| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
கு²த்³த³கனிகாயே
Khuddakanikāye
சூளனித்³தே³ஸ-அட்ட²கதா²
Cūḷaniddesa-aṭṭhakathā
பாராயனவக்³க³னித்³தே³ஸோ
Pārāyanavagganiddeso
1. அஜிதமாணவஸுத்தனித்³தே³ஸவண்ணனா
1. Ajitamāṇavasuttaniddesavaṇṇanā
பாராயனவக்³க³ஸ்ஸ பட²மே அஜிதஸுத்தனித்³தே³ஸே –
Pārāyanavaggassa paṭhame ajitasuttaniddese –
1.
1.
‘‘கேனஸ்ஸு நிவுதோ லோகோ, (இச்சாயஸ்மா அஜிதோ,)
‘‘Kenassu nivuto loko, (iccāyasmā ajito,)
கேனஸ்ஸு நப்பகாஸதி;
Kenassu nappakāsati;
கிஸ்ஸாபி⁴லேபனங் ப்³ரூஸி, கிங்ஸு தஸ்ஸ மஹப்³ப⁴ய’’ந்தி. –
Kissābhilepanaṃ brūsi, kiṃsu tassa mahabbhaya’’nti. –
அஜிதமாணவஸ்ஸ புச்சி²தே பட²மபஞ்ஹே ச உபரூபரிபஞ்ஹே ச நித்³தே³ஸேஸு ச வுத்தஞ்ச உத்தானஞ்ச வஜ்ஜெத்வா விஸேஸமேவ வக்கா²ம. தத்த² நிவுதோதி படிச்சா²தி³தோ. கிஸ்ஸாபி⁴லேபனங் ப்³ரூஸீதி கிங் அஸ்ஸ லோகஸ்ஸ அபி⁴லேபனங் வதே³ஸி?
Ajitamāṇavassa pucchite paṭhamapañhe ca uparūparipañhe ca niddesesu ca vuttañca uttānañca vajjetvā visesameva vakkhāma. Tattha nivutoti paṭicchādito. Kissābhilepanaṃ brūsīti kiṃ assa lokassa abhilepanaṃ vadesi?
ஆவுதோதி ஆவரிதோ. நிவுதோதி படிச்சா²தி³தோ. ஓவுதோதி ஹெட்டா² படிச்சா²தி³தோ. பிஹிதோதி உபரிபா⁴கே³ன சா²தி³தோ. படிச்ச²ன்னோதி அவிவடோ. படிகுஜ்ஜிதோதி அதோ⁴முக²ங் சா²தி³தோ.
Āvutoti āvarito. Nivutoti paṭicchādito. Ovutoti heṭṭhā paṭicchādito. Pihitoti uparibhāgena chādito. Paṭicchannoti avivaṭo. Paṭikujjitoti adhomukhaṃ chādito.
நப்பகாஸதீதி நப்பகாஸோ ஹோதி. நப்பபா⁴ஸதீதி ஞாணப்பபா⁴ஸங் ந கரோதி. ந தபதீதி ஞாணதபங் ந கரோதி. ந விரோசதீதி ஞாணவிரோசனங் ந கரோதி. ந ஞாயதீதி ந ஜானீயதி. ந பஞ்ஞாயதீதி நப்பஞ்ஞாயதே.
Nappakāsatīti nappakāso hoti. Nappabhāsatīti ñāṇappabhāsaṃ na karoti. Na tapatīti ñāṇatapaṃ na karoti. Na virocatīti ñāṇavirocanaṃ na karoti. Na ñāyatīti na jānīyati. Na paññāyatīti nappaññāyate.
கேன லித்தோதி கேன லிம்பிதோ. ஸங்லித்தோ உபலித்தோதி உபஸக்³கே³ன பத³ங் வட்³டி⁴தங். ஆசிக்க²ஸி நித்³தே³ஸவஸேன. தே³ஸேஸி படினித்³தே³ஸவஸேன . பஞ்ஞபேஸி தேன தேன பகாரேன. அத்த²ங் போ³தெ⁴ந்தோ பட்ட²பேஸி. தஸ்ஸத்த²ஸ்ஸ காரணங் த³ஸ்ஸெந்தோ விவரஸி. ப்³யஞ்ஜனபா⁴வங் த³ஸ்ஸெந்தோ விப⁴ஜஸி. நிகுஜ்ஜிதபா⁴வங் க³ம்பீ⁴ரபா⁴வஞ்ச ஹரித்வா ஸோதூனங் ஞாணஸ்ஸ பதிட்ட²ங் ஜனயந்தோ உத்தானீகரோஸி. ஸப்³பே³ஹிபி இமேஹி ஆகாரேஹி ஸோதூனங் அஞ்ஞாணந்த⁴காரங் வித⁴மெந்தோ பகாஸேஸீதி ஏவங் அத்தோ² த³ட்ட²ப்³போ³.
Kenalittoti kena limpito. Saṃlitto upalittoti upasaggena padaṃ vaḍḍhitaṃ. Ācikkhasi niddesavasena. Desesi paṭiniddesavasena . Paññapesi tena tena pakārena. Atthaṃ bodhento paṭṭhapesi. Tassatthassa kāraṇaṃ dassento vivarasi. Byañjanabhāvaṃ dassento vibhajasi. Nikujjitabhāvaṃ gambhīrabhāvañca haritvā sotūnaṃ ñāṇassa patiṭṭhaṃ janayanto uttānīkarosi. Sabbehipi imehi ākārehi sotūnaṃ aññāṇandhakāraṃ vidhamento pakāsesīti evaṃ attho daṭṭhabbo.
2. வேவிச்சா² பமாதா³ நப்பகாஸதீதி மச்ச²ரியஹேது ச பமாத³ஹேது ச நப்பகாஸதி. மச்ச²ரியங் ஹிஸ்ஸ தா³னாதீ³ஹி கு³ணேஹி பகாஸிதுங் ந தே³தி, பமாதோ³ ஸீலாதீ³ஹி. ஜப்பாபி⁴லேபனந்தி தண்ஹா அஸ்ஸ லோகஸ்ஸ மக்கடலேபோ விய மக்கடஸ்ஸ அபி⁴லேபனங். து³க்க²ந்தி ஜாதிஆதி³கங் து³க்க²ங்.
2.Vevicchā pamādā nappakāsatīti macchariyahetu ca pamādahetu ca nappakāsati. Macchariyaṃ hissa dānādīhi guṇehi pakāsituṃ na deti, pamādo sīlādīhi. Jappābhilepananti taṇhā assa lokassa makkaṭalepo viya makkaṭassa abhilepanaṃ. Dukkhanti jātiādikaṃ dukkhaṃ.
