| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಅಜ್ಝಾರಾಮೇಉಪಾಹನಪಟಿಕ್ಖೇಪಕಥಾ
Ajjhārāmeupāhanapaṭikkhepakathā
೨೪೮. ಅಭಿಜೀವನಿಕಸ್ಸಾತಿ ಯೇನ ಸಿಪ್ಪೇನ ಅಭಿಜೀವನ್ತಿ, ಜೀವಿಕಂ ಕಪ್ಪೇನ್ತಿ, ತಸ್ಸ ಕಾರಣಾತಿ ಅತ್ಥೋ। ಇಧ ಖೋ ತಂ ಭಿಕ್ಖವೇತಿ ಏತ್ಥ ತನ್ತಿ ನಿಪಾತಮತ್ತಂ, ಇಧ ಖೋ ಭಿಕ್ಖವೇ ಸೋಭೇಯ್ಯಾಥಾತಿ ಅತ್ಥೋ। ಯಂ ತುಮ್ಹೇತಿ ಯೇ ತುಮ್ಹೇ। ಅಥ ವಾ ಯದಿ ತುಮ್ಹೇತಿ ವುತ್ತಂ ಹೋತಿ। ಯದಿಸದ್ದಸ್ಸ ಹಿ ಅತ್ಥೇ ಅಯಂ ನಿಪಾತೋ। ಆಚರಿಯೇಸೂತಿಆದಿಮ್ಹಿ ಪಬ್ಬಜ್ಜಾಚರಿಯೋ, ಉಪಸಮ್ಪದಾಚರಿಯೋ, ನಿಸ್ಸಯಾಚಾರಿಯೋ, ಉದ್ದೇಸಾಚರಿಯೋತಿ ಇಮೇ ಚತ್ತಾರೋಪಿ ಇಧ ಆಚರಿಯಾ ಏವ। ಅವಸ್ಸಿಕಸ್ಸ ಛಬ್ಬಸ್ಸೋ ಆಚರಿಯಮತ್ತೋ। ಸೋ ಹಿ ಚತುವಸ್ಸಕಾಲೇ ತಂ ನಿಸ್ಸಾಯ ವಚ್ಛತಿ; ಏವಂ ಏಕವಸ್ಸಸ್ಸ ಸತ್ತವಸ್ಸೋ, ದುವಸ್ಸಸ್ಸ ಅಟ್ಠವಸ್ಸೋ, ತಿವಸ್ಸಸ್ಸ ನವವಸ್ಸೋ, ಚತುವಸ್ಸಸ್ಸ ದಸವಸ್ಸೋ। ಇಮೇಪಿ ಆಚರಿಯಮತ್ತಾ ಏವ । ಉಪಜ್ಝಾಯಸ್ಸ ಸನ್ದಿಟ್ಠಸಮ್ಭತ್ತಾ ಪನ ಸಹಾಯಭಿಕ್ಖೂ, ಯೇ ವಾ ಪನ ಕೇಚಿ ದಸಹಿ ವಸ್ಸೇಹಿ ಮಹನ್ತತರಾ ತೇ ಸಬ್ಬೇಪಿ ಉಪಜ್ಝಾಯಮತ್ತಾ ನಾಮ। ಏತ್ತಕೇಸು ಭಿಕ್ಖೂಸು ಅನುಪಾಹನೇಸು ಚಙ್ಕಮನ್ತೇಸು ಸಉಪಾಹನಸ್ಸ ಚಙ್ಕಮತೋ ಆಪತ್ತಿ।
248.Abhijīvanikassāti yena sippena abhijīvanti, jīvikaṃ kappenti, tassa kāraṇāti attho. Idha kho taṃ bhikkhaveti ettha tanti nipātamattaṃ, idha kho bhikkhave sobheyyāthāti attho. Yaṃ tumheti ye tumhe. Atha vā yadi tumheti vuttaṃ hoti. Yadisaddassa hi atthe ayaṃ nipāto. Ācariyesūtiādimhi pabbajjācariyo, upasampadācariyo, nissayācāriyo, uddesācariyoti ime cattāropi idha ācariyā eva. Avassikassa chabbasso ācariyamatto. So hi catuvassakāle taṃ nissāya vacchati; evaṃ ekavassassa sattavasso, duvassassa aṭṭhavasso, tivassassa navavasso, catuvassassa dasavasso. Imepi ācariyamattā eva . Upajjhāyassa sandiṭṭhasambhattā pana sahāyabhikkhū, ye vā pana keci dasahi vassehi mahantatarā te sabbepi upajjhāyamattā nāma. Ettakesu bhikkhūsu anupāhanesu caṅkamantesu saupāhanassa caṅkamato āpatti.
