| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā |
༦. ཨཛཱཏསུཏྟཝཎྞནཱ
6. Ajātasuttavaṇṇanā
༤༣. ཚཊྛེ ཨཏྠི, བྷིཀྑཝེཏི ཀཱ ཨུཔྤཏྟི? ཨེཀདིཝསཾ ཀིར བྷགཝཏཱ ཨནེཀཔརིཡཱཡེན སཾསཱརེ ཨཱདཱིནཝཾ པཀཱསེཏྭཱ ཏདུཔསམནཱདིཝསེན ནིབྦཱནཔཊིསཾཡུཏྟཱཡ དྷམྨདེསནཱཡ ཀཏཱཡ བྷིཀྑཱུནཾ ཨེཏདཧོསི ‘‘ཨཡཾ སཾསཱརོ བྷགཝཏཱ ཨཝིཛྫཱདཱིཧི ཀཱརཎེཧི སཧེཏུཀོ ཝུཏྟོ, ནིབྦཱནསྶ པན ཏདུཔསམསྶ ན ཀིཉྩི ཀཱརཎཾ ཝུཏྟཾ, ཏཡིདཾ ཨཧེཏུཀཾ ཀཐཾ སཙྩིཀཊྛཔརམཏྠེན ཨུཔལབྦྷཏཱི’’ཏི། ཨཐ བྷགཝཱ ཏེསཾ བྷིཀྑཱུནཾ ཝིམཏིཝིདྷམནཏྠཉྩེཝ, ‘‘ཨིདྷ སམཎབྲཱཧྨཎཱནཾ ‘ནིབྦཱནཾ ནིབྦཱན’ནྟི ཝཱཙཱཝཏྠུམཏྟམེཝ, ནཏྠི ཧི པརམཏྠཏོ ནིབྦཱནཾ ནཱམ ཨནུཔལབྦྷམཱནསབྷཱཝཏྟཱ’’ཏི ལོཀཱཡཏིཀཱདཡོ ཝིཡ ཝིཔྤཊིཔནྣཱནཾ བཧིདྡྷཱ ཙ པུཐུདིཊྛིགཏིཀཱནཾ མིཙྪཱཝཱདབྷཉྫནཏྠཉྩ, ཨམཏམཧཱནིབྦཱནསྶ པརམཏྠཏོ ཨཏྠིབྷཱཝདཱིཔནཏྠཾ ཏསྶ ཙ ནིསྶརཎབྷཱཝཱདིཨཱནུབྷཱཝཝནྟཏཱདཱིཔནཏྠཾ པཱིཏིཝེགེན ཨུདཱནཝསེན ཨིདཾ སུཏྟཾ ཨབྷཱསི། ཏཐཱ ཧི ཨིདཾ སུཏྟཾ ཨུདཱནེཔི (ཨུདཱ॰ ༧༢-༧༤) སངྒཱིཏཾ།
43. Chaṭṭhe atthi, bhikkhaveti kā uppatti? Ekadivasaṃ kira bhagavatā anekapariyāyena saṃsāre ādīnavaṃ pakāsetvā tadupasamanādivasena nibbānapaṭisaṃyuttāya dhammadesanāya katāya bhikkhūnaṃ etadahosi ‘‘ayaṃ saṃsāro bhagavatā avijjādīhi kāraṇehi sahetuko vutto, nibbānassa pana tadupasamassa na kiñci kāraṇaṃ vuttaṃ, tayidaṃ ahetukaṃ kathaṃ saccikaṭṭhaparamatthena upalabbhatī’’ti. Atha bhagavā tesaṃ bhikkhūnaṃ vimatividhamanatthañceva, ‘‘idha samaṇabrāhmaṇānaṃ ‘nibbānaṃ nibbāna’nti vācāvatthumattameva, natthi hi paramatthato nibbānaṃ nāma anupalabbhamānasabhāvattā’’ti lokāyatikādayo viya vippaṭipannānaṃ bahiddhā ca puthudiṭṭhigatikānaṃ micchāvādabhañjanatthañca, amatamahānibbānassa paramatthato atthibhāvadīpanatthaṃ tassa ca nissaraṇabhāvādiānubhāvavantatādīpanatthaṃ pītivegena udānavasena idaṃ suttaṃ abhāsi. Tathā hi idaṃ suttaṃ udānepi (udā. 72-74) saṅgītaṃ.
