| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
10. அஜிதத்தே²ரகா³தா²வண்ணனா
10. Ajitattheragāthāvaṇṇanā
மரணே மே ப⁴யங் நத்தீ²தி ஆயஸ்மதோ அஜிதத்தே²ரஸ்ஸ கா³தா². கா உப்பத்தி? ஸோ கிர ஏகனவுதே கப்பே விபஸ்ஸிங் ப⁴க³வந்தங் பஸ்ஸித்வா பஸன்னசித்தோ கபித்த²ப²லங் அதா³ஸி. ததோ பரம்பி தங் தங் புஞ்ஞங் கத்வா தே³வமனுஸ்ஸேஸு ஸங்ஸரந்தோ இமஸ்மிங் கப்பே அனுப்பன்னே ஏவ அம்ஹாகங் ஸத்த²ரி ஸாவத்தி²யங் மஹாகோஸலரஞ்ஞோ அக்³கா³ஸனியஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி. தஸ்ஸ அஜிதோதி நாமங் அஹோஸி. தஸ்மிஞ்ச ஸமயே ஸாவத்தி²வாஸீ பா³வரீ நாம ப்³ராஹ்மணோ தீஹி மஹாபுரிஸலக்க²ணேஹி ஸமன்னாக³தோ திண்ணங் வேதா³னங் பாரகூ³ ஸாவத்தி²தோ நிக்க²மித்வா தாபஸபப்³ப³ஜ்ஜங் பப்³ப³ஜித்வா கோ³தா⁴வரீதீரே கபித்தா²ராமே வஸதி. அத² அஜிதோ தஸ்ஸ ஸந்திகே பப்³ப³ஜிதோ அத்த²காமாய தே³வதாய சோதி³தேன பா³வரினா ஸத்து² ஸந்திகங் பேஸிதோ திஸ்ஸமெத்தெய்யாதீ³ஹி ஸத்³தி⁴ங் ப⁴க³வந்தங் உபஸங்கமித்வா மனஸாவ பஞ்ஹே புச்சி²த்வா தேஸு விஸ்ஸஜ்ஜிதேஸு பஸன்னசித்தோ ஸத்து² ஸந்திகே பப்³ப³ஜித்வா கம்மட்டா²னங் க³ஹெத்வா விபஸ்ஸனங் வட்³டெ⁴த்வா அரஹத்தங் பாபுணி. தேன வுத்தங் அபதா³னே (அப॰ தே²ர 2.52.7-11) –
Maraṇe me bhayaṃ natthīti āyasmato ajitattherassa gāthā. Kā uppatti? So kira ekanavute kappe vipassiṃ bhagavantaṃ passitvā pasannacitto kapitthaphalaṃ adāsi. Tato parampi taṃ taṃ puññaṃ katvā devamanussesu saṃsaranto imasmiṃ kappe anuppanne eva amhākaṃ satthari sāvatthiyaṃ mahākosalarañño aggāsaniyassa brāhmaṇassa putto hutvā nibbatti. Tassa ajitoti nāmaṃ ahosi. Tasmiñca samaye sāvatthivāsī bāvarī nāma brāhmaṇo tīhi mahāpurisalakkhaṇehi samannāgato tiṇṇaṃ vedānaṃ pāragū sāvatthito nikkhamitvā tāpasapabbajjaṃ pabbajitvā godhāvarītīre kapitthārāme vasati. Atha ajito tassa santike pabbajito atthakāmāya devatāya coditena bāvarinā satthu santikaṃ pesito tissametteyyādīhi saddhiṃ bhagavantaṃ upasaṅkamitvā manasāva pañhe pucchitvā tesu vissajjitesu pasannacitto satthu santike pabbajitvā kammaṭṭhānaṃ gahetvā vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.52.7-11) –
‘‘ஸுவண்ணவண்ணங் ஸம்பு³த்³த⁴ங், ஆஹுதீனங் படிக்³க³ஹங்;
‘‘Suvaṇṇavaṇṇaṃ sambuddhaṃ, āhutīnaṃ paṭiggahaṃ;
ரதி²யங் படிபஜ்ஜந்தங், கபித்த²ங் அத³தி³ங் ப²லங்.
Rathiyaṃ paṭipajjantaṃ, kapitthaṃ adadiṃ phalaṃ.
