| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༢༥. ཨཀཔྤིཡསཡནནིདྡེསཝཎྞནཱ
25. Akappiyasayananiddesavaṇṇanā
༡༨༧-༩. ཨཀཔྤིཡཱནི སཡནཱནཱིཏི ཨུཙྩཱསཡནམཧཱསཡནཱནི། པདྷཱནཝསེན པན ‘‘སཡནཱནཱི’’ཏི ཝུཏྟཾ, པཱིཋཱདཡོཔི ཨེཏྠེཝ སངྒཡ྄ཧནྟི ཨཉྫནཱི-སདྡེན ཨཝསེསཱནི ཝིཡ། ཨཱསནྡི ཙ…པེ॰… ཨུབྷཏོརཏྟཱུཔདྷཱནཀཉྩེཏི ཨེཏཱནི ཨཀཔྤིཡཱནཱིཏི སམྦནྡྷོ། ཏཏྠ ཨཱསནྡཱིཏི སུགཏངྒུལེན ཨཏིརེཀཊྛངྒུལཔཱདཀཱནི མཉྩཔཱིཋཱནི། ཏཏྠ པཱིཋཾ ནཱམ མཉྩོ ཝིཡ ནཱཏིདཱིགྷཾ ཝུཙྩཏི། ཏིཝིདྷཾ ཏཱུལམེཏིསྶཱ ཨཏྠཱིཏི ཏཱུལཱི, པཀཏིཏཱུལིཀཱ། ‘‘པལླངྐོཏི པཱདེསུ ཝཱལ༹རཱུཔཱནི ཋཔེཏྭཱ ཀཏོ’’ཏི ཋཔནསྶ ཨཊྛཀཐཱཡཾ (མཧཱཝ॰ ཨཊྛ॰ ༢༥༤) ཝུཏྟཏྟཱ ཋཔནཉྩ ཡཐཱཀཐཉྩི ཧོཏི, ཡུཏྟི ཙ ཧོཏཱིཏི, ‘‘ཏཏྠེཝ སཱིཧརཱུཔཱདིཾ དསྶེཏྭཱ ཀཏོ པན ཝཊྚཏཱིཏི ཝདནྟཱི’’ཏི ཡཾ ཊཱིཀཱཡཾ ཝུཏྟཾ, ཏཾ ‘‘ཀིམིཏི ཨེཝཾ ཝདནྟཱི’’ཏི ཝཏྭཱ པཊིཀྑིཔིཏབྦཾ། ‘‘ཨཀཔྤིཡརཱུཔཀཏོ ཨཀཔྤིཡམཉྩོ པལླངྐོ ནཱམཱ’’ཏི ཧི སཱརསམཱསེཔི། ཨཱསནྡཱི པལླངྐོ ཨུཙྩཱསཡནཾ, སེསཱ མཧཱསཡནཾ། པཊིཀཱ ཨུཎྞཱམཡོ སེཏཏྠརཎོ། གོནོ ཙཏུརངྒུལཱདྷིཀལོམོ མཧཱཀོཛཝོ། ཙིཏྟཀཾ ཝཱནཝིཙིཏྲོ ཨུཎྞཱམཡཏྠརཎོ། ཨུཎྞཱ ཨེལ༹ཀལོམཾ། པཊལིཀཱ གྷནཔུཔྥིཀཱ། ཝིཀཏཱིཏི སཱིཧབྱགྒྷཱདིརཱུཔཝིཙིཏྟོ། ཨུདྡལོམཱིཏི ཨེཀཏོ ཨུགྒཏལོམོ། ཨེཀནྟལོམིཀཱཏི ཨུབྷཏོ ཨུགྒཏལོམོ།
187-9.Akappiyāni sayanānīti uccāsayanamahāsayanāni. Padhānavasena pana ‘‘sayanānī’’ti vuttaṃ, pīṭhādayopi ettheva saṅgayhanti añjanī-saddena avasesāni viya. Āsandi ca…pe… ubhatorattūpadhānakañceti etāni akappiyānīti sambandho. Tattha āsandīti sugataṅgulena atirekaṭṭhaṅgulapādakāni mañcapīṭhāni. Tattha pīṭhaṃ nāma mañco viya nātidīghaṃ vuccati. Tividhaṃ tūlametissā atthīti tūlī, pakatitūlikā. ‘‘Pallaṅkoti pādesu vāḷarūpāni ṭhapetvā kato’’ti ṭhapanassa aṭṭhakathāyaṃ (mahāva. aṭṭha. 254) vuttattā ṭhapanañca yathākathañci hoti, yutti ca hotīti, ‘‘tattheva sīharūpādiṃ dassetvā kato pana vaṭṭatīti vadantī’’ti yaṃ ṭīkāyaṃ vuttaṃ, taṃ ‘‘kimiti evaṃ vadantī’’ti vatvā paṭikkhipitabbaṃ. ‘‘Akappiyarūpakato akappiyamañco pallaṅko nāmā’’ti hi sārasamāsepi. Āsandī pallaṅko uccāsayanaṃ, sesā mahāsayanaṃ. Paṭikā uṇṇāmayo setattharaṇo. Gono caturaṅgulādhikalomo mahākojavo. Cittakaṃ vānavicitro uṇṇāmayattharaṇo. Uṇṇā eḷakalomaṃ. Paṭalikā ghanapupphikā. Vikatīti sīhabyagghādirūpavicitto. Uddalomīti ekato uggatalomo. Ekantalomikāti ubhato uggatalomo.
