| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
(༨) ༣. ཨཱཀངྑཝགྒོ
(8) 3. Ākaṅkhavaggo
༡. ཨཱཀངྑསུཏྟཝཎྞནཱ
1. Ākaṅkhasuttavaṇṇanā
༧༡. ཏཏིཡསྶ པཋམེ སམྤནྣསཱིལཱཏི པརིཔུཎྞསཱིལཱ, སཱིལསམངྒིནོ ཝཱ ཧུཏྭཱཏི ཨཏྠོ། ཏཏྠ དྭཱིཧི ཀཱརཎེཧི སམྤནྣསཱིལཏཱ ཧོཏི སཱིལཝིཔཏྟིཡཱ ཙ ཨཱདཱིནཝདསྶནེན, སཱིལསམྤཏྟིཡཱ ཙ ཨཱནིསཾསདསྶནེན། ཏདུབྷཡམྤི ཝིསུདྡྷིམགྒེ (ཝིསུདྡྷི॰ ༡.༩, ༢༡) ཝིཏྠཱརིཏཾ། ཏཏྠ ‘‘སམྤནྣསཱིལཱ’’ཏི ཨེཏྟཱཝཏཱ ཀིར བྷགཝཱ ཙཏུཔཱརིསུདྡྷིསཱིལཾ ཨུདྡིསིཏྭཱ ‘‘པཱཏིམོཀྑསཾཝརསཾཝུཏཱ’’ཏི ཨིམིནཱ ཏཏྠ ཛེཊྛཀསཱིལཾ ཝིཏྠཱརེཏྭཱ དསྶེསཱིཏི དཱིཔཝིཧཱརཝཱསཱི སུམནཏྠེརོ ཨཱཧ། ཨནྟེཝཱསིཀོ པནསྶ ཏེཔིཊཀཙཱུལ༹ནཱགཏྠེརོ ཨཱཧ – ཨུབྷཡཏྠཔི པཱཏིམོཀྑསཾཝརོཝ བྷགཝཏཱ ཝུཏྟོ། པཱཏིམོཀྑསཾཝརོཡེཝ ཧི སཱིལཾ, ཨིཏརཱནི པན ཏཱིཎི སཱིལནྟི ཝུཏྟཊྛཱནཾ ཨཏྠཱིཏི ཨནནུཛཱནནྟོ ཝཏྭཱ ཨཱཧ – ཨིནྡྲིཡསཾཝརོ ནཱམ ཚདྭཱརཱརཀྑཱམཏྟཀམེཝ, ཨཱཛཱིཝཔཱརིསུདྡྷི དྷམྨེན སམེན པཙྩཡུཔྤཏྟིམཏྟཀཾ, པཙྩཡསནྣིསྶིཏཾ པཊིལདྡྷཔཙྩཡེ ཨིདམཏྠནྟི པཙྩཝེཀྑིཏྭཱ པརིབྷུཉྫནམཏྟཀཾ། ནིཔྤརིཡཱཡེན པཱཏིམོཀྑསཾཝརོཝ སཱིལཾ། ཡསྶ སོ བྷིནྣོ, ཨཡཾ སཱིསཙྪིནྣོ ཝིཡ པུརིསོ ཧཏྠཔཱདེ སེསཱནི རཀྑིསྶཏཱིཏི ན ཝཏྟབྦོ། ཡསྶ པན སོ ཨརོགོ, ཨཡཾ ཨཙྪིནྣསཱིསོ ཝིཡ པུརིསོ ཛཱིཝིཏཾ སེསཱནི པུན པཱཀཏིཀཱནི ཀཱཏུཾ སཀྐོཏི། ཏསྨཱ ‘‘སམྤནྣསཱིལཱ’’ཏི ཨིམིནཱ པཱཏིམོཀྑསཾཝརཾ ཨུདྡིསིཏྭཱ ‘‘སམྤནྣཔཱཏིམོཀྑཱ’’ཏི ཏསྶེཝ ཝེཝཙནཾ ཝཏྭཱ ཏཾ ཝིཏྠཱརེཏྭཱ དསྶེནྟོ པཱཏིམོཀྑསཾཝརསཾཝུཏཱཏིཨཱདིམཱཧ། ཏཏྠ པཱཏིམོཀྑསཾཝརསཾཝུཏྟཱཏིཨཱདཱིནི ཝུཏྟཏྠཱནེཝ། ཨཱཀངྑེཡྻ ཙེཏི ཨིདཾ ཀསྨཱ ཨཱརདྡྷནྟི? སཱིལཱནིསཾསདསྶནཏྠཾ ། སཙེཔི ཨཙིརཔབྦཛིཏཱནཾ ཝཱ དུཔྤཉྙཱནཾ ཝཱ ཨེཝམསྶ ‘‘བྷགཝཱ ‘སཱིལཾ པཱུརེཐ སཱིལཾ པཱུརེཐཱ’ཏི ཝདཏི, ཀོ ནུ ཁོ སཱིལཔཱུརཎེ ཨཱནིསཾསོ, ཀོ ཝིསེསོ, ཀཱ ཝཌྜྷཱི’’ཏི ཏེསཾ དས ཨཱནིསཾསེ དསྶེཏུཾ ཨེཝམཱཧ – ‘‘ཨཔྤེཝ ནཱམ ཨེཏཾ སབྲཧྨཙཱརཱིནཾ པིཡམནཱཔཏཱདིཨཱསཝཀྑཡཔརིཡོསཱནཾ ཨཱནིསཾསཾ སུཏྭཱཔི སཱིལཾ པརིཔཱུརེཡྻུ’’ནྟི།
