| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
25. அகப்பியஸயனநித்³தே³ஸவண்ணனா
25. Akappiyasayananiddesavaṇṇanā
187-9. ‘‘உச்சகோ ஆஸந்தி³கோ உப்பன்னோ ஹோதி, அனுஜானாமி பி⁴க்க²வே உச்சகம்பி ஆஸந்தி³க’’ந்தி (சூளவ॰ 297) வசனதோ மஞ்சஸ்ஸ உபட்³ட⁴பா⁴க³ப்பமாணேன ஏகதோபா⁴கே³ன தீ³க⁴ம்பி ஸுக³தங்கு³லேன அதிரேகட்ட²ங்கு³லபாத³கங் இத⁴ ஆஸந்தீ³தி அதி⁴ப்பேதங், சதுரங்ஸாஸந்தி³கோ பன பமாணாதிக்கந்தகோபி வட்டதி. தூலீதி பகதிதூலிகா. பல்லங்கோநாம ஆஹரிமேஹி வாளேஹி கதோதி வுத்தோ. தத்தே²வ ‘‘ஸீஹரூபாதி³ங் த³ஸ்ஸெத்வா கதோ பன வட்டதீ’’தி வத³ந்தி. படிகந்தி ஸேதத்த²ரணங். கோ³னசித்தகந்தி எத்த² சதுரங்கு³லாதி⁴கலோமோ கோஜவோ ‘‘கோ³னகோ’’தி வுச்சதி. ‘‘அனுஜானாமி, பி⁴க்க²வே, கோஜவ’’ந்தி (மஹாவ॰ 337) சீவரக்க²ந்த⁴கே வுத்தத்தா சதுரங்கு³லலோமகங் பகதிகோஜவங் வட்டதி. ரதனசித்தங் சித்தகங் ந வட்டதி. படலீதி க⁴னபுப்ப²ரத்தஅத்த²ரணங் . விகதீதி ஸீஹப்³யக்³கா⁴தி³ரூபவிசித்தோ உண்ணாமயத்த²ரணகோ. உத்³த³லோமீதி ஏகதோஉக்³க³தபுப்ப²ங். ஏகந்தலோமிகாதி உப⁴தோஉக்³க³தபுப்ப²ங்.
187-9. ‘‘Uccako āsandiko uppanno hoti, anujānāmi bhikkhave uccakampi āsandika’’nti (cūḷava. 297) vacanato mañcassa upaḍḍhabhāgappamāṇena ekatobhāgena dīghampi sugataṅgulena atirekaṭṭhaṅgulapādakaṃ idha āsandīti adhippetaṃ, caturaṃsāsandiko pana pamāṇātikkantakopi vaṭṭati. Tūlīti pakatitūlikā. Pallaṅkonāma āharimehi vāḷehi katoti vutto. Tattheva ‘‘sīharūpādiṃ dassetvā kato pana vaṭṭatī’’ti vadanti. Paṭikanti setattharaṇaṃ. Gonacittakanti ettha caturaṅgulādhikalomo kojavo ‘‘gonako’’ti vuccati. ‘‘Anujānāmi, bhikkhave, kojava’’nti (mahāva. 337) cīvarakkhandhake vuttattā caturaṅgulalomakaṃ pakatikojavaṃ vaṭṭati. Ratanacittaṃ cittakaṃ na vaṭṭati. Paṭalīti ghanapuppharattaattharaṇaṃ . Vikatīti sīhabyagghādirūpavicitto uṇṇāmayattharaṇako. Uddalomīti ekatouggatapupphaṃ. Ekantalomikāti ubhatouggatapupphaṃ.
குத்தந்தி ஸோளஸன்னங் நாடகித்தீ²னங் ட²த்வா நச்சனயொக்³க³ங் உண்ணாமயத்த²ரணங். கோஸெய்யந்தி ரதனபரிஸிப்³பி³தங் கோஸெய்யஸுத்தமயங் பச்சத்த²ரணங். கட்டிஸ்ஸந்தி ரதனபரிஸிப்³பி³தங் கோஸெய்யகட்டிஸ்ஸமயங் பச்சத்த²ரணங். கோஸெய்யஞ்ச கட்டிஸ்ஸஞ்ச ரதனபரிஸிப்³பி³தானேவ ந வட்டந்தி, ஸுத்³தா⁴னி வட்டந்தி. ஹத்தி²அஸ்ஸரத²த்த²ரா தேஸங் உபரி அத்த²ரணகஅத்த²ரணாவ. அஜினப்பவேணீதி அஜினசம்மேஹி மஞ்சப்பமாணேன ஸிப்³பி³த்வா கதா பவேணீ, தேன ச கத³லீமிக³சம்மங் ஸேதவத்த²ஸ்ஸ உபரி பத்த²ரித்வா ஸிப்³பி³த்வா கதங் பவரப்பச்சத்த²ரணங் கத³லீமிக³ப்பவரப்பச்சத்த²ரணங், தேன ச அத்த²தங் அஜினப்பவேணீகத³லீமிக³ப்பவரப்பச்சத்த²ரணத்த²தங்.
