| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
(৮) ৩. আকঙ্খৰগ্গো
(8) 3. Ākaṅkhavaggo
১-৪. আকঙ্খসুত্তাদিৰণ্ণনা
1-4. Ākaṅkhasuttādivaṇṇanā
৭১-৭৪. ততিযস্স পঠমে সীলস্স অনৰসেসসমাদানেন অখণ্ডাদিভাৰাপত্তিযা চ পরিপুণ্ণসীলা। সমাদানতো পট্ঠায অৰিচ্ছিন্দনতো সীলসমঙ্গিনো। এত্তাৰতা কিরাতি (অ॰ নি॰ ২.৩৭) কির-সদ্দো অরুচিসূচনত্থো। তেনেত্থ আচরিযৰাদস্স অত্তনো অরুচ্চনভাৰং দীপেতি। সম্পন্নসীলাতি অনামট্ঠৰিসেসং সামঞ্ঞতো সীলসঙ্খেপেন গহিতং। তঞ্চ চতুব্বিধন্তি আচরিযত্থেরো ‘‘চতুপারিসুদ্ধিসীলং উদ্দিসিত্ৰা’’তি আহ। তত্থাতি চতুপারিসুদ্ধিসীলে। জেট্ঠকসীলন্তি (সং॰ নি॰ ৫.৪১২) পধানসীলং। উভযত্থাতি উদ্দেসনিদ্দেসে। ইধ নিদ্দেসে ৰিয উদ্দেসেপি পাতিমোক্খসংৰরো ভগৰতা ৰুত্তো ‘‘সম্পন্নসীলা’’তি ৰুত্তত্তাতি অধিপ্পাযো। সীলগ্গহণঞ্হি পাল়িযং পাতিমোক্খসংৰরৰসেন আগতং। তেনাহ ‘‘পাতিমোক্খসংৰরোযেৰা’’তিআদি। তত্থ অৰধারণেন ইতরেসং তিণ্ণং একদেসেন পাতিমোক্খন্তোগধতং দীপেতি। তথা হি অনোলোকিযোলোকনে আজীৰহেতু ছসিক্খাপদৰীতিক্কমে গিলানপচ্চযস্স অপচ্চৰেক্খিতপরিভোগে চ আপত্তি ৰিহিতাতি। তীণীতি ইন্দ্রিযসংৰরসীলাদীনি। সীলন্তি ৰুত্তট্ঠানং নাম অত্থীতি সীলপরিযাযেন তেসং কত্থচি সুত্তে গহিতট্ঠানং নাম কিং অত্থি যথা পাতিমোক্খসংৰরোতি আচরিযস্স সম্মুখত্তা অপ্পটিক্খিপন্তোৰ উপচারেন পুচ্ছন্তো ৰিয ৰদতি। তেনাহ ‘‘অননুজানন্তো’’তি। ছদ্ৰাররক্খামত্তকমেৰাতি তস্স সল্লহুকভাৰমাহ চিত্তাধিট্ঠানমত্তেন পটিপাকতিকভাৰাপত্তিতো। ইতরেসুপি এসেৰ নযো। পচ্চযুপ্পত্তিমত্তকন্তি ফলেন হেতুং দস্সেতি। উপ্পাদনহেতুকা হি পচ্চযানং উপ্পত্তি। ইদমত্থন্তি ইদং পযোজনং ইমস্স পচ্চযস্স পরিভুঞ্জনেতি অধিপ্পাযো। নিপ্পরিযাযেনাতি ইমিনা ইন্দ্রিযসংৰরাদীনি তীণি পধানস্স সীলস্স পরিৰারৰসেন পৰত্তিযা পরিযাযসীলানি নামাতি দস্সেতি।
71-74. Tatiyassa paṭhame sīlassa anavasesasamādānena akhaṇḍādibhāvāpattiyā ca paripuṇṇasīlā. Samādānato paṭṭhāya avicchindanato sīlasamaṅgino. Ettāvatā kirāti (a. ni. 2.37) kira-saddo arucisūcanattho. Tenettha ācariyavādassa attano aruccanabhāvaṃ dīpeti. Sampannasīlāti anāmaṭṭhavisesaṃ sāmaññato sīlasaṅkhepena gahitaṃ. Tañca catubbidhanti ācariyatthero ‘‘catupārisuddhisīlaṃ uddisitvā’’ti āha. Tatthāti catupārisuddhisīle. Jeṭṭhakasīlanti (saṃ. ni. 5.412) padhānasīlaṃ. Ubhayatthāti uddesaniddese. Idha niddese viya uddesepi pātimokkhasaṃvaro bhagavatā vutto ‘‘sampannasīlā’’ti vuttattāti adhippāyo. Sīlaggahaṇañhi pāḷiyaṃ pātimokkhasaṃvaravasena āgataṃ. Tenāha ‘‘pātimokkhasaṃvaroyevā’’tiādi. Tattha avadhāraṇena itaresaṃ tiṇṇaṃ ekadesena pātimokkhantogadhataṃ dīpeti. Tathā hi anolokiyolokane ājīvahetu chasikkhāpadavītikkame gilānapaccayassa apaccavekkhitaparibhoge ca āpatti vihitāti. Tīṇīti indriyasaṃvarasīlādīni. Sīlanti vuttaṭṭhānaṃ nāma atthīti sīlapariyāyena tesaṃ katthaci sutte gahitaṭṭhānaṃ nāma kiṃ atthi yathā pātimokkhasaṃvaroti ācariyassa sammukhattā appaṭikkhipantova upacārena pucchanto viya vadati. Tenāha ‘‘ananujānanto’’ti. Chadvārarakkhāmattakamevāti tassa sallahukabhāvamāha cittādhiṭṭhānamattena paṭipākatikabhāvāpattito. Itaresupi eseva nayo. Paccayuppattimattakanti phalena hetuṃ dasseti. Uppādanahetukā hi paccayānaṃ uppatti. Idamatthanti idaṃ payojanaṃ imassa paccayassa paribhuñjaneti adhippāyo. Nippariyāyenāti iminā indriyasaṃvarādīni tīṇi padhānassa sīlassa parivāravasena pavattiyā pariyāyasīlāni nāmāti dasseti.