ཏཏྠ ཨཏྠཱིཏི ཝིཛྫཏི པརམཏྠཏོ ཨུཔལབྦྷཏི། ཨཛཱཏཾ ཨབྷཱུཏཾ ཨཀཏཾ ཨསངྑཏནྟི སབྦཱནིཔི པདཱནི ཨཉྙམཉྙཝེཝཙནཱནི། ཨཐ ཝཱ ཝེདནཱདཡོ ཝིཡ ཧེཏུཔཙྩཡསམཝཱཡསངྑཱཏཱཡ ཀཱརཎསཱམགྒིཡཱ ན ཛཱཏཾ ན ནིབྦཏྟནྟི ཨཛཱཏཾ། ཀཱརཎེན ཝིནཱ སཡམེཝ ན བྷཱུཏཾ ན པཱཏུབྷཱུཏཾ ན ཨུཔྤནྣནྟི ཨབྷཱུཏཾ། ཨེཝཾ ཨཛཱཏཏྟཱ ཨབྷཱུཏཏྟཱ ཙ ཡེན ཀེནཙི ཀཱརཎེན ན ཀཏནྟི ཨཀཏཾ། ཛཱཏབྷཱུཏཀཏསབྷཱཝོ ཙ ནཱམརཱུཔཱདཱིནཾ སངྑཏདྷམྨཱནཾ ཧོཏི, ན ཨསངྑཏསབྷཱཝསྶ ནིབྦཱནསྶཱཏི དསྶནཏྠཾ ཨསངྑཏནྟི ཝུཏྟཾ། པཊིལོམཏོ ཝཱ སམེཙྩ སམྦྷུཡྻ པཙྩཡེཧི ཀཏནྟི སངྑཏཾ, ཏཐཱ ན སངྑཏཾ, སངྑཏལཀྑཎརཧིཏནྟི ཙ ཨསངྑཏནྟི ཨེཝཾ ཨནེཀེཧི ཀཱརཎེཧི ནིབྦཏྟིཏབྷཱཝེ པཊིསིདྡྷེ ‘‘སིཡཱ ནུ ཁོ ཨེཀེནེཝ ཀཱརཎེན ཀཏ’’ནྟི ཨཱསངྐཱཡཾ ‘‘ན ཀེནཙི ཀཏ’’ནྟི དསྶནཏྠཾ ‘‘ཨཀཏ’’ནྟི ཝུཏྟཾ། ཨེཝཾ ཨཔྤཙྩཡམྤི སམཱནཾ ‘‘སཡམེཝ ནུ ཁོ ཨིདཾ བྷཱུཏཾ པཱཏུབྷཱུཏ’’ནྟི ཨཱསངྐཱཡཾ ཏནྣིཝཏྟནཏྠཾ ‘‘ཨབྷཱུཏ’’ནྟི ཝུཏྟཾ། ཨཡཉྩ ཨེཏསྶ ཨསངྑཏཱཀཏཱབྷཱུཏབྷཱཝོ སབྦེན སབྦཾ ཨཛཱཏིདྷམྨཏྟཱཏི དསྶེཏུཾ ‘‘ཨཛཱཏ’’ནྟི ཝུཏྟནྟི། ཨེཝམེཏེསཾ ཙཏུནྣམྤི པདཱནཾ སཱཏྠཀབྷཱཝོ ཝེདིཏབྦོ།
Tattha atthīti vijjati paramatthato upalabbhati. Ajātaṃ abhūtaṃ akataṃ asaṅkhatanti sabbānipi padāni aññamaññavevacanāni. Atha vā vedanādayo viya hetupaccayasamavāyasaṅkhātāya kāraṇasāmaggiyā na jātaṃ na nibbattanti ajātaṃ. Kāraṇena vinā sayameva na bhūtaṃ na pātubhūtaṃ na uppannanti abhūtaṃ. Evaṃ ajātattā abhūtattā ca yena kenaci kāraṇena na katanti akataṃ. Jātabhūtakatasabhāvo ca nāmarūpādīnaṃ saṅkhatadhammānaṃ hoti, na asaṅkhatasabhāvassa nibbānassāti dassanatthaṃ asaṅkhatanti vuttaṃ. Paṭilomato vā samecca sambhuyya paccayehi katanti saṅkhataṃ, tathā na saṅkhataṃ, saṅkhatalakkhaṇarahitanti ca asaṅkhatanti evaṃ anekehi kāraṇehi