| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
6. аж̇аад̇асуд̇д̇аван̣н̣анаа
6. Ajātasuttavaṇṇanā
43. чадтз ад̇т̇и, бхигкавзд̇и гаа уббад̇д̇и? згад̣̇ивасам̣ гира бхаг̇авад̇аа анзгабарияааязна сам̣саарз аад̣̇ийнавам̣ багаасзд̇ваа д̇ад̣̇убасаманаад̣̇ивасзна ниб̣б̣аанабадисам̣яуд̇д̇ааяа д̇хаммад̣̇зсанааяа гад̇ааяа бхигкуунам̣ зд̇ад̣̇ахоси ‘‘аяам̣ сам̣сааро бхаг̇авад̇аа авиж̇ж̇аад̣̇ийхи гааран̣зхи сахзд̇уго вуд̇д̇о, ниб̣б̣аанасса бана д̇ад̣̇убасамасса на гин̃жи гааран̣ам̣ вуд̇д̇ам̣, д̇аяид̣̇ам̣ ахзд̇угам̣ гат̇ам̣ сажжигадтабарамад̇т̇зна убалаб̣бхад̇ий’’д̇и. ат̇а бхаг̇аваа д̇зсам̣ бхигкуунам̣ вимад̇ивид̇хаманад̇т̇ан̃жзва, ‘‘ид̇ха саман̣аб̣раахман̣аанам̣ ‘ниб̣б̣аанам̣ ниб̣б̣аана’нд̇и ваажаавад̇т̇умад̇д̇амзва, над̇т̇и хи барамад̇т̇ад̇о ниб̣б̣аанам̣ наама анубалаб̣бхамаанасабхаавад̇д̇аа’’д̇и логааяад̇игаад̣̇аяо вияа виббадибаннаанам̣ б̣ахид̣̇д̇хаа жа бут̇уд̣̇идтиг̇ад̇игаанам̣ мижчааваад̣̇абхан̃ж̇анад̇т̇ан̃жа, амад̇амахааниб̣б̣аанасса барамад̇т̇ад̇о ад̇т̇ибхаавад̣̇ийбанад̇т̇ам̣ д̇асса жа ниссаран̣абхааваад̣̇иаанубхаававанд̇ад̇аад̣̇ийбанад̇т̇ам̣ бийд̇ивзг̇зна уд̣̇аанавасзна ид̣̇ам̣ суд̇д̇ам̣ абхааси. д̇ат̇аа хи ид̣̇ам̣ суд̇д̇ам̣ уд̣̇аанзби (уд̣̇аа. 72-74) сан̇г̇ийд̇ам̣.
43. Chaṭṭhe atthi, bhikkhaveti kā uppatti? Ekadivasaṃ kira bhagavatā anekapariyāyena saṃsāre ādīnavaṃ pakāsetvā tadupasamanādivasena nibbānapaṭisaṃyuttāya dhammadesanāya katāya bhikkhūnaṃ etadahosi ‘‘ayaṃ saṃsāro bhagavatā avijjādīhi kāraṇehi sahetuko vutto, nibbānassa pana tadupasamassa na kiñci kāraṇaṃ vuttaṃ, tayidaṃ ahetukaṃ kathaṃ saccikaṭṭhaparamatthena upalabbhatī’’ti. Atha bhagavā tesaṃ bhikkhūnaṃ vimatividhamanatthañceva, ‘‘idha samaṇabrāhmaṇānaṃ ‘nibbānaṃ nibbāna’nti vācāvatthumattameva, natthi hi paramatthato nibbānaṃ nāma anupalabbhamānasabhāvattā’’ti lokāyatikādayo viya vippaṭipannānaṃ bahiddhā ca puthudiṭṭhigatikānaṃ micchāvādabhañjanatthañca, amatamahānibbānassa paramatthato atthibhāvadīpanatthaṃ tassa ca nissaraṇabhāvādiānubhāvavantatādīpanatthaṃ pītivegena udānavasena idaṃ suttaṃ abhāsi. Tathā hi idaṃ suttaṃ udānepi (udā. 72-74) saṅgītaṃ.