ཀུཏྟཾ སོལ༹སནྣཾ ནཱཊཀིཏྠཱིནཾ ཋཏྭཱ ནཙྩནཡོགྒོ། ཀོསེཡྻཾ རཏནཔརིསིབྦིཏཾ ཀོསེཡྻསུཏྟམཡཾ པཙྩཏྠརཎཾ, ཀཊྚིསྶཾ རཏནཔརིསིབྦིཏཾ ཀོསེཡྻཀཊྚིསྶམཡཾ། ཧཏྠིནོ ཙ ཨསྶཱ ཙ རཐཱ ཙཱཏི སེནངྒཱནཾ བཧུཏྟེ སམཱཧཱརདྭནྡོ, ཧཏྠིཨསྶརཐེ ཏེསཾ པིཊྛཱིསུ ཨཏྠརཱཏི ཏཔྤུརིསོ། ཨཛིནཔྤཝེཎཱིཏི ཨཛིནཱནཾ ཨཛིནམིགཙམྨཱནཾ མཉྩཔྤམཱཎེན དུཔཊྚཏིཔཊྚཱནི ཀཏྭཱ སིབྦིཏཱ པཝེཎཱི། ཀདལིམིགཱནཾ ཨིདཾ ཀདལིམིགཾ, ཀིཾ ཏཾ? ཙམྨཾ, པཝརོ ཙ སོ པཙྩཏྠརོ ཙཱཏི པཝརཔཙྩཏྠརོ, སོ ཙ ཏཾ སེཏཝཏྠསྶ ཨུཔརི ཨཏྠཏཉྩ, ཀདལིམིགཉྩ ཏཾ པཝརཔཙྩཏྠརཉྩཱཏི སམཱསོ, པཝརཔཙྩཏྠརཎསངྑཱཏཾ སེཏཝཏྠསྶ ཨུཔརི པཏྠརིཏཾ ཀདལིམིགཔྤཝརཔཙྩཏྠརཎནྟི ཨཏྠོ། ཏཾ ཀིར ཨེཝཾ ཀརོནྟི། ཊཱིཀཱཡཾ པན ཡཐཱཝུཏྟདྭཡེན ཨཏྠཏཾ ཨཉྙམེཝ ཀིཉྩི ཝུཏྟཾ, ཏཾ ན ཡུཏྟཾ ‘‘ཨཛིནཔྤཝེཎཱི དྷཱརེཏབྦཱ’’ཏིཨཱདིནཱ (མཧཱཝ॰ ༢༥༤) ཝིསུཾ ཨཏྠརཎཱནམེཝ ཝུཏྟཏྟཱ། ཏེསུ ཧི ཝུཏྟེསུ ཏདཏྠཏཾ ཝུཏྟམེཝ སིཡཱ, ཏཐཱ ཙ ཝུཏྟཾ ཧེཊྛཱ ཝིསུཾ པཊིཀཱདིཀནྟི།
Kuttaṃ soḷasannaṃ nāṭakitthīnaṃ ṭhatvā naccanayoggo. Koseyyaṃ ratanaparisibbitaṃ koseyyasuttamayaṃ paccattharaṇaṃ, kaṭṭissaṃ ratanaparisibbitaṃ koseyyakaṭṭissamayaṃ. Hatthino ca assā ca rathā cāti senaṅgānaṃ bahutte samāhāradvando, hatthiassarathe tesaṃ piṭṭhīsu attharāti tappuriso. Ajinappaveṇīti ajinānaṃ ajinamigacammānaṃ mañcappamāṇena dupaṭṭatipaṭṭāni katvā sibbitā paveṇī. Kadalimigānaṃ idaṃ kadalimigaṃ, kiṃ taṃ? Cammaṃ, pavaro ca so paccattharo cāti pavarapaccattharo, so ca taṃ setavatthassa upari atthatañca, kadalimigañca taṃ pavarapaccattharañcāti samāso, pavarapaccattharaṇasaṅkhātaṃ setavatthassa upari pattharitaṃ kadalimigappavarapaccattharaṇanti attho. Taṃ kira evaṃ karonti. Ṭīkāyaṃ pana yathāvuttadvayena atthataṃ aññameva kiñci vuttaṃ, taṃ na yuttaṃ ‘‘ajinappaveṇī dhāretabbā’’tiādinā (mahāva. 