| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
३. अकम्मनियवग्गवण्णना
3. Akammaniyavaggavaṇṇanā
२१-२२. ततियस्स पठमे अभावितन्ति अवड्ढितं भावनावसेन अप्पवत्तितं। अकम्मनियं होतीति कम्मक्खमं कम्मयोग्गं न होति। दुतिये वुत्तविपरियायेन अत्थो वेदितब्बो। एत्थ च पठमे चित्तन्ति वट्टवसेन उप्पन्नचित्तं, दुतिये विवट्टवसेन उप्पन्नचित्तं। तत्थ च वट्टं वट्टपादं, विवट्टं विवट्टपादन्ति अयं पभेदो वेदितब्बो। वट्टं नाम तेभूमकवट्टं, वट्टपादं नाम वट्टपटिलाभाय कम्मं, विवट्टं नाम नव लोकुत्तरधम्मा, विवट्टपादं नाम विवट्टपटिलाभाय कम्मं। इति इमेसु सुत्तेसु वट्टविवट्टमेव कथितन्ति।
21-22. Tatiyassa paṭhame abhāvitanti avaḍḍhitaṃ bhāvanāvasena appavattitaṃ. Akammaniyaṃ hotīti kammakkhamaṃ kammayoggaṃ na hoti. Dutiye vuttavipariyāyena attho veditabbo. Ettha ca paṭhame cittanti vaṭṭavasena uppannacittaṃ, dutiye vivaṭṭavasena uppannacittaṃ. Tattha ca vaṭṭaṃ vaṭṭapādaṃ, vivaṭṭaṃ vivaṭṭapādanti ayaṃ pabhedo veditabbo. Vaṭṭaṃ nāma tebhūmakavaṭṭaṃ, vaṭṭapādaṃ nāma vaṭṭapaṭilābhāya kammaṃ, vivaṭṭaṃ nāma nava lokuttaradhammā, vivaṭṭapādaṃ nāma vivaṭṭapaṭilābhāya kammaṃ. Iti imesu suttesu vaṭṭavivaṭṭameva kathitanti.
२३-२४. ततिये वट्टवसेनेव उप्पन्नचित्तं वेदितब्बं। महतो अनत्थाय संवत्ततीति देवमनुस्ससम्पत्तियो मारब्रह्मइस्सरियानि च ददमानम्पि पुनप्पुनं जातिजराब्याधिमरणसोकपरिदेवदुक्खदोमनस्सुपायासे खन्धधातुआयतनपटिच्चसमुप्पादवट्टानि च ददमानं केवलं दुक्खक्खन्धमेव देतीति महतो अनत्थाय संवत्तति नामाति। चतुत्थे चित्तन्ति विवट्टवसेनेव उप्पन्नचित्तं।
23-24. Tatiye vaṭṭavaseneva uppannacittaṃ veditabbaṃ. Mahato anatthāya saṃvattatīti devamanussasampattiyo mārabrahmaissariyāni ca dadamānampi punappunaṃ jātijarābyādhimaraṇasokaparidevadukkhadomanassupāyāse khandhadhātuāyatanapaṭiccasamuppādavaṭṭāni ca dadamānaṃ kevalaṃ dukkhakkhandhameva detīti mahato anatthāya saṃvattati nāmāti. Catutthe cittanti vivaṭṭavaseneva uppannacittaṃ.
२५-२६. पञ्चमछट्ठेसु अभावितं अपातुभूतन्ति अयं विसेसो। तत्रामयधिप्पायो – वट्टवसेन उप्पन्नचित्तं नाम उप्पन्नम्पि अभावितं अपातुभूतमेव होति। कस्मा ? लोकुत्तरपादकज्झानविपस्सनामग्गफलनिब्बानेसु पक्खन्दितुं असमत्थत्ता। विवट्टवसेन उप्पन्नं पन भावितं पातुभूतं नाम होति। कस्मा? तेसु धम्मेसु पक्खन्दितुं समत्थत्ता। कुरुन्दकवासी फुस्समित्तत्थेरो पनाह – ‘‘मग्गचित्तमेव, आवुसो, भावितं पातुभूतं नाम होती’’ति।
25-26. Pañcamachaṭṭhesu abhāvitaṃ apātubhūtanti ayaṃ viseso. Tatrāmayadhippāyo – vaṭṭavasena uppannacittaṃ nāma uppannampi abhāvitaṃ apātubhūtameva hoti. Kasmā ? Lokuttarapādakajjhānavipassanāmaggaphalanibbānesu pakkhandituṃ asamatthattā. Vivaṭṭavasena uppannaṃ pana bhāvitaṃ pātubhūtaṃ nāma hoti. Kasmā? Tesu dhammesu pakkhandituṃ samatthattā. Kurundakavāsī phussamittatthero panāha – ‘‘maggacittameva, āvuso, bhāvitaṃ pātubhūtaṃ nāma hotī’’ti.
