| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(8) 3. ஆகங்க²வக்³கோ³
(8) 3. Ākaṅkhavaggo
1. ஆகங்க²ஸுத்தவண்ணனா
1. Ākaṅkhasuttavaṇṇanā
71. ததியஸ்ஸ பட²மே ஸம்பன்னஸீலாதி பரிபுண்ணஸீலா, ஸீலஸமங்கி³னோ வா ஹுத்வாதி அத்தோ². தத்த² த்³வீஹி காரணேஹி ஸம்பன்னஸீலதா ஹோதி ஸீலவிபத்தியா ச ஆதீ³னவத³ஸ்ஸனேன, ஸீலஸம்பத்தியா ச ஆனிஸங்ஸத³ஸ்ஸனேன. தது³ப⁴யம்பி விஸுத்³தி⁴மக்³கே³ (விஸுத்³தி⁴॰ 1.9, 21) வித்தா²ரிதங். தத்த² ‘‘ஸம்பன்னஸீலா’’தி எத்தாவதா கிர ப⁴க³வா சதுபாரிஸுத்³தி⁴ஸீலங் உத்³தி³ஸித்வா ‘‘பாதிமொக்க²ஸங்வரஸங்வுதா’’தி இமினா தத்த² ஜெட்ட²கஸீலங் வித்தா²ரெத்வா த³ஸ்ஸேஸீதி தீ³பவிஹாரவாஸீ ஸுமனத்தே²ரோ ஆஹ. அந்தேவாஸிகோ பனஸ்ஸ தேபிடகசூளனாக³த்தே²ரோ ஆஹ – உப⁴யத்த²பி பாதிமொக்க²ஸங்வரோவ ப⁴க³வதா வுத்தோ. பாதிமொக்க²ஸங்வரோயேவ ஹி ஸீலங், இதரானி பன தீணி ஸீலந்தி வுத்தட்டா²னங் அத்தீ²தி அனநுஜானந்தோ வத்வா ஆஹ – இந்த்³ரியஸங்வரோ நாம ச²த்³வாராரக்கா²மத்தகமேவ, ஆஜீவபாரிஸுத்³தி⁴ த⁴ம்மேன ஸமேன பச்சயுப்பத்திமத்தகங், பச்சயஸன்னிஸ்ஸிதங் படிலத்³த⁴பச்சயே இத³மத்த²ந்தி பச்சவெக்கி²த்வா பரிபு⁴ஞ்ஜனமத்தகங். நிப்பரியாயேன பாதிமொக்க²ஸங்வரோவ ஸீலங். யஸ்ஸ ஸோ பி⁴ன்னோ, அயங் ஸீஸச்சி²ன்னோ விய புரிஸோ ஹத்த²பாதே³ ஸேஸானி ரக்கி²ஸ்ஸதீதி ந வத்தப்³போ³. யஸ்ஸ பன ஸோ அரோகோ³, அயங் அச்சி²ன்னஸீஸோ விய புரிஸோ ஜீவிதங் ஸேஸானி புன பாகதிகானி காதுங் ஸக்கோதி. தஸ்மா ‘‘ஸம்பன்னஸீலா’’தி இமினா பாதிமொக்க²ஸங்வரங் உத்³தி³ஸித்வா ‘‘ஸம்பன்னபாதிமொக்கா²’’தி தஸ்ஸேவ வேவசனங் வத்வா தங் வித்தா²ரெத்வா த³ஸ்ஸெந்தோ பாதிமொக்க²ஸங்வரஸங்வுதாதிஆதி³மாஹ. தத்த² பாதிமொக்க²ஸங்வரஸங்வுத்தாதிஆதீ³னி வுத்தத்தா²னேவ. ஆகங்கெ²ய்ய சேதி இத³ங் கஸ்மா ஆரத்³த⁴ந்தி? ஸீலானிஸங்ஸத³ஸ்ஸனத்த²ங் . ஸசேபி அசிரபப்³ப³ஜிதானங் வா து³ப்பஞ்ஞானங் வா ஏவமஸ்ஸ ‘‘ப⁴க³வா ‘ஸீலங் பூரேத² ஸீலங் பூரேதா²’தி வத³தி, கோ நு கோ² ஸீலபூரணே ஆனிஸங்ஸோ, கோ விஸேஸோ, கா வட்³டீ⁴’’தி தேஸங் த³ஸ ஆனிஸங்ஸே த³ஸ்ஸேதுங் ஏவமாஹ – ‘‘அப்பேவ நாம ஏதங் ஸப்³ரஹ்மசாரீனங் பியமனாபதாதி³ஆஸவக்க²யபரியோஸானங் ஆனிஸங்ஸங் ஸுத்வாபி ஸீலங் பரிபூரெய்யு’’ந்தி.