‘‘ஏகனவுதிதோ கப்பே, யங் ப²லங் அத³தி³ங் த³தா³;
‘‘Ekanavutito kappe, yaṃ phalaṃ adadiṃ dadā;
து³க்³க³திங் நாபி⁴ஜானாமி, ப²லதா³னஸ்ஸித³ங் ப²லங்.
Duggatiṃ nābhijānāmi, phaladānassidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்தோ ஸீஹனாத³ங் நத³ந்தோ ‘‘மரணே மே ப⁴யங் நத்தீ²’’தி கா³த²ங் அபா⁴ஸி.
Arahattaṃ pana patto sīhanādaṃ nadanto ‘‘maraṇe me bhayaṃ natthī’’ti gāthaṃ abhāsi.
20. தத்த² மரணேதி மரணனிமித்தங் மரணஹேது. மேதி மய்ஹங், ப⁴யங் நத்தி² உச்சி²ன்னப⁴வமூலதாய பரிக்கீ²ணஜாதிகத்தா . அனுச்சி²ன்னப⁴வமூலானஞ்ஹி ‘‘கீதி³ஸீ நு கோ² மய்ஹங் ஆயதிங் உப்பத்தீ’’தி மரணதோ ப⁴யங் ப⁴வெய்ய. நிகந்தீதி அபெக்கா² தண்ஹா, ஸா நத்தி² ஜீவிதே ஸுபரிமத்³தி³தஸங்கா²ரதாய உபாதா³னக்க²ந்தா⁴னங் து³க்கா²ஸாரகாதி³பா⁴வேன ஸுட்டு² உபட்ட²ஹனதோ. ஏவங்பூ⁴தோ சாஹங் ஸந்தே³ஹங் ஸரீரங், ஸகங் வா தே³ஹங் தே³ஹஸங்கா²தங் து³க்க²பா⁴ரங் நிக்கி²பிஸ்ஸாமி ச²ட்³டெ³ஸ்ஸாமி, நிக்கி²பந்தோ ச ‘‘‘இமினா ஸரீரகேன ஸாதே⁴தப்³ப³ங் ஸாதி⁴தங், இதா³னி தங் ஏகங்ஸேன ச²ட்³ட³னீயமேவா’தி பஞ்ஞாவேபுல்லப்பத்தியா ஸம்பஜானோ ஸதிவேபுல்லப்பத்தியா படிஸ்ஸதோ நிக்கி²பிஸ்ஸாமீ’’தி. இமங் பன கா³த²ங் வத்வா தே²ரோ ஜா²னங் ஸமாபஜ்ஜித்வா தத³னந்தரங் பரினிப்³பா³யீதி.
20. Tattha maraṇeti maraṇanimittaṃ maraṇahetu. Meti mayhaṃ, bhayaṃ natthi ucchinnabhavamūlatāya parikkhīṇajātikattā . Anucchinnabhavamūlānañhi ‘‘kīdisī nu kho mayhaṃ āyatiṃ uppattī’’ti maraṇato bhayaṃ bhaveyya. Nikantīti apekkhā taṇhā, sā natthi jīvite suparimadditasaṅkhāratāya upādānakkhandhānaṃ dukkhāsārakādibhāvena suṭṭhu upaṭṭhahanato. Evaṃbhūto cāhaṃ sandehaṃ sarīraṃ, sakaṃ vā dehaṃ dehasaṅkhātaṃ dukkhabhāraṃ nikkhipissāmi chaḍḍessāmi, nikkhipanto ca ‘‘‘iminā sarīrakena sādhetabbaṃ sādhitaṃ, idāni taṃ ekaṃsena chaḍḍanīyamevā’ti paññāvepullappattiyā sampajāno sativepullappattiyā paṭissato nikkhipissāmī’’ti. Imaṃ pana gāthaṃ vatvā thero jhānaṃ samāpajjitvā tadanantaraṃ parinibbāyīti.
அஜிதத்தே²ரகா³தா²வண்ணனா நிட்டி²தா.
Ajitattheragāthāvaṇṇanā niṭṭhitā.
து³தியவக்³க³வண்ணனா நிட்டி²தா.
Dutiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 10. அஜிதத்தே²ரகா³தா² • 10. Ajitattheragāthā