д̇ад̇т̇а ад̇т̇ийд̇и виж̇ж̇ад̇и барамад̇т̇ад̇о убалаб̣бхад̇и. аж̇аад̇ам̣ абхууд̇ам̣ агад̇ам̣ асан̇кад̇анд̇и саб̣б̣ааниби бад̣̇аани ан̃н̃аман̃н̃авзважанаани. ат̇а ваа взд̣̇анаад̣̇аяо вияа хзд̇убажжаяасамавааяасан̇каад̇ааяа гааран̣асаамаг̇г̇ияаа на ж̇аад̇ам̣ на ниб̣б̣ад̇д̇анд̇и аж̇аад̇ам̣. гааран̣зна винаа саяамзва на бхууд̇ам̣ на баад̇убхууд̇ам̣ на уббаннанд̇и абхууд̇ам̣. звам̣ аж̇аад̇ад̇д̇аа абхууд̇ад̇д̇аа жа язна гзнажи гааран̣зна на гад̇анд̇и агад̇ам̣. ж̇аад̇абхууд̇агад̇асабхааво жа наамаруубаад̣̇ийнам̣ сан̇кад̇ад̇хаммаанам̣ ход̇и, на асан̇кад̇асабхаавасса ниб̣б̣аанассаад̇и д̣̇ассанад̇т̇ам̣ асан̇кад̇анд̇и вуд̇д̇ам̣. бадиломад̇о ваа самзжжа самбхуяяа бажжаязхи гад̇анд̇и сан̇кад̇ам̣, д̇ат̇аа на сан̇кад̇ам̣, сан̇кад̇алагкан̣арахид̇анд̇и жа асан̇кад̇анд̇и звам̣ анзгзхи гааран̣зхи ниб̣б̣ад̇д̇ид̇абхаавз бадисид̣̇д̇хз ‘‘сияаа ну ко згзнзва гааран̣зна гад̇а’’нд̇и аасан̇гааяам̣ ‘‘на гзнажи гад̇а’’нд̇и д̣̇ассанад̇т̇ам̣ ‘‘агад̇а’’нд̇и вуд̇д̇ам̣. звам̣ аббажжаяамби самаанам̣ ‘‘саяамзва ну ко ид̣̇ам̣ бхууд̇ам̣ баад̇убхууд̇а’’нд̇и аасан̇гааяам̣ д̇аннивад̇д̇анад̇т̇ам̣ ‘‘абхууд̇а’’нд̇и вуд̇д̇ам̣. аяан̃жа зд̇асса асан̇кад̇аагад̇аабхууд̇абхааво саб̣б̣зна саб̣б̣ам̣ аж̇аад̇ид̇хаммад̇д̇аад̇и д̣̇ассзд̇ум̣ ‘‘аж̇аад̇а’’нд̇и вуд̇д̇анд̇и. звамзд̇зсам̣ жад̇уннамби бад̣̇аанам̣ саад̇т̇агабхааво взд̣̇ид̇аб̣б̣о.
Tattha atthīti vijjati paramatthato upalabbhati. Ajātaṃ abhūtaṃ akataṃ asaṅkhatanti sabbānipi padāni aññamaññavevacanāni. Atha vā vedanādayo viya hetupaccayasamavāyasaṅkhātāya kāraṇasāmaggiyā na jātaṃ na nibbattanti ajātaṃ. Kāraṇena vinā sayameva na bhūtaṃ na pātubhūtaṃ na uppannanti abhūtaṃ. Evaṃ ajātattā abhūtattā ca yena kenaci kāraṇena na katanti akataṃ. Jātabhūtakatasabhāvo ca nāmarūpādīnaṃ saṅkhatadhammānaṃ hoti, na asaṅkhatasabhāvassa nibbānassāti dassanatthaṃ asaṅkhatanti vuttaṃ. Paṭilomato vā samecca sambhuyya paccayehi katanti saṅkhataṃ, tathā na saṅkhataṃ, saṅkhatalakkhaṇarahitanti ca asaṅkhatanti evaṃ anekehi kāraṇehi nibbattitabhāve paṭisiddhe ‘‘siyā nu kho ekeneva kāraṇena kata’’nti āsaṅkāyaṃ ‘‘na kenaci kata’’nti dassanatthaṃ ‘‘akata’’nti vuttaṃ. Evaṃ appaccayampi samānaṃ ‘‘sayameva nu kho idaṃ bhūtaṃ pātubhūta’’nti āsaṅkāyaṃ tannivattanatthaṃ ‘‘abhūta’’nti vuttaṃ. Ayañca etassa asaṅkhatākatābhūtabhāvo sabbena sabbaṃ ajātidhammattāti dassetuṃ ‘‘ajāta’’nti vuttanti. Evametesaṃ catunnampi padānaṃ sātthakabhāvo veditabbo.
