| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
10. அகப்பியமங்ஸனித்³தே³ஸவண்ணனா
10. Akappiyamaṃsaniddesavaṇṇanā
113. இதா³னி மங்ஸேஸு படிபஜ்ஜிதப்³பா³காரங் த³ஸ்ஸேதுங் ‘‘மங்ஸேஸு ச அகப்பிய’’ந்தி உத்³த⁴டங். அகப்பியமங்ஸம்ஹி த³ஸ்ஸிதே கப்பியமங்ஸங் த³ஸ்ஸிதமேவ ஹோதி பாரிஸேஸனயேன. உரக³ஸ்ஸ சாதி எத்த² ஸப்³போ³பி உரகோ³ ந கப்பதி.
113. Idāni maṃsesu paṭipajjitabbākāraṃ dassetuṃ ‘‘maṃsesu ca akappiya’’nti uddhaṭaṃ. Akappiyamaṃsamhi dassite kappiyamaṃsaṃ dassitameva hoti pārisesanayena. Uragassa cāti ettha sabbopi urago na kappati.
114. எத்தாவதா ஜாதிவஸேன த³ஸவித⁴ம்பி அகப்பியமங்ஸங் த³ஸ்ஸெத்வா இதா³னி கப்பியமங்ஸேஸுபி அகப்பியவிதி⁴ங் த³ஸ்ஸேதுங் ‘‘உத்³தி³ஸ்ஸகதமங்ஸஞ்ச, யஞ்ச அப்படிவெக்கி²த’’ந்தி வுத்தங். தத்த² பஞ்சஸு ஸஹத⁴ம்மிகேஸு யஸ்ஸ கஸ்ஸசி யங் கிஞ்சி உத்³தி³ஸ்ஸ கதங் உத்³தி³ஸ்ஸகதங் நாம, தங் பன ஜானித்வா பரிபு⁴ஞ்ஜிதுங் ஸப்³பே³ஸம்பி ந வட்டதி, அஜானந்தானங் அனாபத்தி. மச்சே²ஸுபி ஏஸேவ நயோ. அப்படிவெக்கி²தந்தி அனுபபரிக்கி²தங், அனாபுச்சி²தந்தி அத்தோ². ‘‘ந பி⁴க்க²வே அப்படிவெக்கி²த்வா மங்ஸங் பரிபு⁴ஞ்ஜிதப்³ப³ங், யோ பரிபு⁴ஞ்ஜெய்ய, ஆபத்தி து³க்கடஸ்ஸா’’தி (மஹாவ॰ 281) வுத்தங். மச்சே²ஸு பன ஆபுச்ச²னகிச்சங் நத்தி² அகப்பியமச்சா²னங் நத்தி²தாயாதி வத³ந்தி. இதா³னி ஏதேஸு ஆபத்திபே⁴த³ங் த³ஸ்ஸேதுங் ‘‘து²ல்லச்சய’’ந்திஆதி³மாஹ. தங் ஸப்³ப³ங் (கங்கா²॰ அட்ட²॰ ஸன்னிதி⁴காரகஸிக்கா²பத³வண்ணனா) உத்தானமேவ.
114. Ettāvatā jātivasena dasavidhampi akappiyamaṃsaṃ dassetvā idāni kappiyamaṃsesupi akappiyavidhiṃ dassetuṃ ‘‘uddissakatamaṃsañca, yañca appaṭivekkhita’’nti vuttaṃ. Tattha pañcasu sahadhammikesu yassa kassaci yaṃ kiñci uddissa kataṃ uddissakataṃ nāma, taṃ pana jānitvā paribhuñjituṃ sabbesampi na vaṭṭati, ajānantānaṃ anāpatti. Macchesupi eseva nayo. Appaṭivekkhitanti anupaparikkhitaṃ, anāpucchitanti attho. ‘‘Na bhikkhave appaṭivekkhitvā maṃsaṃ paribhuñjitabbaṃ, yo paribhuñjeyya, āpatti dukkaṭassā’’ti (mahāva. 281) vuttaṃ. Macchesu pana āpucchanakiccaṃ natthi akappiyamacchānaṃ natthitāyāti vadanti. Idāni etesu āpattibhedaṃ dassetuṃ ‘‘thullaccaya’’ntiādimāha. Taṃ sabbaṃ (kaṅkhā. aṭṭha. sannidhikārakasikkhāpadavaṇṇanā) uttānameva.
115. இதா³னி ந கேவலங் இமேஸங் மனுஸ்ஸாதீ³னங் மங்ஸமேவ அகப்பியங், அட்டி²ஆதீ³னிபி அகப்பியானீதி த³ஸ்ஸேதுங் ‘‘அட்டீ²பீ’’திஆதி³ வுத்தங். தத்த² (மஹாவ॰ அட்ட² 281) லோமம்பேஸந்தி லோமம்பி ஏஸங் அகப்பியமங்ஸவத்தூ²னந்தி அத்தோ². ஸசித்தகங் வாதி ஏதேஸு பன உத்³தி³ஸ்ஸகதமேவ ஸசித்தகங், ஸேஸா அசித்தகாதி. அகப்பியமங்ஸவினிச்ச²யோ.
115. Idāni na kevalaṃ imesaṃ manussādīnaṃ maṃsameva akappiyaṃ, aṭṭhiādīnipi akappiyānīti dassetuṃ ‘‘aṭṭhīpī’’tiādi vuttaṃ. Tattha (mahāva. aṭṭha 281) lomampesanti lomampi esaṃ akappiyamaṃsavatthūnanti attho. Sacittakaṃ vāti etesu pana uddissakatameva sacittakaṃ, sesā acittakāti. Akappiyamaṃsavinicchayo.
அகப்பியமங்ஸனித்³தே³ஸவண்ணனா நிட்டி²தா.
Akappiyamaṃsaniddesavaṇṇanā niṭṭhitā.
