| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
ஸங்யுத்தனிகாயே
Saṃyuttanikāye
ஸளாயதனவக்³க³-அட்ட²கதா²
Saḷāyatanavagga-aṭṭhakathā
1. ஸளாயதனஸங்யுத்தங்
1. Saḷāyatanasaṃyuttaṃ
1. அனிச்சவக்³கோ³
1. Aniccavaggo
1. அஜ்ஜ²த்தானிச்சஸுத்தவண்ணனா
1. Ajjhattāniccasuttavaṇṇanā
1. ஸளாயதனவக்³க³ஸ்ஸ பட²மே சக்கு²ந்தி த்³வே சக்கூ²னி – ஞாணசக்கு² சேவ மங்ஸசக்கு² ச. தத்த² ஞாணசக்கு² பஞ்சவித⁴ங் – பு³த்³த⁴சக்கு², த⁴ம்மசக்கு², ஸமந்தசக்கு², தி³ப்³ப³சக்கு², பஞ்ஞாசக்கூ²தி. தேஸு பு³த்³த⁴சக்கு² நாம ஆஸயானுஸயஞாணஞ்சேவ இந்த்³ரியபரோபரியத்தஞாணஞ்ச, யங் – ‘‘பு³த்³த⁴சக்கு²னா லோகங் வோலோகெந்தோ’’தி (மஹாவ॰ 9; ம॰ நி॰ 1.283; 2.338) ஆக³தங் . த⁴ம்மசக்கு² நாம ஹெட்டி²மா தயோ மக்³கா³ தீணி ச ப²லானி, யங் – ‘‘விரஜங் வீதமலங் த⁴ம்மசக்கு²ங் உத³பாதீ³’’தி (மஹாவ॰ 16; ம॰ நி॰ 2.395) ஆக³தங். ஸமந்தசக்கு² நாம ஸப்³ப³ஞ்ஞுதஞ்ஞாணங், யங் – ‘‘பாஸாத³மாருய்ஹ ஸமந்தசக்கூ²’’தி (மஹாவ॰ 8; ம॰ நி॰ 1.282; 2.338) ஆக³தங். தி³ப்³ப³சக்கு² நாம ஆலோகப²ரணேன உப்பன்னங் ஞாணங், யங் – ‘‘தி³ப்³பே³ன சக்கு²னா விஸுத்³தே⁴னா’’தி (பாரா॰ 13; ம॰ நி॰ 2.341) ஆக³தங். பஞ்ஞாசக்கு² நாம சதுஸச்சபரிச்சே²த³கஞாணங், யங் – ‘‘சக்கு²ங் உத³பாதீ³’’தி (ஸ॰ நி॰ 5.1081; மஹாவ॰ 15) ஆக³தங்.
1. Saḷāyatanavaggassa paṭhame cakkhunti dve cakkhūni – ñāṇacakkhu ceva maṃsacakkhu ca. Tattha ñāṇacakkhu pañcavidhaṃ – buddhacakkhu, dhammacakkhu, samantacakkhu, dibbacakkhu, paññācakkhūti. Tesu buddhacakkhu nāma āsayānusayañāṇañceva indriyaparopariyattañāṇañca, yaṃ – ‘‘buddhacakkhunā lokaṃ volokento’’ti (mahāva. 9; ma. ni. 1.283; 2.338) āgataṃ . Dhammacakkhu nāma heṭṭhimā tayo maggā tīṇi ca phalāni, yaṃ – ‘‘virajaṃ vītamalaṃ dhammacakkhuṃ udapādī’’ti (mahāva. 16; ma. ni. 2.395) āgataṃ. Samantacakkhu nāma sabbaññutaññāṇaṃ, yaṃ – ‘‘pāsādamāruyha samantacakkhū’’ti (mahāva. 8; ma. ni. 1.282; 2.338) āgataṃ. Dibbacakkhu nāma ālokapharaṇena uppannaṃ ñāṇaṃ, yaṃ – ‘‘dibbena cakkhunā visuddhenā’’ti (pārā. 13; ma. ni. 2.341) āgataṃ. Paññācakkhu nāma catusaccaparicchedakañāṇaṃ, yaṃ – ‘‘cakkhuṃ udapādī’’ti (sa. ni. 5.1081; mahāva. 15) āgataṃ.