nibbattitabhāve paṭisiddhe ‘‘siyā nu kho ekeneva kāraṇena kata’’nti āsaṅkāyaṃ ‘‘na kenaci kata’’nti dassanatthaṃ ‘‘akata’’nti vuttaṃ. Evaṃ appaccayampi samānaṃ ‘‘sayameva nu kho idaṃ bhūtaṃ pātubhūta’’nti āsaṅkāyaṃ tannivattanatthaṃ ‘‘abhūta’’nti vuttaṃ. Ayañca etassa asaṅkhatākatābhūtabhāvo sabbena sabbaṃ ajātidhammattāti dassetuṃ ‘‘ajāta’’nti vuttanti. Evametesaṃ catunnampi padānaṃ sātthakabhāvo veditabbo.
ཨིཏི བྷགཝཱ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏ’’ནྟི པརམཏྠཏོ ནིབྦཱནསྶ ཨཏྠིབྷཱཝཾ ཝཏྭཱ ཏཏྠ ཧེཏུཾ དསྶེནྟོ ‘‘ནོ ཙེཏཾ, བྷིཀྑཝེ’’ཏིཨཱདིམཱཧ། ཏསྶཱཡཾ སངྑེཔོ – བྷིཀྑཝེ, ཡདི ཨཛཱཏཱདིསབྷཱཝཱ ཨསངྑཏཱ དྷཱཏུ ན ཨབྷཝིསྶ ན སིཡཱ, ཨིདྷ ལོཀེ ཛཱཏཱདིསབྷཱཝསྶ རཱུཔཱདིཀྑནྡྷཔཉྩཀསངྑཱཏསྶ སངྑཱརགཏསྶ ནིསྶརཎཾ ཨནཝསེསཝཊྚུཔསམོ ན པཉྙཱཡེཡྻ ན ཨུཔལབྦྷེཡྻ ན སམྦྷཝེཡྻ། ནིབྦཱནཉྷི ཨཱརམྨཎཾ ཀཏྭཱ པཝཏྟམཱནཱ སམྨཱདིཊྛིཨཱདཡོ ཨརིཡམགྒདྷམྨཱ ཨནཝསེསཏོ ཀིལེསེ སམུཙྪིནྡནྟི, ཏེནེཏྠ སབྦསྶཔི ཝཊྚདུཀྑསྶ ཨཔྤཝཏྟི ཨཔགམོ ནིསྶརཎཾ པཉྙཱཡཏི།
Iti bhagavā ‘‘atthi, bhikkhave, ajātaṃ abhūtaṃ akataṃ asaṅkhata’’nti paramatthato nibbānassa atthibhāvaṃ vatvā tattha hetuṃ dassento ‘‘no cetaṃ, bhikkhave’’tiādimāha. Tassāyaṃ saṅkhepo – bhikkhave, yadi ajātādisabhāvā asaṅkhatā dhātu na abhavissa na siyā, idha loke jātādisabhāvassa rūpādikkhandhapañcakasaṅkhātassa saṅkhāragatassa nissaraṇaṃ anavasesavaṭṭupasamo na paññāyeyya na upalabbheyya na sambhaveyya. Nibbānañhi ārammaṇaṃ katvā pavattamānā sammādiṭṭhiādayo ariyamaggadhammā anavasesato kilese samucchindanti, tenettha sabbassapi vaṭṭadukkhassa appavatti apagamo nissaraṇaṃ paññāyati.
