| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༥༡. ཨཛ྄ཛྷཱརཱམེ ཨུཔཱཧནཔཊིཀྑེཔོ
151. Ajjhārāme upāhanapaṭikkhepo
༢༤༨. ཏེན ཁོ པན སམཡེན བྷགཝཱ ཨཛ྄ཛྷོཀཱསེ ཨནུཔཱཧནོ ཙངྐམཏི། སཏྠཱ ཨནུཔཱཧནོ ཙངྐམཏཱིཏི, ཐེརཱཔི བྷིཀྑཱུ ཨནུཔཱཧནཱ ཙངྐམནྟི། ཚབྦགྒིཡཱ བྷིཀྑཱུ, སཏྠརི ཨནུཔཱཧནེ ཙངྐམམཱནེ, ཐེརེསུཔི བྷིཀྑཱུསུ ཨནུཔཱཧནེསུ ཙངྐམམཱནེསུ, སཨུཔཱཧནཱ ཙངྐམནྟི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ, སཏྠརི ཨནུཔཱཧནེ ཙངྐམམཱནེ, ཐེརེསུཔི བྷིཀྑཱུསུ ཨནུཔཱཧནེསུ ཙངྐམམཱནེསུ, སཨུཔཱཧནཱ ཙངྐམིསྶནྟཱི’’ཏི། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར, བྷིཀྑཝེ, ཚབྦགྒིཡཱ བྷིཀྑཱུ, སཏྠརི ཨནུཔཱཧནེ ཙངྐམམཱནེ, ཐེརེསུཔི བྷིཀྑཱུསུ ཨནུཔཱཧནེསུ ཙངྐམམཱནེསུ, སཨུཔཱཧནཱ ཙངྐམནྟཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ‘‘ཀཐཉྷི ནཱམ ཏེ, བྷིཀྑཝེ, མོགྷཔུརིསཱ, སཏྠརི ཨནུཔཱཧནེ ཙངྐམམཱནེ, ཐེརེསུཔི བྷིཀྑཱུསུ ཨནུཔཱཧནེསུ ཙངྐམམཱནེསུ, སཨུཔཱཧནཱ ཙངྐམིསྶནྟི། ཨིམེ ཧི ནཱམ, བྷིཀྑཝེ , གིཧཱི ཨོདཱཏཝཏྠཝསནཀཱ ཨབྷིཛཱིཝནིཀསྶ སིཔྤསྶ ཀཱརཎཱ ཨཱཙརིཡེསུ སགཱརཝཱ སཔྤཏིསྶཱ སབྷཱགཝུཏྟིཀཱ ཝིཧརིསྶནྟི། ཨིདྷ ཁོ ཏཾ, བྷིཀྑཝེ, སོབྷེཐ, ཡཾ ཏུམྷེ ཨེཝཾ སྭཱཀྑཱཏེ དྷམྨཝིནཡེ པབྦཛིཏཱ སམཱནཱ ཨཱཙརིཡེསུ ཨཱཙརིཡམཏྟེསུ ཨུཔཛ྄ཛྷཱཡེསུ ཨུཔཛ྄ཛྷཱཡམཏྟེསུ ཨགཱརཝཱ ཨཔྤཏིསྶཱ ཨསབྷཱགཝུཏྟིཀཱ 1 ཝིཧརེཡྻཱཐ། ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ན, བྷིཀྑཝེ, ཨཱཙརིཡེསུ ཨཱཙརིཡམཏྟེསུ ཨུཔཛ྄ཛྷཱཡེསུ ཨུཔཛ྄ཛྷཱཡམཏྟེསུ ཨནུཔཱཧནེསུ ཙངྐམམཱནེསུ སཨུཔཱཧནེན ཙངྐམིཏབྦཾ། ཡོ ཙངྐམེཡྻ, ཨཱཔཏྟི དུཀྐཊསྶ ། ན ཙ, བྷིཀྑཝེ, ཨཛ྄ཛྷཱརཱམེ ཨུཔཱཧནཱ དྷཱརེཏབྦཱ། ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི།
248. Tena kho pana samayena bhagavā ajjhokāse anupāhano caṅkamati. Satthā anupāhano caṅkamatīti, therāpi bhikkhū anupāhanā caṅkamanti. Chabbaggiyā bhikkhū, satthari anupāhane caṅkamamāne, theresupi bhikkhūsu anupāhanesu caṅkamamānesu, saupāhanā caṅkamanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū, satthari anupāhane caṅkamamāne, theresupi bhikkhūsu anupāhanesu caṅkamamānesu, saupāhanā caṅkamissantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū, satthari anupāhane caṅkamamāne, theresupi bhikkhūsu anupāhanesu caṅkamamānesu, saupāhanā caṅkamantī’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā, satthari anupāhane caṅkamamāne, theresupi bhikkhūsu anupāhanesu caṅkamamānesu, saupāhanā caṅkamissanti. Ime hi nāma, bhikkhave , gihī odātavatthavasanakā abhijīvanikassa sippassa kāraṇā ācariyesu sagāravā sappatissā sabhāgavuttikā viharissanti. Idha kho taṃ, bhikkhave, sobhetha, yaṃ tumhe evaṃ svākkhāte dhammavinaye pabbajitā samānā ācariyesu ācariyamattesu upajjhāyesu upajjhāyamattesu agāravā appatissā asabhāgavuttikā 2 vihareyyātha. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, ācariyesu ācariyamattesu upajjhāyesu upajjhāyamattesu anupāhanesu caṅkamamānesu saupāhanena caṅkamitabbaṃ. Yo caṅkameyya, āpatti dukkaṭassa . Na ca, bhikkhave, ajjhārāme upāhanā dhāretabbā. Yo dhāreyya, āpatti dukkaṭassā’’ti.
