| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
10. аж̇ид̇ад̇т̇зраг̇аат̇ааван̣н̣анаа
10. Ajitattheragāthāvaṇṇanā
маран̣з мз бхаяам̣ над̇т̇ийд̇и ааяасмад̇о аж̇ид̇ад̇т̇зрасса г̇аат̇аа. гаа уббад̇д̇и? со гира зганавуд̇з габбз вибассим̣ бхаг̇аванд̇ам̣ бассид̇ваа басаннажид̇д̇о габид̇т̇апалам̣ ад̣̇ааси. д̇ад̇о барамби д̇ам̣ д̇ам̣ бун̃н̃ам̣ гад̇ваа д̣̇звамануссзсу сам̣саранд̇о имасмим̣ габбз ануббаннз зва амхаагам̣ сад̇т̇ари саавад̇т̇ияам̣ махаагосаларан̃н̃о аг̇г̇аасанияасса б̣раахман̣асса буд̇д̇о худ̇ваа ниб̣б̣ад̇д̇и. д̇асса аж̇ид̇од̇и наамам̣ ахоси. д̇асмин̃жа самаяз саавад̇т̇иваасий б̣ааварий наама б̣раахман̣о д̇ийхи махаабурисалагкан̣зхи саманнааг̇ад̇о д̇ин̣н̣ам̣ взд̣̇аанам̣ баараг̇уу саавад̇т̇ид̇о нигкамид̇ваа д̇аабасабаб̣б̣аж̇ж̇ам̣ баб̣б̣аж̇ид̇ваа г̇од̇хааварийд̇ийрз габид̇т̇аараамз васад̇и. ат̇а аж̇ид̇о д̇асса санд̇игз баб̣б̣аж̇ид̇о ад̇т̇агаамааяа д̣̇звад̇ааяа жод̣̇ид̇зна б̣ааваринаа сад̇т̇у санд̇игам̣ бзсид̇о д̇иссамзд̇д̇зяяаад̣̇ийхи сад̣̇д̇хим̣ бхаг̇аванд̇ам̣ убасан̇гамид̇ваа манасаава бан̃хз бужчид̇ваа д̇зсу виссаж̇ж̇ид̇зсу басаннажид̇д̇о сад̇т̇у санд̇игз баб̣б̣аж̇ид̇ваа гаммадтаанам̣ г̇ахзд̇ваа вибассанам̣ вад̣дхзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 2.52.7-11) –
Maraṇe me bhayaṃ natthīti āyasmato ajitattherassa gāthā. Kā uppatti? So kira ekanavute kappe vipassiṃ bhagavantaṃ passitvā pasannacitto kapitthaphalaṃ adāsi. Tato parampi taṃ taṃ puññaṃ katvā devamanussesu saṃsaranto imasmiṃ kappe anuppanne eva amhākaṃ satthari sāvatthiyaṃ mahākosalarañño aggāsaniyassa brāhmaṇassa putto hutvā nibbatti. Tassa ajitoti nāmaṃ ahosi. Tasmiñca samaye sāvatthivāsī bāvarī nāma brāhmaṇo tīhi mahāpurisalakkhaṇehi samannāgato tiṇṇaṃ vedānaṃ pāragū sāvatthito nikkhamitvā tāpasapabbajjaṃ pabbajitvā godhāvarītīre kapitthārāme vasati. Atha ajito tassa santike pabbajito atthakāmāya devatāya coditena bāvarinā satthu santikaṃ pesito tissametteyyādīhi saddhiṃ bhagavantaṃ upasaṅkamitvā manasāva pañhe pucchitvā tesu vissajjitesu pasannacitto satthu santike pabbajitvā kammaṭṭhānaṃ gahetvā vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.52.7-11) –
‘‘суван̣н̣аван̣н̣ам̣ самб̣уд̣̇д̇хам̣, аахуд̇ийнам̣ бадиг̇г̇ахам̣;
‘‘Suvaṇṇavaṇṇaṃ sambuddhaṃ, āhutīnaṃ paṭiggahaṃ;
рат̇ияам̣ бадибаж̇ж̇анд̇ам̣, габид̇т̇ам̣ ад̣̇ад̣̇им̣ палам̣.
Rathiyaṃ paṭipajjantaṃ, kapitthaṃ adadiṃ phalaṃ.