யேஸங் த⁴ம்மானந்தி யேஸங் ரூபாதி³த⁴ம்மானங். ஆதி³தோ ஸமுதா³க³மனங் பஞ்ஞாயதீதி பட²மதோ உப்பாதோ³ பஞ்ஞாயதி. அத்த²ங்க³மதோ நிரோதோ⁴ பஞ்ஞாயதீதி ப⁴ங்க³தோ நிருஜ்ஜ²னங் பஞ்ஞாயதி. கம்மஸன்னிஸ்ஸிதோ விபாகோதி குஸலாகுஸலவிபாகோ கம்மங் அமுஞ்சித்வா பவத்தனதோ கம்மஸன்னிஸ்ஸிதோ விபாகோதி வுச்சதி. விபாகஸன்னிஸ்ஸிதங் கம்மந்தி குஸலாகுஸலங் கம்மங் விபாகஸ்ஸ ஓகாஸங் கத்வா டி²தத்தா விபாகஸன்னிஸ்ஸிதங் கம்மந்தி வுச்சதி. நாமஸன்னிஸ்ஸிதங் ரூபந்தி பஞ்சவோகாரே ரூபங் நாமங் அமுஞ்சித்வா பவத்தனதோ நாமஸன்னிஸ்ஸிதங் ரூபந்தி வுச்சதி. ரூபஸன்னிஸ்ஸிதங் நாமந்தி பஞ்சவோகாரே நாமங் ரூபங் அமுஞ்சித்வா பவத்தனதோ ரூபஸன்னிஸ்ஸிதங் நாமந்தி வுச்சதி.
Yesaṃ dhammānanti yesaṃ rūpādidhammānaṃ. Ādito samudāgamanaṃ paññāyatīti paṭhamato uppādo paññāyati. Atthaṅgamato nirodho paññāyatīti bhaṅgato nirujjhanaṃ paññāyati. Kammasannissito vipākoti kusalākusalavipāko kammaṃ amuñcitvā pavattanato kammasannissito vipākoti vuccati. Vipākasannissitaṃ kammanti kusalākusalaṃ kammaṃ vipākassa okāsaṃ katvā ṭhitattā vipākasannissitaṃ kammanti vuccati. Nāmasannissitaṃ rūpanti pañcavokāre rūpaṃ nāmaṃ amuñcitvā pavattanato nāmasannissitaṃ rūpanti vuccati. Rūpasannissitaṃ nāmanti pañcavokāre nāmaṃ rūpaṃ amuñcitvā pavattanato rūpasannissitaṃ nāmanti vuccati.
3. ஸவந்தி ஸப்³ப³தி⁴ ஸோதாதி ஸப்³பே³ஸு ரூபாதி³ஆயதனேஸு தண்ஹாதி³கா ஸோதா ஸந்த³ந்தி. கிங் நிவாரணந்தி தேஸங் கிங் ஆவரணங் கா ரக்கா². ஸங்வரங் ப்³ரூஹீதி தங் தேஸங் நிவாரணஸங்கா²தங் ஸங்வரங் ப்³ரூஹி. ஏதேன ஸாவஸேஸப்பஹானங் புச்ச²தி. கேன ஸோதா பிதீ⁴யரேதி கேன த⁴ம்மேன ஏதே ஸோதா பிதீ⁴யந்தி பச்சி²ஜ்ஜந்தி. ஏதேன அனவஸேஸப்பஹானங் புச்ச²தி.
3.Savanti sabbadhi sotāti sabbesu rūpādiāyatanesu taṇhādikā sotā sandanti. Kiṃ nivāraṇanti tesaṃ kiṃ āvaraṇaṃ kā rakkhā. Saṃvaraṃ brūhīti taṃ tesaṃ nivāraṇasaṅkhātaṃ saṃvaraṃ brūhi. Etena sāvasesappahānaṃ pucchati. Kena sotā pidhīyareti kena dhammena ete sotā pidhīyanti pacchijjanti. Etena anavasesappahānaṃ pucchati.
ஸவந்தீதி உப்பஜ்ஜந்தி. ஆஸவந்தீதி அதோ⁴கா³மினோ ஹுத்வா ஸவந்தி. ஸந்த³ந்தீதி நிரந்தரகா³மினோ ஹுத்வா ஸந்த³மானா பவத்தந்தி. பவத்தந்தீதி புனப்புனங் வத்தந்தி.
Savantīti uppajjanti. Āsavantīti adhogāmino hutvā savanti. Sandantīti nirantaragāmino hutvā sandamānā pavattanti. Pavattantīti punappunaṃ vattanti.
4. ஸதி தேஸங் நிவாரணந்தி விபஸ்ஸனாயுத்தா குஸலாகுஸலத⁴ம்மானங் க³தியோ ஸமன்வேஸமானா ஸதி தேஸங் ஸோதானங் நிவாரணங் . ஸோதானங் ஸங்வரங் ப்³ரூமீதி தமேவாஹங் ஸதிங் ஸோதானங் ஸங்வரங் ப்³ரூமீதி அதி⁴ப்பாயோ. பஞ்ஞாயேதே பிதீ⁴யரேதி ரூபாதீ³ஸு பன அனிச்சதாதி³படிவேத⁴ஸாதி⁴காய மக்³க³பஞ்ஞாய ஏதே ஸோதா ஸப்³ப³ஸோ பிதீ⁴யந்தி.
4.Satitesaṃ nivāraṇanti vipassanāyuttā kusalākusaladhammānaṃ gatiyo samanvesamānā sati tesaṃ sotānaṃ nivāraṇaṃ . Sotānaṃ saṃvaraṃ brūmīti tamevāhaṃ satiṃ sotānaṃ saṃvaraṃ brūmīti adhippāyo. Paññāyete pidhīyareti rūpādīsu pana aniccatādipaṭivedhasādhikāya maggapaññāya ete sotā sabbaso pidhīyanti.
பச்சி²ஜ்ஜந்தீதி உச்சி²ஜ்ஜந்தி. ஸமுத³யஞ்சாதி பச்சயஞ்ச. அத்த²ங்க³மஞ்சாதி உப்பன்னானங் அபா⁴வக³மனஞ்ச, அனுப்பன்னானங் அனுப்பாத³ங் வா. அஸ்ஸாத³ஞ்சாதி ஆனிஸங்ஸஞ்ச. ஆதீ³னவஞ்சாதி தோ³ஸஞ்ச. நிஸ்ஸரணஞ்சாதி நிக்க²மனஞ்ச.
Pacchijjantīti ucchijjanti. Samudayañcāti paccayañca. Atthaṅgamañcāti uppannānaṃ abhāvagamanañca, anuppannānaṃ anuppādaṃ vā. Assādañcāti ānisaṃsañca. Ādīnavañcāti dosañca. Nissaraṇañcāti nikkhamanañca.
5. பஞ்ஞா சேவாதி பஞ்ஹாகா³தா²ய யா சாயங் தயா வுத்தா பஞ்ஞா, யா ச ஸதி, யஞ்ச தத³வஸேஸங் நாமரூபங், ஏதங் ஸப்³ப³ம்பி கத்த² நிருஜ்ஜ²தி. ஏதங் மே பஞ்ஹங் புட்டோ² பப்³ரூஹீதி ஏவங் ஸங்கே²பத்தோ² வேதி³தப்³போ³.
5.Paññā cevāti pañhāgāthāya yā cāyaṃ tayā vuttā paññā, yā ca sati, yañca tadavasesaṃ nāmarūpaṃ, etaṃ sabbampi kattha nirujjhati. Etaṃ me pañhaṃ puṭṭho pabrūhīti evaṃ saṅkhepattho veditabbo.
கத்தே²தங் உபருஜ்ஜ²தீதி ஏதங் நாமரூபங் கத்த² ந ப⁴வதி. வூபஸம்மதீதி நிப்³பா³தி. அத்த²ங் க³ச்ச²தீதி அபா⁴வங் க³ச்ச²தி. படிப்பஸ்ஸம்ப⁴தீதி ஸன்னிஸீத³தி.