೨೪೯. ಪಾದಖೀಲಾಬಾಧೋ ನಾಮ ಪಾದತೋ ಖೀಲಸದಿಸಂ ಮಂಸಂ ನಿಕ್ಖನ್ತಂ ಹೋತಿ।
249.Pādakhīlābādho nāma pādato khīlasadisaṃ maṃsaṃ nikkhantaṃ hoti.
೨೫೧. ತಿಣಪಾದುಕಾತಿ ಯೇನ ಕೇನಚಿ ತಿಣೇನ ಕತಪಾದುಕಾ। ಹಿನ್ತಾಲಪಾದುಕಾತಿ ಖಜ್ಜೂರೀಪತ್ತೇಹಿ ಕತಪಾದುಕಾ; ಹಿನ್ತಾಲಪತ್ತೇಹಿಪಿ ನ ವಟ್ಟತಿಯೇವ। ಕಮಲಪಾದುಕಾತಿ ಕಮಲತಿಣಂ ನಾಮ ಅತ್ಥಿ, ತೇನ ಕತಪಾದುಕಾ; ಉಸೀರಪಾದುಕಾತಿಪಿ ವದನ್ತಿ। ಕಮ್ಬಲಪಾದುಕಾತಿ ಉಣ್ಣಾಹಿ ಕತಪಾದುಕಾ। ಅಸಙ್ಕಮನೀಯಾತಿ ಭೂಮಿಯಂ ಸುಪ್ಪತಿಟ್ಠಿತಾ ನಿಚ್ಚಲಾ ಅಸಂಹಾರಿಯಾ।
251.Tiṇapādukāti yena kenaci tiṇena katapādukā. Hintālapādukāti khajjūrīpattehi katapādukā; hintālapattehipi na vaṭṭatiyeva. Kamalapādukāti kamalatiṇaṃ nāma atthi, tena katapādukā; usīrapādukātipi vadanti. Kambalapādukāti uṇṇāhi katapādukā. Asaṅkamanīyāti bhūmiyaṃ suppatiṭṭhitā niccalā asaṃhāriyā.
೨೫೨. ಅಙ್ಗಜಾತಂ ಛುಪನ್ತೀತಿ ಅಙ್ಗಜಾತೇನೇವ ಅಙ್ಗಜಾತಂ ಛುಪನ್ತಿ। ಓಗಾಹೇತ್ವಾ ಮಾರೇನ್ತೀತಿ ಅನ್ತೋ ಉದಕೇ ದಳ್ಹಂ ಗಹೇತ್ವಾ ಮಾರೇನ್ತಿ।
252.Aṅgajātaṃ chupantīti aṅgajāteneva aṅgajātaṃ chupanti. Ogāhetvā mārentīti anto udake daḷhaṃ gahetvā mārenti.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೧೫೧. ಅಜ್ಝಾರಾಮೇ ಉಪಾಹನಪಟಿಕ್ಖೇಪೋ • 151. Ajjhārāme upāhanapaṭikkhepo
೧೫೨. ಕಟ್ಠಪಾದುಕಾದಿಪಟಿಕ್ಖೇಪೋ • 152. Kaṭṭhapādukādipaṭikkhepo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā
ಅಜ್ಝಾರಾಮೇ ಉಪಾಹನಪಟಿಕ್ಖೇಪಕಥಾವಣ್ಣನಾ • Ajjhārāme upāhanapaṭikkhepakathāvaṇṇanā
ಕಟ್ಠಪಾದುಕಾದಿಪಟಿಕ್ಖೇಪಕಥಾವಣ್ಣನಾ • Kaṭṭhapādukādipaṭikkhepakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಜ್ಝಾರಾಮೇಉಪಾಹನಪಟಿಕ್ಖೇಪಕಥಾದಿವಣ್ಣನಾ • Ajjhārāmeupāhanapaṭikkhepakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೫೧. ಅಜ್ಝಾರಾಮೇ ಉಪಾಹನಪಟಿಕ್ಖೇಪಕಥಾ • 151. Ajjhārāme upāhanapaṭikkhepakathā