༢༤༩. ཏེན ཁོ པན སམཡེན ཨཉྙཏརསྶ བྷིཀྑུནོ པཱདཁིལཱབཱདྷོ ཧོཏི། ཏཾ བྷིཀྑཱུ པརིགྒཧེཏྭཱ ཨུཙྩཱརམྤི པསྶཱཝམྤི ནིཀྑཱམེནྟི། ཨདྡསཱ ཁོ བྷགཝཱ སེནཱསནཙཱརིཀཾ ཨཱཧིཎྜནྟོ ཏེ བྷིཀྑཱུ ཏཾ བྷིཀྑུཾ པརིགྒཧེཏྭཱ ཨུཙྩཱརམྤི པསྶཱཝམྤི ནིཀྑཱམེནྟེ, དིསྭཱན ཡེན ཏེ བྷིཀྑཱུ ཏེནུཔསངྐམི, ཨུཔསངྐམིཏྭཱ ཏེ བྷིཀྑཱུ ཨེཏདཝོཙ – ‘‘ཀིཾ ཨིམསྶ, བྷིཀྑཝེ, བྷིཀྑུནོ ཨཱབཱདྷོ’’ཏི? ‘‘ཨིམསྶ, བྷནྟེ, ཨཱཡསྨཏོ པཱདཁིལཱབཱདྷོ; ཨིམཾ མཡཾ པརིགྒཧེཏྭཱ ཨུཙྩཱརམྤི པསྶཱཝམྤི ནིཀྑཱམེམཱ’’ཏི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཡསྶ པཱདཱ ཝཱ དུཀྑཱ, པཱདཱ ཝཱ ཕལིཏཱ, པཱདཁིལོ ཝཱ ཨཱབཱདྷོ 3 ཨུཔཱཧནཾ དྷཱརེཏུ’’ནྟི།
249. Tena kho pana samayena aññatarassa bhikkhuno pādakhilābādho hoti. Taṃ bhikkhū pariggahetvā uccārampi passāvampi nikkhāmenti. Addasā kho bhagavā senāsanacārikaṃ āhiṇḍanto te bhikkhū taṃ bhikkhuṃ pariggahetvā uccārampi passāvampi nikkhāmente, disvāna yena te bhikkhū tenupasaṅkami, upasaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato pādakhilābādho; imaṃ mayaṃ pariggahetvā uccārampi passāvampi nikkhāmemā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa pādā vā dukkhā, pādā vā phalitā, pādakhilo vā ābādho 4 upāhanaṃ dhāretu’’nti.
ཏེན ཁོ པན སམཡེན བྷིཀྑཱུ ཨདྷོཏེཧི པཱདེཧི མཉྩམྤི པཱིཋམྤི ཨབྷིརུཧནྟི; ཙཱིཝརམྤི སེནཱསནམྤི དུསྶཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ‘ཨིདཱནི མཉྩཾ ཝཱ པཱིཋཾ ཝཱ ཨབྷིརུཧིསྶཱམཱི’’ཏི ཨུཔཱཧནཾ དྷཱརེཏུནྟི།
Tena kho pana samayena bhikkhū adhotehi pādehi mañcampi pīṭhampi abhiruhanti; cīvarampi senāsanampi dussati. Bhagavato etamatthaṃ ārocesuṃ. Anujānāmi, bhikkhave, ‘idāni mañcaṃ vā pīṭhaṃ vā abhiruhissāmī’’ti upāhanaṃ dhāretunti.
ཏེན ཁོ པན སམཡེན བྷིཀྑཱུ རཏྟིཡཱ ཨུཔོསཐགྒམྤི སནྣིསཛྫམྤི གཙྪནྟཱ ཨནྡྷཀཱརེ ཁཱཎུམྤི ཀཎྚཀམྤི ཨཀྐམནྟི; པཱདཱ དུཀྑཱ ཧོནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཛ྄ཛྷཱརཱམེ ཨུཔཱཧནཾ དྷཱརེཏུཾ, ཨུཀྐཾ, པདཱིཔཾ, ཀཏྟརདཎྜནྟི།
Tena kho pana samayena bhikkhū rattiyā uposathaggampi sannisajjampi gacchantā andhakāre khāṇumpi kaṇṭakampi akkamanti; pādā dukkhā honti. Bhagavato etamatthaṃ ārocesuṃ. Anujānāmi, bhikkhave, ajjhārāme upāhanaṃ dhāretuṃ, ukkaṃ, padīpaṃ, kattaradaṇḍanti.
ཨཛ྄ཛྷཱརཱམེ ཨུཔཱཧནཔཊིཀྑེཔོ ནིཊྛིཏོ།
Ajjhārāme upāhanapaṭikkhepo niṭṭhito.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཨཛ྄ཛྷཱརཱམེཨུཔཱཧནཔཊིཀྑེཔཀཐཱ • Ajjhārāmeupāhanapaṭikkhepakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨཛ྄ཛྷཱརཱམེ ཨུཔཱཧནཔཊིཀྑེཔཀཐཱཝཎྞནཱ • Ajjhārāme upāhanapaṭikkhepakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༥༡. ཨཛ྄ཛྷཱརཱམེ ཨུཔཱཧནཔཊིཀྑེཔཀཐཱ • 151. Ajjhārāme upāhanapaṭikkhepakathā