ཨེཝཾ བྱཏིརེཀཝསེན ནིབྦཱནསྶ ཨཏྠིབྷཱཝཾ དསྶེཏྭཱ ཨིདཱནི ཨནྭཡཝསེནཔི ཏཾ དསྶེཏུཾ ‘‘ཡསྨཱ ཙ ཁོ’’ཏིཨཱདི ཝུཏྟཾ, ཏཾ ཝུཏྟཏྠམེཝ། ཨེཏྠ ཙ ཡསྨཱ ‘‘ཨཔཙྩཡཱ དྷམྨཱ, ཨསངྑཏཱ དྷམྨཱ (དྷ॰ ས॰ དུཀམཱཏིཀཱ ༧, ༨)། ཨཏྠི, བྷིཀྑཝེ, ཏདཱཡཏནཾ, ཡཏྠ ནེཝ པཐཝཱི (ཨུདཱ॰ ༧༡)། ཨིདམྤི ཁོ ཋཱནཾ དུདྡསཾ ཡདིདཾ སབྦསངྑཱརསམཐོ སབྦཱུཔདྷིཔཊིནིསྶགྒོ (མཧཱཝ॰ ༧; མ॰ ནི॰ ༡.༢༨༡)། ཨསངྑཏཉྩ ཝོ, བྷིཀྑཝེ, དྷམྨཾ དེསེསྶཱམི ཨསངྑཏགཱམིནིཉྩ པཊིཔད’’ནྟིཨཱདཱིཧི (སཾ॰ ནི॰ ༤.༣༦༦) ཨནེཀེཧི སུཏྟཔདེཧི ‘‘ཨཏྠི, བྷིཀྑཝེ, ཨཛཱཏ’’ནྟི ཨིམིནཱཔི སུཏྟེན ནིབྦཱནདྷཱཏུཡཱ པརམཏྠཏོ སབྦྷཱཝོ སབྦལོཀཾ ཨནུཀམྤམཱནེན སམྨཱསམྦུདྡྷེན དེསིཏོ, ཏསྨཱ ན པཊིཀྑིཔིཏབྦཾ། ཏཏྠ ཨཔྤཙྩཀྑཀཱརཱིནམྤི ཝིཉྙཱུནཾ ཀངྑཱ ཝཱ ཝིམཏི ཝཱ ནཏྠི ཨེཝ། ཡེ པན ཨབུདྡྷིཔུགྒལཱ, ཏེསཾ ཝིམཏིཝིནོདནཏྠཾ ཨཡམེཏྠ ཨདྷིཔྤཱཡནིདྡྷཱརཎམུཁེན ཡུཏྟིཝིཙཱརཎཱ – ཡཐཱ པརིཉྙེཡྻཏཱཡ སཨུཏྟརཱནཾ ཀཱམཱནཾ རཱུཔཱནཉྩ པཊིཔཀྑབྷཱུཏཾ ཏབྦིདྷུརསབྷཱཝཾ ནིསྶརཎཾ པཉྙཱཡཏི, ཨེཝཾ ཏཾསབྷཱཝཱནཾ སབྦེསཾ སངྑཏདྷམྨཱནཾ པཊིཔཀྑབྷཱུཏེན ཏབྦིདྷུརསབྷཱཝེན ནིསྶརཎེན བྷཝིཏབྦཾ། ཡཉྩེཏཾ ནིསྶརཎཾ, སཱ ཨསངྑཏཱ དྷཱཏུ། ཀིཉྩ བྷིཡྻོ, སངྑཏདྷམྨཱརམྨཎཾ ཝིཔསྶནཱཉཱཎཾ ཨཔི ཨནུལོམཉཱཎཾ ཀིལེསེ སམུཙྪེདཝསེན པཛཧིཏུཾ ན སཀྐོཏི, ཏཐཱ སམྨུཏིསཙྩཱརམྨཎཾ པཋམཛ྄ཛྷཱནཱདཱིསུ ཉཱཎཾ ཝིཀྑམྦྷནཝསེནེཝ ཀིལེསེ པཛཧཏི, ན སམུཙྪེདཝསེན། ཨིཏི སངྑཏདྷམྨཱརམྨཎསྶ སམྨུཏིསཙྩཱརམྨཎསྶ ཙ ཉཱཎསྶ ཀིལེསཱནཾ སམུཙྪེདཔྤཧཱནེ ཨསམཏྠབྷཱཝཏོ ཏེསཾ སམུཙྪེདཔྤཧཱནཀརསྶ ཨརིཡམགྒཉཱཎསྶ ཏདུབྷཡཝིཔརཱིཏསབྷཱཝེན ཨཱརམྨཎེན བྷཝིཏབྦཾ , སཱ ཨསངྑཏཱ དྷཱཏུ། ཏཐཱ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏ’’ནྟི ཨིདཾ ནིབྦཱནསྶ པརམཏྠཏོ ཨཏྠིབྷཱཝཛོཏཀཝཙནཾ ཨཝིཔརཱིཏཏྠཾ བྷགཝཏཱ བྷཱསིཏཏྟཱ། ཡཉྷི བྷགཝཏཱ བྷཱསིཏཾ, ཏཾ ཨཝིཔརཱིཏཏྠཾ པརམཏྠནྟི ཡཐཱ ཏཾ ‘‘སབྦེ སངྑཱརཱ ཨནིཙྩཱ, སབྦེ སངྑཱརཱ དུཀྑཱ, སབྦེ དྷམྨཱ ཨནཏྟཱ’’ཏི (དྷ॰ པ॰ ༢༧༧-༢༧༩; ཙཱུལ༹ནི॰ ཧེམཀམཱཎཝཔུཙྪཱནིདྡེས ༥༦)། ཏཐཱ ནིབྦཱནསདྡོ ཀཏྠཙི ཝིསཡེ ཡཐཱབྷཱུཏཔརམཏྠཝིསཡོ ཨུཔཙཱརཝུཏྟིསབྦྷཱཝཏོ སེཡྻཐཱཔི སཱིཧསདྡོ། ཨཐ ཝཱ ཨཏྠེཝ པརམཏྠཏོ ཨསངྑཏཱདྷཱཏུ ཨིཏརཏབྦིཔརཱིཏཝིནིམུཏྟསབྷཱཝཏྟཱ སེཡྻཐཱཔི པཐཝཱིདྷཱཏུ ཝེདནཱཏི། ཨེཝམཱདཱིཧི ནཡེཧི ཡུཏྟིཏོཔི ཨསངྑཏཱཡ དྷཱཏུཡཱ པརམཏྠཏོ ཨཏྠིབྷཱཝོ ཝེདིཏབྦོ།
Evaṃ byatirekavasena nibbānassa atthibhāvaṃ dassetvā idāni anvayavasenapi taṃ dassetuṃ ‘‘yasmā ca kho’’tiādi vuttaṃ, taṃ vuttatthameva. Ettha ca yasmā ‘‘apaccayā dhammā, asaṅkhatā dhammā (dha. sa. dukamātikā 7, 8). Atthi, bhikkhave, tadāyatanaṃ, yattha neva pathavī (udā. 71). Idampi kho ṭhānaṃ duddasaṃ yadidaṃ sabbasaṅkhārasamatho sabbūpadhipaṭinissaggo (mahāva. 7; ma. ni. 1.281). Asaṅkhatañca vo, bhikkhave, dhammaṃ desessāmi asaṅkhatagāminiñca paṭipada’’ntiādīhi (saṃ. ni. 4.366) anekehi suttapadehi ‘‘atthi, bhikkhave, ajāta’’nti imināpi suttena nibbānadhātuyā paramatthato sabbhāvo sabbalokaṃ anukampamānena sammāsambuddhena desito, tasmā na paṭikkhipitabbaṃ. Tattha appaccakkhakārīnampi viññūnaṃ kaṅkhā vā vimati vā natthi eva. Ye pana abuddhipuggalā, tesaṃ vimativinodanatthaṃ ayamettha adhippāyaniddhāraṇamukhena yuttivicāraṇā – yathā pariññeyyatāya sauttarānaṃ kāmānaṃ rūpānañca paṭipakkhabhūtaṃ tabbidhurasabhāvaṃ nissaraṇaṃ paññāyati, evaṃ taṃsabhāvānaṃ sabbesaṃ saṅkhatadhammānaṃ paṭipakkhabhūtena tabbidhurasabhāvena nissaraṇena bhavitabbaṃ. Yañcetaṃ nissaraṇaṃ, sā asaṅkhatā dhātu. Kiñca bhiyyo, saṅkhatadhammārammaṇaṃ vipassanāñāṇaṃ api anulomañāṇaṃ kilese samucchedavasena pajahituṃ na sakkoti, tathā sammutisaccārammaṇaṃ paṭhamajjhānādīsu ñāṇaṃ vikkhambhanavaseneva kilese pajahati, na samucchedavasena. Iti saṅkhatadhammārammaṇassa sammutisaccārammaṇassa ca ñāṇassa kilesānaṃ samucchedappahāne asamatthabhāvato tesaṃ samucchedappahānakarassa ariyamaggañāṇassa tadubhayaviparītasabhāvena ārammaṇena bhavitabbaṃ , sā asaṅkhatā dhātu. Tathā ‘‘atthi, bhikkhave, ajātaṃ abhūtaṃ akataṃ asaṅkhata’’nti idaṃ nibbānassa paramatthato atthibhāvajotakavacanaṃ aviparītatthaṃ bhagavatā bhāsitattā. Yañhi bhagavatā bhāsitaṃ, taṃ aviparītatthaṃ paramatthanti yathā taṃ ‘‘sabbe saṅkhārā aniccā, sabbe saṅkhārā dukkhā, sabbe dhammā anattā’’ti (dha. pa. 277-279; cūḷani. hemakamāṇavapucchāniddesa 56). Tathā nibbānasaddo katthaci visaye yathābhūtaparamatthavisayo upacāravuttisabbhāvato seyyathāpi sīhasaddo. Atha vā attheva paramatthato asaṅkhatādhātu itaratabbiparītavinimuttasabhāvattā seyyathāpi pathavīdhātu vedanāti. Evamādīhi nayehi yuttitopi asaṅkhatāya dhātuyā paramatthato atthibhāvo veditabbo.
གཱཐཱསུ ཛཱཏནྟི ཛཱཡནཊྛེན ཛཱཏཾ, ཛཱཏིལཀྑཎཔྤཏྟནྟི ཨཏྠོ། བྷཱུཏནྟི བྷཝནཊྛེན བྷཱུཏཾ, ཨཧུཏྭཱ སམྦྷཱུཏནྟི ཨཏྠོ། སམུཔྤནྣནྟི སཧིཏབྷཱཝེན ཨུཔྤནྣཾ, སཧིཏེཧི དྷམྨེཧི ཙ ཨུཔྤནྣནྟི ཨཏྠོ། ཀཏནྟི ཀཱརཎབྷཱུཏེཧི པཙྩཡེཧི ནིབྦཏྟིཏཾ། སངྑཏནྟི ཏེཧིཡེཝ སམེཙྩ སམྦྷུཡྻ ཀཏནྟི སངྑཏཾ, སབྦམེཏཾ པཙྩཡནིབྦཏྟསྶ ཨདྷིཝཙནཾ། ནིཙྩསཱརཱདིཝིརཧིཏཏོ ཨདྡྷུཝཾ། ཛརཱཡ མརཎེན ཙ ཨེཀནྟེནེཝ སངྒྷཊིཏཾ སཾསཊྛནྟི ཛརཱམརཎསངྒྷཱཏཾ། ‘‘ཛརཱམརཎསངྒྷཊྚ’’ནྟིཔི པཋནྟི, ཛརཱཡ མརཎེན ཙ ཨུཔདྡུཏཾ པཱིལི༹ཏནྟི ཨཏྠོ། ཨཀྑིརོགཱདཱིནཾ ཨནེཀེསཾ རོགཱནཾ ནཱིལ༹ཾ ཀུལཱཝཀནྟི རོགནཱིལ༹ཾ། སརསཏོ ཨུཔཀྐམཏོ ཙ པབྷངྒུཔརམསཱིལཏཱཡ པབྷངྒུརཾ།