Katthetaṃ uparujjhatīti etaṃ nāmarūpaṃ kattha na bhavati. Vūpasammatīti nibbāti. Atthaṃ gacchatīti abhāvaṃ gacchati. Paṭippassambhatīti sannisīdati.
6. விஸ்ஸஜ்ஜனகா³தா²ய பனஸ்ஸ யஸ்மா பஞ்ஞாஸதியோ நாமேனேவ ஸங்க³ஹங் க³ச்ச²ந்தி, தஸ்மா தா விஸுங் ந வுத்தா. அயமெத்த² ஸங்கே²பத்தோ² – யங் மங் த்வங், அஜித, ஏதங் பஞ்ஹங் அபுச்சி² – ‘‘கத்தே²தங் உபருஜ்ஜ²தீ’’தி, ததே³தங் யத்த² நாமஞ்ச ரூபஞ்ச அஸேஸங் உபருஜ்ஜ²தி, தங் தே வதா³மி. தஸ்ஸ தஸ்ஸ ஹி விஞ்ஞாணஸ்ஸ நிரோதே⁴ன ஸஹேவ அபுப்³ப³ங் அசரிமங் எத்தே²தங் உபருஜ்ஜ²தி, எத்தே²வ விஞ்ஞாணனிரோதே⁴ன நிருஜ்ஜ²தி ஏதங், விஞ்ஞாணனிரோதா⁴ தஸ்ஸ தஸ்ஸ நிரோதோ⁴ ஹோதி, தங் நாதிவத்ததீதி வுத்தங் ஹோதி.
6. Vissajjanagāthāya panassa yasmā paññāsatiyo nāmeneva saṅgahaṃ gacchanti, tasmā tā visuṃ na vuttā. Ayamettha saṅkhepattho – yaṃ maṃ tvaṃ, ajita, etaṃ pañhaṃ apucchi – ‘‘katthetaṃ uparujjhatī’’ti, tadetaṃ yattha nāmañca rūpañca asesaṃ uparujjhati, taṃ te vadāmi. Tassa tassa hi viññāṇassa nirodhena saheva apubbaṃ acarimaṃ etthetaṃ uparujjhati, ettheva viññāṇanirodhena nirujjhati etaṃ, viññāṇanirodhā tassa tassa nirodho hoti, taṃ nātivattatīti vuttaṃ hoti.
ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதே⁴னாதி ஸோதாபத்திமக்³க³ஸம்பயுத்தபஞ்ஞாய குஸலாகுஸலசேதனாஸம்பயுத்தசித்தஸ்ஸ அப⁴ப்³பு³ப்பத்திகவஸேன நிருஜ்ஜ²னேன. தத்த² து³விதோ⁴ நிரோதோ⁴ அனுபாதி³ன்னகனிரோதோ⁴ உபாதி³ன்னகனிரோதோ⁴தி. ஸோதாபத்திமக்³கே³ன ஹி சத்தாரி தி³ட்டி²ஸம்பயுத்தானி விசிகிச்சா²ஸஹக³தந்தி பஞ்ச சித்தானி நிருஜ்ஜ²ந்தி, தானி ரூபங் ஸமுட்டா²பெந்தி . தங் அனுபாதி³ன்னகரூபக்க²ந்தோ⁴ , தானி சித்தானி விஞ்ஞாணக்க²ந்தோ⁴, தங்ஸம்பயுத்தா வேத³னா ஸஞ்ஞா ஸங்கா²ரா தயோ அரூபக்க²ந்தா⁴. தத்த² ஸசே ஸோதாபன்னஸ்ஸ ஸோதாபத்திமக்³கோ³ அபா⁴விதோ அப⁴விஸ்ஸா, தானி பஞ்ச சித்தானி ச²ஸு ஆரம்மணேஸு பரியுட்டா²னங் பாபுணெய்யுங். ஸோதாபத்திமக்³கோ³ பன நேஸங் பரியுட்டா²னுப்பத்திங் வாரயமானோ ஸேதுஸமுக்³கா⁴தங் அப⁴ப்³பு³ப்பத்திகபா⁴வங் குருமானோ அனுபாதி³ன்னகங் நிரோதே⁴தி நாம. ஸகதா³கா³மிமக்³கே³ன சத்தாரி தி³ட்டி²விப்பயுத்தானி த்³வே தோ³மனஸ்ஸஸஹக³தானீதி ஓளாரிககாமராக³ப்³யாபாத³வஸேன ச² சித்தானி நிருஜ்ஜ²ந்தி. அனாகா³மிமக்³கே³ன அணுஸஹக³தகாமராக³ப்³யாபாத³வஸேன தானி ஏவ ச² சித்தானி நிருஜ்ஜ²ந்தி. அரஹத்தமக்³கே³ன சத்தாரி தி³ட்டி²விப்பயுத்தானி உத்³த⁴ச்சஸஹக³தஞ்சாதி பஞ்ச அகுஸலசித்தானி நிருஜ்ஜ²ந்தி. தத்த² ஸசே தேஸங் அரியானங் தே மக்³கா³ அபா⁴விதா அஸ்ஸு, தானி சித்தானி ச²ஸு ஆரம்மணேஸு பரியுட்டா²னங் பாபுணெய்யுங். தே பன தேஸங் மக்³கா³ பரியுட்டா²னுப்பத்திங் வாரயமானா ஸேதுஸமுக்³கா⁴தங் அப⁴ப்³பு³ப்பத்திகபா⁴வங் குருமானா அனுபாதி³ன்னகங் நிரோதெ⁴ந்தி நாம. ஏவங் அனுபாதி³ன்னகனிரோதோ⁴ வேதி³தப்³போ³.
Sotāpattimaggañāṇena abhisaṅkhāraviññāṇassa nirodhenāti sotāpattimaggasampayuttapaññāya kusalākusalacetanāsampayuttacittassa abhabbuppattikavasena nirujjhanena. Tattha duvidho nirodho anupādinnakanirodho upādinnakanirodhoti. Sotāpattimaggena hi cattāri diṭṭhisampayuttāni vicikicchāsahagatanti pañca cittāni nirujjhanti, tāni rūpaṃ samuṭṭhāpenti . Taṃ anupādinnakarūpakkhandho , tāni cittāni viññāṇakkhandho, taṃsampayuttā vedanā saññā saṅkhārā tayo arūpakkhandhā. Tattha sace sotāpannassa sotāpattimaggo abhāvito abhavissā, tāni pañca cittāni chasu ārammaṇesu pariyuṭṭhānaṃ pāpuṇeyyuṃ. Sotāpattimaggo pana nesaṃ pariyuṭṭhānuppattiṃ vārayamāno setusamugghātaṃ abhabbuppattikabhāvaṃ kurumāno anupādinnakaṃ nirodheti nāma. Sakadāgāmimaggena cattāri diṭṭhivippayuttāni dve domanassasahagatānīti oḷārikakāmarāgabyāpādavasena cha cittāni nirujjhanti. Anāgāmimaggena aṇusahagatakāmarāgabyāpādavasena tāni eva cha cittāni nirujjhanti. Arahattamaggena cattāri diṭṭhivippayuttāni uddhaccasahagatañcāti pañca akusalacittāni nirujjhanti. Tattha sace tesaṃ ariyānaṃ te maggā abhāvitā assu, tāni cittāni chasu ārammaṇesu pariyuṭṭhānaṃ pāpuṇeyyuṃ. Te pana tesaṃ maggā pariyuṭṭhānuppattiṃ vārayamānā setusamugghātaṃ abhabbuppattikabhāvaṃ kurumānā anupādinnakaṃ nirodhenti nāma. Evaṃ anupādinnakanirodho veditabbo.
