Library / Tipiṭaka / తిపిటక • Tipiṭaka / పాచిత్యాదియోజనాపాళి • Pācityādiyojanāpāḷi |
౧౫౧. అజ్ఝారామే ఉపాహనపటిక్ఖేపకథా
151. Ajjhārāme upāhanapaṭikkhepakathā
౨౪౮. ‘‘యేన సిప్పేనా’’తిఆదినా అభి అధికం జీవన్తి అనేనాతి అభిజీవనం, కింతం? సిప్పన్తి అత్థం దస్సేతి. తస్సాతి సిప్పస్స . ఇధాతి ఇమస్మిం సాసనే. యంసద్దో వచనవిపల్లాసోతి ఆహ ‘‘యే తుమ్హే’’తి. హీతి సచ్చం. యంనిపాతోతి యంఇతి నిపాతో యదిసద్దస్స అత్థే పవత్తతీతి యోజనా. ఆచరియా ఏవాతి ఏవసద్దేన ఆచరియమత్తభావం పటిక్ఖిపతి. హీతి సచ్చం. సోతి అవస్సికో. తన్తి ఛబ్బస్సం. నిస్సాయ వచ్ఛతీతి అవస్సికస్స చతువస్సకాలే ఛబ్బస్సస్స దసవస్సికత్తా తం నిస్సాయ వసతి. ఉపజ్ఝాయమత్తం దస్సేన్తో ఆహ ‘‘ఉపజ్ఝాయస్సా’’తిఆది. మహన్తతరాతి అత్తనో వుడ్ఢతరా. ఉపజ్ఝాయస్స మత్తం పమాణమేతేసన్తి ఉపజ్ఝాయమత్తా.
248. ‘‘Yena sippenā’’tiādinā abhi adhikaṃ jīvanti anenāti abhijīvanaṃ, kiṃtaṃ? Sippanti atthaṃ dasseti. Tassāti sippassa . Idhāti imasmiṃ sāsane. Yaṃsaddo vacanavipallāsoti āha ‘‘ye tumhe’’ti. Hīti saccaṃ. Yaṃnipātoti yaṃiti nipāto yadisaddassa atthe pavattatīti yojanā. Ācariyā evāti evasaddena ācariyamattabhāvaṃ paṭikkhipati. Hīti saccaṃ. Soti avassiko. Tanti chabbassaṃ. Nissāya vacchatīti avassikassa catuvassakāle chabbassassa dasavassikattā taṃ nissāya vasati. Upajjhāyamattaṃ dassento āha ‘‘upajjhāyassā’’tiādi. Mahantatarāti attano vuḍḍhatarā. Upajjhāyassa mattaṃ pamāṇametesanti upajjhāyamattā.
౨౪౯. పాదతో నిక్ఖన్తేన ఖీలసదిసేన మంసేన పవత్తో ఆబాధో పాదఖీలాబాధోతి వచనత్థం దస్సేన్తో ఆహ ‘‘పాదతో’’తిఆది. పాదతో నిక్ఖన్తన్తి సమ్బన్ధో.
249. Pādato nikkhantena khīlasadisena maṃsena pavatto ābādho pādakhīlābādhoti vacanatthaṃ dassento āha ‘‘pādato’’tiādi. Pādato nikkhantanti sambandho.
౨౫౧. తిణపాదుకాతిఆదీసు తిణేన కతా పాదుకా తిణపాదుకాతి వచనత్థాదిం దస్సేన్తో ఆహ ‘‘యేన కేనచి తిణేనా’’తిఆది. తం సువిఞ్ఞేయ్యమేవ. ‘‘భూమియం సుప్పతిట్ఠితాతి’’ఆదినా న సఙ్కమితబ్బాతి అసఙ్కమనీయాతి అత్థం దస్సేతి.
251.Tiṇapādukātiādīsu tiṇena katā pādukā tiṇapādukāti vacanatthādiṃ dassento āha ‘‘yena kenaci tiṇenā’’tiādi. Taṃ suviññeyyameva. ‘‘Bhūmiyaṃ suppatiṭṭhitāti’’ādinā na saṅkamitabbāti asaṅkamanīyāti atthaṃ dasseti.
౨౫౨. అఙ్గజాతేనేవాతి అత్తనో అఙ్గజాతేన ఏవ. అఙ్గజాతన్తి గావీనం అఙ్గజాతం. ఓగాహేత్వాతి ఏత్థ ఓత్యూపసగ్గో దళ్హత్థోతి ఆహ ‘‘దళ్హం గహేత్వా’’తి.
252.Aṅgajātenevāti attano aṅgajātena eva. Aṅgajātanti gāvīnaṃ aṅgajātaṃ. Ogāhetvāti ettha otyūpasaggo daḷhatthoti āha ‘‘daḷhaṃ gahetvā’’ti.
Related texts:
తిపిటక (మూల) • Tipiṭaka (Mūla) / వినయపిటక • Vinayapiṭaka / మహావగ్గపాళి • Mahāvaggapāḷi
౧౫౧. అజ్ఝారామే ఉపాహనపటిక్ఖేపో • 151. Ajjhārāme upāhanapaṭikkhepo
౧౫౨. కట్ఠపాదుకాదిపటిక్ఖేపో • 152. Kaṭṭhapādukādipaṭikkhepo
అట్ఠకథా • Aṭṭhakathā / వినయపిటక (అట్ఠకథా) • Vinayapiṭaka (aṭṭhakathā) / మహావగ్గ-అట్ఠకథా • Mahāvagga-aṭṭhakathā / అజ్ఝారామేఉపాహనపటిక్ఖేపకథా • Ajjhārāmeupāhanapaṭikkhepakathā
టీకా • Tīkā / వినయపిటక (టీకా) • Vinayapiṭaka (ṭīkā) / సారత్థదీపనీ-టీకా • Sāratthadīpanī-ṭīkā
అజ్ఝారామే ఉపాహనపటిక్ఖేపకథావణ్ణనా • Ajjhārāme upāhanapaṭikkhepakathāvaṇṇanā
కట్ఠపాదుకాదిపటిక్ఖేపకథావణ్ణనా • Kaṭṭhapādukādipaṭikkhepakathāvaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / విమతివినోదనీ-టీకా • Vimativinodanī-ṭīkā / అజ్ఝారామేఉపాహనపటిక్ఖేపకథాదివణ్ణనా • Ajjhārāmeupāhanapaṭikkhepakathādivaṇṇanā