ইদানি পাতিমোক্খসংৰরস্সেৰ পধানভাৰং ব্যতিরেকতো অন্ৰযতো চ উপমায ৰিভাৰেতুং ‘‘যস্সা’’তিআদিমাহ। তত্থ সোতি পাতিমোক্খসংৰরো। সেসানীতি ইন্দ্রিযসংৰরাদীনি। তস্সে ৰাতি ‘‘সম্পন্নসীলা’’তি এত্থ যং সীলং ৰুত্তং, তস্সেৰ। সম্পন্নপাতিমোক্খাতি এত্থ পাতিমোক্খগ্গহণেন ৰেৰচনং ৰত্ৰা তং ৰিত্থারেত্ৰা…পে॰… আদিমাহ। যথা অঞ্ঞত্থাপি ‘‘ইধ ভিক্খু সীলৰা হোতী’’তি পুগ্গলাধিট্ঠানায দেসনায উদ্দিট্ঠং সীলং ‘‘পাতিমোক্খসংৰরসংৰুতো ৰিহরতী’’তি (ৰিভ॰ ৫০৮) নিদ্দিট্ঠং। কস্মা আরদ্ধন্তি দেসনায কারণপুচ্ছা। সীলানিসংসদস্সনত্থন্তি পযোজননিদ্দেসো। ‘‘সীলানিসংসদস্সনত্থ’’ন্তি হি এত্থ ব্যতিরেকতো যং সীলানিসংসস্স অদস্সনং, তং ইমিস্সা দেসনায কারণন্তি কস্মা আরদ্ধন্তি? ৰেনেয্যানং সীলানিসংসস্স অদস্সনতোতি অত্থতো আপন্নো এৰ হোতি। তেনাহ ‘‘সচেপী’’তিআদি। সীলানিসংসদস্সনত্থন্তি পন ইমস্স অত্থং ৰিৰরিতুং ‘‘তেস’’ন্তিআদি ৰুত্তং। আনিসংসোতি উদযো। ‘‘সীলৰা সীলসম্পন্নো কাযস্স ভেদা পরং মরণা সুগতিং সগ্গং লোকং উপপজ্জতী’’তিআদীসু (দী॰ নি॰ ৩.৩১৬; অ॰ নি॰ ৫.২১৩; মহাৰ॰ ২৮৫) পন ৰিপাকফলম্পি ‘‘আনিসংসো’’তি ৰুত্তং। কো ৰিসেসোতি কো ফলৰিসেসো। কা ৰড্ঢীতি কো অব্ভুদযো। ৰিজ্জমানোপি গুণো যাথাৰতো ৰিভাৰিতো এৰ অভিরুচিং উপ্পাদেতি, ন অৰিভাৰিতো, তস্মা একন্ততো আনিসংসকিত্তনং ইচ্ছিতব্বমেৰাতি দস্সেতুং ‘‘অপ্পেৰ নামা’’তিআদিমাহ।
Idāni pātimokkhasaṃvarasseva padhānabhāvaṃ byatirekato anvayato ca upamāya vibhāvetuṃ ‘‘yassā’’tiādimāha. Tattha soti pātimokkhasaṃvaro. Sesānīti indriyasaṃvarādīni. Tasse vāti ‘‘sampannasīlā’’ti ettha yaṃ sīlaṃ vuttaṃ, tasseva. Sampannapātimokkhāti ettha pātimokkhaggahaṇena vevacanaṃ vatvā taṃ vitthāretvā…pe… ādimāha. Yathā aññatthāpi ‘‘idha bhikkhu sīlavā hotī’’ti puggalādhiṭṭhānāya desanāya uddiṭṭhaṃ sīlaṃ ‘‘pātimokkhasaṃvarasaṃvuto viharatī’’ti (vibha. 508) niddiṭṭhaṃ. Kasmā āraddhanti desanāya kāraṇapucchā. Sīlānisaṃsadassanatthanti payojananiddeso. ‘‘Sīlānisaṃsadassanattha’’nti hi ettha byatirekato yaṃ sīlānisaṃsassa adassanaṃ, taṃ imissā desanāya kāraṇanti kasmā āraddhanti? Veneyyānaṃ sīlānisaṃsassa adassanatoti atthato āpanno eva hoti. Tenāha ‘‘sacepī’’tiādi. Sīlānisaṃsadassanatthanti pana imassa atthaṃ vivarituṃ ‘‘tesa’’ntiādi vuttaṃ. Ānisaṃsoti udayo. ‘‘Sīlavā sīlasampanno kāyassa bhedā paraṃ maraṇā sugatiṃ saggaṃ lokaṃ upapajjatī’’tiādīsu (dī. ni. 3.316; a. ni. 5.213; mahāva. 285) pana vipākaphalampi ‘‘ānisaṃso’’ti vuttaṃ. Ko visesoti ko phalaviseso. Kā vaḍḍhīti ko abbhudayo. Vijjamānopi guṇo yāthāvato vibhāvito eva abhiruciṃ uppādeti, na avibhāvito, tasmā ekantato ānisaṃsakittanaṃ icchitabbamevāti dassetuṃ ‘‘appeva nāmā’’tiādimāha.