254) visuṃ attharaṇānameva vuttattā. Tesu hi vuttesu tadatthataṃ vuttameva siyā, tathā ca vuttaṃ heṭṭhā visuṃ paṭikādikanti.
སལོཧིཏཝིཏཱནནྟི ཨེཏཾ ‘‘ཨུབྷཏོརཏྟཱུཔདྷཱནཀ’’ནྟིམསྶ ཝིསེསནཾ། ལོཧིཏཝིཏཱནེན སཧ ཝཏྟམཱནནྟི སམཱསོ། སེཏཝིཏཱནམྤི ཧེཊྛཱ ཨཀཔྤིཡཔཙྩཏྠརཎེ སཏི ན ཝཊྚཏི། རཏྟཾ ཨུཔདྷཱནཾ སཱིསཱུཔདྷཱནཾ པཱདཱུཔདྷཱནཉྩ རཏྟཱུཔདྷཱནཀཾ, ཨུབྷཏོ མཉྩསྶ སཱིསཔཱདནིཀྑེཔནཊྛཱནེ རཏྟཱུཔདྷཱནཀནྟི ཨལོཔསམཱསོ། ཡཾ པན ཨེཀམེཝ ཨུཔདྷཱནཾ ཨུབྷཡཔསྶེསུ རཏྟཱདིཝཎྞཾ ཝིཙིཏྲཾ, ཏཾ པམཱཎཡུཏྟམེཝ ཝཊྚཏི། ཏཏྲིདཾ པམཱཎཾ – ཝིཏྠཱརཏོ ཏཱིསུ ཀཎྞེསུ དྭིནྣཾ ཀཎྞཱནཾ ཨནྟརཾ ཝིདཏྠིཙཏུརངྒུལཾ, མཛ྄ཛྷེ མུཊྛིརཏནཾ, དཱིགྷཏོ པན དིཡཌྜྷརཏནཾ ཝཱ དྭིརཏནཾ ཝཱ། པརིབྷུཉྫཏོཏི ཨིམིནཱ ཀརོནྟསྶ ཀཱརཱཔེནྟསྶ ཀཏྠཙི ཚེདནཀཾ པཱཙིཏྟིཡནྟི དཱིཔེཏི།
Salohitavitānanti etaṃ ‘‘ubhatorattūpadhānaka’’ntimassa visesanaṃ. Lohitavitānena saha vattamānanti samāso. Setavitānampi heṭṭhā akappiyapaccattharaṇe sati na vaṭṭati. Rattaṃ upadhānaṃ sīsūpadhānaṃ pādūpadhānañca rattūpadhānakaṃ, ubhato mañcassa sīsapādanikkhepanaṭṭhāne rattūpadhānakanti alopasamāso. Yaṃ pana ekameva upadhānaṃ ubhayapassesu rattādivaṇṇaṃ vicitraṃ, taṃ pamāṇayuttameva vaṭṭati. Tatridaṃ pamāṇaṃ – vitthārato tīsu kaṇṇesu dvinnaṃ kaṇṇānaṃ antaraṃ vidatthicaturaṅgulaṃ, majjhe muṭṭhiratanaṃ, dīghato pana diyaḍḍharatanaṃ vā dviratanaṃ vā. Paribhuñjatoti iminā karontassa kārāpentassa katthaci chedanakaṃ pācittiyanti dīpeti.