२७-२८. सत्तमट्ठमेसु अबहुलीकतन्ति पुनप्पुनं अकतं। इमानिपि द्वे वट्टविवट्टवसेन उप्पन्नचित्तानेव वेदितब्बानीति।
27-28. Sattamaṭṭhamesu abahulīkatanti punappunaṃ akataṃ. Imānipi dve vaṭṭavivaṭṭavasena uppannacittāneva veditabbānīti.
२९. नवमे ‘‘जातिपि दुक्खा’’तिआदिना नयेन वुत्तं दुक्खं अधिवहति आहरतीति दुक्खाधिवहं। दुक्खाधिवाहन्तिपि पाठो। तस्सत्थो – लोकुत्तरपादकज्झानादि अरियधम्माभिमुखं दुक्खेन अधिवाहीयति पेसीयतीति दुक्खाधिवाहं। इदम्पि वट्टवसेन उप्पन्नचित्तमेव। तञ्हि वुत्तप्पकारा देवमनुस्सादिसम्पत्तियो ददमानम्पि जातिआदीनं अधिवहनतो दुक्खाधिवहं, अरियधम्माधिगमाय दुप्पेसनतो दुक्खाधिवाहञ्च नाम होतीति।
29. Navame ‘‘jātipi dukkhā’’tiādinā nayena vuttaṃ dukkhaṃ adhivahati āharatīti dukkhādhivahaṃ. Dukkhādhivāhantipi pāṭho. Tassattho – lokuttarapādakajjhānādi ariyadhammābhimukhaṃ dukkhena adhivāhīyati pesīyatīti dukkhādhivāhaṃ. Idampi vaṭṭavasena uppannacittameva. Tañhi vuttappakārā devamanussādisampattiyo dadamānampi jātiādīnaṃ adhivahanato dukkhādhivahaṃ, ariyadhammādhigamāya duppesanato dukkhādhivāhañca nāma hotīti.
३०. दसमे विवट्टवसेन उप्पन्नचित्तमेव चित्तं। तञ्हि मानुसकसुखतो दिब्बसुखं, दिब्बसुखतो झानसुखं, झानसुखतो विपस्सनासुखं, विपस्सनासुखतो मग्गसुखं, मग्गसुखतो फलसुखं, फलसुखतो निब्बानसुखं अधिवहति आहरतीति सुखाधिवहं नाम होति, सुखाधिवाहं वा। तञ्हि लोकुत्तरपादकज्झानादिअरियधम्माभिमुखं सुपेसयं विस्सट्ठइन्दवजिरसदिसं होतीति सुखाधिवाहन्तिपि वुच्चति। इमस्मिम्पि वग्गे वट्टविवट्टमेव कथितन्ति।
30. Dasame vivaṭṭavasena uppannacittameva cittaṃ. Tañhi mānusakasukhato dibbasukhaṃ, dibbasukhato jhānasukhaṃ, jhānasukhato vipassanāsukhaṃ, vipassanāsukhato maggasukhaṃ, maggasukhato phalasukhaṃ, phalasukhato nibbānasukhaṃ adhivahati āharatīti sukhādhivahaṃ nāma hoti, sukhādhivāhaṃ vā. Tañhi lokuttarapādakajjhānādiariyadhammābhimukhaṃ supesayaṃ vissaṭṭhaindavajirasadisaṃ hotīti sukhādhivāhantipi vuccati. Imasmimpi vagge vaṭṭavivaṭṭameva kathitanti.
अकम्मनियवग्गवण्णना।
Akammaniyavaggavaṇṇanā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ३. अकम्मनियवग्गो • 3. Akammaniyavaggo
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ३. अकम्मनियवग्गवण्णना • 3. Akammaniyavaggavaṇṇanā