ид̇и бхаг̇аваа ‘‘ад̇т̇и, бхигкавз, аж̇аад̇ам̣ абхууд̇ам̣ агад̇ам̣ асан̇кад̇а’’нд̇и барамад̇т̇ад̇о ниб̣б̣аанасса ад̇т̇ибхаавам̣ вад̇ваа д̇ад̇т̇а хзд̇ум̣ д̣̇ассзнд̇о ‘‘но жзд̇ам̣, бхигкавз’’д̇иаад̣̇имааха. д̇ассааяам̣ сан̇кзбо – бхигкавз, яад̣̇и аж̇аад̇аад̣̇исабхааваа асан̇кад̇аа д̇хаад̇у на абхависса на сияаа, ид̇ха логз ж̇аад̇аад̣̇исабхаавасса руубаад̣̇игканд̇хабан̃жагасан̇каад̇асса сан̇каараг̇ад̇асса ниссаран̣ам̣ анавасзсаваддубасамо на бан̃н̃ааязяяа на убалаб̣бхзяяа на самбхавзяяа. ниб̣б̣аанан̃хи аарамман̣ам̣ гад̇ваа бавад̇д̇амаанаа саммаад̣̇идтиаад̣̇аяо арияамаг̇г̇ад̇хаммаа анавасзсад̇о гилзсз самужчинд̣̇анд̇и, д̇знзд̇т̇а саб̣б̣ассаби ваддад̣̇угкасса аббавад̇д̇и абаг̇амо ниссаран̣ам̣ бан̃н̃ааяад̇и.
Iti bhagavā ‘‘atthi, bhikkhave, ajātaṃ abhūtaṃ akataṃ asaṅkhata’’nti paramatthato nibbānassa atthibhāvaṃ vatvā tattha hetuṃ dassento ‘‘no cetaṃ, bhikkhave’’tiādimāha. Tassāyaṃ saṅkhepo – bhikkhave, yadi ajātādisabhāvā asaṅkhatā dhātu na abhavissa na siyā, idha loke jātādisabhāvassa rūpādikkhandhapañcakasaṅkhātassa saṅkhāragatassa nissaraṇaṃ anavasesavaṭṭupasamo na paññāyeyya na upalabbheyya na sambhaveyya. Nibbānañhi ārammaṇaṃ katvā pavattamānā sammādiṭṭhiādayo ariyamaggadhammā anavasesato kilese samucchindanti, tenettha sabbassapi vaṭṭadukkhassa appavatti apagamo nissaraṇaṃ paññāyati.