ஸசே பன ஸோதாபன்னஸ்ஸ ஸோதாபத்திமக்³கோ³ அபா⁴விதோ அப⁴விஸ்ஸா, ட²பெத்வா ஸத்த ப⁴வே அனமதக்³கே³ ஸங்ஸாரவட்டே உபாதி³ன்னகக்க²ந்த⁴ப்பவத்தங் பவத்தெய்ய. கஸ்மா? தஸ்ஸ பவத்தியா ஹேதூனங் அத்தி²தாய. தீணி ஸங்யோஜனானி தி³ட்டா²னுஸயோ விசிகிச்சா²னுஸயோதி இமே பன பஞ்ச கிலேஸே ஸோ மக்³கோ³ உப்பஜ்ஜமானோவ ஸமுக்³கா⁴தேதி. இதா³னி குதோ ஸோதாபன்னஸ்ஸ ஸத்த ப⁴வே ட²பெத்வா அனமதக்³கே³ ஸங்ஸாரவட்டே உபாதி³ன்னகப்பவத்தங் பவத்திஸ்ஸதி. ஏவங் ஸோதாபத்திமக்³கோ³ உபாதி³ன்னகப்பவத்தங் அப்பவத்தங் குருமானோ உபாதி³ன்னகங் நிரோதே⁴தி நாம.
Sace pana sotāpannassa sotāpattimaggo abhāvito abhavissā, ṭhapetvā satta bhave anamatagge saṃsāravaṭṭe upādinnakakkhandhappavattaṃ pavatteyya. Kasmā? Tassa pavattiyā hetūnaṃ atthitāya. Tīṇi saṃyojanāni diṭṭhānusayo vicikicchānusayoti ime pana pañca kilese so maggo uppajjamānova samugghāteti. Idāni kuto sotāpannassa satta bhave ṭhapetvā anamatagge saṃsāravaṭṭe upādinnakappavattaṃ pavattissati. Evaṃ sotāpattimaggo upādinnakappavattaṃ appavattaṃ kurumāno upādinnakaṃ nirodheti nāma.
ஸசே ஸகதா³கா³மிஸ்ஸ ஸகதா³கா³மிமக்³கோ³ அபா⁴விதோ அப⁴விஸ்ஸா, ட²பெத்வா த்³வே ப⁴வே பஞ்சஸு ப⁴வேஸு உபாதி³ன்னகப்பவத்தங் பவத்தெய்ய. கஸ்மா? தஸ்ஸ பவத்தியா ஹேதூனங் அத்தி²தாய. ஓளாரிகானி காமராக³படிக⁴ஸங்யோஜனானி ஓளாரிகோ காமராகா³னுஸயோ படிகா⁴னுஸயோதி இமே பன சத்தாரோ கிலேஸே ஸோ மக்³கோ³ உப்பஜ்ஜமானோவ ஸமுக்³கா⁴தேதி. இதா³னி குதோ ஸகதா³கா³மிஸ்ஸ த்³வே ப⁴வே ட²பெத்வா பஞ்சஸு ப⁴வேஸு உபாதி³ன்னகப்பவத்தங் பவத்திஸ்ஸதி . ஏவங் ஸகதா³கா³மிமக்³கோ³ உபாதி³ன்னகப்பவத்தங் அப்பவத்தங் குருமானோ உபாதி³ன்னகங் நிரோதே⁴தி நாம.
Sace sakadāgāmissa sakadāgāmimaggo abhāvito abhavissā, ṭhapetvā dve bhave pañcasu bhavesu upādinnakappavattaṃ pavatteyya. Kasmā? Tassa pavattiyā hetūnaṃ atthitāya. Oḷārikāni kāmarāgapaṭighasaṃyojanāni oḷāriko kāmarāgānusayo paṭighānusayoti ime pana cattāro kilese so maggo uppajjamānova samugghāteti. Idāni kuto sakadāgāmissa dve bhave ṭhapetvā pañcasu bhavesu upādinnakappavattaṃ pavattissati . Evaṃ sakadāgāmimaggo upādinnakappavattaṃ appavattaṃ kurumāno upādinnakaṃ nirodheti nāma.
ஸசே அனாகா³மிஸ்ஸ அனாகா³மிமக்³கோ³ அபா⁴விதோ அப⁴விஸ்ஸா, ட²பெத்வா ஏகங் ப⁴வங் து³தியப⁴வே உபாதி³ன்னகப்பவத்தங் பவத்தெய்ய. கஸ்மா? தஸ்ஸ பவத்தியா ஹேதூனங் அத்தி²தாய. அணுஸஹக³தானி காமராக³படிக⁴ஸஞ்ஞோஜனானி அணுஸஹக³தோ காமராகா³னுஸயோ படிகா⁴னுஸயோதி இமே பன சத்தாரோ கிலேஸே ஸோ மக்³கோ³ உப்பஜ்ஜமானோவ ஸமுக்³கா⁴தேதி. இதா³னி குதோ அனாகா³மிஸ்ஸ ஏகங் ப⁴வங் ட²பெத்வா து³தியப⁴வே உபாதி³ன்னகப்பவத்தங் பவத்திஸ்ஸதி. ஏவங் அனாகா³மிமக்³கோ³ உபாதி³ன்னகப்பவத்தங் அப்பவத்தங் குருமானோ உபாதி³ன்னகங் நிரோதே⁴தி நாம.
Sace anāgāmissa anāgāmimaggo abhāvito abhavissā, ṭhapetvā ekaṃ bhavaṃ dutiyabhave upādinnakappavattaṃ pavatteyya. Kasmā? Tassa pavattiyā hetūnaṃ atthitāya. Aṇusahagatāni kāmarāgapaṭighasaññojanāni aṇusahagato kāmarāgānusayo paṭighānusayoti ime pana cattāro kilese so maggo uppajjamānova samugghāteti. Idāni kuto anāgāmissa ekaṃ bhavaṃ ṭhapetvā dutiyabhave upādinnakappavattaṃ pavattissati. Evaṃ anāgāmimaggo upādinnakappavattaṃ appavattaṃ kurumāno upādinnakaṃ nirodheti nāma.
ஸசே அரஹதோ அரஹத்தமக்³கோ³ அபா⁴விதோ அப⁴விஸ்ஸா, ரூபாரூபப⁴வேஸு உபாதி³ன்னகப்பவத்தங் பவத்தெய்ய. கஸ்மா? தஸ்ஸ பவத்தியா ஹேதூனங் அத்தி²தாய. ரூபராகோ³ அரூபராகோ³ மானோ உத்³த⁴ச்சங் அவிஜ்ஜா மானானுஸயோ ப⁴வராகா³னுஸயோ அவிஜ்ஜானுஸயோதி இமே பன அட்ட² கிலேஸே ஸோ மக்³கோ³ உப்பஜ்ஜமானோவ ஸமுக்³கா⁴தேதி. இதா³னி குதோ கீ²ணாஸவஸ்ஸ புனப்³ப⁴வே உபாதி³ன்னகப்பவத்தங் பவத்திஸ்ஸதி? ஏவங் அரஹத்தமக்³கோ³ உபாதி³ன்னகப்பவத்தங் அப்பவத்தங் குருமானோ உபாதி³ன்னகங் நிரோதே⁴தி நாம.