71. Tatiyassa paṭhame sampannasīlāti paripuṇṇasīlā, sīlasamaṅgino vā hutvāti attho. Tattha dvīhi kāraṇehi sampannasīlatā hoti sīlavipattiyā ca ādīnavadassanena, sīlasampattiyā ca ānisaṃsadassanena. Tadubhayampi visuddhimagge (visuddhi. 1.9, 21) vitthāritaṃ. Tattha ‘‘sampannasīlā’’ti ettāvatā kira bhagavā catupārisuddhisīlaṃ uddisitvā ‘‘pātimokkhasaṃvarasaṃvutā’’ti iminā tattha jeṭṭhakasīlaṃ vitthāretvā dassesīti dīpavihāravāsī sumanatthero āha. Antevāsiko panassa tepiṭakacūḷanāgatthero āha – ubhayatthapi pātimokkhasaṃvarova bhagavatā vutto. Pātimokkhasaṃvaroyeva hi sīlaṃ, itarāni pana tīṇi sīlanti vuttaṭṭhānaṃ atthīti ananujānanto vatvā āha – indriyasaṃvaro nāma chadvārārakkhāmattakameva, ājīvapārisuddhi dhammena samena paccayuppattimattakaṃ, paccayasannissitaṃ paṭiladdhapaccaye idamatthanti paccavekkhitvā paribhuñjanamattakaṃ. Nippariyāyena pātimokkhasaṃvarova sīlaṃ. Yassa so bhinno, ayaṃ sīsacchinno viya puriso hatthapāde sesāni rakkhissatīti na vattabbo. Yassa pana so arogo, ayaṃ acchinnasīso viya puriso jīvitaṃ sesāni puna pākatikāni kātuṃ sakkoti. Tasmā ‘‘sampannasīlā’’ti iminā pātimokkhasaṃvaraṃ uddisitvā ‘‘sampannapātimokkhā’’ti tasseva vevacanaṃ vatvā taṃ vitthāretvā dassento pātimokkhasaṃvarasaṃvutātiādimāha. Tattha pātimokkhasaṃvarasaṃvuttātiādīni vuttatthāneva. Ākaṅkheyya ceti idaṃ kasmā āraddhanti? Sīlānisaṃsadassanatthaṃ . Sacepi acirapabbajitānaṃ vā duppaññānaṃ vā evamassa ‘‘bhagavā ‘sīlaṃ pūretha sīlaṃ pūrethā’ti vadati, ko nu kho sīlapūraṇe ānisaṃso, ko viseso, kā vaḍḍhī’’ti tesaṃ dasa ānisaṃse dassetuṃ evamāha – ‘‘appeva nāma etaṃ sabrahmacārīnaṃ piyamanāpatādiāsavakkhayapariyosānaṃ ānisaṃsaṃ sutvāpi sīlaṃ paripūreyyu’’nti.
