| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
1. அஜிதஸுத்தவண்ணனா
1. Ajitasuttavaṇṇanā
1039. தஸ்மிங் பன பஞ்ஹே நிவுதோதி படிச்சா²தி³தோ. கிஸ்ஸாபி⁴லேபனங் ப்³ரூஸீதி கிங் அஸ்ஸ லோகஸ்ஸ அபி⁴லேபனங் வதே³ஸி.
1039. Tasmiṃ pana pañhe nivutoti paṭicchādito. Kissābhilepanaṃ brūsīti kiṃ assa lokassa abhilepanaṃ vadesi.
1040. வேவிச்சா² பமாதா³ நப்பகாஸதீதி மச்ச²ரியஹேது ச பமாத³ஹேது ச நப்பகாஸதி. மச்ச²ரியங் ஹிஸ்ஸ தா³னாதி³கு³ணேஹி பகாஸிதுங் ந தே³தி, பமாதோ³ ஸீலாதீ³ஹி. ஜப்பாபி⁴லேபனந்தி தண்ஹா அஸ்ஸ லோகஸ்ஸ மக்கடலேபோ விய மக்கடஸ்ஸ அபி⁴லேபனங். து³க்க²ந்தி ஜாதிஆதி³கங் து³க்க²ங்.
1040.Vevicchā pamādā nappakāsatīti macchariyahetu ca pamādahetu ca nappakāsati. Macchariyaṃ hissa dānādiguṇehi pakāsituṃ na deti, pamādo sīlādīhi. Jappābhilepananti taṇhā assa lokassa makkaṭalepo viya makkaṭassa abhilepanaṃ. Dukkhanti jātiādikaṃ dukkhaṃ.
1041. ஸவந்தி ஸப்³ப³தி⁴ ஸோதாதி ஸப்³பே³ஸு ரூபாதி³ஆயதனேஸு தண்ஹாதி³கா ஸோதா ஸந்த³ந்தி. கிங் நிவாரணந்தி தேஸங் கிங் ஆவரணங் கா ரக்கா²தி? ஸங்வரங் ப்³ரூஹீதி தங் தேஸங் நிவாரணஸங்கா²தங் ஸங்வரங் ப்³ரூஹி. ஏதேன ஸாவஸேஸப்பஹானங் புச்ச²தி. கேன ஸோதா பிதி⁴ய்யரேதி கேன த⁴ம்மேன ஏதே ஸோதா பிதி⁴ய்யந்தி பச்சி²ஜ்ஜந்தி. ஏதேன அனவஸேஸப்பஹானங் புச்ச²தி.
1041.Savanti sabbadhi sotāti sabbesu rūpādiāyatanesu taṇhādikā sotā sandanti. Kiṃ nivāraṇanti tesaṃ kiṃ āvaraṇaṃ kā rakkhāti? Saṃvaraṃ brūhīti taṃ tesaṃ nivāraṇasaṅkhātaṃ saṃvaraṃ brūhi. Etena sāvasesappahānaṃ pucchati. Kena sotā pidhiyyareti kena dhammena ete sotā pidhiyyanti pacchijjanti. Etena anavasesappahānaṃ pucchati.
1042. ஸதி தேஸங் நிவாரணந்தி விபஸ்ஸனாயுத்தா. குஸலானங் த⁴ம்மானங் க³தியோ ஸமன்னேஸமானா ஸதி தேஸங் ஸோதானங் நிவாரணங். ஸோதானங் ஸங்வரங் ப்³ரூமீதி தமேவாஹங் ஸதிங் ஸோதானங் ஸங்வரங் ப்³ரூமீதி அதி⁴ப்பாயோ. பஞ்ஞாயேதே பிதி⁴ய்யரேதி ரூபாதீ³ஸு பன அனிச்சதாதி³படிவேத⁴ஸாதி⁴காய மக்³க³பஞ்ஞாய ஏதே ஸோதா ஸப்³ப³ஸோ பிதி⁴ய்யந்தீதி.
1042.Sati tesaṃ nivāraṇanti vipassanāyuttā. Kusalānaṃ dhammānaṃ gatiyo samannesamānā sati tesaṃ sotānaṃ nivāraṇaṃ. Sotānaṃ saṃvaraṃ brūmīti tamevāhaṃ satiṃ sotānaṃ saṃvaraṃ brūmīti adhippāyo. Paññāyete pidhiyyareti rūpādīsu pana aniccatādipaṭivedhasādhikāya maggapaññāya ete sotā sabbaso pidhiyyantīti.
1043. பஞ்ஞா சேவாதி பஞ்ஹகா³தா²ய, யா சாயங் தயா வுத்தா பஞ்ஞா யா ச ஸதி, யஞ்ச தத³வஸேஸங் நாமரூபங், ஏதங் ஸப்³ப³ம்பி கத்த² நிருஜ்ஜ²தி, ஏதங் மே பஞ்ஹங் புட்டோ² ப்³ரூஹீதி ஏவங் ஸங்கே²பத்தோ² வேதி³தப்³போ³.