Sace arahato arahattamaggo abhāvito abhavissā, rūpārūpabhavesu upādinnakappavattaṃ pavatteyya. Kasmā? Tassa pavattiyā hetūnaṃ atthitāya. Rūparāgo arūparāgo māno uddhaccaṃ avijjā mānānusayo bhavarāgānusayo avijjānusayoti ime pana aṭṭha kilese so maggo uppajjamānova samugghāteti. Idāni kuto khīṇāsavassa punabbhave upādinnakappavattaṃ pavattissati? Evaṃ arahattamaggo upādinnakappavattaṃ appavattaṃ kurumāno upādinnakaṃ nirodheti nāma.
ஸோதாபத்திமக்³கோ³ செத்த² அபாயப⁴வங் நிரோதே⁴தி. ஸகதா³கா³மிமக்³கோ³ ஸுக³திகாமப⁴வேகதே³ஸங். அனாகா³மிமக்³கோ³ காமப⁴வங். அரஹத்தமக்³கோ³ ரூபாரூபப⁴வங், ஸப்³ப³ப⁴வேபி நிரோதே⁴தி ஏவாதி வத³ந்தி. ஏவங் உபாதி³ன்னகனிரோதோ⁴ வேதி³தப்³போ³.
Sotāpattimaggo cettha apāyabhavaṃ nirodheti. Sakadāgāmimaggo sugatikāmabhavekadesaṃ. Anāgāmimaggo kāmabhavaṃ. Arahattamaggo rūpārūpabhavaṃ, sabbabhavepi nirodheti evāti vadanti. Evaṃ upādinnakanirodho veditabbo.
தத்த² ‘‘அபி⁴ஸங்கா²ரவிஞ்ஞாணஸ்ஸ நிரோதே⁴னா’’தி ஏதேன அனுபாதி³ன்னகனிரோத⁴ங் த³ஸ்ஸேதி. ‘‘யே உப்பஜ்ஜெய்யுங் நாமஞ்ச ரூபஞ்ச, எத்தே²தே நிருஜ்ஜ²ந்தீ’’தி இமினா பன உபாதி³ன்னகனிரோத⁴ங் த³ஸ்ஸேதி.
Tattha ‘‘abhisaṅkhāraviññāṇassa nirodhenā’’ti etena anupādinnakanirodhaṃ dasseti. ‘‘Ye uppajjeyyuṃ nāmañca rūpañca, etthete nirujjhantī’’ti iminā pana upādinnakanirodhaṃ dasseti.
தத்த² ஸத்த ப⁴வே ட²பெத்வாதி காமப⁴வதோ காமப⁴வங் ஸங்ஸரந்தஸ்ஸ ஸத்த ப⁴வே வஜ்ஜெத்வா. அனமதக்³கே³ ஸங்ஸாரேதி –
Tattha satta bhave ṭhapetvāti kāmabhavato kāmabhavaṃ saṃsarantassa satta bhave vajjetvā. Anamatagge saṃsāreti –
‘‘க²ந்தா⁴னஞ்ச படிபாடி, தா⁴துஆயதனான ச;
‘‘Khandhānañca paṭipāṭi, dhātuāyatanāna ca;
அப்³பொ³ச்சி²ன்னங் வத்தமானா, ‘ஸங்ஸாரோ’தி பவுச்சதீ’’தி. (விஸுத்³தி⁴॰ 2.619; த⁴॰ ஸ॰ அட்ட²॰ நிதா³னகதா²; அ॰ நி॰ அட்ட²॰ 2.4.199; படி॰ ம॰ அட்ட²॰ 2.1.117; இதிவு॰ அட்ட²॰ 14, 58; உதா³॰ அட்ட²॰ 39) –
Abbocchinnaṃ vattamānā, ‘saṃsāro’ti pavuccatī’’ti. (visuddhi. 2.619; dha. sa. aṭṭha. nidānakathā; a. ni. aṭṭha. 2.4.199; paṭi. ma. aṭṭha. 2.1.117; itivu. aṭṭha. 14, 58; udā. aṭṭha. 39) –
ஏவங் வண்ணிதே ஸங்ஸாரவட்டே. யே உப்பஜ்ஜெய்யுங் நாமஞ்ச ரூபஞ்சாதி நமனலக்க²ணங் சதுக்க²ந்த⁴ஸங்கா²தங் நாமஞ்ச ருப்பனலக்க²ணங் பூ⁴தோபாதா³யஸங்கா²தங் ரூபஞ்ச ஏதே த⁴ம்மா உப்பஜ்ஜெய்யுங். எத்தே²தே நிருஜ்ஜ²ந்தீதி ஏதஸ்மிங் ஸோதாபத்திமக்³கே³ ஏதே நாமரூபத⁴ம்மா அப⁴ப்³பு³ப்பத்திகவஸேன நிரோத⁴ங் க³ச்ச²ந்தி. ஸகதா³கா³மிமக்³க³ஞாணேனாதி எத்த² படிஸந்தி⁴வஸேன ஸகிங்யேவ இமங் லோகங் ஆக³ச்ச²தீதி ஸகதா³கா³மீ , தஸ்ஸ மக்³கோ³ ஸகதா³கா³மிமக்³கோ³. தேன மக்³கே³ன ஸம்பயுத்தஞாணேன. த்³வே ப⁴வே ட²பெத்வாதி காமதா⁴துயாயேவ படிஸந்தி⁴வஸேன த்³வே ப⁴வே வஜ்ஜெத்வா. பஞ்சஸு ப⁴வேஸூதி தத³வஸிட்டே²ஸு பஞ்சஸு ப⁴வேஸு. எத்தே²தே நிருஜ்ஜ²ந்தீதி எத்த² ஸகதா³கா³மிமக்³கே³ ஏதே த⁴ம்மா வுத்தனயேன நிருஜ்ஜ²ந்தி. ஏகங் ப⁴வங் ட²பெத்வாதி உக்கட்ட²வஸேன ரூபதா⁴துயா வா அரூபதா⁴துயா வா ஏகங் ப⁴வங் வஜ்ஜெத்வா. ரூபதா⁴துயா வா அரூபதா⁴துயா வாதி து³தியகப⁴வே ரூபதா⁴துயா சேவ அரூபதா⁴துயா ச. நாமஞ்ச ரூபஞ்சாதி எத்த² ரூபப⁴வே நாமரூபங், அரூபப⁴வே நாமமேவ. எத்தே²தே நிருஜ்ஜ²ந்தீதி எத்த² அனாகா³மிமக்³கே³ ஏதே நாமரூபத⁴ம்மா வுத்தனயேன நிருஜ்ஜ²ந்தி.