পিযোতি পিযাযিতব্বো। পিযস্স নাম দস্সনং একন্ততো অভিনন্দিতব্বং হোতীতি আহ ‘‘পিযচক্খূহি সম্পস্সিতব্বো’’তি। পীতিসমুট্ঠানপ্পসন্নসোম্মরূপপরিগ্গহঞ্হি চক্খু ‘‘পিযচক্খূ’’তি ৰুচ্চতি। তেসন্তি সব্রহ্মচারীনং। মনৰড্ঢনকোতি পীতিমনস্স পরিব্রূহনতো উপরূপরি পীতিচিত্তস্সেৰ উপ্পাদনকো। গরুট্ঠানিযোতি গরুকরণস্স ঠানভূতো। জানং জানাতীতি ঞাণেন জানিতব্বং জানাতি। যথা ৰা অঞ্ঞে অজানন্তাপি জানন্তা ৰিয পৰত্তন্তি, ন এৰমযং, অযং পন জানন্তো এৰ জানাতি। পস্সং পস্সতীতি দস্সনভূতেন পঞ্ঞাচক্খুনা পস্সিতব্বং পস্সতি, পস্সন্তো এৰ ৰা পস্সতি। এৰং সম্ভাৰনীযোতি এৰং ৰিঞ্ঞুতায পণ্ডিতভাৰেন সম্ভাৰেতব্বো। সীলেস্ৰেৰস্স পরিপূরকারীতি সীলেসু পরিপূরকারী এৰ ভৰেয্যাতি। এৰং উত্তরপদাৰধারণং দট্ঠব্বং। এৰঞ্হি ইমিনা পদেন উপরিসিক্খাদ্ৰযং অনিৰত্তিতমেৰ হোতি। যথা পন সীলেসু পরিপূরকারী নাম হোতি, তং ফলেন দস্সেতুং ‘‘অজ্ঝত্ত’’ন্তিআদি ৰুত্তং। ৰিপস্সনাধিট্ঠানসমাধিসংৰত্তনিকতায হি ইধ সীলস্স পারিপূরী, ন কেৰলং অখণ্ডাদিভাৰমত্তং। ৰুত্তঞ্হেতং ‘‘যানি খো পন তানি অখণ্ডানি…পে॰… সমাধিসংৰত্তনিকানী’’তি। এৰঞ্চ কত্ৰা উপরিসিক্খাদ্ৰযং সীলস্স সম্ভারভাৰেন গহিতন্তি সীলস্সেৰেত্থ পধানগ্গহণং সিদ্ধং হোতি। সীলানুরক্খকা হি চিত্তেকগ্গতাসঙ্খারপরিগ্গহা। অনূনেনাতি অখণ্ডাদিভাৰেন, কস্সচি ৰা অহাপনেন উপপন্নেন। আকারেনাতি করণেন সম্পাদনেন।
Piyoti piyāyitabbo. Piyassa nāma dassanaṃ ekantato abhinanditabbaṃ hotīti āha ‘‘piyacakkhūhi sampassitabbo’’ti. Pītisamuṭṭhānappasannasommarūpapariggahañhi cakkhu ‘‘piyacakkhū’’ti vuccati. Tesanti sabrahmacārīnaṃ. Manavaḍḍhanakoti pītimanassa paribrūhanato uparūpari pīticittasseva uppādanako. Garuṭṭhāniyoti garukaraṇassa ṭhānabhūto. Jānaṃ jānātīti ñāṇena jānitabbaṃ jānāti. Yathā vā aññe ajānantāpi jānantā viya pavattanti, na evamayaṃ, ayaṃ pana jānanto eva jānāti. Passaṃ passatīti dassanabhūtena paññācakkhunā passitabbaṃ passati, passanto eva vā passati. Evaṃ sambhāvanīyoti evaṃ viññutāya paṇḍitabhāvena sambhāvetabbo. Sīlesvevassa paripūrakārīti sīlesu paripūrakārī eva bhaveyyāti. Evaṃ uttarapadāvadhāraṇaṃ daṭṭhabbaṃ. Evañhi iminā padena uparisikkhādvayaṃ anivattitameva hoti. Yathā pana sīlesu paripūrakārī nāma hoti, taṃ phalena dassetuṃ ‘‘ajjhatta’’ntiādi vuttaṃ. Vipassanādhiṭṭhānasamādhisaṃvattanikatāya hi idha sīlassa pāripūrī, na kevalaṃ akhaṇḍādibhāvamattaṃ. Vuttañhetaṃ ‘‘yāni kho pana tāni akhaṇḍāni…pe… samādhisaṃvattanikānī’’ti. Evañca katvā uparisikkhādvayaṃ sīlassa sambhārabhāvena gahitanti sīlassevettha padhānaggahaṇaṃ siddhaṃ hoti. Sīlānurakkhakā hi cittekaggatāsaṅkhārapariggahā. Anūnenāti akhaṇḍādibhāvena, kassaci vā ahāpanena upapannena. Ākārenāti karaṇena sampādanena.
