| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
সংযুত্তনিকাযে
Saṃyuttanikāye
সল়াযতনৰগ্গটীকা
Saḷāyatanavaggaṭīkā
১. সল়াযতনসংযুত্তং
1. Saḷāyatanasaṃyuttaṃ
১. অনিচ্চৰগ্গো
1. Aniccavaggo
১. অজ্ঝত্তানিচ্চসুত্তৰণ্ণনা
1. Ajjhattāniccasuttavaṇṇanā
১. চক্খতীতি চক্খু, ঞাণং, যথাসভাৰতো আরম্মণস্স জাননেন সমৰিসমং আচিক্খন্তং ৰিয পৰত্ততীতি অত্থো। তথা মংসচক্খু। তম্পি হি রূপদস্সনে চক্খতীতি চক্খু। বুদ্ধানংযেৰ চক্খূতি বুদ্ধচক্খু, অসাধারণতো হি সত্তসন্তানেসু সস্সতুচ্ছেদদিট্ঠি অনুলোমিকঞাণযথাভূতঞাণানঞ্চেৰ কামরাগানুসযাদীনঞ্চ যাথাৰতো ৰিভাৰিতঞাণং আসযানুসযঞাণং ইন্দ্রিযপরোপরিযত্তঞাণঞ্চ। হেট্ঠিমা তযো মগ্গা চতুসচ্চধম্মেসু ৰুত্তাকারেন পৰত্তিযা ধম্মে চক্খূতি ধম্মচক্খু, তথা তেসং ফলানি তংতংপটিপক্খেসু পটিপ্পস্সদ্ধিপহানৰসেন পৰত্তনতো। সমন্ততো সব্বধম্মেসু চক্খুকিচ্চসাধনতো সমন্তচক্খু, সব্বঞ্ঞুতঞ্ঞাণং। দিব্বৰিহারসন্নিস্সযেন লদ্ধব্বতো দেৰানং দিব্বচক্খু ৰিযাতি তং দিব্বচক্খু, অভিঞ্ঞাৰিসেসো। আলোকং ৰড্ঢেত্ৰা রূপদস্সনতো ‘‘আলোকফরণেনা’’তি ৰুত্তং। ‘‘ইদং দুক্খং অরিযসচ্চন্তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদী’’তিআদিনা (সং॰ নি॰ ৫.১০৮১; মহাৰ॰ ১৫) নযেন আগতত্তা চতুসচ্চপরিচ্ছেদকঞাণং ‘‘পঞ্ঞাচক্খূ’’তি ৰুত্তং। তদিদং ‘‘ৰিপস্সনাঞাণ’’ন্তি ৰদন্তি, ‘‘ৰিপস্সনামগ্গফলপচ্চৰেক্খণঞাণানী’’তি অপরে।
1. Cakkhatīti cakkhu, ñāṇaṃ, yathāsabhāvato ārammaṇassa jānanena samavisamaṃ ācikkhantaṃ viya pavattatīti attho. Tathā maṃsacakkhu. Tampi hi rūpadassane cakkhatīti cakkhu. Buddhānaṃyeva cakkhūti buddhacakkhu, asādhāraṇato hi sattasantānesu sassatucchedadiṭṭhi anulomikañāṇayathābhūtañāṇānañceva kāmarāgānusayādīnañca yāthāvato vibhāvitañāṇaṃ āsayānusayañāṇaṃ indriyaparopariyattañāṇañca. Heṭṭhimā tayo maggā catusaccadhammesu vuttākārena pavattiyā dhamme cakkhūti dhammacakkhu, tathā tesaṃ phalāni taṃtaṃpaṭipakkhesu paṭippassaddhipahānavasena pavattanato. Samantato sabbadhammesu cakkhukiccasādhanato samantacakkhu, sabbaññutaññāṇaṃ. Dibbavihārasannissayena laddhabbato devānaṃ dibbacakkhu viyāti taṃ dibbacakkhu, abhiññāviseso. Ālokaṃ vaḍḍhetvā rūpadassanato ‘‘ālokapharaṇenā’’ti vuttaṃ. ‘‘Idaṃ dukkhaṃ ariyasaccanti me, bhikkhave, pubbe ananussutesu dhammesu cakkhuṃ udapādī’’tiādinā (saṃ. ni. 5.1081; mahāva. 15) nayena āgatattā catusaccaparicchedakañāṇaṃ ‘‘paññācakkhū’’ti vuttaṃ. Tadidaṃ ‘‘vipassanāñāṇa’’nti vadanti, ‘‘vipassanāmaggaphalapaccavekkhaṇañāṇānī’’ti apare.