Evaṃ vaṇṇite saṃsāravaṭṭe. Ye uppajjeyyuṃ nāmañca rūpañcāti namanalakkhaṇaṃ catukkhandhasaṅkhātaṃ nāmañca ruppanalakkhaṇaṃ bhūtopādāyasaṅkhātaṃ rūpañca ete dhammā uppajjeyyuṃ. Etthete nirujjhantīti etasmiṃ sotāpattimagge ete nāmarūpadhammā abhabbuppattikavasena nirodhaṃ gacchanti. Sakadāgāmimaggañāṇenāti ettha paṭisandhivasena sakiṃyeva imaṃ lokaṃ āgacchatīti sakadāgāmī , tassa maggo sakadāgāmimaggo. Tena maggena sampayuttañāṇena. Dve bhave ṭhapetvāti kāmadhātuyāyeva paṭisandhivasena dve bhave vajjetvā. Pañcasu bhavesūti tadavasiṭṭhesu pañcasu bhavesu. Etthete nirujjhantīti ettha sakadāgāmimagge ete dhammā vuttanayena nirujjhanti. Ekaṃ bhavaṃ ṭhapetvāti ukkaṭṭhavasena rūpadhātuyā vā arūpadhātuyā vā ekaṃ bhavaṃ vajjetvā. Rūpadhātuyā vā arūpadhātuyā vāti dutiyakabhave rūpadhātuyā ceva arūpadhātuyā ca. Nāmañca rūpañcāti ettha rūpabhave nāmarūpaṃ, arūpabhave nāmameva. Etthete nirujjhantīti ettha anāgāmimagge ete nāmarūpadhammā vuttanayena nirujjhanti.
அரஹதோதி கிலேஸேஹி ஆரகத்தா ‘‘அரஹா’’தி லத்³த⁴னாமஸ்ஸ கீ²ணாஸவஸ்ஸ. அனுபாதி³ஸேஸாய நிப்³பா³னதா⁴துயாதி து³விதா⁴ ஹி நிப்³பா³னதா⁴து ஸஉபாதி³ஸேஸா ச அனுபாதி³ஸேஸா ச. தத்த² உபாதீ³யதி ‘‘அஹங் மமா’’தி பு⁴ஸங் க³ண்ஹீயதீதி உபாதி³, க²ந்த⁴பஞ்சகஸ்ஸேதங் அதி⁴வசனங். உபாதி³யேவ ஸேஸோ அவஸிட்டோ² உபாதி³ஸேஸோ, ஸஹ உபாதி³ஸேஸேன வத்ததீதி ஸஉபாதி³ஸேஸா. நத்தெ²த்த² உபாதி³ஸேஸோதி அனுபாதி³ஸேஸா. தாய அனுபாதி³ஸேஸாய நிப்³பா³னதா⁴துயா. பரினிப்³பா³யந்தஸ்ஸாதி நிரிந்த⁴னஸ்ஸ விய ஜாதவேத³ஸ்ஸ நிப்³பா³யந்தஸ்ஸ அப்பவத்தங் பவிஸந்தஸ்ஸ. சரிமவிஞ்ஞாணஸ்ஸ நிரோதே⁴னாதி எத்த² அஸ்ஸாஸபஸ்ஸாஸானங் நிரோத⁴வஸேன. தயோ சரிமா ப⁴வசரிமோ ஜா²னசரிமோ சுதிசரிமோதி. ப⁴வேஸு ஹி காமப⁴வே அஸ்ஸாஸபஸ்ஸாஸா பவத்தந்தி, ரூபாரூபப⁴வேஸு நப்பவத்தந்தி. தஸ்மா ஸோ ப⁴வசரிமோ. ஜா²னேஸு புரிமஜா²னத்தயேவ பவத்தந்தி, சதுத்தே² நப்பவத்தந்தி. தஸ்மா ஸோ ஜா²னசரிமோ. யே பன சுதிசித்தஸ்ஸ புரதோ ஸோளஸமேன சித்தேன ஸஹுப்பன்னா, தே சுதிசித்தேன ஸஹ நிருஜ்ஜ²ந்தி. ஸோ சுதிசரிமோ நாம. அயங் இத⁴ சரிமோதி அதி⁴ப்பேதோ. யே ஹி கேசி பு³த்³தா⁴ வா பச்சேகபு³த்³தா⁴ வா அரியஸாவகா வா அந்தமஸோ குந்த²கிபில்லிகங் உபாதா³ய ஸப்³பே³ ப⁴வங்க³சித்தேனேவ அப்³யாகதேன து³க்க²ஸச்சேன காலங் கரொந்தி. தஸ்மா சரிமவிஞ்ஞாணஸ்ஸ நிரோதே⁴னாதி சுதிசித்தஸ்ஸ நிரோதே⁴னாதி அத்தோ².
Arahatoti kilesehi ārakattā ‘‘arahā’’ti laddhanāmassa khīṇāsavassa. Anupādisesāya nibbānadhātuyāti duvidhā hi nibbānadhātu saupādisesā ca anupādisesā ca. Tattha upādīyati ‘‘ahaṃ mamā’’ti bhusaṃ gaṇhīyatīti upādi, khandhapañcakassetaṃ adhivacanaṃ. Upādiyeva seso avasiṭṭho upādiseso, saha upādisesena vattatīti saupādisesā. Natthettha upādisesoti anupādisesā. Tāya anupādisesāya nibbānadhātuyā. Parinibbāyantassāti nirindhanassa viya jātavedassa nibbāyantassa appavattaṃ pavisantassa. Carimaviññāṇassa nirodhenāti ettha assāsapassāsānaṃ nirodhavasena. Tayo carimā bhavacarimo jhānacarimo cuticarimoti. Bhavesu hi kāmabhave assāsapassāsā pavattanti, rūpārūpabhavesu nappavattanti. Tasmā so bhavacarimo. Jhānesu purimajhānattayeva pavattanti, catutthe nappavattanti. Tasmā so jhānacarimo. Ye pana cuticittassa purato soḷasamena cittena sahuppannā, te cuticittena saha nirujjhanti. So cuticarimo nāma. Ayaṃ idha carimoti adhippeto. Ye hi keci buddhā vā paccekabuddhā vā ariyasāvakā vā antamaso kunthakipillikaṃ upādāya sabbe bhavaṅgacitteneva abyākatena dukkhasaccena kālaṃ karonti. Tasmā carimaviññāṇassa nirodhenāti cuticittassa nirodhenāti attho.
பஞ்ஞா ச ஸதி ச நாமஞ்சாதி ஏதேஹி சதுன்னங் அரூபக்க²ந்தா⁴னங் க³ஹணங் பச்சேதப்³ப³ங். ரூபஞ்சாதி ஏதேன சதுன்னங் மஹாபூ⁴தானங் சதுவீஸதிஉபாதா³ரூபானஞ்ச க³ஹணங் பச்சேதப்³ப³ங். இதா³னி தஸ்ஸ நிருஜ்ஜ²னூபாயங் த³ஸ்ஸெந்தோ ‘‘விஞ்ஞாணஸ்ஸ நிரோதே⁴ன, எத்தே²தங் உபருஜ்ஜ²தீ’’தி ஆஹ. தத்த² விஞ்ஞாணந்தி சரிமவிஞ்ஞாணம்பி அபி⁴ஸங்கா²ரவிஞ்ஞாணம்பி. அபி⁴ஸங்கா²ரவிஞ்ஞாணஸ்ஸ பஹீனநிரோதே⁴ன எத்தே²தங் உபருஜ்ஜ²தி நிருஜ்ஜ²தி தீ³பஸிகா² விய அபண்ணத்திகபா⁴வங் யாதி, சரிமவிஞ்ஞாணஸ்ஸ அனுப்பாத³பச்சயத்தா அனுப்பாத³னிரோதே⁴ன அனுப்பாத³வஸேனேவ உபருஜ்ஜ²தீதி (தீ³॰ நி॰ அட்ட²॰ 1.499).
