| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༡༠. ཨཀཔྤིཡམཾསནིདྡེསཝཎྞནཱ
10. Akappiyamaṃsaniddesavaṇṇanā
༡༡༣-༤. མནུསྶཧཏྠིཨསྶཱནཉྩ …པེ॰… ཨུརགསྶ ཙ ཡཾ མཾསཉྩ, ཡཾ ཨུདྡིསྶཀཏམཾསཉྩ, ཨཔྤཊིཝེཀྑིཏཾ ཡཉྩ མཾསཾ, ཏེསུ མཾསེསཱུཏི ཨེཝཾ ཡོཛེཏྭཱ ཨཏྠོ ཝེདིཏབྦོ། ཏཏྠ སཱིསགཱིཝཱཏརངྒེན ཙརནྟཱ ཨཙྪཝིསེསཱཝ ཏརཙྪཱ། ཨུརགསྶཱཏི ཨིམིནཱ སབྦཱཔི དཱིགྷཛཱཏི སངྒཧིཏཱ། ཨུདྡིསྶཀཏམཾསནྟི བྷིཀྑུཾ ཨུདྡིསིཏྭཱ ཀཏཾ ཨུདྡིསྶཀཏཾ, ཏཉྩ ཏཾ མཾསཉྩ། ཨེཏྠ ཙ མཾས-གྒཧཎེན མཙྪཱནམྤི གཧཎཾ ཝེདིཏབྦཾ ཨུཔལཀྑཎཝསེན, ཙ-སདྡེན ཝཱ། པཉྩསུཔི སཧདྷམྨིཀེསུ ཡཾ ཀིཉྩི ཨུདྡིསྶཀཏཾ སབྦེསམྤི ན ཀཔྤཏི, ཏམྤི ཨདིཊྛཨསུཏཨཔརིསངྐིཏཏཱཡ ཏིཀོཊིཔརིསུདྡྷཾ ཝཊྚཏི། ཨཔྤཊིཝེཀྑིཏནྟི ཨནུཔཔརིཀྑིཏཾ, ཨནཱཔུཙྪིཏནྟི ཨཏྠོ། ཨཱཔཏྟིབྷཱིརུཀེན ཧི རཱུཔཾ སལླཀྑེནྟེནཱཔི པུཙྪིཏྭཱ པཊིགྒཧེཏབྦཾ པརིབྷུཉྫིཏབྦཉྩ། མནུསྶཱནཾ མཾསེསུ ཐུལླཙྩཡནྟི ཡོཛནཱ། ཐཱུལོ ཨཙྩཡོ ཨེཏྠཱཏི རསྶེ, དྭིཏྟེ ཙ ཐུལླཙྩཡཾ། པཱརཱཛིཀསངྒྷཱདིསེསེཧི ཋཔེཏྭཱ ཨིཏོ ཨདྷིཀཾ ཝཛྫཾ ནཏྠི། སེསེསཱུཏི ཨཝསེསེསུ ཨེཀཱདསསུ།
113-4. Manussahatthiassānañca …pe… uragassa ca yaṃ maṃsañca, yaṃ uddissakatamaṃsañca, appaṭivekkhitaṃ yañca maṃsaṃ, tesu maṃsesūti evaṃ yojetvā attho veditabbo. Tattha sīsagīvātaraṅgena carantā acchavisesāva taracchā. Uragassāti iminā sabbāpi dīghajāti saṅgahitā. Uddissakatamaṃsanti bhikkhuṃ uddisitvā kataṃ uddissakataṃ, tañca taṃ maṃsañca. Ettha ca maṃsa-ggahaṇena macchānampi gahaṇaṃ veditabbaṃ upalakkhaṇavasena, ca-saddena vā. Pañcasupi sahadhammikesu yaṃ kiñci uddissakataṃ sabbesampi na kappati, tampi adiṭṭhaasutaaparisaṅkitatāya tikoṭiparisuddhaṃ vaṭṭati. Appaṭivekkhitanti anupaparikkhitaṃ, anāpucchitanti attho. Āpattibhīrukena hi rūpaṃ sallakkhentenāpi pucchitvā paṭiggahetabbaṃ paribhuñjitabbañca. Manussānaṃ maṃsesu thullaccayanti yojanā. Thūlo accayo etthāti rasse, dvitte ca thullaccayaṃ. Pārājikasaṅghādisesehi ṭhapetvā ito adhikaṃ vajjaṃ natthi. Sesesūti avasesesu ekādasasu.
༡༡༥. ཨིདཱནི མནུསྶཱདཱིནཾ ཨཊྛིཨཱདཱིནིཔི ཨཀཔྤིཡཱནཱིཏི དསྶེཏུཾ ‘‘ཨཊྛིཔཱི’’ཏིཨཱདིམཱཧ། པི-སདྡོ ‘‘ལོཧིཏ’’ནྟིཨཱདཱིསུཔི ཨནུཝཏྟེཏབྦོ། ཨེསནྟི མནུསྶཱདཱིནཾ དསནྣཾ། ཝསཱསུ པན ཨེཀཱ མནུསྶཝསཱ ན ཝཊྚཏི། ཁཱིརཱདཱིསུ ཨཀཔྤིཡཾ ནཱམ ནཏྠི། ཨུདྡིསྶཀཏཾཡེཝ སཙིཏྟཀནྟི ཡོཛནཱ། སཙིཏྟཀནྟི ཨུདྡིསྶཀཏབྷཱཝཛཱནནཙིཏྟེན སཧ ཝཏྟཏཱིཏི སཙིཏྟཀཾ། ཝཏྠུཝཱིཏིཀྐམཝིཛཱནནཙིཏྟེན ཧི སཙིཏྟཀཏྟཾ། ཨེཏྠ ཙ སཙིཏྟཀཏྟཾ ཨཱཔཏྟིཡཱ ཨེཝ, ན ཙ མཾསསྶ, ཏཐཱཔི མཾསསཱིསེན ཨཱཔཏྟི ཨེཝ ཝུཏྟཱཏི ཝིཉྙཱཏབྦནྟི།
115. Idāni manussādīnaṃ aṭṭhiādīnipi akappiyānīti dassetuṃ ‘‘aṭṭhipī’’tiādimāha. Pi-saddo ‘‘lohita’’ntiādīsupi anuvattetabbo. Esanti manussādīnaṃ dasannaṃ. Vasāsu pana ekā manussavasā na vaṭṭati. Khīrādīsu akappiyaṃ nāma natthi. Uddissakataṃyeva sacittakanti yojanā. Sacittakanti uddissakatabhāvajānanacittena saha vattatīti sacittakaṃ. Vatthuvītikkamavijānanacittena hi sacittakattaṃ. Ettha ca sacittakattaṃ āpattiyā eva, na ca maṃsassa, tathāpi maṃsasīsena āpatti eva vuttāti viññātabbanti.
ཨཀཔྤིཡམཾསནིདྡེསཝཎྞནཱ ནིཊྛིཏཱ།
Akappiyamaṃsaniddesavaṇṇanā niṭṭhitā.
