| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. அகம்மனியவக்³க³வண்ணனா
3. Akammaniyavaggavaṇṇanā
21. ததியஸ்ஸ பட²மே அபா⁴விதந்தி ஸமத²விபஸ்ஸனாபா⁴வனாவஸேன ந பா⁴விதங் ததா² அபா⁴விதத்தா. தஞ்ஹி ‘‘அவட்³டி⁴த’’ந்தி வுச்சதி படிபக்கா²பி⁴ப⁴வேன பரிப்³ரூஹனாபா⁴வதோ. தேனாஹ ப⁴க³வா – ‘‘அகம்மனியங் ஹோதீ’’தி.
21. Tatiyassa paṭhame abhāvitanti samathavipassanābhāvanāvasena na bhāvitaṃ tathā abhāvitattā. Tañhi ‘‘avaḍḍhita’’nti vuccati paṭipakkhābhibhavena paribrūhanābhāvato. Tenāha bhagavā – ‘‘akammaniyaṃ hotī’’ti.
22. து³தியே வுத்தவிபரியாயேன அத்தோ² வேதி³தப்³போ³. பட²மேதி ததியவக்³க³ஸ்ஸ பட²மஸுத்தே. வட்டவஸேனாதி விபாகவட்டவஸேன. தேபூ⁴மகவட்டந்தி தேபூ⁴மகவிபாகவட்டங். வட்டபடிலாபா⁴ய கம்மந்தி விபாகவட்டஸ்ஸ படிலாபா⁴ய உபனிஸ்ஸயபூ⁴தங் கம்மங், தஸ்ஸ ஸஹாயபூ⁴தங் கிலேஸவட்டம்பி கம்மக்³க³ஹணேனேவ ஸங்க³ஹிதந்தி த³ட்ட²ப்³ப³ங். விவட்டபடிலாபா⁴ய கம்மந்தி விவட்டாதி⁴க³மஸ்ஸ உபனிஸ்ஸயபூ⁴தங் கம்மங். யங் பன சரிமப⁴வனிப்³ப³த்தகங் கம்மங், தங் விவட்டப்படிலாபா⁴ய கம்மங் ஹோதி, ந ஹோதீதி? ந ஹோதி வட்டபாத³கபா⁴வதோ. சரிமப⁴வபடிஸந்தி⁴ விய பன விவட்டூபனிஸ்ஸயோதி ஸக்கா விஞ்ஞாதுங். ந ஹி கதா³சி திஹேதுகபடிஸந்தி⁴யா வினா விஸேஸாதி⁴க³மோ ஸம்ப⁴வதி. இமேஸு ஸுத்தேஸூதி இமேஸு பன பட²மது³தியஸுத்தேஸு யதா²க்கமங் வட்டவிவட்டமேவ கதி²தங்.
22. Dutiye vuttavipariyāyena attho veditabbo. Paṭhameti tatiyavaggassa paṭhamasutte. Vaṭṭavasenāti vipākavaṭṭavasena. Tebhūmakavaṭṭanti tebhūmakavipākavaṭṭaṃ. Vaṭṭapaṭilābhāya kammanti vipākavaṭṭassa paṭilābhāya upanissayabhūtaṃ kammaṃ, tassa sahāyabhūtaṃ kilesavaṭṭampi kammaggahaṇeneva saṅgahitanti daṭṭhabbaṃ. Vivaṭṭapaṭilābhāya kammanti vivaṭṭādhigamassa upanissayabhūtaṃ kammaṃ. Yaṃ pana carimabhavanibbattakaṃ kammaṃ, taṃ vivaṭṭappaṭilābhāya kammaṃ hoti, na hotīti? Na hoti vaṭṭapādakabhāvato. Carimabhavapaṭisandhi viya pana vivaṭṭūpanissayoti sakkā viññātuṃ. Na hi kadāci tihetukapaṭisandhiyā vinā visesādhigamo sambhavati. Imesu suttesūti imesu pana paṭhamadutiyasuttesu yathākkamaṃ vaṭṭavivaṭṭameva kathitaṃ.
23. ததியே அபா⁴விதந்தி எத்த² பா⁴வனா நாம ஸமாதி⁴பா⁴வனா. ஸா யத்த² ஆஸங்கிதப்³பா³, தங் காமாவசரபட²மமஹாகுஸலசித்தாதி³அபா⁴விதந்தி அதி⁴ப்பேதந்தி ஆஹ – ‘‘தே³வமனுஸ்ஸஸம்பத்தியோ’’திஆதி³.
23. Tatiye abhāvitanti ettha bhāvanā nāma samādhibhāvanā. Sā yattha āsaṅkitabbā, taṃ kāmāvacarapaṭhamamahākusalacittādiabhāvitanti adhippetanti āha – ‘‘devamanussasampattiyo’’tiādi.
24. சதுத்தே² யஸ்மா சித்தந்தி விவட்டவஸேனேவ உப்பன்னசித்தங் அதி⁴ப்பேதங், தஸ்மா ஜாதிஜராப்³யாதி⁴மரணஸோகாதி³து³க்க²ஸ்ஸ அனிப்³ப³த்தனதோ மஹதோ அத்தா²ய ஸங்வத்ததீதி யோஜனா வேதி³தப்³பா³.