1043.Paññā cevāti pañhagāthāya, yā cāyaṃ tayā vuttā paññā yā ca sati, yañca tadavasesaṃ nāmarūpaṃ, etaṃ sabbampi kattha nirujjhati, etaṃ me pañhaṃ puṭṭho brūhīti evaṃ saṅkhepattho veditabbo.
1044. விஸ்ஸஜ்ஜனகா³தா²ய பனஸ்ஸ யஸ்மா பஞ்ஞாஸதியோ நாமேனேவ ஸங்க³ஹங் க³ச்ச²ந்தி, தஸ்மா தா விஸுங் ந வுத்தா. அயமெத்த² ஸங்கே²பத்தோ² – யங் மங் த்வங், அஜித, ஏதங் பஞ்ஹங் அபுச்சி² ‘‘கத்தே²தங் உபருஜ்ஜ²தீ’’தி, தங் தே யத்த² நாமஞ்ச ரூபஞ்ச அஸேஸங் உபருஜ்ஜ²தி, தங் வத³ந்தோ வதா³மி , தஸ்ஸ, தஸ்ஸ ஹி விஞ்ஞாணஸ்ஸ நிரோதே⁴ன ஸஹேவ அபுப்³ப³ங் அசரிமங் எத்தே²தங் உபருஜ்ஜ²தி. எத்தே²வ விஞ்ஞாணனிரோதே⁴ நிருஜ்ஜ²தி ஏதங், விஞ்ஞாணனிரோதா⁴ தஸ்ஸ நிரோதோ⁴ ஹோதி. தங் நாதிவத்ததீதி வுத்தங் ஹோதி.
1044. Vissajjanagāthāya panassa yasmā paññāsatiyo nāmeneva saṅgahaṃ gacchanti, tasmā tā visuṃ na vuttā. Ayamettha saṅkhepattho – yaṃ maṃ tvaṃ, ajita, etaṃ pañhaṃ apucchi ‘‘katthetaṃ uparujjhatī’’ti, taṃ te yattha nāmañca rūpañca asesaṃ uparujjhati, taṃ vadanto vadāmi, tassa, tassa hi viññāṇassa nirodhena saheva apubbaṃ acarimaṃ etthetaṃ uparujjhati. Ettheva viññāṇanirodhe nirujjhati etaṃ, viññāṇanirodhā tassa nirodho hoti. Taṃ nātivattatīti vuttaṃ hoti.
1045. எத்தாவதா ச ‘‘து³க்க²மஸ்ஸ மஹப்³ப⁴ய’’ந்தி இமினா பகாஸிதங் து³க்க²ஸச்சங், ‘‘யானி ஸோதானீ’’தி இமினா ஸமுத³யஸச்சங் பஞ்ஞாயேதே பிதி⁴ய்யரேதி இமினா மக்³க³ஸச்சங், ‘‘அஸேஸங் உபருஜ்ஜ²தீ’’தி இமினா நிரோத⁴ஸச்சந்தி ஏவங் சத்தாரி ஸச்சானி ஸுத்வாபி அரியபூ⁴மிங் அனதி⁴க³தோ புன ஸேகா²ஸேக²படிபத³ங் புச்ச²ந்தோ ‘‘யே ச ஸங்கா²தத⁴ம்மாஸே’’தி கா³த²மாஹ. தத்த² ஸங்கா²தத⁴ம்மாதி அனிச்சாதி³வஸேன பரிவீமங்ஸிதத⁴ம்மா, அரஹதங் ஏதங் அதி⁴வசனங். ஸேகா²தி ஸீலாதீ³னி ஸிக்க²மானா அவஸேஸா அரியபுக்³க³லா. புதூ²தி ப³ஹூ ஸத்தஜனா. தேஸங் மே நிபகோ இரியங் புட்டோ² பப்³ரூஹீதி தேஸங் மே ஸேகா²ஸேகா²னங் நிபகோ பண்டி³தோ த்வங் புட்டோ² படிபத்திங் ப்³ரூஹீதி.
1045. Ettāvatā ca ‘‘dukkhamassa mahabbhaya’’nti iminā pakāsitaṃ dukkhasaccaṃ, ‘‘yāni sotānī’’ti iminā samudayasaccaṃ paññāyete pidhiyyareti iminā maggasaccaṃ, ‘‘asesaṃ uparujjhatī’’ti iminā nirodhasaccanti evaṃ cattāri saccāni sutvāpi ariyabhūmiṃ anadhigato puna sekhāsekhapaṭipadaṃ pucchanto ‘‘ye ca saṅkhātadhammāse’’ti gāthamāha. Tattha saṅkhātadhammāti aniccādivasena parivīmaṃsitadhammā, arahataṃ etaṃ adhivacanaṃ. Sekhāti sīlādīni sikkhamānā avasesā ariyapuggalā. Puthūti bahū sattajanā. Tesaṃ me nipako iriyaṃ puṭṭho pabrūhīti tesaṃ me sekhāsekhānaṃ nipako paṇḍito tvaṃ puṭṭho paṭipattiṃ brūhīti.