71. Tatiyassa paṭhame sampannasīlāti paripuṇṇasīlā, sīlasamaṅgino vā hutvāti attho. Tattha dvīhi kāraṇehi sampannasīlatā hoti sīlavipattiyā ca ādīnavadassanena, sīlasampattiyā ca ānisaṃsadassanena. Tadubhayampi visuddhimagge (visuddhi. 1.9, 21) vitthāritaṃ. Tattha ‘‘sampannasīlā’’ti ettāvatā kira bhagavā catupārisuddhisīlaṃ uddisitvā ‘‘pātimokkhasaṃvarasaṃvutā’’ti iminā tattha jeṭṭhakasīlaṃ vitthāretvā dassesīti dīpavihāravāsī sumanatthero āha. Antevāsiko panassa tepiṭakacūḷanāgatthero āha – ubhayatthapi pātimokkhasaṃvarova bhagavatā vutto. Pātimokkhasaṃvaroyeva hi sīlaṃ, itarāni pana tīṇi sīlanti vuttaṭṭhānaṃ atthīti ananujānanto vatvā āha – indriyasaṃvaro nāma chadvārārakkhāmattakameva, ājīvapārisuddhi dhammena samena paccayuppattimattakaṃ, paccayasannissitaṃ paṭiladdhapaccaye idamatthanti paccavekkhitvā paribhuñjanamattakaṃ. Nippariyāyena pātimokkhasaṃvarova sīlaṃ. Yassa so bhinno, ayaṃ sīsacchinno viya puriso hatthapāde sesāni rakkhissatīti na vattabbo. Yassa pana so arogo, ayaṃ acchinnasīso viya puriso jīvitaṃ sesāni puna pākatikāni kātuṃ sakkoti. Tasmā ‘‘sampannasīlā’’ti iminā pātimokkhasaṃvaraṃ uddisitvā ‘‘sampannapātimokkhā’’ti tasseva vevacanaṃ vatvā taṃ vitthāretvā dassento pātimokkhasaṃvarasaṃvutātiādimāha. Tattha pātimokkhasaṃvarasaṃvuttātiādīni vuttatthāneva. Ākaṅkheyya ceti idaṃ kasmā āraddhanti? Sīlānisaṃsadassanatthaṃ . Sacepi acirapabbajitānaṃ vā duppaññānaṃ vā evamassa ‘‘bhagavā ‘sīlaṃ pūretha sīlaṃ pūrethā’ti vadati, ko nu kho sīlapūraṇe ānisaṃso, ko viseso, kā vaḍḍhī’’ti tesaṃ dasa ānisaṃse dassetuṃ evamāha – ‘‘appeva nāma etaṃ sabrahmacārīnaṃ piyamanāpatādiāsavakkhayapariyosānaṃ ānisaṃsaṃ sutvāpi sīlaṃ paripūreyyu’’nti.