Kuttanti soḷasannaṃ nāṭakitthīnaṃ ṭhatvā naccanayoggaṃ uṇṇāmayattharaṇaṃ. Koseyyanti ratanaparisibbitaṃ koseyyasuttamayaṃ paccattharaṇaṃ. Kaṭṭissanti ratanaparisibbitaṃ koseyyakaṭṭissamayaṃ paccattharaṇaṃ. Koseyyañca kaṭṭissañca ratanaparisibbitāneva na vaṭṭanti, suddhāni vaṭṭanti. Hatthiassarathattharā tesaṃ upari attharaṇakaattharaṇāva. Ajinappaveṇīti ajinacammehi mañcappamāṇena sibbitvā katā paveṇī, tena ca kadalīmigacammaṃ setavatthassa upari pattharitvā sibbitvā kataṃ pavarappaccattharaṇaṃ kadalīmigappavarappaccattharaṇaṃ, tena ca atthataṃ ajinappaveṇīkadalīmigappavarappaccattharaṇatthataṃ.
ஸேதவிதானம்பி ஹெட்டா² அகப்பியப்பச்சத்த²ரணே ஸதி ந வட்டதி, கப்பியப்பச்சத்த²ரணே ஸதி வட்டதி, ரத்தவிதானஸ்ஸ ஹெட்டா² கப்பியப்பச்சத்த²ரணே ஸதிபி ந வட்டதி ஏவ. ஸீஸூபதா⁴னங் பாதூ³பதா⁴னந்தி மஞ்சஸ்ஸ உப⁴தோலோஹிதகங் உபதா⁴னங் ந வட்டதி. யங் பன ஏகமேவ உபதா⁴னங் ஹோதி, உபோ⁴ஸு அந்தேஸு ரத்தங் வா பது³மவண்ணங் வா சித்தங் வா, ஸசே பமாணயுத்தங், வட்டதி, மஹாஉபதா⁴னங் பன படிக்கி²த்தங்.
Setavitānampi heṭṭhā akappiyappaccattharaṇe sati na vaṭṭati, kappiyappaccattharaṇe sati vaṭṭati, rattavitānassa heṭṭhā kappiyappaccattharaṇe satipi na vaṭṭati eva. Sīsūpadhānaṃ pādūpadhānanti mañcassa ubhatolohitakaṃ upadhānaṃ na vaṭṭati. Yaṃ pana ekameva upadhānaṃ hoti, ubhosu antesu rattaṃ vā padumavaṇṇaṃ vā cittaṃ vā, sace pamāṇayuttaṃ, vaṭṭati, mahāupadhānaṃ pana paṭikkhittaṃ.
190. ஆஸந்தா³தி³த்தயாதி ஆஸந்தீ³ தூலீ பல்லங்கோதி இத³ங் தயங் நாமங். ‘‘அனுஜானாமி, பி⁴க்க²வே, ட²பெத்வா தீணி ஆஸந்தி³ங் பல்லங்கங் தூலிகங் ஸேஸகங் கி³ஹிவிகடங் அபி⁴னிஸீதி³துங், ந த்வேவ அபி⁴னிபஜ்ஜிது’’ந்தி (சூளவ॰ 314) ஹி வுத்தங். ஸேஸே கி³ஹிஸந்தகே நிஸீதி³துங் லப்³ப⁴தீதி அத்தோ². யதி³ த⁴ம்மாஸனே ஸங்கி⁴கம்பி கோ³னகாதி³ங் பி⁴க்கூ²ஹி அனாணத்தா ஆராமிகாத³யோ ஸயமேவ பஞ்ஞபெந்தி சேவ நீஹரந்தி ச, ஏதங் கி³ஹிவிகடனீஹாரங் நாம, இமினா கி³ஹிவிகடனீஹாரேன வட்டதி. ப⁴த்தக்³க³ங் நாம விஹாரே ஏவ தா³னட்டா²னங்.