звам̣ б̣яад̇ирзгавасзна ниб̣б̣аанасса ад̇т̇ибхаавам̣ д̣̇ассзд̇ваа ид̣̇аани анваяавасзнаби д̇ам̣ д̣̇ассзд̇ум̣ ‘‘яасмаа жа ко’’д̇иаад̣̇и вуд̇д̇ам̣, д̇ам̣ вуд̇д̇ад̇т̇амзва. зд̇т̇а жа яасмаа ‘‘абажжаяаа д̇хаммаа, асан̇кад̇аа д̇хаммаа (д̇ха. са. д̣̇угамаад̇игаа 7, 8). ад̇т̇и, бхигкавз, д̇ад̣̇ааяад̇анам̣, яад̇т̇а нзва бат̇авий (уд̣̇аа. 71). ид̣̇амби ко таанам̣ д̣̇уд̣̇д̣̇асам̣ яад̣̇ид̣̇ам̣ саб̣б̣асан̇каарасамат̇о саб̣б̣уубад̇хибадиниссаг̇г̇о (махаава. 7; ма. ни. 1.281). асан̇кад̇ан̃жа во, бхигкавз, д̇хаммам̣ д̣̇зсзссаами асан̇кад̇аг̇ааминин̃жа бадибад̣̇а’’нд̇иаад̣̇ийхи (сам̣. ни. 4.366) анзгзхи суд̇д̇абад̣̇зхи ‘‘ад̇т̇и, бхигкавз, аж̇аад̇а’’нд̇и иминааби суд̇д̇зна ниб̣б̣аанад̇хаад̇уяаа барамад̇т̇ад̇о саб̣бхааво саб̣б̣алогам̣ анугамбамаанзна саммаасамб̣уд̣̇д̇хзна д̣̇зсид̇о, д̇асмаа на бадигкибид̇аб̣б̣ам̣. д̇ад̇т̇а аббажжагкагаарийнамби вин̃н̃уунам̣ ган̇каа ваа вимад̇и ваа над̇т̇и зва. яз бана аб̣уд̣̇д̇хибуг̇г̇алаа, д̇зсам̣ вимад̇ивинод̣̇анад̇т̇ам̣ аяамзд̇т̇а ад̇хиббааяанид̣̇д̇хааран̣амукзна яуд̇д̇ивижааран̣аа – яат̇аа барин̃н̃зяяад̇ааяа сауд̇д̇араанам̣ гаамаанам̣ руубаанан̃жа бадибагкабхууд̇ам̣ д̇аб̣б̣ид̇хурасабхаавам̣ ниссаран̣ам̣ бан̃н̃ааяад̇и, звам̣ д̇ам̣сабхааваанам̣ саб̣б̣зсам̣ сан̇кад̇ад̇хаммаанам̣ бадибагкабхууд̇зна д̇аб̣б̣ид̇хурасабхаавзна ниссаран̣зна бхавид̇аб̣б̣ам̣. яан̃жзд̇ам̣ ниссаран̣ам̣, саа асан̇кад̇аа д̇хаад̇у. гин̃жа бхияяо, сан̇кад̇ад̇хаммаарамман̣ам̣ вибассанаан̃аан̣ам̣ аби ануломан̃аан̣ам̣ гилзсз самужчзд̣̇авасзна баж̇ахид̇ум̣ на саггод̇и, д̇ат̇аа саммуд̇исажжаарамман̣ам̣ батамаж̇жхаанаад̣̇ийсу н̃аан̣ам̣ вигкамбханавасзнзва гилзсз баж̇ахад̇и, на самужчзд̣̇авасзна. ид̇и сан̇кад̇ад̇хаммаарамман̣асса саммуд̇исажжаарамман̣асса жа н̃аан̣асса гилзсаанам̣ самужчзд̣̇аббахаанз асамад̇т̇абхаавад̇о д̇зсам̣ самужчзд̣̇аббахаанагарасса арияамаг̇г̇ан̃аан̣асса д̇ад̣̇убхаяавибарийд̇асабхаавзна аарамман̣зна бхавид̇аб̣б̣ам̣ , саа асан̇кад̇аа д̇хаад̇у. д̇ат̇аа ‘‘ад̇т̇и, бхигкавз, аж̇аад̇ам̣ абхууд̇ам̣ агад̇ам̣ асан̇кад̇а’’нд̇и ид̣̇ам̣ ниб̣б̣аанасса барамад̇т̇ад̇о ад̇т̇ибхааваж̇од̇агаважанам̣ авибарийд̇ад̇т̇ам̣ бхаг̇авад̇аа бхаасид̇ад̇д̇аа. яан̃хи бхаг̇авад̇аа бхаасид̇ам̣, д̇ам̣ авибарийд̇ад̇т̇ам̣ барамад̇т̇анд̇и яат̇аа д̇ам̣ ‘‘саб̣б̣з сан̇каараа анижжаа, саб̣б̣з сан̇каараа д̣̇угкаа, саб̣б̣з д̇хаммаа анад̇д̇аа’’д̇и (д̇ха. ба. 277-279; жуул̣ани. хзмагамаан̣авабужчаанид̣̇д̣̇зса 56). д̇ат̇аа ниб̣б̣аанасад̣̇д̣̇о гад̇т̇ажи висаяз яат̇аабхууд̇абарамад̇т̇ависаяо убажааравуд̇д̇исаб̣бхаавад̇о сзяяат̇ааби сийхасад̣̇д̣̇о. ат̇а ваа ад̇т̇зва барамад̇т̇ад̇о асан̇кад̇аад̇хаад̇у ид̇арад̇аб̣б̣ибарийд̇авинимуд̇д̇асабхаавад̇д̇аа сзяяат̇ааби бат̇авийд̇хаад̇у взд̣̇анаад̇и. звамаад̣̇ийхи наязхи яуд̇д̇ид̇оби асан̇кад̇ааяа д̇хаад̇уяаа барамад̇т̇ад̇о ад̇т̇ибхааво взд̣̇ид̇аб̣б̣о.