ཏཏྠ ཨཱཀངྑེཡྻ ཙེཏི ཡདི ཨིཙྪེཡྻ། པིཡོ ཙསྶནྟི པིཡཙཀྑཱུཧི སམྤསྶིཏབྦོ, སིནེཧུཔྤཏྟིཡཱ པདཊྛཱནབྷཱུཏོ བྷཝེཡྻཾ། མནཱཔོཏི ཏེསཾ མནཝཌྜྷནཀོ, ཏེསཾ ཝཱ མནེན པཏྟབྦོ, མེཏྟཙིཏྟེན ཕརིཏབྦོཏི ཨཏྠོ། གརཱུཏི ཏེསཾ གརུཊྛཱནིཡོ པཱསཱཎཙྪཏྟསདིསོ། བྷཱཝནཱིཡོཏི ‘‘ཨདྡྷཱཡམཱཡསྨཱ ཛཱནཾ ཛཱནཱཏི པསྶཾ པསྶཏཱི’’ཏི ཨེཝཾ སམྦྷཱཝནཱིཡོ། སཱིལེསྭེཝསྶ པརིཔཱུརཀཱརཱིཏི ཙཏུཔཱརིསུདྡྷིསཱིལེསུཡེཝ པརིཔཱུརཀཱརཱི ཨསྶ, ཨནཱུནེན ཨཱཀཱརེན སམནྣཱགཏོ བྷཝེཡྻཱཏི ཝུཏྟཾ ཧོཏི། ཨཛ྄ཛྷཏྟཾ ཙེཏོསམཐམནུཡུཏྟོཏི ཨཏྟནོ ཙིཏྟསམཐེ ཡུཏྟོ། ཨནིརཱཀཏཛ྄ཛྷཱནོཏི བཧི ཨནཱིཧཊཛ྄ཛྷཱནོ, ཨཝིནཱསིཏཛ྄ཛྷཱནོ ཝཱ། ཝིཔསྶནཱཡཱཏི སཏྟཝིདྷཱཡ ཨནུཔསྶནཱཡ། བྲཱུཧེཏཱ སུཉྙཱགཱརཱནནྟི ཝཌྜྷེཏཱ སུཉྙཱགཱརཱནཾ། ཨེཏྠ ཙ སམཐཝིཔསྶནཱཝསེན ཀམྨཊྛཱནཾ གཧེཏྭཱ རཏྟིནྡིཝཾ སུཉྙཱགཱརཾ པཝིསིཏྭཱ ནིསཱིདམཱནོ བྷིཀྑུ ‘‘བྲཱུཧེཏཱ སུཉྙཱགཱརཱན’’ནྟི ཝེདིཏབྦོ། ཨཡམེཏྠ སངྑེཔོ , ཝིཏྠཱརོ པན ཨིཙྪནྟེན མཛ྄ཛྷིམནིཀཱཡཊྛཀཐཱཡ (མ॰ ནི॰ ཨཊྛ॰ ༡.༦༤ ཨཱདཡོ) ཨཱཀངྑེཡྻསུཏྟཝཎྞནཱཡ ཨོལོཀེཏབྦོ།
Tattha ākaṅkheyya ceti yadi iccheyya. Piyo cassanti piyacakkhūhi sampassitabbo, sinehuppattiyā padaṭṭhānabhūto bhaveyyaṃ. Manāpoti tesaṃ manavaḍḍhanako, tesaṃ vā manena pattabbo, mettacittena pharitabboti attho. Garūti tesaṃ garuṭṭhāniyo pāsāṇacchattasadiso. Bhāvanīyoti ‘‘addhāyamāyasmā jānaṃ jānāti passaṃ passatī’’ti evaṃ sambhāvanīyo. Sīlesvevassa paripūrakārīti catupārisuddhisīlesuyeva paripūrakārī assa, anūnena ākārena samannāgato bhaveyyāti vuttaṃ hoti. Ajjhattaṃ cetosamathamanuyuttoti attano cittasamathe yutto. Anirākatajjhānoti bahi anīhaṭajjhāno, avināsitajjhāno vā. Vipassanāyāti sattavidhāya anupassanāya. Brūhetā suññāgārānanti vaḍḍhetā suññāgārānaṃ. Ettha ca samathavipassanāvasena kammaṭṭhānaṃ gahetvā rattindivaṃ suññāgāraṃ pavisitvā nisīdamāno bhikkhu ‘‘brūhetā suññāgārāna’’nti veditabbo. Ayamettha saṅkhepo , vitthāro pana icchantena majjhimanikāyaṭṭhakathāya (ma. ni. aṭṭha. 1.64 ādayo) ākaṅkheyyasuttavaṇṇanāya oloketabbo.