অজ্ঝত্তন্তি ৰা অত্তনোতি ৰা একং একত্থং, ব্যঞ্জনমেৰ নানং। ভুম্মত্থে চেতং, ‘‘সমথ’’ন্তি উপযোগৰচনং ‘‘অনূ’’তি ইমিনা উপসগ্গেন যোগে সিদ্ধন্তি আহ ‘‘অত্তনো চিত্তসমথে যুত্তো’’তি। তত্থ চিত্তসমথেতি চিত্তস্স সমাধানে। যুত্তোতি অৰিযুত্তো পসুতো। যো সব্বেন সব্বং ঝানভাৰনায অননুযুত্তো, সো তং বহি নীহরতি নাম। যো আরভিত্ৰা অন্তরা সঙ্কোচং আপজ্জতি, সো তং ৰিনাসেতি নাম। যো পন ঈদিসো অহুত্ৰা ঝানং উপসম্পজ্জ ৰিহরতি, সো অনিরাকতজ্ঝানোতি দস্সেন্তো ‘‘বহি অনীহটজ্ঝানো’’তিআদিমাহ। নীহরণৰিনাসত্থঞ্হি ইদং নিরাকরণং নাম। ‘‘থম্ভং নিরংকত্ৰা নিৰাতৰুত্তী’’তিআদীসু (সু॰ নি॰ ৩২৮) চস্স পযোগো দট্ঠব্বো।
Ajjhattanti vā attanoti vā ekaṃ ekatthaṃ, byañjanameva nānaṃ. Bhummatthe cetaṃ, ‘‘samatha’’nti upayogavacanaṃ ‘‘anū’’ti iminā upasaggena yoge siddhanti āha ‘‘attano cittasamathe yutto’’ti. Tattha cittasamatheti cittassa samādhāne. Yuttoti aviyutto pasuto. Yo sabbena sabbaṃ jhānabhāvanāya ananuyutto, so taṃ bahi nīharati nāma. Yo ārabhitvā antarā saṅkocaṃ āpajjati, so taṃ vināseti nāma. Yo pana īdiso ahutvā jhānaṃ upasampajja viharati, so anirākatajjhānoti dassento ‘‘bahi anīhaṭajjhāno’’tiādimāha. Nīharaṇavināsatthañhi idaṃ nirākaraṇaṃ nāma. ‘‘Thambhaṃ niraṃkatvā nivātavuttī’’tiādīsu (su. ni. 328) cassa payogo daṭṭhabbo.
সত্তৰিধায অনুপস্সনাযাতি এত্থ অনিচ্চানুপস্সনা, দুক্খানুপস্সনা, অনত্তানুপস্সনা, নিব্বিদানুপস্সনা, ৰিরাগানুপস্সনা, নিরোধানুপস্সনা, পটিনিস্সগ্গানুপস্সনাতি ইমা সত্তৰিধা অনুপস্সনা। সুঞ্ঞাগারগতো ভিক্খু তত্থ লদ্ধকাযৰিৰেকতায সমথৰিপস্সনাৰসেন চিত্তৰিৰেকং পরিব্রূহেন্তো যথানুসিট্ঠপটিপত্তিযা লোকং সাসনঞ্চ অত্তনো ৰিসেসাধিগমট্ঠানভূতং সুঞ্ঞাগারঞ্চ উপসোভযমানো গুণৰিসেসাধিট্ঠানভাৰাপাদনেন ৰিঞ্ঞূনং অত্থতো তং ব্রূহেন্তো নাম হোতীতি ৰুত্তং ‘‘ব্রূহেতা সুঞ্ঞাগারান’’ন্তি। তেনাহ ‘‘এত্থ চা’’তিআদি। একভূমকাদিপাসাদে কুরুমানোপি পন নেৰ সুঞ্ঞাগারানং ব্রূহেতাতি দট্ঠব্বো। সুঞ্ঞাগারগ্গহণেন চেত্থ অরঞ্ঞরুক্খমূলাদি সব্বং পধানানুযোগক্খমং সেনাসনং গহিতন্তি দট্ঠব্বং।
Sattavidhāya anupassanāyāti ettha aniccānupassanā, dukkhānupassanā, anattānupassanā, nibbidānupassanā, virāgānupassanā, nirodhānupassanā, paṭinissaggānupassanāti imā sattavidhā anupassanā. Suññāgāragato bhikkhu tattha laddhakāyavivekatāya samathavipassanāvasena cittavivekaṃ paribrūhento yathānusiṭṭhapaṭipattiyā lokaṃ sāsanañca attano visesādhigamaṭṭhānabhūtaṃ suññāgārañca upasobhayamāno guṇavisesādhiṭṭhānabhāvāpādanena viññūnaṃ atthato taṃ brūhento nāma hotīti vuttaṃ ‘‘brūhetā suññāgārāna’’nti. Tenāha ‘‘ettha cā’’tiādi. Ekabhūmakādipāsāde kurumānopi pana neva suññāgārānaṃ brūhetāti daṭṭhabbo. Suññāgāraggahaṇena cettha araññarukkhamūlādi sabbaṃ padhānānuyogakkhamaṃ senāsanaṃ gahitanti daṭṭhabbaṃ.