24. Catutthe yasmā cittanti vivaṭṭavaseneva uppannacittaṃ adhippetaṃ, tasmā jātijarābyādhimaraṇasokādidukkhassa anibbattanato mahato atthāya saṃvattatīti yojanā veditabbā.
25-26. பஞ்சமச²ட்டே²ஸு உப்பன்னந்தி அவிக³துப்பாதா³தி³க²ணத்தயம்பி அபா⁴விதங் பா⁴வனாரஹிதங் அபாதுபூ⁴தமேவ பண்டி³தஸம்மதஸ்ஸ உப்பன்னகிச்சஸ்ஸ அஸாத⁴னதோ யதா² ‘‘அபுத்தோ’’தி. ஸோ ஹி ஸமத்தோ² ஹுத்வா பிது புத்தகிச்சங் அஸாதெ⁴ந்தோ அபுத்தோதி லோகே வுச்சதி, ஏவங் ஸம்பத³மித³ங். தேனாஹ – ‘‘கஸ்மா’’திஆதி³. தேஸு த⁴ம்மேஸூதி லோகுத்தரபாத³கஜ்ஜா²னாதீ³ஸு. தே²ரோ பன மத்த²கப்பத்தமேவ பா⁴விதங் சித்தங் த³ஸ்ஸெந்தோ ‘‘மக்³க³சித்தமேவா’’தி ஆஹ.
25-26. Pañcamachaṭṭhesu uppannanti avigatuppādādikhaṇattayampi abhāvitaṃ bhāvanārahitaṃ apātubhūtameva paṇḍitasammatassa uppannakiccassa asādhanato yathā ‘‘aputto’’ti. So hi samattho hutvā pitu puttakiccaṃ asādhento aputtoti loke vuccati, evaṃ sampadamidaṃ. Tenāha – ‘‘kasmā’’tiādi. Tesu dhammesūti lokuttarapādakajjhānādīsu. Thero pana matthakappattameva bhāvitaṃ cittaṃ dassento ‘‘maggacittamevā’’ti āha.
27-28. ஸத்தமட்ட²மேஸு புனப்புனங் அகதந்தி பா⁴வனாப³ஹுலீகாரவஸேன புனப்புனங் ந கதங். இமானிபி த்³வேதி இமேஸு த்³வீஸு ஸுத்தேஸு ஆக³தானி இமானிபி த்³வே சித்தானி.
27-28. Sattamaṭṭhamesu punappunaṃ akatanti bhāvanābahulīkāravasena punappunaṃ na kataṃ. Imānipi dveti imesu dvīsu suttesu āgatāni imānipi dve cittāni.
29-30. நவமே அதி⁴வஹதீதி ஆனேதி. து³க்கே²னாதி கிச்சே²ன. து³ப்பேஸனதோதி து³க்கே²ன பேஸேதப்³ப³தோ. மத்த²கப்பத்தங் விபஸ்ஸனாஸுக²ங் பாகதிகஜ்ஜா²னஸுக²தோ ஸந்ததரபணீததரமேவாதி ஆஹ – ‘‘ஜா²னஸுக²தோ விபஸ்ஸனாஸுக²’’ந்தி. தேனாஹ ப⁴க³வா –
29-30. Navame adhivahatīti āneti. Dukkhenāti kicchena. Duppesanatoti dukkhena pesetabbato. Matthakappattaṃ vipassanāsukhaṃ pākatikajjhānasukhato santatarapaṇītataramevāti āha – ‘‘jhānasukhato vipassanāsukha’’nti. Tenāha bhagavā –
‘‘ஸுஞ்ஞாகா³ரங் பவிட்ட²ஸ்ஸ, ஸந்தசித்தஸ்ஸ பி⁴க்கு²னோ;
‘‘Suññāgāraṃ paviṭṭhassa, santacittassa bhikkhuno;
அமானுஸீ ரதி ஹோதி, ஸம்மா த⁴ம்மங் விபஸ்ஸதோ.
Amānusī rati hoti, sammā dhammaṃ vipassato.
‘‘யதோ யதோ ஸம்மஸதி, க²ந்தா⁴னங் உத³யப்³ப³யங்;
‘‘Yato yato sammasati, khandhānaṃ udayabbayaṃ;
லப⁴தீ பீதிபாமோஜ்ஜங், அமதங் தங் விஜானத’’ந்தி. (த⁴॰ ப॰ 374);
Labhatī pītipāmojjaṃ, amataṃ taṃ vijānata’’nti. (dha. pa. 374);
தஞ்ஹி சித்தங் விஸ்ஸட்ட²இந்த³வஜிரஸதி³ஸங் அமோக⁴பா⁴வதோ.
Tañhi cittaṃ vissaṭṭhaindavajirasadisaṃ amoghabhāvato.
அகம்மனியவக்³க³வண்ணனா நிட்டி²தா.
Akammaniyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. அகம்மனியவக்³கோ³ • 3. Akammaniyavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. அகம்மனியவக்³க³வண்ணனா • 3. Akammaniyavaggavaṇṇanā