Evaṃ byatirekavasena nibbānassa atthibhāvaṃ dassetvā idāni anvayavasenapi taṃ dassetuṃ ‘‘yasmā ca kho’’tiādi vuttaṃ, taṃ vuttatthameva. Ettha ca yasmā ‘‘apaccayā dhammā, asaṅkhatā dhammā (dha. sa. dukamātikā 7, 8). Atthi, bhikkhave, tadāyatanaṃ, yattha neva pathavī (udā. 71). Idampi kho ṭhānaṃ duddasaṃ yadidaṃ sabbasaṅkhārasamatho sabbūpadhipaṭinissaggo (mahāva. 7; ma. ni. 1.281). Asaṅkhatañca vo, bhikkhave, dhammaṃ desessāmi asaṅkhatagāminiñca paṭipada’’ntiādīhi (saṃ. ni. 4.366) anekehi suttapadehi ‘‘atthi, bhikkhave, ajāta’’nti imināpi suttena nibbānadhātuyā paramatthato sabbhāvo sabbalokaṃ anukampamānena sammāsambuddhena desito, tasmā na paṭikkhipitabbaṃ. Tattha appaccakkhakārīnampi viññūnaṃ kaṅkhā vā vimati vā natthi eva. Ye pana abuddhipuggalā, tesaṃ vimativinodanatthaṃ ayamettha adhippāyaniddhāraṇamukhena yuttivicāraṇā – yathā pariññeyyatāya sauttarānaṃ kāmānaṃ rūpānañca paṭipakkhabhūtaṃ tabbidhurasabhāvaṃ nissaraṇaṃ paññāyati, evaṃ taṃsabhāvānaṃ sabbesaṃ saṅkhatadhammānaṃ paṭipakkhabhūtena tabbidhurasabhāvena nissaraṇena bhavitabbaṃ. Yañcetaṃ nissaraṇaṃ, sā asaṅkhatā dhātu. Kiñca bhiyyo, saṅkhatadhammārammaṇaṃ vipassanāñāṇaṃ api anulomañāṇaṃ kilese samucchedavasena pajahituṃ na sakkoti, tathā sammutisaccārammaṇaṃ paṭhamajjhānādīsu ñāṇaṃ vikkhambhanavaseneva kilese pajahati, na samucchedavasena. Iti saṅkhatadhammārammaṇassa sammutisaccārammaṇassa ca ñāṇassa kilesānaṃ samucchedappahāne asamatthabhāvato tesaṃ samucchedappahānakarassa ariyamaggañāṇassa tadubhayaviparītasabhāvena ārammaṇena bhavitabbaṃ , sā asaṅkhatā dhātu. Tathā ‘‘atthi, bhikkhave, ajātaṃ abhūtaṃ akataṃ asaṅkhata’’nti idaṃ nibbānassa paramatthato atthibhāvajotakavacanaṃ aviparītatthaṃ bhagavatā bhāsitattā. Yañhi bhagavatā bhāsitaṃ, taṃ aviparītatthaṃ paramatthanti yathā taṃ ‘‘sabbe saṅkhārā aniccā, sabbe saṅkhārā dukkhā, sabbe dhammā anattā’’ti (dha. pa. 277-279; cūḷani. hemakamāṇavapucchāniddesa 56). Tathā nibbānasaddo katthaci visaye yathābhūtaparamatthavisayo upacāravuttisabbhāvato seyyathāpi sīhasaddo. Atha vā attheva paramatthato asaṅkhatādhātu itaratabbiparītavinimuttasabhāvattā seyyathāpi pathavīdhātu vedanāti. Evamādīhi nayehi yuttitopi asaṅkhatāya dhātuyā paramatthato atthibhāvo veditabbo.