தத்த² ஆகங்கெ²ய்ய சேதி யதி³ இச்செ²ய்ய. பியோ சஸ்ஸந்தி பியசக்கூ²ஹி ஸம்பஸ்ஸிதப்³போ³, ஸினேஹுப்பத்தியா பத³ட்டா²னபூ⁴தோ ப⁴வெய்யங். மனாபோதி தேஸங் மனவட்³ட⁴னகோ, தேஸங் வா மனேன பத்தப்³போ³, மெத்தசித்தேன ப²ரிதப்³போ³தி அத்தோ². க³ரூதி தேஸங் க³ருட்டா²னியோ பாஸாணச்ச²த்தஸதி³ஸோ. பா⁴வனீயோதி ‘‘அத்³தா⁴யமாயஸ்மா ஜானங் ஜானாதி பஸ்ஸங் பஸ்ஸதீ’’தி ஏவங் ஸம்பா⁴வனீயோ. ஸீலெஸ்வேவஸ்ஸ பரிபூரகாரீதி சதுபாரிஸுத்³தி⁴ஸீலேஸுயேவ பரிபூரகாரீ அஸ்ஸ, அனூனேன ஆகாரேன ஸமன்னாக³தோ ப⁴வெய்யாதி வுத்தங் ஹோதி. அஜ்ஜ²த்தங் சேதோஸமத²மனுயுத்தோதி அத்தனோ சித்தஸமதே² யுத்தோ. அனிராகதஜ்ஜா²னோதி ப³ஹி அனீஹடஜ்ஜா²னோ, அவினாஸிதஜ்ஜா²னோ வா. விபஸ்ஸனாயாதி ஸத்தவிதா⁴ய அனுபஸ்ஸனாய. ப்³ரூஹேதா ஸுஞ்ஞாகா³ரானந்தி வட்³டே⁴தா ஸுஞ்ஞாகா³ரானங். எத்த² ச ஸமத²விபஸ்ஸனாவஸேன கம்மட்டா²னங் க³ஹெத்வா ரத்திந்தி³வங் ஸுஞ்ஞாகா³ரங் பவிஸித்வா நிஸீத³மானோ பி⁴க்கு² ‘‘ப்³ரூஹேதா ஸுஞ்ஞாகா³ரான’’ந்தி வேதி³தப்³போ³. அயமெத்த² ஸங்கே²போ , வித்தா²ரோ பன இச்ச²ந்தேன மஜ்ஜி²மனிகாயட்ட²கதா²ய (ம॰ நி॰ அட்ட²॰ 1.64 ஆத³யோ) ஆகங்கெ²ய்யஸுத்தவண்ணனாய ஓலோகேதப்³போ³.
Tattha ākaṅkheyya ceti yadi iccheyya. Piyo cassanti piyacakkhūhi sampassitabbo, sinehuppattiyā padaṭṭhānabhūto bhaveyyaṃ. Manāpoti tesaṃ manavaḍḍhanako, tesaṃ vā manena pattabbo, mettacittena pharitabboti attho. Garūti tesaṃ garuṭṭhāniyo pāsāṇacchattasadiso. Bhāvanīyoti ‘‘addhāyamāyasmā jānaṃ jānāti passaṃ passatī’’ti evaṃ sambhāvanīyo. Sīlesvevassa paripūrakārīti catupārisuddhisīlesuyeva paripūrakārī assa, anūnena ākārena samannāgato bhaveyyāti vuttaṃ hoti. Ajjhattaṃ cetosamathamanuyuttoti attano cittasamathe yutto. Anirākatajjhānoti bahi anīhaṭajjhāno, avināsitajjhāno vā. Vipassanāyāti sattavidhāya anupassanāya. Brūhetā suññāgārānanti vaḍḍhetā suññāgārānaṃ. Ettha ca samathavipassanāvasena kammaṭṭhānaṃ gahetvā rattindivaṃ suññāgāraṃ pavisitvā nisīdamāno bhikkhu ‘‘brūhetā suññāgārāna’’nti veditabbo. Ayamettha saṅkhepo , vitthāro pana icchantena majjhimanikāyaṭṭhakathāya (ma. ni. aṭṭha. 1.64 ādayo) ākaṅkheyyasuttavaṇṇanāya oloketabbo.