Gāthāsu jātanti jāyanaṭṭhena jātaṃ, jātilakkhaṇappattanti attho. Bhūtanti bhavanaṭṭhena bhūtaṃ, ahutvā sambhūtanti attho. Samuppannanti sahitabhāvena uppannaṃ, sahitehi dhammehi ca uppannanti attho. Katanti kāraṇabhūtehi paccayehi nibbattitaṃ. Saṅkhatanti tehiyeva samecca sambhuyya katanti saṅkhataṃ, sabbametaṃ paccayanibbattassa adhivacanaṃ. Niccasārādivirahitato addhuvaṃ. Jarāya maraṇena ca ekanteneva saṅghaṭitaṃ saṃsaṭṭhanti jarāmaraṇasaṅghātaṃ. ‘‘Jarāmaraṇasaṅghaṭṭa’’ntipi paṭhanti, jarāya maraṇena ca upaddutaṃ pīḷitanti attho. Akkhirogādīnaṃ anekesaṃ rogānaṃ nīḷaṃ kulāvakanti roganīḷaṃ. Sarasato upakkamato ca pabhaṅguparamasīlatāya pabhaṅguraṃ.
ཙཏུབྦིདྷོ ཨཱཧཱརོ ཙ ཏཎྷཱསངྑཱཏཱ ནེཏྟི ཙ པབྷཝོ སམུཊྛཱནཾ ཨེཏསྶཱཏི ཨཱཧཱརནེཏྟིཔྤབྷཝཾ། སབྦོཔི ཝཱ པཙྩཡོ ཨཱཧཱརོ། ཨིདྷ པན ཏཎྷཱཡ ནེཏྟིགྒཧཎེན གཧིཏཏྟཱ ཏཎྷཱཝཛྫཱ ཝེདིཏབྦཱ། ཏསྨཱ ཨཱཧཱརོ ཙ ནེཏྟི ཙ པབྷཝོ ཨེཏསྶཱཏི ཨཱཧཱརནེཏྟིཔྤབྷཝཾ། ཨཱཧཱརོ ཨེཝ ཝཱ ནཡནཊྛེན པཝཏྟནཊྛེན ནེཏྟཱིཏི ཨེཝམྤི ཨཱཧཱརནེཏྟིཔྤབྷཝཾ། ནཱལཾ ཏདབྷིནནྡིཏུནྟི ཏཾ ཨུཔཱདཱནཀྑནྡྷཔཉྩཀཾ ཨེཝཾ པཙྩཡཱདྷཱིནཝུཏྟིཀཾ, ཏཏོ ཨེཝ ཨནིཙྩཾ, དུཀྑཉྩ ཏཎྷཱདིཊྛཱིཧི ཨབྷིནནྡིཏུཾ ཨསྶཱདེཏུཾ ན ཡུཏྟཾ།
Catubbidho āhāro ca taṇhāsaṅkhātā netti ca pabhavo samuṭṭhānaṃ etassāti āhāranettippabhavaṃ. Sabbopi vā paccayo āhāro. Idha pana taṇhāya nettiggahaṇena gahitattā taṇhāvajjā veditabbā. Tasmā āhāro ca netti ca pabhavo etassāti āhāranettippabhavaṃ. Āhāro eva vā nayanaṭṭhena pavattanaṭṭhena nettīti evampi āhāranettippabhavaṃ. Nālaṃ tadabhinanditunti taṃ upādānakkhandhapañcakaṃ evaṃ paccayādhīnavuttikaṃ, tato eva aniccaṃ, dukkhañca taṇhādiṭṭhīhi abhinandituṃ assādetuṃ na yuttaṃ.
