| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
අජ්‌ඣාරාමෙඋපාහනපටික්‌ඛෙපකථා
Ajjhārāmeupāhanapaṭikkhepakathā
248. අභිජීවනිකස්‌සාති යෙන සිප්‌පෙන අභිජීවන්‌ති, ජීවිකං කප්‌පෙන්‌ති, තස්‌ස කාරණාති අත්‌ථො. ඉධ ඛො තං භික්‌ඛවෙති එත්‌ථ තන්‌ති නිපාතමත්‌තං, ඉධ ඛො භික්‌ඛවෙ සොභෙය්‍යාථාති අත්‌ථො. යං තුම්‌හෙති යෙ තුම්‌හෙ. අථ වා යදි තුම්‌හෙති වුත්‌තං හොති. යදිසද්‌දස්‌ස හි අත්‌ථෙ අයං නිපාතො. ආචරියෙසූතිආදිම්‌හි පබ්‌බජ්‌ජාචරියො, උපසම්‌පදාචරියො, නිස්‌සයාචාරියො, උද්‌දෙසාචරියොති ඉමෙ චත්‌තාරොපි ඉධ ආචරියා එව. අවස්‌සිකස්‌ස ඡබ්‌බස්‌සො ආචරියමත්‌තො. සො හි චතුවස්‌සකාලෙ තං නිස්‌සාය වච්‌ඡති; එවං එකවස්‌සස්‌ස සත්‌තවස්‌සො, දුවස්‌සස්‌ස අට්‌ඨවස්‌සො, තිවස්‌සස්‌ස නවවස්‌සො, චතුවස්‌සස්‌ස දසවස්‌සො. ඉමෙපි ආචරියමත්‌තා එව . උපජ්‌ඣායස්‌ස සන්‌දිට්‌ඨසම්‌භත්‌තා පන සහායභික්‌ඛූ, යෙ වා පන කෙචි දසහි වස්‌සෙහි මහන්‌තතරා තෙ සබ්‌බෙපි උපජ්‌ඣායමත්‌තා නාම. එත්‌තකෙසු භික්‌ඛූසු අනුපාහනෙසු චඞ්‌කමන්‌තෙසු සඋපාහනස්‌ස චඞ්‌කමතො ආපත්‌ති.
248.Abhijīvanikassāti yena sippena abhijīvanti, jīvikaṃ kappenti, tassa kāraṇāti attho. Idha kho taṃ bhikkhaveti ettha tanti nipātamattaṃ, idha kho bhikkhave sobheyyāthāti attho. Yaṃ tumheti ye tumhe. Atha vā yadi tumheti vuttaṃ hoti. Yadisaddassa hi atthe ayaṃ nipāto. Ācariyesūtiādimhi pabbajjācariyo, upasampadācariyo, nissayācāriyo, uddesācariyoti ime cattāropi idha ācariyā eva. Avassikassa chabbasso ācariyamatto. So hi catuvassakāle taṃ nissāya vacchati; evaṃ ekavassassa sattavasso, duvassassa aṭṭhavasso, tivassassa navavasso, catuvassassa dasavasso. Imepi ācariyamattā eva . Upajjhāyassa sandiṭṭhasambhattā pana sahāyabhikkhū, ye vā pana keci dasahi vassehi mahantatarā te sabbepi upajjhāyamattā nāma. Ettakesu bhikkhūsu anupāhanesu caṅkamantesu saupāhanassa caṅkamato āpatti.
249. පාදඛීලාබාධො නාම පාදතො ඛීලසදිසං මංසං නික්‌ඛන්‌තං හොති.
249.Pādakhīlābādho nāma pādato khīlasadisaṃ maṃsaṃ nikkhantaṃ hoti.
251. තිණපාදුකාති යෙන කෙනචි තිණෙන කතපාදුකා. හින්‌තාලපාදුකාති ඛජ්‌ජූරීපත්‌තෙහි කතපාදුකා; හින්‌තාලපත්‌තෙහිපි න වට්‌ටතියෙව. කමලපාදුකාති කමලතිණං නාම අත්‌ථි, තෙන කතපාදුකා; උසීරපාදුකාතිපි වදන්‌ති. කම්‌බලපාදුකාති උණ්‌ණාහි කතපාදුකා. අසඞ්‌කමනීයාති භූමියං සුප්‌පතිට්‌ඨිතා නිච්‌චලා අසංහාරියා.
251.Tiṇapādukāti yena kenaci tiṇena katapādukā. Hintālapādukāti khajjūrīpattehi katapādukā; hintālapattehipi na vaṭṭatiyeva. Kamalapādukāti kamalatiṇaṃ nāma atthi, tena katapādukā; usīrapādukātipi vadanti. Kambalapādukāti uṇṇāhi katapādukā. Asaṅkamanīyāti bhūmiyaṃ suppatiṭṭhitā niccalā asaṃhāriyā.
252. අඞ්‌ගජාතං ඡුපන්‌තීති අඞ්‌ගජාතෙනෙව අඞ්‌ගජාතං ඡුපන්‌ති. ඔගාහෙත්‌වා මාරෙන්‌තීති අන්‌තො උදකෙ දළ්‌හං ගහෙත්‌වා මාරෙන්‌ති.
252.Aṅgajātaṃ chupantīti aṅgajāteneva aṅgajātaṃ chupanti. Ogāhetvā mārentīti anto udake daḷhaṃ gahetvā mārenti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
151. අජ්‌ඣාරාමෙ උපාහනපටික්‌ඛෙපො • 151. Ajjhārāme upāhanapaṭikkhepo
152. කට්‌ඨපාදුකාදිපටික්‌ඛෙපො • 152. Kaṭṭhapādukādipaṭikkhepo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
අජ්‌ඣාරාමෙ උපාහනපටික්‌ඛෙපකථාවණ්‌ණනා • Ajjhārāme upāhanapaṭikkhepakathāvaṇṇanā
කට්‌ඨපාදුකාදිපටික්‌ඛෙපකථාවණ්‌ණනා • Kaṭṭhapādukādipaṭikkhepakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අජ්‌ඣාරාමෙඋපාහනපටික්‌ඛෙපකථාදිවණ්‌ණනා • Ajjhārāmeupāhanapaṭikkhepakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 151. අජ්‌ඣාරාමෙ උපාහනපටික්‌ඛෙපකථා • 151. Ajjhārāme upāhanapaṭikkhepakathā