மங்ஸசக்கு²பி து³வித⁴ங் – ஸஸம்பா⁴ரசக்கு², பஸாத³சக்கூ²தி. தேஸு ய்வாயங் அக்கி²கூபகே அக்கி²படலேஹி பரிவாரிதோ மங்ஸபிண்டோ³, யத்த² சதஸ்ஸோ தா⁴துயோ வண்ணக³ந்த⁴ரஸோஜா ஸம்ப⁴வோ ஜீவிதங் பா⁴வோ சக்கு²பஸாதோ³ காயபஸாதோ³தி ஸங்கே²பதோ தேரஸ ஸம்பா⁴ரா ஹொந்தி. வித்தா²ரதோ பன சதஸ்ஸோ தா⁴துயோ வண்ணக³ந்த⁴ரஸோஜா ஸம்ப⁴வோதி இமே நவ சதுஸமுட்டா²னவஸேன ச²த்திங்ஸ, ஜீவிதங் பா⁴வோ சக்கு²பஸாதோ³ காயபஸாதோ³தி இமே கம்மஸமுட்டா²னா தாவ சத்தாரோதி சத்தாரீஸ ஸம்பா⁴ரா ஹொந்தி. இத³ங் ஸஸம்பா⁴ரசக்கு² நாம. யங் பனெத்த² ஸேதமண்ட³லபரிச்சி²ன்னேன கண்ஹமண்ட³லேன பரிவாரிதே தி³ட்டி²மண்ட³லே ஸன்னிவிட்ட²ங் ரூபத³ஸ்ஸனஸமத்த²ங் பஸாத³மத்தங், இத³ங் பஸாத³சக்கு² நாம. தஸ்ஸ ததோ பரேஸஞ்ச ஸோதாதீ³னங் வித்தா²ரகதா² விஸுத்³தி⁴மக்³கே³ வுத்தாவ.
Maṃsacakkhupi duvidhaṃ – sasambhāracakkhu, pasādacakkhūti. Tesu yvāyaṃ akkhikūpake akkhipaṭalehi parivārito maṃsapiṇḍo, yattha catasso dhātuyo vaṇṇagandharasojā sambhavo jīvitaṃ bhāvo cakkhupasādo kāyapasādoti saṅkhepato terasa sambhārā honti. Vitthārato pana catasso dhātuyo vaṇṇagandharasojā sambhavoti ime nava catusamuṭṭhānavasena chattiṃsa, jīvitaṃ bhāvo cakkhupasādo kāyapasādoti ime kammasamuṭṭhānā tāva cattāroti cattārīsa sambhārā honti. Idaṃ sasambhāracakkhu nāma. Yaṃ panettha setamaṇḍalaparicchinnena kaṇhamaṇḍalena parivārite diṭṭhimaṇḍale sanniviṭṭhaṃ rūpadassanasamatthaṃ pasādamattaṃ, idaṃ pasādacakkhu nāma. Tassa tato paresañca sotādīnaṃ vitthārakathā visuddhimagge vuttāva.
தத்த² யதி³த³ங் பஸாத³சக்கு², தங் க³ஹெத்வா ப⁴க³வா – சக்கு²ங், பி⁴க்க²வே, அனிச்சந்திஆதி³மாஹ. தத்த² – ‘‘சதூஹி காரணேஹி அனிச்சங் உத³யப்³ப³யவந்ததாயா’’திஆதி³னா நயேன வித்தா²ரகதா² ஹெட்டா² பகாஸிதாயேவ. ஸோதம்பி பஸாத³ஸோதமேவ அதி⁴ப்பேதங், ததா² கா⁴னஜிவ்ஹாகாயா. மனோதி தேபூ⁴மகஸம்மஸனசாரசித்தங். இதி இத³ங் ஸுத்தங் ச²ஸு அஜ்ஜ²த்திகாயதனேஸு தீணி லக்க²ணானி த³ஸ்ஸெத்வா கதி²தே பு³ஜ்ஜ²னகானங் அஜ்ஜா²ஸயேன வுத்தங்.
Tattha yadidaṃ pasādacakkhu, taṃ gahetvā bhagavā – cakkhuṃ, bhikkhave, aniccantiādimāha. Tattha – ‘‘catūhi kāraṇehi aniccaṃ udayabbayavantatāyā’’tiādinā nayena vitthārakathā heṭṭhā pakāsitāyeva. Sotampi pasādasotameva adhippetaṃ, tathā ghānajivhākāyā. Manoti tebhūmakasammasanacāracittaṃ. Iti idaṃ suttaṃ chasu ajjhattikāyatanesu tīṇi lakkhaṇāni dassetvā kathite bujjhanakānaṃ ajjhāsayena vuttaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. அஜ்ஜ²த்தானிச்சஸுத்தங் • 1. Ajjhattāniccasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. அஜ்ஜ²த்தானிச்சஸுத்தவண்ணனா • 1. Ajjhattāniccasuttavaṇṇanā
