| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
အာကင္ခမာနဆက္ကံ
Ākaṅkhamānachakkaṃ
၂၁၀. ‘‘တီဟိ , ဘိက္ခဝေ, အင္ဂေဟိ သမန္နာဂတသ္သ ဘိက္ခုနော အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။ ဘဏ္ဍနကာရကော ဟောတိ ကလဟကာရကော ဝိဝာဒကာရကော ဘသ္သကာရကော သင္ဃေ အဓိကရဏကာရကော; ဗာလော ဟောတိ အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေဟိ ခော, ဘိက္ခဝေ, တီဟင္ဂေဟိ သမန္နာဂတသ္သ ဘိက္ခုနော အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။
210. ‘‘Tīhi , bhikkhave, aṅgehi samannāgatassa bhikkhuno ākaṅkhamāno saṅgho tassapāpiyasikākammaṃ kareyya. Bhaṇḍanakārako hoti kalahakārako vivādakārako bhassakārako saṅghe adhikaraṇakārako; bālo hoti abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi – imehi kho, bhikkhave, tīhaṅgehi samannāgatassa bhikkhuno ākaṅkhamāno saṅgho tassapāpiyasikākammaṃ kareyya.
‘‘အပရေဟိပိ, ဘိက္ခဝေ, တီဟင္ဂေဟိ သမန္နာဂတသ္သ ဘိက္ခုနော အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။ အဓိသီလေ သီလဝိပန္နော ဟောတိ, အဇ္ဈာစာရေ အာစာရဝိပန္နော ဟောတိ, အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခော, ဘိက္ခဝေ။ပေ.။။
‘‘Aparehipi, bhikkhave, tīhaṅgehi samannāgatassa bhikkhuno ākaṅkhamāno saṅgho tassapāpiyasikākammaṃ kareyya. Adhisīle sīlavipanno hoti, ajjhācāre ācāravipanno hoti, atidiṭṭhiyā diṭṭhivipanno hoti – imehi kho, bhikkhave…pe….
‘‘အပရေဟိပိ, ဘိက္ခဝေ။ပေ.။ ဗုဒ္ဓသ္သ အဝဏ္ဏံ ဘာသတိ, ဓမ္မသ္သ အဝဏ္ဏံ ဘာသတိ, သင္ဃသ္သ အဝဏ္ဏံ ဘာသတိ – ဣမေဟိ ခော, ဘိက္ခဝေ, တီဟင္ဂေဟိ သမန္နာဂတသ္သ ဘိက္ခုနော အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။
‘‘Aparehipi, bhikkhave…pe… buddhassa avaṇṇaṃ bhāsati, dhammassa avaṇṇaṃ bhāsati, saṅghassa avaṇṇaṃ bhāsati – imehi kho, bhikkhave, tīhaṅgehi samannāgatassa bhikkhuno ākaṅkhamāno saṅgho tassapāpiyasikākammaṃ kareyya.
‘‘တိဏ္ဏံ, ဘိက္ခဝေ, ဘိက္ခူနံ အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။ ဧကော ဘဏ္ဍနကာရကော ဟောတိ။ပေ.။ သင္ဃေ အဓိကရဏကာရကော; ဧကော ဗာလော ဟောတိ အဗ္ယတ္တော အာပတ္တိဗဟုလော အနပဒာနော; ဧကော ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေသံ ခော, ဘိက္ခဝေ, တိဏ္ဏံ ဘိက္ခူနံ အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။
‘‘Tiṇṇaṃ, bhikkhave, bhikkhūnaṃ ākaṅkhamāno saṅgho tassapāpiyasikākammaṃ kareyya. Eko bhaṇḍanakārako hoti…pe… saṅghe adhikaraṇakārako; eko bālo hoti abyatto āpattibahulo anapadāno; eko gihisaṃsaṭṭho viharati ananulomikehi gihisaṃsaggehi – imesaṃ kho, bhikkhave, tiṇṇaṃ bhikkhūnaṃ ākaṅkhamāno saṅgho tassapāpiyasikākammaṃ kareyya.
‘‘အပရေသမ္ပိ, ဘိက္ခဝေ, တိဏ္ဏံ ဘိက္ခူနံ အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။ ဧကော အဓိသီလေ သီလဝိပန္နော ဟောတိ, ဧကော အဇ္ဈာစာရေ အာစာရဝိပန္နော ဟောတိ, ဧကော အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခော, ဘိက္ခဝေ။ပေ.။။
‘‘Aparesampi, bhikkhave, tiṇṇaṃ bhikkhūnaṃ ākaṅkhamāno saṅgho tassapāpiyasikākammaṃ kareyya. Eko adhisīle sīlavipanno hoti, eko ajjhācāre ācāravipanno hoti, eko atidiṭṭhiyā diṭṭhivipanno hoti – imesaṃ kho, bhikkhave…pe….
‘‘အပရေသမ္ပိ , ဘိက္ခဝေ။ပေ.။ ဧကော ဗုဒ္ဓသ္သ အဝဏ္ဏံ ဘာသတိ, ဧကော ဓမ္မသ္သ အဝဏ္ဏံ ဘာသတိ, ဧကော သင္ဃသ္သ အဝဏ္ဏံ ဘာသတိ – ဣမေသံ ခော, ဘိက္ခဝေ, တိဏ္ဏံ ဘိက္ခူနံ အာကင္ခမာနော သင္ဃော တသ္သပာပိယသိကာကမ္မံ ကရေယ္ယ။
‘‘Aparesampi , bhikkhave…pe… eko buddhassa avaṇṇaṃ bhāsati, eko dhammassa avaṇṇaṃ bhāsati, eko saṅghassa avaṇṇaṃ bhāsati – imesaṃ kho, bhikkhave, tiṇṇaṃ bhikkhūnaṃ ākaṅkhamāno saṅgho tassapāpiyasikākammaṃ kareyya.