Paññāca sati ca nāmañcāti etehi catunnaṃ arūpakkhandhānaṃ gahaṇaṃ paccetabbaṃ. Rūpañcāti etena catunnaṃ mahābhūtānaṃ catuvīsatiupādārūpānañca gahaṇaṃ paccetabbaṃ. Idāni tassa nirujjhanūpāyaṃ dassento ‘‘viññāṇassa nirodhena, etthetaṃ uparujjhatī’’ti āha. Tattha viññāṇanti carimaviññāṇampi abhisaṅkhāraviññāṇampi. Abhisaṅkhāraviññāṇassa pahīnanirodhena etthetaṃ uparujjhati nirujjhati dīpasikhā viya apaṇṇattikabhāvaṃ yāti, carimaviññāṇassa anuppādapaccayattā anuppādanirodhena anuppādavaseneva uparujjhatīti (dī. ni. aṭṭha. 1.499).
7. எத்தாவதா ச ‘‘து³க்க²மஸ்ஸ மஹப்³ப⁴ய’’ந்தி இமினா பகாஸிதங் து³க்க²ஸச்சங், ‘‘யானி ஸோதானீ’’தி இமினா ஸமுத³யஸச்சங், ‘‘பஞ்ஞாயேதே பிதீ⁴யரே’’தி இமினா மக்³க³ஸச்சங், ‘‘அஸேஸங் உபருஜ்ஜ²தீ’’தி இமினா நிரோத⁴ஸச்சந்தி ஏவங் சத்தாரி ஸச்சானி ஸுத்வாபி அரியபூ⁴மிங் அனதி⁴க³தோ புன ஸெக்கா²ஸெக்க²படிபத³ங் புச்ச²ந்தோ ‘‘யே ச ஸங்கா²தத⁴ம்மாஸே’’தி கா³த²மாஹ. தத்த² ஸங்கா²தத⁴ம்மாதி அனிச்சாதி³வஸேன பரிவீமங்ஸிதத⁴ம்மா, அரஹந்தானமேதங் அதி⁴வசனங். ஸெக்கா²தி ஸீலாதீ³னி ஸிக்க²மானா அவஸேஸா அரியபுக்³க³லா. புதூ²தி ப³ஹூ ஸத்தஜனா. தேஸங் மே நிபகோ இரியங் புட்டோ² பப்³ரூஹீதி தேஸங் மே ஸெக்கா²ஸெக்கா²னங் நிபகோ பண்டி³தோ த்வங் புட்டோ² படிபத்திங் ப்³ரூஹீதி.
7. Ettāvatā ca ‘‘dukkhamassa mahabbhaya’’nti iminā pakāsitaṃ dukkhasaccaṃ, ‘‘yāni sotānī’’ti iminā samudayasaccaṃ, ‘‘paññāyete pidhīyare’’ti iminā maggasaccaṃ, ‘‘asesaṃ uparujjhatī’’ti iminā nirodhasaccanti evaṃ cattāri saccāni sutvāpi ariyabhūmiṃ anadhigato puna sekkhāsekkhapaṭipadaṃ pucchanto ‘‘ye ca saṅkhātadhammāse’’ti gāthamāha. Tattha saṅkhātadhammāti aniccādivasena parivīmaṃsitadhammā, arahantānametaṃ adhivacanaṃ. Sekkhāti sīlādīni sikkhamānā avasesā ariyapuggalā. Puthūti bahū sattajanā. Tesaṃ me nipako iriyaṃ puṭṭho pabrūhīti tesaṃ me sekkhāsekkhānaṃ nipako paṇḍito tvaṃ puṭṭho paṭipattiṃ brūhīti.
தேஸங் க²ந்தா⁴ ஸங்கா²தாதி தேஸங் பஞ்சக்க²ந்தா⁴ அப்படிஸந்தி⁴கங் கத்வா தே³ஸிதா, ஸங்கே²பங் கத்வா ட²பிதா வா. தா⁴துஆதீ³ஸுபி ஏஸேவ நயோ. இரியந்தி பயோக³ங். சரியந்தி கிரியங். வுத்திந்தி பவத்திங். ஆசரந்தி சரணங். கோ³சரந்தி பச்சயங். விஹாரந்தி இரியாபத²பவத்தனங். படிபத³ந்தி விபஸ்ஸனங்.
Tesaṃ khandhā saṅkhātāti tesaṃ pañcakkhandhā appaṭisandhikaṃ katvā desitā, saṅkhepaṃ katvā ṭhapitā vā. Dhātuādīsupi eseva nayo. Iriyanti payogaṃ. Cariyanti kiriyaṃ. Vuttinti pavattiṃ. Ācaranti caraṇaṃ. Gocaranti paccayaṃ. Vihāranti iriyāpathapavattanaṃ. Paṭipadanti vipassanaṃ.
8. அத²ஸ்ஸ ப⁴க³வா யஸ்மா ஸெக்கே²ன காமச்ச²ந்த³னீவரணங் ஆதி³ங் கத்வா ஸப்³ப³கிலேஸா பஹாதப்³பா³ ஏவ, தஸ்மா ‘‘காமேஸூதி உபட்³ட⁴கா³தா²ய ஸெக்க²படிபத³ங் த³ஸ்ஸேதி. தஸ்ஸத்தோ² – வத்து²காமேஸு கிலேஸகாமேன நாபி⁴கி³ஜ்ஜெ²ய்ய, காயது³ச்சரிதாத³யோ ச மனஸோ ஆவிலபா⁴வகரே த⁴ம்மே பஜஹந்தோ மனஸானாவிலோ ஸியாதி. யஸ்மா பன அஸெக்கோ² அனிச்சாதி³வஸேன ஸப்³ப³ஸங்கா²ராதீ³னங் பரிதுலிதத்தா குஸலோ ஸப்³ப³த⁴ம்மேஸு காயானுபஸ்ஸனாஸதிஆதீ³ஹி ச ஸதோ ஸக்காயதி³ட்டி²ஆதீ³னங் பி⁴ன்னத்தா பி⁴க்கு²பா⁴வங் பத்தோ ஹுத்வா ஸப்³ப³இரியாபதே²ஸு பரிப்³ப³ஜதி, தஸ்மா ‘‘குஸலோ’’தி உபட்³ட⁴கா³தா²ய அஸெக்க²படிபத³ங் த³ஸ்ஸேதி.
8. Athassa bhagavā yasmā sekkhena kāmacchandanīvaraṇaṃ ādiṃ katvā sabbakilesā pahātabbā eva, tasmā ‘‘kāmesūti upaḍḍhagāthāya sekkhapaṭipadaṃ dasseti. Tassattho – vatthukāmesu kilesakāmena nābhigijjheyya, kāyaduccaritādayo ca manaso āvilabhāvakare dhamme pajahanto manasānāvilo siyāti. Yasmā pana asekkho aniccādivasena sabbasaṅkhārādīnaṃ paritulitattā kusalo sabbadhammesu kāyānupassanāsatiādīhi ca sato sakkāyadiṭṭhiādīnaṃ bhinnattā bhikkhubhāvaṃ patto hutvā sabbairiyāpathesu paribbajati, tasmā ‘‘kusalo’’ti upaḍḍhagāthāya asekkhapaṭipadaṃ dasseti.
நாபி⁴கி³ஜ்ஜெ²ய்யாதி கே³த⁴ங் நாபஜ்ஜெய்ய. ந பலிகி³ஜ்ஜெ²ய்யாதி லோப⁴ங் நாபஜ்ஜெய்ய. ந பலிபு³ந்தெ⁴ய்யாதி லோப⁴வஸேன ந அல்லீயெய்ய.