லாபீ⁴தி எத்த² ந ப⁴க³வா லாப⁴னிமித்தங் ஸீலாதி³பரிபூரணங் கதே²தி. ப⁴க³வா ஹி ‘‘கா⁴ஸேஸனங் சி²ன்னகதோ², ந வாசங் பயுதங் ப⁴ணே’’தி (ஸு॰ நி॰ 716) ஏவங் ஸாவகே ஓவத³தி. ஸோ கத²ங் லாப⁴னிமித்தங் ஸீலாதி³பரிபூரணங் கதெ²ய்ய. புக்³க³லஜ்ஜா²ஸயவஸேன பனேதங் வுத்தங். யேஸஞ்ஹி ஏவங் அஜ்ஜா²ஸயோ ப⁴வெய்ய ‘‘ஸசே மயங் சதூஹி பச்சயேஹி ந கிலமெய்யாம, ஸீலானி பரிபூரேதுங் ஸக்குணெய்யாமா’’தி, தேஸங் அஜ்ஜா²ஸயவஸேனேவமாஹ. அபிச ஸரஸானிஸங்ஸோ ஏஸ ஸீலஸ்ஸ யதி³த³ங் சத்தாரோ பச்சயா நாம. ததா² ஹி பண்டி³தமனுஸ்ஸா கொட்டா²தீ³ஸு ட²பிதங் நீஹரித்வா அத்தனாபி அபரிபு⁴ஞ்ஜித்வா ஸீலவந்தானங் தெ³ந்தீதி ஸீலஸ்ஸ ஸரஸானிஸங்ஸத³ஸ்ஸனத்த²ம்பேதங் வுத்தங்.
Lābhīti ettha na bhagavā lābhanimittaṃ sīlādiparipūraṇaṃ katheti. Bhagavā hi ‘‘ghāsesanaṃ chinnakatho, na vācaṃ payutaṃ bhaṇe’’ti (su. ni. 716) evaṃ sāvake ovadati. So kathaṃ lābhanimittaṃ sīlādiparipūraṇaṃ katheyya. Puggalajjhāsayavasena panetaṃ vuttaṃ. Yesañhi evaṃ ajjhāsayo bhaveyya ‘‘sace mayaṃ catūhi paccayehi na kilameyyāma, sīlāni paripūretuṃ sakkuṇeyyāmā’’ti, tesaṃ ajjhāsayavasenevamāha. Apica sarasānisaṃso esa sīlassa yadidaṃ cattāro paccayā nāma. Tathā hi paṇḍitamanussā koṭṭhādīsu ṭhapitaṃ nīharitvā attanāpi aparibhuñjitvā sīlavantānaṃ dentīti sīlassa sarasānisaṃsadassanatthampetaṃ vuttaṃ.
ததியவாரே யேஸாஹந்தி யேஸங் அஹங். தேஸங் தே காராதி தேஸங் தே³வானங் வா மனுஸ்ஸானங் வா தே மயி கதா பச்சயதா³னகாரா. மஹப்ப²லா ஹொந்து மஹானிஸங்ஸாதி லோகியஸுகே²ன ப²லபூ⁴தேன மஹப்ப²லா, லோகுத்தரேன மஹானிஸங்ஸா. உப⁴யங் வா ஏதங் ஏகத்த²மேவ. ஸீலாதி³கு³ணயுத்தஸ்ஸ ஹி கடச்சு²பி⁴க்கா²பி பஞ்சரதனமத்தாய பூ⁴மியா பண்ணஸாலாபி கத்வா தி³ன்னா அனேகானி கப்பஸஹஸ்ஸானி து³க்³க³திவினிபாததோ ரக்க²தி, பரியோஸானே ச அமதாய தா⁴துயா பரினிப்³பா³னஸ்ஸ பச்சயோ ஹோதி. ‘‘கீ²ரோத³னங் அஹமதா³ஸி’’ந்திஆதீ³னி (வி॰ வ॰ 413) செத்த² வத்தூ²னி. ஸகலமேவ வா பேதவத்து² விமானவத்து² ச ஸாத⁴கங்.