ལཱབྷཱིཏི ཨེཏྠ ན བྷགཝཱ ལཱབྷནིམིཏྟཾ སཱིལཱདིཔརིཔཱུརཎཾ ཀཐེཏི། བྷགཝཱ ཧི ‘‘གྷཱསེསནཾ ཚིནྣཀཐོ, ན ཝཱཙཾ པཡུཏཾ བྷཎེ’’ཏི (སུ॰ ནི॰ ༧༡༦) ཨེཝཾ སཱཝཀེ ཨོཝདཏི། སོ ཀཐཾ ལཱབྷནིམིཏྟཾ སཱིལཱདིཔརིཔཱུརཎཾ ཀཐེཡྻ། པུགྒལཛ྄ཛྷཱསཡཝསེན པནེཏཾ ཝུཏྟཾ། ཡེསཉྷི ཨེཝཾ ཨཛ྄ཛྷཱསཡོ བྷཝེཡྻ ‘‘སཙེ མཡཾ ཙཏཱུཧི པཙྩཡེཧི ན ཀིལམེཡྻཱམ, སཱིལཱནི པརིཔཱུརེཏུཾ སཀྐུཎེཡྻཱམཱ’’ཏི, ཏེསཾ ཨཛ྄ཛྷཱསཡཝསེནེཝམཱཧ། ཨཔིཙ སརསཱནིསཾསོ ཨེས སཱིལསྶ ཡདིདཾ ཙཏྟཱརོ པཙྩཡཱ ནཱམ། ཏཐཱ ཧི པཎྜིཏམནུསྶཱ ཀོཊྛཱདཱིསུ ཋཔིཏཾ ནཱིཧརིཏྭཱ ཨཏྟནཱཔི ཨཔརིབྷུཉྫིཏྭཱ སཱིལཝནྟཱནཾ དེནྟཱིཏི སཱིལསྶ སརསཱནིསཾསདསྶནཏྠམྤེཏཾ ཝུཏྟཾ།
Lābhīti ettha na bhagavā lābhanimittaṃ sīlādiparipūraṇaṃ katheti. Bhagavā hi ‘‘ghāsesanaṃ chinnakatho, na vācaṃ payutaṃ bhaṇe’’ti (su. ni. 716) evaṃ sāvake ovadati. So kathaṃ lābhanimittaṃ sīlādiparipūraṇaṃ katheyya. Puggalajjhāsayavasena panetaṃ vuttaṃ. Yesañhi evaṃ ajjhāsayo bhaveyya ‘‘sace mayaṃ catūhi paccayehi na kilameyyāma, sīlāni paripūretuṃ sakkuṇeyyāmā’’ti, tesaṃ ajjhāsayavasenevamāha. Apica sarasānisaṃso esa sīlassa yadidaṃ cattāro paccayā nāma. Tathā hi paṇḍitamanussā koṭṭhādīsu ṭhapitaṃ nīharitvā attanāpi aparibhuñjitvā sīlavantānaṃ dentīti sīlassa sarasānisaṃsadassanatthampetaṃ vuttaṃ.
ཏཏིཡཝཱརེ ཡེསཱཧནྟི ཡེསཾ ཨཧཾ། ཏེསཾ ཏེ ཀཱརཱཏི ཏེསཾ དེཝཱནཾ ཝཱ མནུསྶཱནཾ ཝཱ ཏེ མཡི ཀཏཱ པཙྩཡདཱནཀཱརཱ། མཧཔྥལཱ ཧོནྟུ མཧཱནིསཾསཱཏི ལོཀིཡསུཁེན ཕལབྷཱུཏེན མཧཔྥལཱ, ལོཀུཏྟརེན མཧཱནིསཾསཱ། ཨུབྷཡཾ ཝཱ ཨེཏཾ ཨེཀཏྠམེཝ། སཱིལཱདིགུཎཡུཏྟསྶ ཧི ཀཊཙྪུབྷིཀྑཱཔི པཉྩརཏནམཏྟཱཡ བྷཱུམིཡཱ པཎྞསཱལཱཔི ཀཏྭཱ དིནྣཱ ཨནེཀཱནི ཀཔྤསཧསྶཱནི དུགྒཏིཝིནིཔཱཏཏོ རཀྑཏི, པརིཡོསཱནེ ཙ ཨམཏཱཡ དྷཱཏུཡཱ པརིནིབྦཱནསྶ པཙྩཡོ ཧོཏི། ‘‘ཁཱིརོདནཾ ཨཧམདཱསི’’ནྟིཨཱདཱིནི (ཝི॰ ཝ॰ ༤༡༣) ཙེཏྠ ཝཏྠཱུནི། སཀལམེཝ ཝཱ པེཏཝཏྠུ ཝིམཱནཝཏྠུ ཙ སཱདྷཀཾ།
Tatiyavāre yesāhanti yesaṃ ahaṃ. Tesaṃ te kārāti tesaṃ devānaṃ vā manussānaṃ vā te mayi katā paccayadānakārā. Mahapphalā hontu mahānisaṃsāti lokiyasukhena phalabhūtena mahapphalā, lokuttarena mahānisaṃsā. Ubhayaṃ vā etaṃ ekatthameva. Sīlādiguṇayuttassa hi kaṭacchubhikkhāpi pañcaratanamattāya bhūmiyā paṇṇasālāpi katvā dinnā anekāni kappasahassāni duggativinipātato rakkhati, pariyosāne ca amatāya dhātuyā parinibbānassa paccayo hoti. ‘‘Khīrodanaṃ ahamadāsi’’ntiādīni (vi. va. 413) cettha vatthūni. Sakalameva vā petavatthu vimānavatthu ca sādhakaṃ.