এত্তাৰতা যথা তণ্হাৰিচরিতদেসনা পঠমং তণ্হাৰসেন আরদ্ধাপি তণ্হাপদট্ঠানত্তা মানদিট্ঠীনং মানদিট্ঠিযো ওসরিত্ৰা কমেন পপঞ্চত্তযদেসনা জাতা, এৰমযং দেসনা পঠমং অধিসীলসিক্খাৰসেন আরদ্ধাপি সীলপদট্ঠানত্তা সমথৰিপস্সনানং সমথৰিপস্সনাযো ওসরিত্ৰা কমেন সিক্খাত্তযদেসনা জাতাতি ৰেদিতব্বা। এত্থ হি ‘‘সীলেস্ৰেৰস্স পরিপূরকারী’’তি এত্তাৰতা অধিসীলসিক্খা ৰুত্তা, ‘‘অজ্ঝত্তং চেতোসমথমনুযুত্তো অনিরাকতজ্ঝানো’’তি এত্তাৰতা অধিচিত্তসিক্খা, ‘‘ৰিপস্সনায সমন্নাগতো’’তি এত্তাৰতা অধিপঞ্ঞাসিক্খা। ‘‘ব্রূহেতা সুঞ্ঞাগারান’’ন্তি ইমিনা পন সমথৰসেন সুঞ্ঞাগারৰড্ঢনে অধিচিত্তসিক্খা, ৰিপস্সনাৰসেন অধিপঞ্ঞাসিক্খাতি এৰং দ্ৰেপি সিক্খা সঙ্গহেত্ৰা ৰুত্তা। এত্থ চ ‘‘অজ্ঝত্তং চেতোসমথমনুযুত্তো অনিরাকতজ্ঝানো’’তি ইমেহি পদেহি সীলানুরক্খিকা এৰ চিত্তেকগ্গতা কথিতা, ‘‘ৰিপস্সনাযা’’তি ইমিনা পদেন সীলানুরক্খিকো সঙ্খারপরিগ্গহো।
Ettāvatā yathā taṇhāvicaritadesanā paṭhamaṃ taṇhāvasena āraddhāpi taṇhāpadaṭṭhānattā mānadiṭṭhīnaṃ mānadiṭṭhiyo osaritvā kamena papañcattayadesanā jātā, evamayaṃ desanā paṭhamaṃ adhisīlasikkhāvasena āraddhāpi sīlapadaṭṭhānattā samathavipassanānaṃ samathavipassanāyo osaritvā kamena sikkhāttayadesanā jātāti veditabbā. Ettha hi ‘‘sīlesvevassa paripūrakārī’’ti ettāvatā adhisīlasikkhā vuttā, ‘‘ajjhattaṃ cetosamathamanuyutto anirākatajjhāno’’ti ettāvatā adhicittasikkhā, ‘‘vipassanāya samannāgato’’ti ettāvatā adhipaññāsikkhā. ‘‘Brūhetā suññāgārāna’’nti iminā pana samathavasena suññāgāravaḍḍhane adhicittasikkhā, vipassanāvasena adhipaññāsikkhāti evaṃ dvepi sikkhā saṅgahetvā vuttā. Ettha ca ‘‘ajjhattaṃ cetosamathamanuyutto anirākatajjhāno’’ti imehi padehi sīlānurakkhikā eva cittekaggatā kathitā, ‘‘vipassanāyā’’ti iminā padena sīlānurakkhiko saṅkhārapariggaho.
কথং চিত্তেকগ্গতা সীলমনুরক্খতি? যস্স হি চিত্তেকগ্গতা নত্থি, সো ব্যাধিম্হি উপ্পন্নে ৰিহঞ্ঞতি, সো ব্যাধিৰিহতো ৰিক্খিত্তচিত্তো সীলং ৰিনাসেত্ৰাপি ব্যাধিৰূপসমং কত্তা হোতি। যস্স পন চিত্তেকগ্গতা অত্থি, সো তং ব্যাধিদুক্খং ৰিক্খম্ভেত্ৰা সমাপত্তিং সমাপজ্জতি, সমাপন্নক্খণে দুক্খং দূরগতং হোতি, বলৰতরং সুখমুপ্পজ্জতি। এৰং চিত্তেকগ্গতা সীলমনুরক্খতি। কথং সঙ্খারপরিগ্গহো সীলমনুরক্খতি? যস্স হি সঙ্খারপরিগ্গহো নত্থি, তস্স ‘‘মম রূপং মম ৰিঞ্ঞাণ’’ন্তি অত্তভাৰে বলৰমমত্তং হোতি, সো তথারূপেসু দুব্ভিক্খব্যাধিভযাদীসু সম্পত্তেসু সীলং নাসেত্ৰাপি অত্তভাৰং পোসেতা হোতি। যস্স পন সঙ্খারপরিগ্গহো অত্থি, তস্স অত্তভাৰে বলৰমমত্তং ৰা সিনেহো ৰা ন হোতি, সো তথারূপেসু দুব্ভিক্খব্যাধিভযাদীসু সম্পত্তেসু সচেপিস্স অন্তানি বহি নিক্খমন্তি, সচেপি উস্সুস্সতি ৰিসুস্সতি, খণ্ডাখণ্ডিকো ৰা হোতি সতধাপি সহস্সধাপি, নেৰ সীলং ৰিনাসেত্ৰা অত্তভাৰং পোসেতা হোতি। এৰং সঙ্খারপরিগ্গহো সীলং অনুরক্খতি।
Kathaṃ cittekaggatā sīlamanurakkhati? Yassa hi cittekaggatā natthi, so byādhimhi uppanne vihaññati, so byādhivihato vikkhittacitto sīlaṃ vināsetvāpi byādhivūpasamaṃ kattā hoti. Yassa pana cittekaggatā atthi, so taṃ byādhidukkhaṃ vikkhambhetvā samāpattiṃ samāpajjati, samāpannakkhaṇe dukkhaṃ dūragataṃ hoti, balavataraṃ sukhamuppajjati. Evaṃ cittekaggatā sīlamanurakkhati. Kathaṃ saṅkhārapariggaho sīlamanurakkhati? Yassa hi saṅkhārapariggaho natthi, tassa ‘‘mama rūpaṃ mama viññāṇa’’nti attabhāve balavamamattaṃ hoti, so tathārūpesu dubbhikkhabyādhibhayādīsu sampattesu sīlaṃ nāsetvāpi attabhāvaṃ posetā hoti. Yassa pana saṅkhārapariggaho atthi, tassa attabhāve balavamamattaṃ vā sineho vā na hoti, so tathārūpesu dubbhikkhabyādhibhayādīsu sampattesu sacepissa antāni bahi nikkhamanti, sacepi ussussati visussati, khaṇḍākhaṇḍiko vā hoti satadhāpi sahassadhāpi, neva sīlaṃ vināsetvā attabhāvaṃ posetā hoti. Evaṃ saṅkhārapariggaho sīlaṃ anurakkhati.