༡༩༠. དྷམྨཱསནེ ཙ བྷཏྟགྒེ ཙ གྷརེ ཙཱཔི ཨཱསནྡཱདིཏྟཡཱ སེསེ གིཧིསནྟཀེ གིཧིཝིཀཊེ སཏི ནིསཱིདིཏུཾ ལབྦྷཏཱིཏི ཨཛ྄ཛྷཱཧཱརོ པདསམྦནྡྷོ ཝེདིཏབྦོ། གིཧིསནྟཀེཏི ཨིམིནཱ སངྒྷིཀམྤི ཨུཔལཀྑེཏི། ‘‘ཨནུཛཱནཱམི, བྷིཀྑཝེ, ཋཔེཏྭཱ ཏཱིཎི ཨཱསནྡིཾ པལླངྐཾ ཏཱུལིཀཾ གིཧིཝིཀཊ’’ནྟི (ཙཱུལ༹ཝ॰ ༣༡༤) སཱམཉྙེན ཝུཏྟཾ། སཱམཉྙཛོཏནཱཡ པན ཝིསེསེཔི ཨཝཊྛཱནཏོ ཨཱསནྡཱདིཏྟཡཱཏི ཨེཏྠ དྷམྨཱསནེ ཨཱསནྡཱདིཏྟཡཱ སེསེཏི ཡོཛེཏྭཱ ཨཏྠོ གཧེཏབྦོ། ཨཊྛཀཐཱཡཉྷི ‘‘ཨཱསནྡཱི པལླངྐོ གོནཀོ’’ཏིཨཱདིཔཱལི༹ཀྐམེ ཨཱསནྡཱདིདྭཡམཱདིཏོ ཧིཏྭཱ ‘‘གོནཀཱདཱིནི སངྒྷིཀཝིཧཱརེ ཝཱ པུགྒལིཀཝིཧཱརེ ཝཱ མཉྩཔཱིཋཀེསུ ཨཏྠརིཏྭཱ པརིབྷུཉྫིཏུཾ ན ཝཊྚནྟི, དྷམྨཱསནེ པན གིཧིཝིཀཊནཱིཧཱརེན ལབྦྷནྟི, ཏཏྲཱཔི ནིཔཛྫིཏུཾ ན ཝཊྚཏཱི’’ཏི (ཙཱུལ༹ཝ॰ ཨཊྛ॰ ༣༢༠) ཝུཏྟཾ། བྷཏྟགྒཾ ནཱམ ཝིཧཱརེ དཱནཊྛཱནཾ། དྷམྨཱསནཾ པན ཡཏྠ ཀཏྠཙི། གྷརེཏི ཨནྟརགྷརེ། ནིསཱིདིཏུཾ ལབྦྷཏེཏི ཨིམིནཱ ནིཔཛྫིཏུཾ ན ཝཊྚཏཱིཏི དཱིཔེཏི། སཾཁིཔནཾ ཨནྟོཀརཎཾ སངྑེཔོ, བྷཱུམཏྠརཎེ སངྑེཔོ ཨསྶ སཡནསྶཱཏི སམཱསོ། ཏསྨིཾ བྷཱུམཏྠརཎེ ཨནྟོཀརཎབྷཱུམཏྠརཏོ བྷཱུམཏྠརཎམེཝཱཏི དཊྛབྦཾ། སཡིཏུཉྩཱཏི ཨཏྟནོ ཀཔྤིཡཔཙྩཏྠརཎཾ ཨཏྠརིཏྭཱ སཡིཏུཉྩ ནིསཱིདིཏུཉྩ། ‘‘པརིབྷཎྜཀཏཾ བྷཱུམིཾ ཝཱ བྷཱུམཏྠརཎསེནཱསནཾ ཝཱ སངྒྷིཀམཉྩཔཱིཋཾ ཝཱ ཨཏྟནོ སནྟཀེན པཙྩཏྠརཎེན པཙྩཏྠརིཏྭཱཝ ནིཔཛྫིཏབྦ’’ནྟི ཧི ཨཊྛཀཐཱཡཾ (ཙཱུལ༹ཝ॰ ཨཊྛ॰ ༣༢༤) ཝུཏྟཾ། ཨིདཉྩ ཨཱསནྡཱདཱིནམྤི ཨཉྙཐཏྟཀརཎེ པརིབྷོགེ ལཀྑཎཝཙནཾ། ཝུཏྟཉྷི བྷགཝཏཱ ‘‘ཨནུཛཱནཱམི བྷིཀྑཝེ, ཨཱསནྡིཡཱ པཱདེ ཚིནྡིཏྭཱ པརིབྷུཉྫིཏུཾ, པལླངྐསྶ ཝཱལེ༹ བྷིནྡིཏྭཱ པརིབྷུཉྫིཏུཾ, ཏཱུལིཀཾ ཝིཛཊེཏྭཱ བིབྦོཧནཾ ཀཱཏུཾ, ཨཝསེསཾ བྷཱུམཏྠརཎཾ ཀཱཏུ’’ནྟི (ཙཱུལ༹ཝ॰ ༣༢༠)།
