| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. අජ්‌ඣත්‌තදුක්‌ඛාතීතානාගතසුත්‌තං
8. Ajjhattadukkhātītānāgatasuttaṃ
8. ‘‘චක්‌ඛුං , භික්‌ඛවෙ, දුක්‌ඛං අතීතානාගතං; කො පන වාදො පච්‌චුප්‌පන්‌නස්‌ස! එවං පස්‌සං, භික්‌ඛවෙ, සුතවා අරියසාවකො අතීතස්‌මිං චක්‌ඛුස්‌මිං අනපෙක්‌ඛො හොති; අනාගතං චක්‌ඛුං නාභිනන්‌දති; පච්‌චුප්‌පන්‌නස්‌ස චක්‌ඛුස්‌ස නිබ්‌බිදාය විරාගාය නිරොධාය පටිපන්‌නො හොති. සොතං දුක්‌ඛං…පෙ.… ඝානං දුක්‌ඛං…පෙ.… ජිව්‌හා දුක්‌ඛා අතීතානාගතා; කො පන වාදො පච්‌චුප්‌පන්‌නාය! එවං පස්‌සං, භික්‌ඛවෙ, සුතවා අරියසාවකො අතීතාය ජිව්‌හාය අනපෙක්‌ඛො හොති; අනාගතං ජිව්‌හං නාභිනන්‌දති; පච්‌චුප්‌පන්‌නාය ජිව්‌හාය නිබ්‌බිදාය විරාගාය නිරොධාය පටිපන්‌නො හොති. කායො දුක්‌ඛො…පෙ.… මනො දුක්‌ඛො අතීතානාගතො; කො පන වාදො පච්‌චුප්‌පන්‌නස්‌ස! එවං පස්‌සං, භික්‌ඛවෙ, සුතවා අරියසාවකො අතීතස්‌මිං මනස්‌මිං අනපෙක්‌ඛො හොති; අනාගතං මනං නාභිනන්‌දති; පච්‌චුප්‌පන්‌නස්‌ස මනස්‌ස නිබ්‌බිදාය විරාගාය නිරොධාය පටිපන්‌නො හොතී’’ති. අට්‌ඨමං.
8. ‘‘Cakkhuṃ , bhikkhave, dukkhaṃ atītānāgataṃ; ko pana vādo paccuppannassa! Evaṃ passaṃ, bhikkhave, sutavā ariyasāvako atītasmiṃ cakkhusmiṃ anapekkho hoti; anāgataṃ cakkhuṃ nābhinandati; paccuppannassa cakkhussa nibbidāya virāgāya nirodhāya paṭipanno hoti. Sotaṃ dukkhaṃ…pe… ghānaṃ dukkhaṃ…pe… jivhā dukkhā atītānāgatā; ko pana vādo paccuppannāya! Evaṃ passaṃ, bhikkhave, sutavā ariyasāvako atītāya jivhāya anapekkho hoti; anāgataṃ jivhaṃ nābhinandati; paccuppannāya jivhāya nibbidāya virāgāya nirodhāya paṭipanno hoti. Kāyo dukkho…pe… mano dukkho atītānāgato; ko pana vādo paccuppannassa! Evaṃ passaṃ, bhikkhave, sutavā ariyasāvako atītasmiṃ manasmiṃ anapekkho hoti; anāgataṃ manaṃ nābhinandati; paccuppannassa manassa nibbidāya virāgāya nirodhāya paṭipanno hotī’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7-12. අජ්‌ඣත්‌තානිච්‌චාතීතානාගතසුත්‌තාදිවණ්‌ණනා • 7-12. Ajjhattāniccātītānāgatasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7-12. අජ්‌ඣත්‌තානිච්‌චාතීතානාගතසුත්‌තාදිවණ්‌ණනා • 7-12. Ajjhattāniccātītānāgatasuttādivaṇṇanā