‘‘ব্রূহেতা সুঞ্ঞাগারান’’ন্তি ইমিনা পন তস্সেৰ উভযস্স ব্রূহনা ৰড্ঢনা সাতচ্চকিরিযা দস্সিতা। এৰং ভগৰা যস্মা ‘‘সব্রহ্মচারীনং পিযো চস্সং…পে॰… ভাৰনীযো চা’’তি ইমে চত্তারো ধম্মে আকঙ্খন্তেন নত্থঞ্ঞং কিঞ্চি কাতব্বং, অঞ্ঞদত্থু সীলাদিগুণসমন্নাগতেনেৰ ভৰিতব্বং। ঈদিসো হি সব্রহ্মচারীনং পিযো হোতি মনাপো গরু ভাৰনীযো। ৰুত্তম্পি হেতং –
‘‘Brūhetā suññāgārāna’’nti iminā pana tasseva ubhayassa brūhanā vaḍḍhanā sātaccakiriyā dassitā. Evaṃ bhagavā yasmā ‘‘sabrahmacārīnaṃ piyo cassaṃ…pe… bhāvanīyo cā’’ti ime cattāro dhamme ākaṅkhantena natthaññaṃ kiñci kātabbaṃ, aññadatthu sīlādiguṇasamannāgateneva bhavitabbaṃ. Īdiso hi sabrahmacārīnaṃ piyo hoti manāpo garu bhāvanīyo. Vuttampi hetaṃ –
‘‘সীলদস্সনসম্পন্নং , ধম্মট্ঠং সচ্চৰেদিনং।
‘‘Sīladassanasampannaṃ , dhammaṭṭhaṃ saccavedinaṃ;
অত্তনো কম্ম কুব্বানং, তং জনো কুরুতে পিয’’ন্তি॥ (ধ॰ প॰ ২১৭)।
Attano kamma kubbānaṃ, taṃ jano kurute piya’’nti. (dha. pa. 217);
তস্মা ‘‘আকঙ্খেয্য চে, ভিক্খৰে, ভিক্খু সব্রহ্মচারীনং পিযো চস্সং…পে॰… সীলেস্ৰেৰস্স পরিপূরকারী…পে॰… সুঞ্ঞাগারান’’ন্তি ৰত্ৰা ইদানি যস্মা পচ্চযলাভাদিং পত্থযন্তেনপি ইদমেৰ করণীযং, ন অঞ্ঞং কিঞ্চি, তস্মা ‘‘আকঙ্খেয্য চে, ভিক্খৰে, ভিক্খু লাভী অস্স’’ন্তিআদিমাহ। লাভী অস্সন্তি লাভাসায সংৰরসীলপরিপূরণং পাল়িযং আগতং। কিমীদিসং ভগৰা অনুজানাতীতি? ন ভগৰা সভাৰেন ঈদিসং অনুজানাতি, মহাকারুণিকতায পন পুগ্গলজ্ঝাসযেন এৰং ৰুত্তন্তি দস্সেন্তো ‘‘ন ভগৰা’’তিআদিমাহ। তত্থ ঘাসেসনং ছিন্নকথো, ন ৰাচং পযুত্তং ভণেতি ছিন্নকথো মূগো ৰিয হুত্ৰা ওভাসপরিকথানিমিত্তৰিঞ্ঞত্তিপযুত্তং ঘাসেসনং ৰাচং ন ভণে, ন কথেয্যাতি অত্থো। পুগ্গলজ্ঝাসযৰসেনাতি সঙ্খেপতো ৰুত্তমত্থং ৰিৰরন্তো ‘‘যেসং হী’’তিআদিমাহ। রসো সভাৰভূতো আনিসংসো রসানিসংসো।
Tasmā ‘‘ākaṅkheyya ce, bhikkhave, bhikkhu sabrahmacārīnaṃ piyo cassaṃ…pe… sīlesvevassa paripūrakārī…pe… suññāgārāna’’nti vatvā idāni yasmā paccayalābhādiṃ patthayantenapi idameva karaṇīyaṃ, na aññaṃ kiñci, tasmā ‘‘ākaṅkheyya ce, bhikkhave, bhikkhu lābhī assa’’ntiādimāha. Lābhī assanti lābhāsāya saṃvarasīlaparipūraṇaṃ pāḷiyaṃ āgataṃ. Kimīdisaṃ bhagavā anujānātīti? Na bhagavā sabhāvena īdisaṃ anujānāti, mahākāruṇikatāya pana puggalajjhāsayena evaṃ vuttanti dassento ‘‘na bhagavā’’tiādimāha. Tattha ghāsesanaṃ chinnakatho, na vācaṃ payuttaṃ bhaṇeti chinnakatho mūgo viya hutvā obhāsaparikathānimittaviññattipayuttaṃ ghāsesanaṃ vācaṃ na bhaṇe, na katheyyāti attho. Puggalajjhāsayavasenāti saṅkhepato vuttamatthaṃ vivaranto ‘‘yesaṃ hī’’tiādimāha. Raso sabhāvabhūto ānisaṃso rasānisaṃso.