190. Dhammāsane ca bhattagge ca ghare cāpi āsandādittayā sese gihisantake gihivikaṭe sati nisīdituṃ labbhatīti ajjhāhāro padasambandho veditabbo. Gihisantaketi iminā saṅghikampi upalakkheti. ‘‘Anujānāmi, bhikkhave, ṭhapetvā tīṇi āsandiṃ pallaṅkaṃ tūlikaṃ gihivikaṭa’’nti (cūḷava. 314) sāmaññena vuttaṃ. Sāmaññajotanāya pana visesepi avaṭṭhānato āsandādittayāti ettha dhammāsane āsandādittayā seseti yojetvā attho gahetabbo. Aṭṭhakathāyañhi ‘‘āsandī pallaṅko gonako’’tiādipāḷikkame āsandādidvayamādito hitvā ‘‘gonakādīni saṅghikavihāre vā puggalikavihāre vā mañcapīṭhakesu attharitvā paribhuñjituṃ na vaṭṭanti, dhammāsane pana gihivikaṭanīhārena labbhanti, tatrāpi nipajjituṃ na vaṭṭatī’’ti (cūḷava. aṭṭha. 320) vuttaṃ. Bhattaggaṃ nāma vihāre dānaṭṭhānaṃ. Dhammāsanaṃ pana yattha katthaci. Ghareti antaraghare. Nisīdituṃ labbhateti iminā nipajjituṃ na vaṭṭatīti dīpeti. Saṃkhipanaṃ antokaraṇaṃ saṅkhepo, bhūmattharaṇe saṅkhepo assa sayanassāti samāso. Tasmiṃ bhūmattharaṇe antokaraṇabhūmattharato bhūmattharaṇamevāti daṭṭhabbaṃ. Sayituñcāti attano kappiyapaccattharaṇaṃ attharitvā sayituñca nisīdituñca. ‘‘Paribhaṇḍakataṃ bhūmiṃ vā bhūmattharaṇasenāsanaṃ vā saṅghikamañcapīṭhaṃ vā attano santakena paccattharaṇena paccattharitvāva nipajjitabba’’nti hi aṭṭhakathāyaṃ (cūḷava. aṭṭha. 324) vuttaṃ. Idañca āsandādīnampi aññathattakaraṇe paribhoge lakkhaṇavacanaṃ. Vuttañhi bhagavatā ‘‘anujānāmi bhikkhave, āsandiyā pāde chinditvā paribhuñjituṃ, pallaṅkassa vāḷe bhinditvā paribhuñjituṃ, tūlikaṃ vijaṭetvā bibbohanaṃ kātuṃ, avasesaṃ bhūmattharaṇaṃ kātu’’nti (cūḷava. 320).
