| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗಪಾಳಿ • Cūḷavaggapāḷi |
ಆಕಙ್ಖಮಾನಚತುಕ್ಕಂ
Ākaṅkhamānacatukkaṃ
೩೯. ‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ। ಗಿಹೀನಂ ಅಲಾಭಾಯ ಪರಿಸಕ್ಕತಿ, ಗಿಹೀನಂ ಅನತ್ಥಾಯ ಪರಿಸಕ್ಕತಿ, ಗಿಹೀನಂ ಅನಾವಾಸಾಯ 1 ಪರಿಸಕ್ಕತಿ, ಗಿಹೀ ಅಕ್ಕೋಸತಿ ಪರಿಭಾಸತಿ, ಗಿಹೀ ಗಿಹೀಹಿ ಭೇದೇತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ।
39. ‘‘Pañcahi, bhikkhave, aṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya. Gihīnaṃ alābhāya parisakkati, gihīnaṃ anatthāya parisakkati, gihīnaṃ anāvāsāya 2 parisakkati, gihī akkosati paribhāsati, gihī gihīhi bhedeti – imehi kho, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya.
‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ। ಗಿಹೀನಂ ಬುದ್ಧಸ್ಸ ಅವಣ್ಣಂ ಭಾಸತಿ , ಗಿಹೀನಂ ಧಮ್ಮಸ್ಸ ಅವಣ್ಣಂ ಭಾಸತಿ, ಗಿಹೀನಂ ಸಙ್ಘಸ್ಸ ಅವಣ್ಣಂ ಭಾಸತಿ, ಗಿಹೀ ಹೀನೇನ ಖುಂಸೇತಿ ಹೀನೇನ ವಮ್ಭೇತಿ, ಗಿಹೀನಂ ಧಮ್ಮಿಕಂ ಪಟಿಸ್ಸವಂ ನ ಸಚ್ಚಾಪೇತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ।
‘‘Aparehipi, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya. Gihīnaṃ buddhassa avaṇṇaṃ bhāsati , gihīnaṃ dhammassa avaṇṇaṃ bhāsati, gihīnaṃ saṅghassa avaṇṇaṃ bhāsati, gihī hīnena khuṃseti hīnena vambheti, gihīnaṃ dhammikaṃ paṭissavaṃ na saccāpeti – imehi kho, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya.
‘‘ಪಞ್ಚನ್ನಂ, ಭಿಕ್ಖವೇ, ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ। ಏಕೋ ಗಿಹೀನಂ ಅಲಾಭಾಯ ಪರಿಸಕ್ಕತಿ, ಏಕೋ ಗಿಹೀನಂ ಅನತ್ಥಾಯ ಪರಿಸಕ್ಕತಿ, ಏಕೋ ಗಿಹೀನಂ ಅನಾವಾಸಾಯ ಪರಿಸಕ್ಕತಿ, ಏಕೋ ಗಿಹೀ ಅಕ್ಕೋಸತಿ ಪರಿಭಾಸತಿ, ಏಕೋ ಗಿಹೀ ಗಿಹೀಹಿ ಭೇದೇತಿ – ಇಮೇಸಂ ಖೋ, ಭಿಕ್ಖವೇ, ಪಞ್ಚನ್ನಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ।
‘‘Pañcannaṃ, bhikkhave, bhikkhūnaṃ, ākaṅkhamāno saṅgho, paṭisāraṇīyakammaṃ kareyya. Eko gihīnaṃ alābhāya parisakkati, eko gihīnaṃ anatthāya parisakkati, eko gihīnaṃ anāvāsāya parisakkati, eko gihī akkosati paribhāsati, eko gihī gihīhi bhedeti – imesaṃ kho, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya.
‘‘ಅಪರೇಸಮ್ಪಿ, ಭಿಕ್ಖವೇ, ಪಞ್ಚನ್ನಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ। ಏಕೋ ಗಿಹೀನಂ ಬುದ್ಧಸ್ಸ ಅವಣ್ಣಂ ಭಾಸತಿ, ಏಕೋ ಗಿಹೀನಂ ಧಮ್ಮಸ್ಸ ಅವಣ್ಣಂ ಭಾಸತಿ, ಏಕೋ ಗಿಹೀನಂ ಸಙ್ಘಸ್ಸ ಅವಣ್ಣಂ ಭಾಸತಿ, ಏಕೋ ಗಿಹೀ ಹೀನೇನ ಖುಂಸೇತಿ ಹೀನೇನ ವಮ್ಭೇತಿ, ಏಕೋ ಗಿಹೀನಂ ಧಮ್ಮಿಕಂ ಪಟಿಸ್ಸವಂ ನ ಸಚ್ಚಾಪೇತಿ – ಇಮೇಸಂ ಖೋ, ಭಿಕ್ಖವೇ, ಪಞ್ಚನ್ನಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಟಿಸಾರಣೀಯಕಮ್ಮಂ ಕರೇಯ್ಯ।
‘‘Aparesampi, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya. Eko gihīnaṃ buddhassa avaṇṇaṃ bhāsati, eko gihīnaṃ dhammassa avaṇṇaṃ bhāsati, eko gihīnaṃ saṅghassa avaṇṇaṃ bhāsati, eko gihī hīnena khuṃseti hīnena vambheti, eko gihīnaṃ dhammikaṃ paṭissavaṃ na saccāpeti – imesaṃ kho, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya.
ಆಕಙ್ಖಮಾನಚತುಕ್ಕಂ ನಿಟ್ಠಿತಂ।
Ākaṅkhamānacatukkaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಅಧಮ್ಮಕಮ್ಮಾದಿದ್ವಾದಸಕಕಥಾ • Adhammakammādidvādasakakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ನಿಯಸ್ಸಕಮ್ಮಕಥಾದಿವಣ್ಣನಾ • Niyassakammakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಅಧಮ್ಮಕಮ್ಮಾದಿದ್ವಾದಸಕಕಥಾ • Adhammakammādidvādasakakathā