পচ্চযদানকারাতি চীৰরাদিপচ্চযদানৰসেন পৰত্তকারা। মহপ্ফলা মহানিসংসাতি উভযমেতং অত্থতো একং, ব্যঞ্জনমেৰ নানং। ‘‘পঞ্চিমে, গহপতযো, আনিসংসা’’তিআদীসু (মহাৰ॰ ২৮৫) হি আনিসংসসদ্দো ফলপরিযাযোপি হোতি। মহন্তং ৰা লোকিযসুখং ফলন্তি পসৰন্তীতি মহপ্ফলা, মহতো লোকুত্তরসুখস্স পচ্চযা হোন্তীতি মহানিসংসা। তেনাহ ‘‘লোকিযসুখেন ফলভূতেনা’’তিআদি।
Paccayadānakārāti cīvarādipaccayadānavasena pavattakārā. Mahapphalā mahānisaṃsāti ubhayametaṃ atthato ekaṃ, byañjanameva nānaṃ. ‘‘Pañcime, gahapatayo, ānisaṃsā’’tiādīsu (mahāva. 285) hi ānisaṃsasaddo phalapariyāyopi hoti. Mahantaṃ vā lokiyasukhaṃ phalanti pasavantīti mahapphalā, mahato lokuttarasukhassa paccayā hontīti mahānisaṃsā. Tenāha ‘‘lokiyasukhena phalabhūtenā’’tiādi.
পেচ্চভৰং গতাতি পেতূপপত্তিৰসেন নিব্বত্তিং উপগতা। তে পন যস্মা ইধ কতকালকিরিযা কালেন কতজীৰিতুপচ্ছেদা হোন্তি, তস্মা ৰুত্তং ‘‘কালকতা’’তি। সস্সুসসুরা চ তপ্পক্খিকা চ সস্সুসসুরপক্খিকা। তে ঞাতিযোনিসম্বন্ধেন আৰাহৰিৰাহসম্বন্ধৰসেন সম্বদ্ধা ঞাতী। সালোহিতাতি যোনিসম্বন্ধৰসেন। একলোহিতবদ্ধাতি একেন সমানেন লোহিতসম্বন্ধেন সম্বদ্ধা। পসন্নচিত্তোতি পসন্নচিত্তকো। কালকতো পিতা ৰা মাতা ৰা পেতযোনিযং উপ্পন্নোতি অধিকারতো ৰিঞ্ঞাযতীতি ৰুত্তং। মহানিসংসমেৰ হোতীতি তস্স তথাসীলসম্পন্নত্তাতি অধিপ্পাযো।
Peccabhavaṃ gatāti petūpapattivasena nibbattiṃ upagatā. Te pana yasmā idha katakālakiriyā kālena katajīvitupacchedā honti, tasmā vuttaṃ ‘‘kālakatā’’ti. Sassusasurā ca tappakkhikā ca sassusasurapakkhikā. Te ñātiyonisambandhena āvāhavivāhasambandhavasena sambaddhā ñātī. Sālohitāti yonisambandhavasena. Ekalohitabaddhāti ekena samānena lohitasambandhena sambaddhā. Pasannacittoti pasannacittako. Kālakato pitā vā mātā vā petayoniyaṃ uppannoti adhikārato viññāyatīti vuttaṃ. Mahānisaṃsameva hotīti tassa tathāsīlasampannattāti adhippāyo.
অজ্ঝোত্থরিতাতি মদ্দিতা। ন চ মং অরতি সহেয্যাতি মং চ অরতি ন অভিভৰেয্য ন মদ্দেয্য ন অজ্ঝোত্থরেয্য। উপ্পন্নন্তি জাতং নিব্বত্তং। সীলাদিগুণযুত্তো হি অরতিঞ্চ রতিঞ্চ সহতি অজ্ঝোত্থরতি, মদ্দিত্ৰা তিট্ঠতি, তস্মা ঈদিসমত্তানং ইচ্ছন্তেনপি সীলাদিগুণযুত্তেনেৰ ভৰিতব্বন্তি দস্সেতি। চিত্তুত্রাসো ভাযতীতি ভযং, আরম্মণং ভাযতি এতস্মাতি ভযং। তং দুৰিধম্পি ভযং ভেরৰঞ্চ সহতি অভিভৰতীতি ভযভেরৰসহো। সীলাদিগুণযুত্তো হি ভযভেরৰং সহতি অজ্ঝোত্থরতি, মদ্দিত্ৰা তিট্ঠতি অরিযকোটিযৰাসী মহাদত্তত্থেরো ৰিয।
Ajjhottharitāti madditā. Na ca maṃ arati saheyyāti maṃ ca arati na abhibhaveyya na maddeyya na ajjhotthareyya. Uppannanti jātaṃ nibbattaṃ. Sīlādiguṇayutto hi aratiñca ratiñca sahati ajjhottharati, madditvā tiṭṭhati, tasmā īdisamattānaṃ icchantenapi sīlādiguṇayutteneva bhavitabbanti dasseti. Cittutrāso bhāyatīti bhayaṃ, ārammaṇaṃ bhāyati etasmāti bhayaṃ. Taṃ duvidhampi bhayaṃ bheravañca sahati abhibhavatīti bhayabheravasaho. Sīlādiguṇayutto hi bhayabheravaṃ sahati ajjhottharati, madditvā tiṭṭhati ariyakoṭiyavāsī mahādattatthero viya.