༡༩༡. ཙཏུརཾསཔཱིཋཱ ཙ…པེ॰… པཉྩངྒཱ ཙ ཨུཙྩཔཱདཀཱ ཀཔྤནྟཱིཏི ཨཏྠཏོ ཝཙནཾ ཝིཔལླཱསེཏྭཱ སམྦནྡྷིཏབྦཾ, ‘‘ཀཔྤིཡཱ’’ཏི ཨིམིནཱ ཝཱ སམྦནྡྷོ ཝེདིཏབྦོ། ཏཏྠ ཙཏྟཱརོ ཨཾསཱ ཀོཎཱ ཡེསཾ, ཏེ ཙ ཏེ པཱིཋཱ ཙཱཏི སམཱསོ། ཏིཎྞཾ ཨཔསྶཡཱནཾ, ཙཏུནྣཉྩ པཱདཱནཾ ཝསེན སཏྟ ཨངྒཱནི ཡེསནྟི སམཱསོ། ཨེཀཱཔསྶཡསྶ ཝསེན པཉྩངྒཱ། ཙཏུརཾསཔཱིཋཱནཾ ཝིསུཾ ཀཔྤིཡབྷཱཝསྶ ཝུཏྟཏྟཱ སཏྟངྒཱདཡོ པན དཱིགྷཱཏི ཝིཉྙཱཡནྟི། པཱལི༹ཡཾ བྷཏྟགྒསྶ ཨེཀཡོགནིདྡིཊྛཏྟཱ ཨེཀཡོགནིདྡིཊྛཱནཾ སཧ ཝཱ པཝཏྟི, སཧ ཝཱ ནིཝཏྟཱིཏི གྷརེཏི ཨིམིནཱ བྷཏྟགྒསྶཔི གཧཎཾ། ཨེཝ-སདྡོ ཨཊྛཱནཔྤཡུཏྟོ, ཏསྨཱ ཏཱུལོནདྡྷཱ མཉྩཔཱིཋཱ གྷརེ ཝཱ བྷཏྟགྒེ ཝཱ ནིསཱིདིཏུམེཝ ཀཔྤནྟཱིཏི སམྦནྡྷོ། ཏཏྲཱཡཾ པཱལི༹ ‘‘ཏེན ཁོ པན སམཡེན མནུསྶཱ བྷཏྟགྒེ ཨནྟརགྷརེ ཏཱུལོནདྡྷཾ མཉྩམྤི པཱིཋམྤི པཉྙཔེནྟི། བྷིཀྑཱུ ཀུཀྐུཙྩཱཡནྟཱ ནཱབྷིནིསཱིདནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, གིཧིཝིཀཊཾ ཨབྷིནིསཱིདིཏུཾ, ན ཏྭེཝ ཨབྷིནིཔཛྫིཏུ’’ནྟི (ཙཱུལ༹ཝ॰ ༣༡༤)། ཏེ པན ཀརོནྟསྶ ཝཱ ཀཱརཱཔེནྟསྶ ཝཱ ཨུདྡཱལནཀཾ པཱཙིཏྟིཡཾ།
191. Caturaṃsapīṭhā ca…pe… pañcaṅgā ca uccapādakā kappantīti atthato vacanaṃ vipallāsetvā sambandhitabbaṃ, ‘‘kappiyā’’ti iminā vā sambandho veditabbo. Tattha cattāro aṃsā koṇā yesaṃ, te ca te pīṭhā cāti samāso. Tiṇṇaṃ apassayānaṃ, catunnañca pādānaṃ vasena satta aṅgāni yesanti samāso. Ekāpassayassa vasena pañcaṅgā. Caturaṃsapīṭhānaṃ visuṃ kappiyabhāvassa vuttattā sattaṅgādayo pana dīghāti viññāyanti. Pāḷiyaṃ bhattaggassa ekayoganiddiṭṭhattā ekayoganiddiṭṭhānaṃ saha vā pavatti, saha vā nivattīti ghareti iminā bhattaggassapi gahaṇaṃ. Eva-saddo aṭṭhānappayutto, tasmā tūlonaddhā mañcapīṭhā ghare vā bhattagge vā nisīditumeva kappantīti sambandho. Tatrāyaṃ pāḷi ‘‘tena kho pana samayena manussā bhattagge antaraghare tūlonaddhaṃ mañcampi pīṭhampi paññapenti. Bhikkhū kukkuccāyantā nābhinisīdanti. Bhagavato etamatthaṃ ārocesuṃ. Anujānāmi, bhikkhave, gihivikaṭaṃ abhinisīdituṃ, na tveva abhinipajjitu’’nti (cūḷava. 314). Te pana karontassa vā kārāpentassa vā uddālanakaṃ pācittiyaṃ.
