| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
3. அகாலசீவரஸிக்கா²பத³வண்ணனா
3. Akālacīvarasikkhāpadavaṇṇanā
அபரிக்கி²த்தஸ்ஸ பரிக்கே²பாரஹட்டா²னஸ்ஸ து³ப்³பி³ஜானத்தா தங் த³ஸ்ஸேதுங் ‘‘அபிச பி⁴க்கூ²ன’’ந்திஆதி³ வுத்தங். விஹாரபரியந்தே நிவிட்ட²து⁴வஸன்னிபாதட்டா²னதோ வா பரியந்தே டி²தபோ⁴ஜனஸாலதோ வா நிப³த்³த⁴வஸனகஆவாஸதோ வாதி ஏவங் க³ஹேதப்³ப³ங். ஸசே விஹாரே ஸன்னிபதிதபி⁴க்கூ²ஹி ஸத்³தி⁴ங் ஏகாப³த்³தா⁴ ஹுத்வா யோஜனஸதம்பி பூரெத்வா நிஸீத³ந்தி, யோஜனஸதம்பி உபசாரஸீமா ஹோதீதி அத்தோ². ‘‘ஸமானஸங்வாஸகஸீமாயா’’தி வுத்தே க²ண்ட³ஸீமாதீ³ஸு டி²தானங் ந பாபுணாதி, தாஸங் விஸுங் ஸமானஸங்வாஸகஸீமத்தாதி ச ஸமானஸங்வாஸகஅவிப்பவாஸஸீமானங் இத³ங் நானத்தங். ‘‘அவிப்பவாஸஸீமாய த³ம்மீ’’தி தி³ன்னங் பன கா³மே டி²தானங் ந பாபுணாதி. கஸ்மா? ‘‘ட²பெத்வா கா³மஞ்ச கா³மூபசாரஞ்சா’’தி (மஹாவ॰ 144) வசனதோ. ‘‘ஸமானஸங்வாஸகஸீமாயா’’தி தி³ன்னங் பன யஸ்மிங் டா²னே அவிப்பவாஸஸீமா அத்தி², தத்த² டி²தானம்பி. ‘‘தத்ர டி²தானஞ்ச பாபுணாதீ’’தி ச, ‘‘க²ண்ட³ஸீமாயங் ட²த்வா ‘ஸீமட்ட²கஸங்கோ⁴ க³ண்ஹாதூ’தி வுத்தே உபசாரஸீமாய ஏவ பரிச்சி²ந்தி³த்வா தா³தப்³ப³’’ந்தி ச, ‘‘தேஸங் ப³ஹிஸீமட்டா²னம்பி பாபுணாதி யாவ கதி²னஸ்ஸுப்³பா⁴ராதி அத்தோ²’’தி ச, ‘‘அனத்த²தே பன கதி²னே அந்தோஹேமந்தே ஸசே விஹாரங் பவிஸித்வா ‘வஸ்ஸங்வுட்ட²ஸங்க⁴ஸ்ஸ த³ம்மீ’தி வத³தி, யே தத்த² வஸ்ஸச்சே²த³ங் அகத்வா பச்சி²மவஸ்ஸங்வுட்டா², தேஸங் ப³ஹிஸீமட்டா²னம்பி பாபுணாதீ’’தி வினயத⁴ரா பரிச்சி²ந்த³ந்தி, அட்ட²கதா²யங் பன அனாக³தங். தஸ்மா ஸமந்தபாஸாதி³காயங் ‘‘லக்க²ணஞ்ஞூ வத³ந்தீ’’தி (மஹாவ॰ அட்ட²॰ 379) வுத்தந்தி ச, ‘‘‘சீவரமாஸதோ பட்டா²ய யாவ ஹேமந்தஸ்ஸ பச்சி²மோ தி³வஸோ, தாவ வஸ்ஸாவாஸிகங் தே³மா’தி வுத்தே கதி²னங் அத்த²தங் வா ஹோது, அனத்த²தங் வாதி யங் ஸமந்தபாஸாதி³காவசனங் (மஹாவ॰ அட்ட²॰ 379), எத்தா²பி யதி³ அத்த²தங், புரிமவஸ்ஸங்வுட்டா² பஞ்ச மாஸே. யதி³ அனத்த²தங், பச்சி²மவஸ்ஸங்வுட்டா² சத்தாரோ மாஸே லப⁴ந்தீதி வினிச்ச²யோ’’தி ச லிகி²தங்.
