| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. අජ්‌ඣත්‌තඅනිච්‌චනන්‌දික්‌ඛයසුත්‌තං
3. Ajjhattaaniccanandikkhayasuttaṃ
158. ‘‘චක්‌ඛුං, භික්‌ඛවෙ, යොනිසො මනසි කරොථ; චක්‌ඛානිච්‌චතඤ්‌ච යථාභූතං සමනුපස්‌සථ. චක්‌ඛුං, භික්‌ඛවෙ, භික්‌ඛු යොනිසො මනසිකරොන්‌තො, චක්‌ඛානිච්‌චතඤ්‌ච යථාභූතං සමනුපස්‌සන්‌තො චක්‌ඛුස්‌මිම්‌පි නිබ්‌බින්‌දති. නන්‌දික්‌ඛයා රාගක්‌ඛයො; රාගක්‌ඛයා නන්‌දික්‌ඛයො. නන්‌දිරාගක්‌ඛයා චිත්‌තං සුවිමුත්‌තන්‌ති වුච්‌චති. සොතං , භික්‌ඛවෙ, යොනිසො මනසි කරොථ… ඝානං… ජිව්‌හං, භික්‌ඛවෙ, යොනිසො මනසි කරොථ; ජිව්‌හානිච්‌චතඤ්‌ච යථාභූතං සමනුපස්‌සථ. ජිව්‌හං, භික්‌ඛවෙ, භික්‌ඛු යොනිසො මනසිකරොන්‌තො, ජිව්‌හානිච්‌චතඤ්‌ච යථාභූතං සමනුපස්‌සන්‌තො ජිව්‌හායපි නිබ්‌බින්‌දති. නන්‌දික්‌ඛයා රාගක්‌ඛයො; රාගක්‌ඛයා නන්‌දික්‌ඛයො. නන්‌දිරාගක්‌ඛයා චිත්‌තං සුවිමුත්‌තන්‌ති වුච්‌චති. කායං… මනං, භික්‌ඛවෙ, යොනිසො මනසි කරොථ; මනානිච්‌චතඤ්‌ච යථාභූතං සමනුපස්‌සථ. මනං, භික්‌ඛවෙ, භික්‌ඛු යොනිසො මනසිකරොන්‌තො , මනානිච්‌චතඤ්‌ච යථාභූතං සමනුපස්‌සන්‌තො මනස්‌මිම්‌පි නිබ්‌බින්‌දති. නන්‌දික්‌ඛයා රාගක්‌ඛයො; රාගක්‌ඛයා නන්‌දික්‌ඛයො. නන්‌දිරාගක්‌ඛයා චිත්‌තං සුවිමුත්‌තන්‌ති වුච්‌චතී’’ති. තතියං.
158. ‘‘Cakkhuṃ, bhikkhave, yoniso manasi karotha; cakkhāniccatañca yathābhūtaṃ samanupassatha. Cakkhuṃ, bhikkhave, bhikkhu yoniso manasikaronto, cakkhāniccatañca yathābhūtaṃ samanupassanto cakkhusmimpi nibbindati. Nandikkhayā rāgakkhayo; rāgakkhayā nandikkhayo. Nandirāgakkhayā cittaṃ suvimuttanti vuccati. Sotaṃ , bhikkhave, yoniso manasi karotha… ghānaṃ… jivhaṃ, bhikkhave, yoniso manasi karotha; jivhāniccatañca yathābhūtaṃ samanupassatha. Jivhaṃ, bhikkhave, bhikkhu yoniso manasikaronto, jivhāniccatañca yathābhūtaṃ samanupassanto jivhāyapi nibbindati. Nandikkhayā rāgakkhayo; rāgakkhayā nandikkhayo. Nandirāgakkhayā cittaṃ suvimuttanti vuccati. Kāyaṃ… manaṃ, bhikkhave, yoniso manasi karotha; manāniccatañca yathābhūtaṃ samanupassatha. Manaṃ, bhikkhave, bhikkhu yoniso manasikaronto , manāniccatañca yathābhūtaṃ samanupassanto manasmimpi nibbindati. Nandikkhayā rāgakkhayo; rāgakkhayā nandikkhayo. Nandirāgakkhayā cittaṃ suvimuttanti vuccatī’’ti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-4. අජ්‌ඣත්‌තනන්‌දික්‌ඛයසුත්‌තාදිවණ්‌ණනා • 1-4. Ajjhattanandikkhayasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-4. අජ්‌ඣත්‌තනන්‌දික්‌ඛයසුත්‌තාදිවණ්‌ණනා • 1-4. Ajjhattanandikkhayasuttādivaṇṇanā
