| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
အာကင္ခမာနစတုက္ကံ
Ākaṅkhamānacatukkaṃ
၃၉. ‘‘ပဉ္စဟိ, ဘိက္ခဝေ, အင္ဂေဟိ သမန္နာဂတသ္သ ဘိက္ခုနော, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။ ဂိဟီနံ အလာဘာယ ပရိသက္ကတိ, ဂိဟီနံ အနတ္ထာယ ပရိသက္ကတိ, ဂိဟီနံ အနာဝာသာယ 1 ပရိသက္ကတိ, ဂိဟီ အက္ကောသတိ ပရိဘာသတိ, ဂိဟီ ဂိဟီဟိ ဘေဒေတိ – ဣမေဟိ ခော, ဘိက္ခဝေ, ပဉ္စဟင္ဂေဟိ သမန္နာဂတသ္သ ဘိက္ခုနော, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။
39. ‘‘Pañcahi, bhikkhave, aṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya. Gihīnaṃ alābhāya parisakkati, gihīnaṃ anatthāya parisakkati, gihīnaṃ anāvāsāya 2 parisakkati, gihī akkosati paribhāsati, gihī gihīhi bhedeti – imehi kho, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya.
‘‘အပရေဟိပိ, ဘိက္ခဝေ, ပဉ္စဟင္ဂေဟိ သမန္နာဂတသ္သ ဘိက္ခုနော, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။ ဂိဟီနံ ဗုဒ္ဓသ္သ အဝဏ္ဏံ ဘာသတိ , ဂိဟီနံ ဓမ္မသ္သ အဝဏ္ဏံ ဘာသတိ, ဂိဟီနံ သင္ဃသ္သ အဝဏ္ဏံ ဘာသတိ, ဂိဟီ ဟီနေန ခုံသေတိ ဟီနေန ဝမ္ဘေတိ, ဂိဟီနံ ဓမ္မိကံ ပဋိသ္သဝံ န သစ္စာပေတိ – ဣမေဟိ ခော, ဘိက္ခဝေ, ပဉ္စဟင္ဂေဟိ သမန္နာဂတသ္သ ဘိက္ခုနော, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။
‘‘Aparehipi, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya. Gihīnaṃ buddhassa avaṇṇaṃ bhāsati , gihīnaṃ dhammassa avaṇṇaṃ bhāsati, gihīnaṃ saṅghassa avaṇṇaṃ bhāsati, gihī hīnena khuṃseti hīnena vambheti, gihīnaṃ dhammikaṃ paṭissavaṃ na saccāpeti – imehi kho, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya.
‘‘ပဉ္စန္နံ, ဘိက္ခဝေ, ဘိက္ခူနံ, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။ ဧကော ဂိဟီနံ အလာဘာယ ပရိသက္ကတိ, ဧကော ဂိဟီနံ အနတ္ထာယ ပရိသက္ကတိ, ဧကော ဂိဟီနံ အနာဝာသာယ ပရိသက္ကတိ, ဧကော ဂိဟီ အက္ကောသတိ ပရိဘာသတိ, ဧကော ဂိဟီ ဂိဟီဟိ ဘေဒေတိ – ဣမေသံ ခော, ဘိက္ခဝေ, ပဉ္စန္နံ ဘိက္ခူနံ, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။
‘‘Pañcannaṃ, bhikkhave, bhikkhūnaṃ, ākaṅkhamāno saṅgho, paṭisāraṇīyakammaṃ kareyya. Eko gihīnaṃ alābhāya parisakkati, eko gihīnaṃ anatthāya parisakkati, eko gihīnaṃ anāvāsāya parisakkati, eko gihī akkosati paribhāsati, eko gihī gihīhi bhedeti – imesaṃ kho, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya.
‘‘အပရေသမ္ပိ, ဘိက္ခဝေ, ပဉ္စန္နံ ဘိက္ခူနံ, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။ ဧကော ဂိဟီနံ ဗုဒ္ဓသ္သ အဝဏ္ဏံ ဘာသတိ, ဧကော ဂိဟီနံ ဓမ္မသ္သ အဝဏ္ဏံ ဘာသတိ, ဧကော ဂိဟီနံ သင္ဃသ္သ အဝဏ္ဏံ ဘာသတိ, ဧကော ဂိဟီ ဟီနေန ခုံသေတိ ဟီနေန ဝမ္ဘေတိ, ဧကော ဂိဟီနံ ဓမ္မိကံ ပဋိသ္သဝံ န သစ္စာပေတိ – ဣမေသံ ခော, ဘိက္ခဝေ, ပဉ္စန္နံ ဘိက္ခူနံ, အာကင္ခမာနော သင္ဃော, ပဋိသာရဏီယကမ္မံ ကရေယ္ယ။
‘‘Aparesampi, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya. Eko gihīnaṃ buddhassa avaṇṇaṃ bhāsati, eko gihīnaṃ dhammassa avaṇṇaṃ bhāsati, eko gihīnaṃ saṅghassa avaṇṇaṃ bhāsati, eko gihī hīnena khuṃseti hīnena vambheti, eko gihīnaṃ dhammikaṃ paṭissavaṃ na saccāpeti – imesaṃ kho, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya.
အာကင္ခမာနစတုက္ကံ နိဋ္ဌိတံ။
Ākaṅkhamānacatukkaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / အဓမ္မကမ္မာဒိဒ္ဝာဒသကကထာ • Adhammakammādidvādasakakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / နိယသ္သကမ္မကထာဒိဝဏ္ဏနာ • Niyassakammakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / အဓမ္မကမ္မာဒိဒ္ဝာဒသကကထာ • Adhammakammādidvādasakakathā