1046. அத²ஸ்ஸ ப⁴க³வா யஸ்மா ஸேகே²ன காமச்ச²ந்த³னீவரணங் ஆதி³ங் கத்வா ஸப்³ப³கிலேஸா பஹாதப்³பா³ ஏவ, தஸ்மா ‘‘காமேஸூ’’தி உபட்³ட⁴கா³தா²ய ஸேக²படிபத³ங் த³ஸ்ஸேதி. தஸ்ஸத்தோ² – வத்து² ‘‘காமேஸு’’ கிலேஸகாமேன நாபி⁴கி³ஜ்ஜெ²ய்ய காயது³ச்சரிதாத³யோ ச மனஸோ ஆவிலபா⁴வகரே த⁴ம்மே பஜஹந்தோ மனஸா நாவிலோ ஸியாதி. யஸ்மா பன அஸேகோ² அனிச்சாதி³வஸேன ஸப்³ப³ஸங்கா²ராதீ³னங் பரிதுலிதத்தா குஸலோ ஸப்³ப³த⁴ம்மேஸு காயானுபஸ்ஸனாஸதிஆதீ³ஹி ச ஸதோ ஸக்காயதி³ட்டி²ஆதீ³னங் பி⁴ன்னத்தா பி⁴க்கு²பா⁴வங் பத்தோ ச ஹுத்வா ஸப்³பி³ரியாபதே²ஸு பரிப்³ப³ஜதி, தஸ்மா ‘‘குஸலோ’’தி உபட்³ட⁴கா³தா²ய அஸேக²படிபத³ங் த³ஸ்ஸேதி. ஸேஸங் ஸப்³ப³த்த² பாகடமேவ.
1046. Athassa bhagavā yasmā sekhena kāmacchandanīvaraṇaṃ ādiṃ katvā sabbakilesā pahātabbā eva, tasmā ‘‘kāmesū’’ti upaḍḍhagāthāya sekhapaṭipadaṃ dasseti. Tassattho – vatthu ‘‘kāmesu’’ kilesakāmena nābhigijjheyya kāyaduccaritādayo ca manaso āvilabhāvakare dhamme pajahanto manasā nāvilo siyāti. Yasmā pana asekho aniccādivasena sabbasaṅkhārādīnaṃ paritulitattā kusalo sabbadhammesu kāyānupassanāsatiādīhi ca sato sakkāyadiṭṭhiādīnaṃ bhinnattā bhikkhubhāvaṃ patto ca hutvā sabbiriyāpathesu paribbajati, tasmā ‘‘kusalo’’ti upaḍḍhagāthāya asekhapaṭipadaṃ dasseti. Sesaṃ sabbattha pākaṭameva.
ஏவங் ப⁴க³வா அரஹத்தனிகூடேன தே³ஸனங் நிட்டா²பேஸி, தே³ஸனாபரியோஸானே அஜிதோ அரஹத்தே பதிட்டா²ஸி ஸத்³தி⁴ங் அந்தேவாஸிஸஹஸ்ஸேன, அஞ்ஞேஸஞ்ச அனேகஸஹஸ்ஸானங் த⁴ம்மசக்கு²ங் உத³பாதி³. ஸஹ அரஹத்தப்பத்தியா ச ஆயஸ்மதோ அஜிதஸ்ஸ அந்தேவாஸிஸஹஸ்ஸஸ்ஸ ச அஜினஜடாவாகசீராதீ³னி அந்தரதா⁴யிங்ஸு. ஸப்³பே³வ இத்³தி⁴மயபத்தசீவரத⁴ரா, த்³வங்கு³லகேஸா ஏஹிபி⁴க்கூ² ஹுத்வா ப⁴க³வந்தங் நமஸ்ஸமானா பஞ்ஜலிகா நிஸீதி³ங்ஸூதி.
Evaṃ bhagavā arahattanikūṭena desanaṃ niṭṭhāpesi, desanāpariyosāne ajito arahatte patiṭṭhāsi saddhiṃ antevāsisahassena, aññesañca anekasahassānaṃ dhammacakkhuṃ udapādi. Saha arahattappattiyā ca āyasmato ajitassa antevāsisahassassa ca ajinajaṭāvākacīrādīni antaradhāyiṃsu. Sabbeva iddhimayapattacīvaradharā, dvaṅgulakesā ehibhikkhū hutvā bhagavantaṃ namassamānā pañjalikā nisīdiṃsūti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய அஜிதஸுத்தவண்ணனா நிட்டி²தா.
Suttanipāta-aṭṭhakathāya ajitasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 1. அஜிதமாணவபுச்சா² • 1. Ajitamāṇavapucchā