г̇аат̇аасу ж̇аад̇анд̇и ж̇ааяанадтзна ж̇аад̇ам̣, ж̇аад̇илагкан̣аббад̇д̇анд̇и ад̇т̇о. бхууд̇анд̇и бхаванадтзна бхууд̇ам̣, ахуд̇ваа самбхууд̇анд̇и ад̇т̇о. самуббаннанд̇и сахид̇абхаавзна уббаннам̣, сахид̇зхи д̇хаммзхи жа уббаннанд̇и ад̇т̇о. гад̇анд̇и гааран̣абхууд̇зхи бажжаязхи ниб̣б̣ад̇д̇ид̇ам̣. сан̇кад̇анд̇и д̇зхиязва самзжжа самбхуяяа гад̇анд̇и сан̇кад̇ам̣, саб̣б̣амзд̇ам̣ бажжаяаниб̣б̣ад̇д̇асса ад̇хиважанам̣. нижжасаараад̣̇ивирахид̇ад̇о ад̣̇д̇хувам̣. ж̇арааяа маран̣зна жа зганд̇знзва сан̇гхадид̇ам̣ сам̣садтанд̇и ж̇араамаран̣асан̇гхаад̇ам̣. ‘‘ж̇араамаран̣асан̇гхадда’’нд̇иби батанд̇и, ж̇арааяа маран̣зна жа убад̣̇д̣̇уд̇ам̣ бийл̣ид̇анд̇и ад̇т̇о. агкирог̇аад̣̇ийнам̣ анзгзсам̣ рог̇аанам̣ нийл̣ам̣ гулааваганд̇и рог̇анийл̣ам̣. сарасад̇о убаггамад̇о жа бабхан̇г̇убарамасийлад̇ааяа бабхан̇г̇урам̣.
Gāthāsu jātanti jāyanaṭṭhena jātaṃ, jātilakkhaṇappattanti attho. Bhūtanti bhavanaṭṭhena bhūtaṃ, ahutvā sambhūtanti attho. Samuppannanti sahitabhāvena uppannaṃ, sahitehi dhammehi ca uppannanti attho. Katanti kāraṇabhūtehi paccayehi nibbattitaṃ. Saṅkhatanti tehiyeva samecca sambhuyya katanti saṅkhataṃ, sabbametaṃ paccayanibbattassa adhivacanaṃ. Niccasārādivirahitato addhuvaṃ. Jarāya maraṇena ca ekanteneva saṅghaṭitaṃ saṃsaṭṭhanti jarāmaraṇasaṅghātaṃ. ‘‘Jarāmaraṇasaṅghaṭṭa’’ntipi paṭhanti, jarāya maraṇena ca upaddutaṃ pīḷitanti attho. Akkhirogādīnaṃ anekesaṃ rogānaṃ nīḷaṃ kulāvakanti roganīḷaṃ. Sarasato upakkamato ca pabhaṅguparamasīlatāya pabhaṅguraṃ.
жад̇уб̣б̣ид̇хо аахааро жа д̇ан̣хаасан̇каад̇аа нзд̇д̇и жа бабхаво самудтаанам̣ зд̇ассаад̇и аахааранзд̇д̇иббабхавам̣. саб̣б̣оби ваа бажжаяо аахааро. ид̇ха бана д̇ан̣хааяа нзд̇д̇иг̇г̇ахан̣зна г̇ахид̇ад̇д̇аа д̇ан̣хааваж̇ж̇аа взд̣̇ид̇аб̣б̣аа. д̇асмаа аахааро жа нзд̇д̇и жа бабхаво зд̇ассаад̇и аахааранзд̇д̇иббабхавам̣. аахааро зва ваа наяанадтзна бавад̇д̇анадтзна нзд̇д̇ийд̇и звамби аахааранзд̇д̇иббабхавам̣. наалам̣ д̇ад̣̇абхинанд̣̇ид̇унд̇и д̇ам̣ убаад̣̇аанагканд̇хабан̃жагам̣ звам̣ бажжаяаад̇хийнавуд̇д̇игам̣, д̇ад̇о зва анижжам̣, д̣̇угкан̃жа д̇ан̣хаад̣̇идтийхи абхинанд̣̇ид̇ум̣ ассаад̣̇зд̇ум̣ на яуд̇д̇ам̣.