ཏསྶ ནིསྶརཎནྟི ‘‘ཛཱཏཾ བྷཱུཏ’’ནྟིཨཱདིནཱ ཝུཏྟསྶ ཏསྶ སཀྐཱཡསྶ ནིསྶརཎཾ ནིཀྐམོ ཨནུཔསནྟསབྷཱཝསྶ རཱགཱདིཀིལེསསྶ སབྦསངྑཱརསྶ ཙ ཨབྷཱཝེན ཏདུཔསམབྷཱཝེན པསཏྠབྷཱཝེན ཙ སནྟཾ, ཏཀྐཉཱཎསྶ ཨགོཙརབྷཱཝཏོ ཨཏཀྐཱཝཙརཾ, ནིཙྩཊྛེན དྷུཝཾ, ཏཏོ ཨེཝ ཨཛཱཏཾ ཨསམུཔྤནྣཾ, སོཀཧེཏཱུནཾ ཨབྷཱཝཏོ ཨསོཀཾ, ཝིགཏརཱགཱདིརཛཏྟཱ ཝིརཛཾ, སཾསཱརདུཀྑཊྚིཏེཧི པཊིཔཛྫིཏབྦཏྟཱ པདཾ, ཛཱཏིཨཱདིདུཀྑདྷམྨཱནཾ ནིརོདྷཧེཏུཏཱཡ ནིརོདྷོ དུཀྑདྷམྨཱནཾ, སབྦསངྑཱརཱནཾ ཨུཔསམཧེཏུཏཱཡ སངྑཱརཱུཔསམོ, ཏཏོ ཨེཝ ཨཙྩནྟསུཁཏཱཡ སུཁོཏི སབྦཔདེཧི ཨམཏམཧཱནིབྦཱནམེཝ ཐོམེཏི། ཨེཝཾ བྷགཝཱ པཋམགཱཐཱཡ བྱཏིརེཀཝསེན, དུཏིཡགཱཐཱཡ ཨནྭཡཝསེན ཙ ནིབྦཱནཾ ཝིབྷཱཝེསི།
Tassanissaraṇanti ‘‘jātaṃ bhūta’’ntiādinā vuttassa tassa sakkāyassa nissaraṇaṃ nikkamo anupasantasabhāvassa rāgādikilesassa sabbasaṅkhārassa ca abhāvena tadupasamabhāvena pasatthabhāvena ca santaṃ, takkañāṇassa agocarabhāvato atakkāvacaraṃ, niccaṭṭhena dhuvaṃ, tato eva ajātaṃ asamuppannaṃ, sokahetūnaṃ abhāvato asokaṃ, vigatarāgādirajattā virajaṃ, saṃsāradukkhaṭṭitehi paṭipajjitabbattā padaṃ, jātiādidukkhadhammānaṃ nirodhahetutāya nirodho dukkhadhammānaṃ, sabbasaṅkhārānaṃ upasamahetutāya saṅkhārūpasamo, tato eva accantasukhatāya sukhoti sabbapadehi amatamahānibbānameva thometi. Evaṃ bhagavā paṭhamagāthāya byatirekavasena, dutiyagāthāya anvayavasena ca nibbānaṃ vibhāvesi.
ཚཊྛསུཏྟཝཎྞནཱ ནིཊྛིཏཱ།
Chaṭṭhasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨིཏིཝུཏྟཀཔཱལི༹ • Itivuttakapāḷi / ༦. ཨཛཱཏསུཏྟཾ • 6. Ajātasuttaṃ