190.Āsandādittayāti āsandī tūlī pallaṅkoti idaṃ tayaṃ nāmaṃ. ‘‘Anujānāmi, bhikkhave, ṭhapetvā tīṇi āsandiṃ pallaṅkaṃ tūlikaṃ sesakaṃ gihivikaṭaṃ abhinisīdituṃ, na tveva abhinipajjitu’’nti (cūḷava. 314) hi vuttaṃ. Sese gihisantake nisīdituṃ labbhatīti attho. Yadi dhammāsane saṅghikampi gonakādiṃ bhikkhūhi anāṇattā ārāmikādayo sayameva paññapenti ceva nīharanti ca, etaṃ gihivikaṭanīhāraṃ nāma, iminā gihivikaṭanīhārena vaṭṭati. Bhattaggaṃ nāma vihāre eva dānaṭṭhānaṃ.
191. சதுன்னங் பாதா³னங், தீஸு பஸ்ஸேஸு அபஸ்ஸயானஞ்ச வஸேன ஸத்தங்கோ³. ஏகபஸ்ஸேன யுத்தோ பஞ்சங்கோ³. இமே பன ஸத்தங்க³பஞ்சங்கா³ ‘‘அனுஜானாமி, பி⁴க்க²வே, உச்சகம்பி ஸத்தங்க³’’ந்தி (சூளவ॰ 294) வுத்தத்தா பமாணாதிக்கந்தாபி வட்டந்தி. தேன வுத்தங் ‘‘உச்சபாத³கா’’தி. தூலோனத்³தா⁴ மஞ்சபீடா² க⁴ரேயேவ நிஸீதி³துங் கப்பந்தீதி ஸம்ப³ந்தோ⁴.
191. Catunnaṃ pādānaṃ, tīsu passesu apassayānañca vasena sattaṅgo. Ekapassena yutto pañcaṅgo. Ime pana sattaṅgapañcaṅgā ‘‘anujānāmi, bhikkhave, uccakampi sattaṅga’’nti (cūḷava. 294) vuttattā pamāṇātikkantāpi vaṭṭanti. Tena vuttaṃ ‘‘uccapādakā’’ti. Tūlonaddhā mañcapīṭhā ghareyeva nisīdituṃ kappantīti sambandho.
192. சீவரச்ச²வியோதி ச²ன்னங் சீவரானங், ச²ன்னங் அனுலோமசீவரானஞ்ச அஞ்ஞதரசீவரச்ச²வியோதி அத்தோ². ஸப்³ப³த்தா²தி மஞ்சேபி பீடே²பி ப⁴த்தக்³கே³பி அந்தரக⁴ரேபீதி அத்தோ². இமாஸங் பன பி⁴ஸீனங் பமாணபரிச்சே²தோ³பி நத்தி², மஞ்சபீடா²தீ³னங் வஸேன அனுரூபங் ஸல்லக்கெ²த்வா பமாணங் காதப்³ப³ங்.
192.Cīvaracchaviyoti channaṃ cīvarānaṃ, channaṃ anulomacīvarānañca aññataracīvaracchaviyoti attho. Sabbatthāti mañcepi pīṭhepi bhattaggepi antaragharepīti attho. Imāsaṃ pana bhisīnaṃ pamāṇaparicchedopi natthi, mañcapīṭhādīnaṃ vasena anurūpaṃ sallakkhetvā pamāṇaṃ kātabbaṃ.
193. ‘‘தூலிகா உப்பன்னா ஹோதி. அனுஜானாமி, பி⁴க்க²வே, விஜடெத்வா பி³ம்போ³ஹனங் காதுங், தீணி தூலானி ருக்க²தூலங் லதாதூலங் போடகிதூல’’ந்தி (சூளவ॰ 297) வுத்தத்தா தூலத்தயஞ்ச (சூளவ॰ அட்ட²॰ 297; கங்கா²॰ அட்ட²॰ தூலோனந்த³ஸிக்கா²பத³வண்ணனா) பி³ம்போ³ஹனே வட்டதி. இமேஹி தீஹி தூலேஹி ஸப்³பே³ஸங் ருக்க²லதாதிணானங் தூலங் அனுஞ்ஞாதந்தி வேதி³தப்³ப³ங். பி⁴ஸியங் பன கிஞ்சி தூலங் ந வட்டதியேவ. பி⁴ஸிக³ப்³போ⁴தி பி⁴ஸியா வுத்தங் சோளாதி³பஞ்சகங் பி³ம்போ³ஹனே அனுஞ்ஞாதந்தி ஸம்ப³ந்தோ⁴. மிக³பக்கி²னந்தி ஸீஹாதீ³னங் ஸப்³ப³சதுப்பதா³னங் ஹங்ஸமோராதீ³னங் ஸப்³ப³பக்கீ²னங் லோமானி கப்பந்தி. மஸூரகே அனுஞ்ஞாதந்தி ஸம்ப³ந்தோ⁴.
