| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
ආකඞ්‌ඛමානචතුක්‌කං
Ākaṅkhamānacatukkaṃ
39. ‘‘පඤ්‌චහි, භික්‌ඛවෙ, අඞ්‌ගෙහි සමන්‌නාගතස්‌ස භික්‌ඛුනො, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය. ගිහීනං අලාභාය පරිසක්‌කති, ගිහීනං අනත්‌ථාය පරිසක්‌කති, ගිහීනං අනාවාසාය 1 පරිසක්‌කති, ගිහී අක්‌කොසති පරිභාසති, ගිහී ගිහීහි භෙදෙති – ඉමෙහි ඛො, භික්‌ඛවෙ, පඤ්‌චහඞ්‌ගෙහි සමන්‌නාගතස්‌ස භික්‌ඛුනො, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය.
39. ‘‘Pañcahi, bhikkhave, aṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya. Gihīnaṃ alābhāya parisakkati, gihīnaṃ anatthāya parisakkati, gihīnaṃ anāvāsāya 2 parisakkati, gihī akkosati paribhāsati, gihī gihīhi bhedeti – imehi kho, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya.
‘‘අපරෙහිපි, භික්‌ඛවෙ, පඤ්‌චහඞ්‌ගෙහි සමන්‌නාගතස්‌ස භික්‌ඛුනො, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය. ගිහීනං බුද්‌ධස්‌ස අවණ්‌ණං භාසති , ගිහීනං ධම්‌මස්‌ස අවණ්‌ණං භාසති, ගිහීනං සඞ්‌ඝස්‌ස අවණ්‌ණං භාසති, ගිහී හීනෙන ඛුංසෙති හීනෙන වම්‌භෙති, ගිහීනං ධම්‌මිකං පටිස්‌සවං න සච්‌චාපෙති – ඉමෙහි ඛො, භික්‌ඛවෙ, පඤ්‌චහඞ්‌ගෙහි සමන්‌නාගතස්‌ස භික්‌ඛුනො, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය.
‘‘Aparehipi, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya. Gihīnaṃ buddhassa avaṇṇaṃ bhāsati , gihīnaṃ dhammassa avaṇṇaṃ bhāsati, gihīnaṃ saṅghassa avaṇṇaṃ bhāsati, gihī hīnena khuṃseti hīnena vambheti, gihīnaṃ dhammikaṃ paṭissavaṃ na saccāpeti – imehi kho, bhikkhave, pañcahaṅgehi samannāgatassa bhikkhuno, ākaṅkhamāno saṅgho, paṭisāraṇīyakammaṃ kareyya.
‘‘පඤ්‌චන්‌නං, භික්‌ඛවෙ, භික්‌ඛූනං, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය. එකො ගිහීනං අලාභාය පරිසක්‌කති, එකො ගිහීනං අනත්‌ථාය පරිසක්‌කති, එකො ගිහීනං අනාවාසාය පරිසක්‌කති, එකො ගිහී අක්‌කොසති පරිභාසති, එකො ගිහී ගිහීහි භෙදෙති – ඉමෙසං ඛො, භික්‌ඛවෙ, පඤ්‌චන්‌නං භික්‌ඛූනං, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය.
‘‘Pañcannaṃ, bhikkhave, bhikkhūnaṃ, ākaṅkhamāno saṅgho, paṭisāraṇīyakammaṃ kareyya. Eko gihīnaṃ alābhāya parisakkati, eko gihīnaṃ anatthāya parisakkati, eko gihīnaṃ anāvāsāya parisakkati, eko gihī akkosati paribhāsati, eko gihī gihīhi bhedeti – imesaṃ kho, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya.
‘‘අපරෙසම්‌පි, භික්‌ඛවෙ, පඤ්‌චන්‌නං භික්‌ඛූනං, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය. එකො ගිහීනං බුද්‌ධස්‌ස අවණ්‌ණං භාසති, එකො ගිහීනං ධම්‌මස්‌ස අවණ්‌ණං භාසති, එකො ගිහීනං සඞ්‌ඝස්‌ස අවණ්‌ණං භාසති, එකො ගිහී හීනෙන ඛුංසෙති හීනෙන වම්‌භෙති, එකො ගිහීනං ධම්‌මිකං පටිස්‌සවං න සච්‌චාපෙති – ඉමෙසං ඛො, භික්‌ඛවෙ, පඤ්‌චන්‌නං භික්‌ඛූනං, ආකඞ්‌ඛමානො සඞ්‌ඝො, පටිසාරණීයකම්‌මං කරෙය්‍ය.
‘‘Aparesampi, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya. Eko gihīnaṃ buddhassa avaṇṇaṃ bhāsati, eko gihīnaṃ dhammassa avaṇṇaṃ bhāsati, eko gihīnaṃ saṅghassa avaṇṇaṃ bhāsati, eko gihī hīnena khuṃseti hīnena vambheti, eko gihīnaṃ dhammikaṃ paṭissavaṃ na saccāpeti – imesaṃ kho, bhikkhave, pañcannaṃ bhikkhūnaṃ, ākaṅkhamāno saṅgho, paṭisāraṇīyakammaṃ kareyya.
ආකඞ්‌ඛමානචතුක්‌කං නිට්‌ඨිතං.
Ākaṅkhamānacatukkaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / අධම්‌මකම්‌මාදිද්‌වාදසකකථා • Adhammakammādidvādasakakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / නියස්‌සකම්‌මකථාදිවණ්‌ණනා • Niyassakammakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / අධම්‌මකම්‌මාදිද්‌වාදසකකථා • Adhammakammādidvādasakakathā
