| Library / Tipiṭaka / तिपिटक • Tipiṭaka / महावग्ग-अट्ठकथा • Mahāvagga-aṭṭhakathā |
अज्झारामेउपाहनपटिक्खेपकथा
Ajjhārāmeupāhanapaṭikkhepakathā
२४८. अभिजीवनिकस्साति येन सिप्पेन अभिजीवन्ति, जीविकं कप्पेन्ति, तस्स कारणाति अत्थो। इध खो तं भिक्खवेति एत्थ तन्ति निपातमत्तं, इध खो भिक्खवे सोभेय्याथाति अत्थो। यं तुम्हेति ये तुम्हे। अथ वा यदि तुम्हेति वुत्तं होति। यदिसद्दस्स हि अत्थे अयं निपातो। आचरियेसूतिआदिम्हि पब्बज्जाचरियो, उपसम्पदाचरियो, निस्सयाचारियो, उद्देसाचरियोति इमे चत्तारोपि इध आचरिया एव। अवस्सिकस्स छब्बस्सो आचरियमत्तो। सो हि चतुवस्सकाले तं निस्साय वच्छति; एवं एकवस्सस्स सत्तवस्सो, दुवस्सस्स अट्ठवस्सो, तिवस्सस्स नववस्सो, चतुवस्सस्स दसवस्सो। इमेपि आचरियमत्ता एव । उपज्झायस्स सन्दिट्ठसम्भत्ता पन सहायभिक्खू, ये वा पन केचि दसहि वस्सेहि महन्ततरा ते सब्बेपि उपज्झायमत्ता नाम। एत्तकेसु भिक्खूसु अनुपाहनेसु चङ्कमन्तेसु सउपाहनस्स चङ्कमतो आपत्ति।
248.Abhijīvanikassāti yena sippena abhijīvanti, jīvikaṃ kappenti, tassa kāraṇāti attho. Idha kho taṃ bhikkhaveti ettha tanti nipātamattaṃ, idha kho bhikkhave sobheyyāthāti attho. Yaṃ tumheti ye tumhe. Atha vā yadi tumheti vuttaṃ hoti. Yadisaddassa hi atthe ayaṃ nipāto. Ācariyesūtiādimhi pabbajjācariyo, upasampadācariyo, nissayācāriyo, uddesācariyoti ime cattāropi idha ācariyā eva. Avassikassa chabbasso ācariyamatto. So hi catuvassakāle taṃ nissāya vacchati; evaṃ ekavassassa sattavasso, duvassassa aṭṭhavasso, tivassassa navavasso, catuvassassa dasavasso. Imepi ācariyamattā eva . Upajjhāyassa sandiṭṭhasambhattā pana sahāyabhikkhū, ye vā pana keci dasahi vassehi mahantatarā te sabbepi upajjhāyamattā nāma. Ettakesu bhikkhūsu anupāhanesu caṅkamantesu saupāhanassa caṅkamato āpatti.
२४९. पादखीलाबाधो नाम पादतो खीलसदिसं मंसं निक्खन्तं होति।
249.Pādakhīlābādho nāma pādato khīlasadisaṃ maṃsaṃ nikkhantaṃ hoti.
२५१. तिणपादुकाति येन केनचि तिणेन कतपादुका। हिन्तालपादुकाति खज्जूरीपत्तेहि कतपादुका; हिन्तालपत्तेहिपि न वट्टतियेव। कमलपादुकाति कमलतिणं नाम अत्थि, तेन कतपादुका; उसीरपादुकातिपि वदन्ति। कम्बलपादुकाति उण्णाहि कतपादुका। असङ्कमनीयाति भूमियं सुप्पतिट्ठिता निच्चला असंहारिया।
251.Tiṇapādukāti yena kenaci tiṇena katapādukā. Hintālapādukāti khajjūrīpattehi katapādukā; hintālapattehipi na vaṭṭatiyeva. Kamalapādukāti kamalatiṇaṃ nāma atthi, tena katapādukā; usīrapādukātipi vadanti. Kambalapādukāti uṇṇāhi katapādukā. Asaṅkamanīyāti bhūmiyaṃ suppatiṭṭhitā niccalā asaṃhāriyā.
२५२. अङ्गजातं छुपन्तीति अङ्गजातेनेव अङ्गजातं छुपन्ति। ओगाहेत्वा मारेन्तीति अन्तो उदके दळ्हं गहेत्वा मारेन्ति।
252.Aṅgajātaṃ chupantīti aṅgajāteneva aṅgajātaṃ chupanti. Ogāhetvā mārentīti anto udake daḷhaṃ gahetvā mārenti.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi
१५१. अज्झारामे उपाहनपटिक्खेपो • 151. Ajjhārāme upāhanapaṭikkhepo
१५२. कट्ठपादुकादिपटिक्खेपो • 152. Kaṭṭhapādukādipaṭikkhepo
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā
अज्झारामे उपाहनपटिक्खेपकथावण्णना • Ajjhārāme upāhanapaṭikkhepakathāvaṇṇanā
कट्ठपादुकादिपटिक्खेपकथावण्णना • Kaṭṭhapādukādipaṭikkhepakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / अज्झारामेउपाहनपटिक्खेपकथादिवण्णना • Ajjhārāmeupāhanapaṭikkhepakathādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १५१. अज्झारामे उपाहनपटिक्खेपकथा • 151. Ajjhārāme upāhanapaṭikkhepakathā