193. ‘‘Tūlikā uppannā hoti. Anujānāmi, bhikkhave, vijaṭetvā bimbohanaṃ kātuṃ, tīṇi tūlāni rukkhatūlaṃ latātūlaṃ poṭakitūla’’nti (cūḷava. 297) vuttattā tūlattayañca (cūḷava. aṭṭha. 297; kaṅkhā. aṭṭha. tūlonandasikkhāpadavaṇṇanā) bimbohane vaṭṭati. Imehi tīhi tūlehi sabbesaṃ rukkhalatātiṇānaṃ tūlaṃ anuññātanti veditabbaṃ. Bhisiyaṃ pana kiñci tūlaṃ na vaṭṭatiyeva. Bhisigabbhoti bhisiyā vuttaṃ coḷādipañcakaṃ bimbohane anuññātanti sambandho. Migapakkhinanti sīhādīnaṃ sabbacatuppadānaṃ haṃsamorādīnaṃ sabbapakkhīnaṃ lomāni kappanti. Masūrake anuññātanti sambandho.
194. இதா³னி பி⁴ஸியங் கப்பியாகப்பியங் த³ஸ்ஸேதுங் ‘‘மனுஸ்ஸலோம’’ந்திஆதி³மாஹ. உண்ணாயந்தி (சூளவ॰ 297; சூளவ॰ அட்ட²॰ 297) உண்ணாபி⁴ஸியங் மனுஸ்ஸலோமங் ந லப்³ப⁴தீதி அத்தோ². உண்ணாபி⁴ஸியம்பி மனுஸ்ஸலோமங் ட²பெத்வா யேஸங் கேஸஞ்சி பக்கி²சதுப்பதா³னங் லோமங் வட்டதீதி அத்தோ². பண்ணேதி பண்ணபி⁴ஸியஞ்ச புப்ப²ஞ்ச ஸுத்³த⁴ங் தமாலபத்தஞ்ச ந லப்³ப⁴ங், அவஸேஸங் யங் கிஞ்சி பண்ணங் லப்³ப⁴தீதி அத்தோ². தமாலபத்தகம்பி அஞ்ஞேஹி மிஸ்ஸங் வட்டதீதி. சோளவாகதிணேஸு அகப்பியங் நாம நத்தி². ஆஸனஞ்சேவ அப்படிவெக்கி²தங் ந லப்³ப⁴ந்தி ஆஸனஸாமஞ்ஞதோ பஸங்கே³ன வுத்தங். அகப்பியஸயனவினிச்ச²யோ.
194. Idāni bhisiyaṃ kappiyākappiyaṃ dassetuṃ ‘‘manussaloma’’ntiādimāha. Uṇṇāyanti (cūḷava. 297; cūḷava. aṭṭha. 297) uṇṇābhisiyaṃ manussalomaṃ na labbhatīti attho. Uṇṇābhisiyampi manussalomaṃ ṭhapetvā yesaṃ kesañci pakkhicatuppadānaṃ lomaṃ vaṭṭatīti attho. Paṇṇeti paṇṇabhisiyañca pupphañca suddhaṃ tamālapattañca na labbhaṃ, avasesaṃ yaṃ kiñci paṇṇaṃ labbhatīti attho. Tamālapattakampi aññehi missaṃ vaṭṭatīti. Coḷavākatiṇesu akappiyaṃ nāma natthi. Āsanañceva appaṭivekkhitaṃ na labbhanti āsanasāmaññato pasaṅgena vuttaṃ. Akappiyasayanavinicchayo.
அகப்பியஸயனநித்³தே³ஸவண்ணனா நிட்டி²தா.
Akappiyasayananiddesavaṇṇanā niṭṭhitā.