Aparikkhittassa parikkhepārahaṭṭhānassa dubbijānattā taṃ dassetuṃ ‘‘apica bhikkhūna’’ntiādi vuttaṃ. Vihārapariyante niviṭṭhadhuvasannipātaṭṭhānato vā pariyante ṭhitabhojanasālato vā nibaddhavasanakaāvāsato vāti evaṃ gahetabbaṃ. Sace vihāre sannipatitabhikkhūhi saddhiṃ ekābaddhā hutvā yojanasatampi pūretvā nisīdanti, yojanasatampi upacārasīmā hotīti attho. ‘‘Samānasaṃvāsakasīmāyā’’ti vutte khaṇḍasīmādīsu ṭhitānaṃ na pāpuṇāti, tāsaṃ visuṃ samānasaṃvāsakasīmattāti ca samānasaṃvāsakaavippavāsasīmānaṃ idaṃ nānattaṃ. ‘‘Avippavāsasīmāya dammī’’ti dinnaṃ pana gāme ṭhitānaṃ na pāpuṇāti. Kasmā? ‘‘Ṭhapetvā gāmañca gāmūpacārañcā’’ti (mahāva. 144) vacanato. ‘‘Samānasaṃvāsakasīmāyā’’ti dinnaṃ pana yasmiṃ ṭhāne avippavāsasīmā atthi, tattha ṭhitānampi. ‘‘Tatra ṭhitānañca pāpuṇātī’’ti ca, ‘‘khaṇḍasīmāyaṃ ṭhatvā ‘sīmaṭṭhakasaṅgho gaṇhātū’ti vutte upacārasīmāya eva paricchinditvā dātabba’’nti ca, ‘‘tesaṃ bahisīmaṭṭhānampi pāpuṇāti yāva kathinassubbhārāti attho’’ti ca, ‘‘anatthate pana kathine antohemante sace vihāraṃ pavisitvā ‘vassaṃvuṭṭhasaṅghassa dammī’ti vadati, ye tattha vassacchedaṃ akatvā pacchimavassaṃvuṭṭhā, tesaṃ bahisīmaṭṭhānampi pāpuṇātī’’ti vinayadharā paricchindanti, aṭṭhakathāyaṃ pana anāgataṃ. Tasmā samantapāsādikāyaṃ ‘‘lakkhaṇaññū vadantī’’ti (mahāva. aṭṭha. 379) vuttanti ca, ‘‘‘cīvaramāsato paṭṭhāya yāva hemantassa pacchimo divaso, tāva vassāvāsikaṃ demā’ti vutte kathinaṃ atthataṃ vā hotu, anatthataṃ vāti yaṃ samantapāsādikāvacanaṃ (mahāva. aṭṭha. 379), etthāpi yadi atthataṃ, purimavassaṃvuṭṭhā pañca māse. Yadi anatthataṃ, pacchimavassaṃvuṭṭhā cattāro māse labhantīti vinicchayo’’ti ca likhitaṃ.
‘‘யேஹி மய்ஹங் யாகு³ பீதாதி யேஹி நிமந்திதேஹி மய்ஹங் யாகு³ பீதாதி அதி⁴ப்பாயோ. தஸ்மா யேஹி நிமந்திதேஹி யாகு³ பீதா, தேஸங்யேவ பாபுணாதீதி வுத்தங். அஞ்ஞதா² ‘யேஹி மய்ஹங் யாகு³ பீதா’தி வுத்தே நிமந்திதா வா ஹொந்து, அனிமந்திதா வா, யேஹி பீதா, தேஸங் பாபுணிதப்³பா³னீ’’தி வத³ந்தி. எத்த² ‘‘நிட்டி²தசீவரஸ்மிங் பி⁴க்கு²னா உப்³ப⁴தஸ்மிங் கதி²னே’’தி வத³ந்தோ ஞாபேதி எத்த²ந்தரே திண்ணம்பி அகாலசீவரானங் உப்பத்திஅபா⁴வந்தி. கஸ்மா பன பத³பா⁴ஜனே வித்தா²ரிதானீதி? வுச்சதே – இத³ங் பன ஸிக்கா²பத³ங் அதி⁴ட்டா²னங் ஸந்தா⁴ய ந வுத்தங் கிந்து பட²மஸிக்கா²பதே³ த³ஸாஹபரமங் அனுஜானித்வா தஸ்மிங் அப்பஹொந்தே ஸசே பச்சாஸா அத்தி², தமேவ வட்³டெ⁴த்வா மாஸமனுஜானந்தோ இமம்பி அத்த²விஸேஸங் தீ³பேதி. அகாலசீவரங் நாம ஸம்முகீ²பூ⁴தேன பா⁴ஜேதப்³ப³ங். தங் பன ‘‘ஆகங்க²மானேன பி⁴க்கு²னா படிக்³க³ஹேதப்³ப³’’ந்தி இமினா ஸிக்கா²பதே³ன வட்³டெ⁴த்வா வுத்தந்தி. தஸ்மா தீணிபி பத³பா⁴ஜனே வித்தா²ரிதானீதி.