‘‘зганавуд̇ид̇о габбз, яам̣ палам̣ ад̣̇ад̣̇им̣ д̣̇ад̣̇аа;
‘‘Ekanavutito kappe, yaṃ phalaṃ adadiṃ dadā;
д̣̇уг̇г̇ад̇им̣ наабхиж̇аанаами, палад̣̇аанассид̣̇ам̣ палам̣.
Duggatiṃ nābhijānāmi, phaladānassidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇д̇о сийханаад̣̇ам̣ над̣̇анд̇о ‘‘маран̣з мз бхаяам̣ над̇т̇ий’’д̇и г̇аат̇ам̣ абхааси.
Arahattaṃ pana patto sīhanādaṃ nadanto ‘‘maraṇe me bhayaṃ natthī’’ti gāthaṃ abhāsi.
20. д̇ад̇т̇а маран̣зд̇и маран̣анимид̇д̇ам̣ маран̣ахзд̇у. мзд̇и маяхам̣, бхаяам̣ над̇т̇и ужчиннабхавамуулад̇ааяа баригкийн̣аж̇аад̇игад̇д̇аа . анужчиннабхавамуулаанан̃хи ‘‘гийд̣̇исий ну ко маяхам̣ ааяад̇им̣ уббад̇д̇ий’’д̇и маран̣ад̇о бхаяам̣ бхавзяяа. ниганд̇ийд̇и абзгкаа д̇ан̣хаа, саа над̇т̇и ж̇ийвид̇з субаримад̣̇д̣̇ид̇асан̇каарад̇ааяа убаад̣̇аанагканд̇хаанам̣ д̣̇угкаасаарагаад̣̇ибхаавзна судту убадтаханад̇о. звам̣бхууд̇о жаахам̣ санд̣̇зхам̣ сарийрам̣, сагам̣ ваа д̣̇зхам̣ д̣̇зхасан̇каад̇ам̣ д̣̇угкабхаарам̣ нигкибиссаами чад̣д̣зссаами, нигкибанд̇о жа ‘‘‘иминаа сарийрагзна саад̇хзд̇аб̣б̣ам̣ саад̇хид̇ам̣, ид̣̇аани д̇ам̣ згам̣сзна чад̣д̣анийяамзваа’д̇и бан̃н̃аавзбуллаббад̇д̇ияаа самбаж̇аано сад̇ивзбуллаббад̇д̇ияаа бадиссад̇о нигкибиссаамий’’д̇и. имам̣ бана г̇аат̇ам̣ вад̇ваа т̇зро жхаанам̣ самаабаж̇ж̇ид̇ваа д̇ад̣̇ананд̇арам̣ бариниб̣б̣ааяийд̇и.
20. Tattha maraṇeti maraṇanimittaṃ maraṇahetu. Meti mayhaṃ, bhayaṃ natthi ucchinnabhavamūlatāya parikkhīṇajātikattā . Anucchinnabhavamūlānañhi ‘‘kīdisī nu kho mayhaṃ āyatiṃ uppattī’’ti maraṇato bhayaṃ bhaveyya. Nikantīti apekkhā taṇhā, sā natthi jīvite suparimadditasaṅkhāratāya upādānakkhandhānaṃ dukkhāsārakādibhāvena suṭṭhu upaṭṭhahanato. Evaṃbhūto cāhaṃ sandehaṃ sarīraṃ, sakaṃ vā dehaṃ dehasaṅkhātaṃ dukkhabhāraṃ nikkhipissāmi chaḍḍessāmi, nikkhipanto ca ‘‘‘iminā sarīrakena sādhetabbaṃ sādhitaṃ, idāni taṃ ekaṃsena chaḍḍanīyamevā’ti paññāvepullappattiyā sampajāno sativepullappattiyā paṭissato nikkhipissāmī’’ti. Imaṃ pana gāthaṃ vatvā thero jhānaṃ samāpajjitvā tadanantaraṃ parinibbāyīti.
аж̇ид̇ад̇т̇зраг̇аат̇ааван̣н̣анаа нидтид̇аа.
Ajitattheragāthāvaṇṇanā niṭṭhitā.
д̣̇уд̇ияаваг̇г̇аван̣н̣анаа нидтид̇аа.
Dutiyavaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 10. аж̇ид̇ад̇т̇зраг̇аат̇аа • 10. Ajitattheragāthā