থেরো কির মগ্গং পটিপন্নো অঞ্ঞতরং পাসাদিকং অরঞ্ঞং দিস্ৰা ‘‘ইধেৰজ্জ সমণধম্মং কত্ৰা গমিস্সামী’’তি মগ্গা ওক্কম্ম অঞ্ঞতরস্মিং রুক্খমূলে সঙ্ঘাটিং পঞ্ঞপেত্ৰা পল্লঙ্কং আভুজিত্ৰা নিসীদি। রুক্খদেৰতায দারকা থেরস্স সীলতেজেন সকভাৰেন সণ্ঠাতুং অসক্কোন্তা ৰিস্সরমকংসু। দেৰতাপি সকলরুক্খং চালেসি। থেরো অচলোৰ নিসীদি। সা দেৰতা ধূমাযি পজ্জলি। নেৰ সক্খি থেরং চালেতুং। ততো উপাসকৰণ্ণেনাগন্ত্ৰা ৰন্দিত্ৰা অট্ঠাসি। ‘‘কো এসো’’তি ৰুত্তা ‘‘অহং, ভন্তে, তস্মিং রুক্খে অধিৰত্থা দেৰতা’’তি অৰোচ। ত্ৰং এতে ৰিকারে অকাসীতি। আম, ভন্তেতি। ‘‘কস্মা’’তি চ ৰুত্তা আহ ‘‘তুম্হাকং, ভন্তে, সীলতেজেন দারকা সকভাৰেন সণ্ঠাতুং অসক্কোন্তা ৰিস্সরমকংসু, সাহং তুম্হে পলাপেতুং এৰমকাসি’’ন্তি। থেরো আহ ‘‘অথ কস্মা ‘ইধ, ভন্তে, মা ৰসথ, ময্হং অফাসুক’ন্তি পটিকচ্চেৰ নাৰচাসি, ইদানি পন মা মং কিঞ্চি অৰচ, ‘অরিযকোটিযমহাদত্তো অমনুস্সভযেন গতো’তি ৰচনতো লজ্জামি, তেনাহং ইধেৰ ৰসিস্সং, ত্ৰং পন অজ্জেকদিৰসং যত্থ কত্থচি ৰসাহী’’তি। এৰং সীলাদিগুণযুত্তো ভযভেরৰসহো হোতি, তস্মা ঈদিসমত্তানং ইচ্ছন্তেনপি সীলাদিগুণযুত্তেনেৰ ভৰিতব্বন্তি দস্সেতি। দুতিযাদীনি উত্তানত্থানি।
Thero kira maggaṃ paṭipanno aññataraṃ pāsādikaṃ araññaṃ disvā ‘‘idhevajja samaṇadhammaṃ katvā gamissāmī’’ti maggā okkamma aññatarasmiṃ rukkhamūle saṅghāṭiṃ paññapetvā pallaṅkaṃ ābhujitvā nisīdi. Rukkhadevatāya dārakā therassa sīlatejena sakabhāvena saṇṭhātuṃ asakkontā vissaramakaṃsu. Devatāpi sakalarukkhaṃ cālesi. Thero acalova nisīdi. Sā devatā dhūmāyi pajjali. Neva sakkhi theraṃ cāletuṃ. Tato upāsakavaṇṇenāgantvā vanditvā aṭṭhāsi. ‘‘Ko eso’’ti vuttā ‘‘ahaṃ, bhante, tasmiṃ rukkhe adhivatthā devatā’’ti avoca. Tvaṃ ete vikāre akāsīti. Āma, bhanteti. ‘‘Kasmā’’ti ca vuttā āha ‘‘tumhākaṃ, bhante, sīlatejena dārakā sakabhāvena saṇṭhātuṃ asakkontā vissaramakaṃsu, sāhaṃ tumhe palāpetuṃ evamakāsi’’nti. Thero āha ‘‘atha kasmā ‘idha, bhante, mā vasatha, mayhaṃ aphāsuka’nti paṭikacceva nāvacāsi, idāni pana mā maṃ kiñci avaca, ‘ariyakoṭiyamahādatto amanussabhayena gato’ti vacanato lajjāmi, tenāhaṃ idheva vasissaṃ, tvaṃ pana ajjekadivasaṃ yattha katthaci vasāhī’’ti. Evaṃ sīlādiguṇayutto bhayabheravasaho hoti, tasmā īdisamattānaṃ icchantenapi sīlādiguṇayutteneva bhavitabbanti dasseti. Dutiyādīni uttānatthāni.
আকঙ্খসুত্তাদিৰণ্ণনা নিট্ঠিতা।
Ākaṅkhasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
১. আকঙ্খসুত্তং • 1. Ākaṅkhasuttaṃ
২. কণ্টকসুত্তং • 2. Kaṇṭakasuttaṃ
৩. ইট্ঠধম্মসুত্তং • 3. Iṭṭhadhammasuttaṃ
৪. ৰড্ঢিসুত্তং • 4. Vaḍḍhisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
১. আকঙ্খসুত্তৰণ্ণনা • 1. Ākaṅkhasuttavaṇṇanā
২. কণ্টকসুত্তৰণ্ণনা • 2. Kaṇṭakasuttavaṇṇanā
৩-৪. ইট্ঠধম্মসুত্তাদিৰণ্ণনা • 3-4. Iṭṭhadhammasuttādivaṇṇanā