Nābhigijjheyyāti gedhaṃ nāpajjeyya. Na paligijjheyyāti lobhaṃ nāpajjeyya. Na palibundheyyāti lobhavasena na allīyeyya.
ஆவிலகரே கிலேஸே ஜஹெய்யாதி சித்தாலுளகரே உபதாபஸங்கா²தே கிலேஸே ஜஹெய்ய.
Āvilakare kilese jaheyyāti cittāluḷakare upatāpasaṅkhāte kilese jaheyya.
ஸப்³பே³ த⁴ம்மா அனத்தாதி நிப்³பா³னங் அந்தோகரித்வா வுத்தங். யங் கிஞ்சி ஸமுத³யத⁴ம்மந்தி யங் கிஞ்சி ஸப்பச்சயஸபா⁴வங்.
Sabbe dhammā anattāti nibbānaṃ antokaritvā vuttaṃ. Yaṃ kiñci samudayadhammanti yaṃ kiñci sappaccayasabhāvaṃ.
ஸஹ கா³தா²பரியோஸானாதி கா³தா²வஸானேனேவ ஸத்³தி⁴ங். யேதே ப்³ராஹ்மணேன ஸத்³தி⁴ங் ஏகச்ச²ந்தா³தி யே ஏதே அஜிதமாணவேன கல்யாணச²ந்தே³ன ஏகஜ்ஜா²ஸயா. ஏகப்பயோகா³தி காயவசீமனோபயோகே³ஹி ஏகப்பயோகா³. ஏகாதி⁴ப்பாயாதி ஏகோ அதி⁴ப்பாயோ ருசி ஏதேஸந்தி ஏகாதி⁴ப்பாயா, ஏகருசிகாதி அத்தோ². ஏகவாஸனவாஸிதாதி அதீதபு³த்³த⁴ஸாஸனே தேன ஸத்³தி⁴ங் பா⁴விதபா⁴வனா. அனேகபாணஸஹஸ்ஸானந்தி அனேகேஸங் தே³வமனுஸ்ஸஸங்கா²தானங் பாணஸஹஸ்ஸானங். விரஜங் வீதமலந்தி ராகா³தி³ரஜவிரஹிதங் ராகா³தி³மலவிரஹிதஞ்ச.
Saha gāthāpariyosānāti gāthāvasāneneva saddhiṃ. Yete brāhmaṇena saddhiṃ ekacchandāti ye ete ajitamāṇavena kalyāṇachandena ekajjhāsayā. Ekappayogāti kāyavacīmanopayogehi ekappayogā. Ekādhippāyāti eko adhippāyo ruci etesanti ekādhippāyā, ekarucikāti attho. Ekavāsanavāsitāti atītabuddhasāsane tena saddhiṃ bhāvitabhāvanā. Anekapāṇasahassānanti anekesaṃ devamanussasaṅkhātānaṃ pāṇasahassānaṃ. Virajaṃ vītamalanti rāgādirajavirahitaṃ rāgādimalavirahitañca.
த⁴ம்மசக்கு²ந்தி இத⁴ ஸோதாபத்திமக்³கோ³ அதி⁴ப்பேதோ. அஞ்ஞத்த² ஹெட்டா²மக்³க³த்தயங். தஸ்ஸ உப்பத்திகாரணத³ஸ்ஸனத்த²ங் ‘‘யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்ம’’ந்தி ஆஹ. தஞ்ஹி நிரோத⁴ங் ஆரம்மணங் கத்வா கிச்சவஸேன ஏவங் ஸப்³ப³ஸங்க²தங் படிவிஜ்ஜ²ந்தங் உப்பஜ்ஜதி. தஸ்ஸ ப்³ராஹ்மணஸ்ஸ அனுபாதா³ய ஆஸவேஹி சித்தங் விமுச்சீதி தஸ்ஸ ச அஜிதப்³ராஹ்மணஸ்ஸ அந்தேவாஸிகஸஹஸ்ஸானஞ்ச தண்ஹாதீ³ஹி அக்³க³ஹெத்வா காமாஸவாதீ³ஹி மக்³க³க்க²ணே சித்தங் விமுச்சமானங் ப²லக்க²ணே விமுச்சி. ஸஹ அரஹத்தப்பத்தாதி அரஹத்தப்பத்தியா ச ஸஹேவ ஆயஸ்மதோ அஜிதஸ்ஸ ச அந்தேவாஸிகஸஹஸ்ஸஸ்ஸ ச அஜினஜடாவாகசீரதித³ண்ட³கமண்ட³லுஆத³யோ அந்தரதா⁴யிங்ஸு. ஸப்³பே³வ இத்³தி⁴மயபத்தசீவரத⁴ரா த்³வங்கு³லகேஸா ஏஹிபி⁴க்கூ² ஹுத்வா ப⁴க³வந்தங் நமஸ்ஸமானா பஞ்ஜலிகா நிஸீதி³ங்ஸு. பாளியங் பன அஜிதத்தே²ரோவ பஞ்ஞாயதி. தத்த² அன்வத்த²படிபத்தியாதி ஸயங் பச்சாஸீஸிதலத்³த⁴படிபத்தியா, நிப்³பா³னலத்³த⁴பா⁴வேனாதி அத்தோ². ஸேஸங் ஸப்³ப³த்த² பாகடமேவ. ஏவங் ப⁴க³வா அரஹத்தனிகூடேன தே³ஸனங் நிட்டா²பேஸீதி.
Dhammacakkhunti idha sotāpattimaggo adhippeto. Aññattha heṭṭhāmaggattayaṃ. Tassa uppattikāraṇadassanatthaṃ ‘‘yaṃ kiñci samudayadhammaṃ, sabbaṃ taṃ nirodhadhamma’’nti āha. Tañhi nirodhaṃ ārammaṇaṃ katvā kiccavasena evaṃ sabbasaṅkhataṃ paṭivijjhantaṃ uppajjati. Tassa brāhmaṇassa anupādāya āsavehi cittaṃ vimuccīti tassa ca ajitabrāhmaṇassa antevāsikasahassānañca taṇhādīhi aggahetvā kāmāsavādīhi maggakkhaṇe cittaṃ vimuccamānaṃ phalakkhaṇe vimucci. Saha arahattappattāti arahattappattiyā ca saheva āyasmato ajitassa ca antevāsikasahassassa ca ajinajaṭāvākacīratidaṇḍakamaṇḍaluādayo antaradhāyiṃsu. Sabbeva iddhimayapattacīvaradharā dvaṅgulakesā ehibhikkhū hutvā bhagavantaṃ namassamānā pañjalikā nisīdiṃsu. Pāḷiyaṃ pana ajitattherova paññāyati. Tattha anvatthapaṭipattiyāti sayaṃ paccāsīsitaladdhapaṭipattiyā, nibbānaladdhabhāvenāti attho. Sesaṃ sabbattha pākaṭameva. Evaṃ bhagavā arahattanikūṭena desanaṃ niṭṭhāpesīti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
அஜிதமாணவஸுத்தனித்³தே³ஸவண்ணனா நிட்டி²தா.
Ajitamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
1. அஜிதமாணவபுச்சா² • 1. Ajitamāṇavapucchā
1. அஜிதமாணவபுச்சா²னித்³தே³ஸோ • 1. Ajitamāṇavapucchāniddeso