Catubbidho āhāro ca taṇhāsaṅkhātā netti ca pabhavo samuṭṭhānaṃ etassāti āhāranettippabhavaṃ. Sabbopi vā paccayo āhāro. Idha pana taṇhāya nettiggahaṇena gahitattā taṇhāvajjā veditabbā. Tasmā āhāro ca netti ca pabhavo etassāti āhāranettippabhavaṃ. Āhāro eva vā nayanaṭṭhena pavattanaṭṭhena nettīti evampi āhāranettippabhavaṃ. Nālaṃ tadabhinanditunti taṃ upādānakkhandhapañcakaṃ evaṃ paccayādhīnavuttikaṃ, tato eva aniccaṃ, dukkhañca taṇhādiṭṭhīhi abhinandituṃ assādetuṃ na yuttaṃ.
д̇асса ниссаран̣анд̇и ‘‘ж̇аад̇ам̣ бхууд̇а’’нд̇иаад̣̇инаа вуд̇д̇асса д̇асса саггааяасса ниссаран̣ам̣ ниггамо анубасанд̇асабхаавасса рааг̇аад̣̇игилзсасса саб̣б̣асан̇каарасса жа абхаавзна д̇ад̣̇убасамабхаавзна басад̇т̇абхаавзна жа санд̇ам̣, д̇агган̃аан̣асса аг̇ожарабхаавад̇о ад̇аггааважарам̣, нижжадтзна д̇хувам̣, д̇ад̇о зва аж̇аад̇ам̣ асамуббаннам̣, согахзд̇уунам̣ абхаавад̇о асогам̣, виг̇ад̇арааг̇аад̣̇ираж̇ад̇д̇аа вираж̇ам̣, сам̣саарад̣̇угкаддид̇зхи бадибаж̇ж̇ид̇аб̣б̣ад̇д̇аа бад̣̇ам̣, ж̇аад̇иаад̣̇ид̣̇угкад̇хаммаанам̣ нирод̇хахзд̇уд̇ааяа нирод̇хо д̣̇угкад̇хаммаанам̣, саб̣б̣асан̇каараанам̣ убасамахзд̇уд̇ааяа сан̇кааруубасамо, д̇ад̇о зва ажжанд̇асукад̇ааяа сукод̇и саб̣б̣абад̣̇зхи амад̇амахааниб̣б̣аанамзва т̇омзд̇и. звам̣ бхаг̇аваа батамаг̇аат̇ааяа б̣яад̇ирзгавасзна, д̣̇уд̇ияаг̇аат̇ааяа анваяавасзна жа ниб̣б̣аанам̣ вибхаавзси.
Tassanissaraṇanti ‘‘jātaṃ bhūta’’ntiādinā vuttassa tassa sakkāyassa nissaraṇaṃ nikkamo anupasantasabhāvassa rāgādikilesassa sabbasaṅkhārassa ca abhāvena tadupasamabhāvena pasatthabhāvena ca santaṃ, takkañāṇassa agocarabhāvato atakkāvacaraṃ, niccaṭṭhena dhuvaṃ, tato eva ajātaṃ asamuppannaṃ, sokahetūnaṃ abhāvato asokaṃ, vigatarāgādirajattā virajaṃ, saṃsāradukkhaṭṭitehi paṭipajjitabbattā padaṃ, jātiādidukkhadhammānaṃ nirodhahetutāya nirodho dukkhadhammānaṃ, sabbasaṅkhārānaṃ upasamahetutāya saṅkhārūpasamo, tato eva accantasukhatāya sukhoti sabbapadehi amatamahānibbānameva thometi. Evaṃ bhagavā paṭhamagāthāya byatirekavasena, dutiyagāthāya anvayavasena ca nibbānaṃ vibhāvesi.
чадтасуд̇д̇аван̣н̣анаа нидтид̇аа.
Chaṭṭhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 6. аж̇аад̇асуд̇д̇ам̣ • 6. Ajātasuttaṃ