Tatiyavāre yesāhanti yesaṃ ahaṃ. Tesaṃ te kārāti tesaṃ devānaṃ vā manussānaṃ vā te mayi katā paccayadānakārā. Mahapphalā hontu mahānisaṃsāti lokiyasukhena phalabhūtena mahapphalā, lokuttarena mahānisaṃsā. Ubhayaṃ vā etaṃ ekatthameva. Sīlādiguṇayuttassa hi kaṭacchubhikkhāpi pañcaratanamattāya bhūmiyā paṇṇasālāpi katvā dinnā anekāni kappasahassāni duggativinipātato rakkhati, pariyosāne ca amatāya dhātuyā parinibbānassa paccayo hoti. ‘‘Khīrodanaṃ ahamadāsi’’ntiādīni (vi. va. 413) cettha vatthūni. Sakalameva vā petavatthu vimānavatthu ca sādhakaṃ.
சதுத்த²வாரே பேதாதி பேச்சப⁴வங் க³தா. ஞாதீதி ஸஸ்ஸுஸஸுரபக்கி²கா. ஸாலோஹிதாதி ஏகலோஹிதப³த்³தா⁴ பிதிபிதாமஹாத³யோ. காலங்கதாதி மதா. தேஸங் தந்தி தேஸங் தங் மயி பஸன்னசித்தங், தங் வா பஸன்னேன சித்தேன அனுஸ்ஸரணங். யஸ்ஸ ஹி பி⁴க்கு²னோ காலகதோ பிதா வா மாதா வா ‘‘அம்ஹாகங் ஞாதகத்தே²ரோ ஸீலவா கல்யாணத⁴ம்மோ’’தி பஸன்னசித்தோ ஹுத்வா தங் பி⁴க்கு²ங் அனுஸ்ஸரதி, தஸ்ஸ ஸோ சித்தப்பஸாதோ³பி தங் அனுஸ்ஸரணமத்தம்பி மஹப்ப²லங் மஹானிஸங்ஸமேவ ஹோதி.
Catutthavāre petāti peccabhavaṃ gatā. Ñātīti sassusasurapakkhikā. Sālohitāti ekalohitabaddhā pitipitāmahādayo. Kālaṅkatāti matā. Tesaṃ tanti tesaṃ taṃ mayi pasannacittaṃ, taṃ vā pasannena cittena anussaraṇaṃ. Yassa hi bhikkhuno kālakato pitā vā mātā vā ‘‘amhākaṃ ñātakatthero sīlavā kalyāṇadhammo’’ti pasannacitto hutvā taṃ bhikkhuṃ anussarati, tassa so cittappasādopi taṃ anussaraṇamattampi mahapphalaṃ mahānisaṃsameva hoti.
அரதிரதிஸஹோதி நெக்க²ம்மபடிபத்தியா அரதியா காமகு³ணேஸு ரதியா ச ஸஹோ அபி⁴ப⁴விதா அஜ்ஜொ²த்த²ரிதா. ப⁴யபே⁴ரவஸஹோதி எத்த² ப⁴யங் சித்துத்ராஸோபி ஆரம்மணம்பி, பே⁴ரவங் ஆரம்மணமேவ.
Aratiratisahoti nekkhammapaṭipattiyā aratiyā kāmaguṇesu ratiyā ca saho abhibhavitā ajjhottharitā. Bhayabheravasahoti ettha bhayaṃ cittutrāsopi ārammaṇampi, bheravaṃ ārammaṇameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஆகங்க²ஸுத்தங் • 1. Ākaṅkhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. ஆகங்க²ஸுத்தாதி³வண்ணனா • 1-4. Ākaṅkhasuttādivaṇṇanā