ཙཏུཏྠཝཱརེ པེཏཱཏི པེཙྩབྷཝཾ གཏཱ། ཉཱཏཱིཏི སསྶུསསུརཔཀྑིཀཱ། སཱལོཧིཏཱཏི ཨེཀལོཧིཏབདྡྷཱ པིཏིཔིཏཱམཧཱདཡོ། ཀཱལངྐཏཱཏི མཏཱ། ཏེསཾ ཏནྟི ཏེསཾ ཏཾ མཡི པསནྣཙིཏྟཾ, ཏཾ ཝཱ པསནྣེན ཙིཏྟེན ཨནུསྶརཎཾ། ཡསྶ ཧི བྷིཀྑུནོ ཀཱལཀཏོ པིཏཱ ཝཱ མཱཏཱ ཝཱ ‘‘ཨམྷཱཀཾ ཉཱཏཀཏྠེརོ སཱིལཝཱ ཀལྱཱཎདྷམྨོ’’ཏི པསནྣཙིཏྟོ ཧུཏྭཱ ཏཾ བྷིཀྑུཾ ཨནུསྶརཏི, ཏསྶ སོ ཙིཏྟཔྤསཱདོཔི ཏཾ ཨནུསྶརཎམཏྟམྤི མཧཔྥལཾ མཧཱནིསཾསམེཝ ཧོཏི།
Catutthavāre petāti peccabhavaṃ gatā. Ñātīti sassusasurapakkhikā. Sālohitāti ekalohitabaddhā pitipitāmahādayo. Kālaṅkatāti matā. Tesaṃ tanti tesaṃ taṃ mayi pasannacittaṃ, taṃ vā pasannena cittena anussaraṇaṃ. Yassa hi bhikkhuno kālakato pitā vā mātā vā ‘‘amhākaṃ ñātakatthero sīlavā kalyāṇadhammo’’ti pasannacitto hutvā taṃ bhikkhuṃ anussarati, tassa so cittappasādopi taṃ anussaraṇamattampi mahapphalaṃ mahānisaṃsameva hoti.
ཨརཏིརཏིསཧོཏི ནེཀྑམྨཔཊིཔཏྟིཡཱ ཨརཏིཡཱ ཀཱམགུཎེསུ རཏིཡཱ ཙ སཧོ ཨབྷིབྷཝིཏཱ ཨཛ྄ཛྷོཏྠརིཏཱ། བྷཡབྷེརཝསཧོཏི ཨེཏྠ བྷཡཾ ཙིཏྟུཏྲཱསོཔི ཨཱརམྨཎམྤི, བྷེརཝཾ ཨཱརམྨཎམེཝ།
Aratiratisahoti nekkhammapaṭipattiyā aratiyā kāmaguṇesu ratiyā ca saho abhibhavitā ajjhottharitā. Bhayabheravasahoti ettha bhayaṃ cittutrāsopi ārammaṇampi, bheravaṃ ārammaṇameva.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. ཨཱཀངྑསུཏྟཾ • 1. Ākaṅkhasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༤. ཨཱཀངྑསུཏྟཱདིཝཎྞནཱ • 1-4. Ākaṅkhasuttādivaṇṇanā