পচ্চযভূতেহি এতেহি অভিসম্ভরীযন্তীতি সম্ভারা, উপত্থম্ভভূতা চতুসমুট্ঠানিকরূপা। সহ সম্ভারেহীতি সসম্ভারং। মহাভূতানং উপাদায পসীদতীতি পসাদো। অক্খিকূপকে অক্খিপটলেহীতি উভোহি অক্খিদলেহি। সম্ভৰোতি আপোধাতুমেৰ সম্ভৰভূতমাহ। ইধ ‘‘তেরস সম্ভারা’’তি ৰুত্তং। অট্ঠসালিনিযং (ধ॰ স॰ অট্ঠ॰ ৫৯৬) পন সণ্ঠানেন সদ্ধিং ‘‘চুদ্দস সম্ভারা’’তি আগতং। তত্থ সণ্ঠানন্তি ৰণ্ণাযতনমেৰ পরিমণ্ডলাদিসণ্ঠানভূতং। ৰিসুং ৰচনং পন নেসং তথাভূতানং অতথাভূতানঞ্চ আপোধাতুৰণ্ণাযতনানং যথাৰুত্তে মংসপিণ্ডে ৰিজ্জমানত্তা। সম্ভৰস্স চতুধাতুনিস্সিতেহি সহ ৰুত্তস্স ধাতুত্তযনিস্সিততা যোজেতব্বা। দিট্ঠিমণ্ডলেতি অভিমুখং ঠিতানং পটিবিম্বপঞ্ঞাযনট্ঠানভূতে চক্খুসঞ্ঞিতায দিট্ঠিযা পৰত্তিট্ঠানভূতে মণ্ডলে। সন্নিৰিট্ঠন্তি এতেন চক্খুপসাদস্স অনেককলাপগতভাৰো দস্সিতো। তথা হি সো সত্ত অক্খিপটলানি অভিব্যাপেত্ৰা ৰত্ততি। যস্মা সো সত্ত অক্খিপটলানি ব্যাপেত্ৰা ঠিতেহি অত্তনো নিস্সযভূতেহি কতূপকারং তংনিস্সিতেহেৰ আযুৰণ্ণাদীহি অনুপালিতপরিৰারিতং তিসন্ততিরূপসমুট্ঠাপকেহি উতুচিত্তাহারেহি উপত্থম্ভিযমানং হুত্ৰা তিট্ঠতি। রূপদস্সনসমত্থন্তি অত্তানং নিস্সায পৰত্তৰিঞ্ঞাণস্স ৰসেন রূপাযতনদস্সনসমত্থং। ৰিত্থারকথাতি তস্স চক্খুনো সোতাদীনঞ্চ হেতুপচ্চযাদিৰসেন চেৰ লক্খণাদিৰসেন চ ৰিত্থারকথা।
Paccayabhūtehi etehi abhisambharīyantīti sambhārā, upatthambhabhūtā catusamuṭṭhānikarūpā. Saha sambhārehīti sasambhāraṃ. Mahābhūtānaṃ upādāya pasīdatīti pasādo. Akkhikūpake akkhipaṭalehīti ubhohi akkhidalehi. Sambhavoti āpodhātumeva sambhavabhūtamāha. Idha ‘‘terasa sambhārā’’ti vuttaṃ. Aṭṭhasāliniyaṃ (dha. sa. aṭṭha. 596) pana saṇṭhānena saddhiṃ ‘‘cuddasa sambhārā’’ti āgataṃ. Tattha saṇṭhānanti vaṇṇāyatanameva parimaṇḍalādisaṇṭhānabhūtaṃ. Visuṃ vacanaṃ pana nesaṃ tathābhūtānaṃ atathābhūtānañca āpodhātuvaṇṇāyatanānaṃ yathāvutte maṃsapiṇḍe vijjamānattā. Sambhavassa catudhātunissitehi saha vuttassa dhātuttayanissitatā yojetabbā. Diṭṭhimaṇḍaleti abhimukhaṃ ṭhitānaṃ paṭibimbapaññāyanaṭṭhānabhūte cakkhusaññitāya diṭṭhiyā pavattiṭṭhānabhūte maṇḍale. Sanniviṭṭhanti etena cakkhupasādassa anekakalāpagatabhāvo dassito. Tathā hi so satta akkhipaṭalāni abhibyāpetvā vattati. Yasmā so satta akkhipaṭalāni byāpetvā ṭhitehi attano nissayabhūtehi katūpakāraṃ taṃnissiteheva āyuvaṇṇādīhi anupālitaparivāritaṃ tisantatirūpasamuṭṭhāpakehi utucittāhārehi upatthambhiyamānaṃ hutvā tiṭṭhati. Rūpadassanasamatthanti attānaṃ nissāya pavattaviññāṇassa vasena rūpāyatanadassanasamatthaṃ. Vitthārakathāti tassa cakkhuno sotādīnañca hetupaccayādivasena ceva lakkhaṇādivasena ca vitthārakathā.
সম্মসনচারচিত্তন্তি ৰিপস্সনায পৰত্তিট্ঠানভূতং ৰিপস্সিতব্বং চিত্তং। কেচি ‘‘ৰিপস্সনুপগতকিরিযমযচিত্ত’’ন্তি ৰদন্তি, তং তেসং মতিমত্তং। তীণি লক্খণানি দস্সেত্ৰা ৰিপস্সনং উস্সুক্কাপেত্ৰা অরহত্তস্স পাপনৰসেন দেসনায পৰত্তত্তা।
Sammasanacāracittanti vipassanāya pavattiṭṭhānabhūtaṃ vipassitabbaṃ cittaṃ. Keci ‘‘vipassanupagatakiriyamayacitta’’nti vadanti, taṃ tesaṃ matimattaṃ. Tīṇi lakkhaṇāni dassetvā vipassanaṃ ussukkāpetvā arahattassa pāpanavasena desanāya pavattattā.
অজ্ঝত্তানিচ্চসুত্তৰণ্ণনা নিট্ঠিতা।
Ajjhattāniccasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. অজ্ঝত্তানিচ্চসুত্তং • 1. Ajjhattāniccasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. অজ্ঝত্তানিচ্চসুত্তৰণ্ণনা • 1. Ajjhattāniccasuttavaṇṇanā