‘‘Yehi mayhaṃ yāgu pītāti yehi nimantitehi mayhaṃ yāgu pītāti adhippāyo. Tasmā yehi nimantitehi yāgu pītā, tesaṃyeva pāpuṇātīti vuttaṃ. Aññathā ‘yehi mayhaṃ yāgu pītā’ti vutte nimantitā vā hontu, animantitā vā, yehi pītā, tesaṃ pāpuṇitabbānī’’ti vadanti. Ettha ‘‘niṭṭhitacīvarasmiṃ bhikkhunā ubbhatasmiṃ kathine’’ti vadanto ñāpeti etthantare tiṇṇampi akālacīvarānaṃ uppattiabhāvanti. Kasmā pana padabhājane vitthāritānīti? Vuccate – idaṃ pana sikkhāpadaṃ adhiṭṭhānaṃ sandhāya na vuttaṃ kintu paṭhamasikkhāpade dasāhaparamaṃ anujānitvā tasmiṃ appahonte sace paccāsā atthi, tameva vaḍḍhetvā māsamanujānanto imampi atthavisesaṃ dīpeti. Akālacīvaraṃ nāma sammukhībhūtena bhājetabbaṃ. Taṃ pana ‘‘ākaṅkhamānena bhikkhunā paṭiggahetabba’’nti iminā sikkhāpadena vaḍḍhetvā vuttanti. Tasmā tīṇipi padabhājane vitthāritānīti.
‘‘கி²ப்பமேவ காரேதப்³ப³ந்தி ஸீக⁴ங் அந்தோத³ஸாஹேயேவ காரேதப்³ப³’’ந்தி இத³ங் பன பஹோனகபா⁴வே புரிமஸிக்கா²பத³லக்க²ணேனாதி தீ³பேதுங் வுத்தங். தஸ்மா ஏவங் ‘‘ஸீக⁴’’ந்தி வா ‘‘லஹு’’ந்தி வா ஆதி³னா அவத்வாபி ‘‘த³ஸாஹா’’தி வுத்தந்தி. அத்த²தகதி²னஸ்ஸ ஏவங் ஹோது, அனத்த²தே பன கதி²னே கத²ந்தி வுத்தே அனத்த²தஸ்ஸ படிக்கே²பதங் த³ஸ்ஸேதீதி வுத்தோ அபஸ்ஸந்தோ விகா⁴தங் ஆபஜ்ஜதீதி (வஜிர॰ டீ॰ பாராஜிக 499-500) லிகி²தங்.
‘‘Khippameva kāretabbanti sīghaṃ antodasāheyeva kāretabba’’nti idaṃ pana pahonakabhāve purimasikkhāpadalakkhaṇenāti dīpetuṃ vuttaṃ. Tasmā evaṃ ‘‘sīgha’’nti vā ‘‘lahu’’nti vā ādinā avatvāpi ‘‘dasāhā’’ti vuttanti. Atthatakathinassa evaṃ hotu, anatthate pana kathine kathanti vutte anatthatassa paṭikkhepataṃ dassetīti vutto apassanto vighātaṃ āpajjatīti (vajira. ṭī. pārājika 499-500) likhitaṃ.
அகாலசீவரஸிக்கா²பத³வண்ணனா நிட்டி²தா.
Akālacīvarasikkhāpadavaṇṇanā niṭṭhitā.