༡༩༢. སཱནུལོམཱནཾ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཚཝི ཨེཏཱསནྟི ཝིགྒཧོ། པཉྩ བྷིསཱིཏི ཙོལཱ༹དིཏཱུལགཎནཱཡ པཉྩཀཱ ཝུཏྟཱ། སབྦཏྠཱཏི ཝིཧཱརམཉྩཔཱིཋཱདཱིསུ སབྦཏྠ།
192. Sānulomānaṃ channaṃ cīvarānaṃ aññataraṃ cīvaraṃ chavi etāsanti viggaho. Pañca bhisīti coḷāditūlagaṇanāya pañcakā vuttā. Sabbatthāti vihāramañcapīṭhādīsu sabbattha.
༡༩༣. ཏཱུལཏྟཡནྟི སིམྦལིརུཀྑཱདཱིནཾ ཁཱིརཝལླིཨཱདཱིནཾ ཨེརཀཱདཱིནཾ ཏིཎཱནཾ ཏཱུལཏྟཡཾ། བྷིསིགབྦྷོ ཙོལཱ༹དིཀོ པཉྩཝིདྷོ བྷིསིགབྦྷོ། མིགཔཀྑིནཾ ལོམཱནཱིཏི ཨེཏཾ སབྦནྟི སེསོ། མིག-སདྡེནེཝ སབྦེཔི སཱིཧཱདཡོ ཙཏུཔྤདཱ, པཀྑི-སདྡེན སབྦེཔི ཧཾསམོརཱདཡོ གཧིཏཱ། ནནུ ཙ བྷིསིགབྦྷསདྡནྟོགདྷཱཡ ཨུཎྞཱཡ མིགཔཀྑིལོམཱནམྤི གཧཎསབྦྷཱཝེཔི ཏེསཾ ཝིསུཾ གཧཎེ སཏི པུནརུཏྟིདོསོ ཨཱཔཛྫཏཱིཏི? ནཱཔཛྫཏི མནུསྶལོམཔརིཙྩཱགཝིབྷཱཝནཔྤཡོཛནསབྦྷཱཝཏོ། ནནུ ཙ ཨེཝམྤི དོསོཡེཝ, ‘‘མནུསྶལོམམུཎྞཱཡ’’ནྟིཨཱདིནཱ བྷིསིགབྦྷཱནཾ ཨུཔརི ནཱིཡམཱནཏྟཱ གམྱཏེ བིབྦོཧནེཔི ཨཡམེཝ བྷིསིགབྦྷོཏི? སཙྩཾ, ཏཐཱཔི ན དོསོ, གམྱམཱནཏྠསྶ སདྡསྶ པཡོགཾ པཏི ཀཱམཙཱརོཏི། མསཱུརཀེ ཏཱུལཝཛྫཱ ཨནུཉྙཱཏཱཏི ཝིཔརིཎཱམེཏྭཱ སམྦནྡྷིཏབྦཾ། མསཱུརཀཾ ནཱམ ཙམྨཚཝིཀཱ བྷིསཱིཏི ཝདནྟི།
193.Tūlattayanti simbalirukkhādīnaṃ khīravalliādīnaṃ erakādīnaṃ tiṇānaṃ tūlattayaṃ. Bhisigabbho coḷādiko pañcavidho bhisigabbho. Migapakkhinaṃ lomānīti etaṃ sabbanti seso. Miga-saddeneva sabbepi sīhādayo catuppadā, pakkhi-saddena sabbepi haṃsamorādayo gahitā. Nanu ca bhisigabbhasaddantogadhāya uṇṇāya migapakkhilomānampi gahaṇasabbhāvepi tesaṃ visuṃ gahaṇe sati punaruttidoso āpajjatīti? Nāpajjati manussalomapariccāgavibhāvanappayojanasabbhāvato. Nanu ca evampi dosoyeva, ‘‘manussalomamuṇṇāya’’ntiādinā bhisigabbhānaṃ upari nīyamānattā gamyate bibbohanepi ayameva bhisigabbhoti? Saccaṃ, tathāpi na doso, gamyamānatthassa saddassa payogaṃ pati kāmacāroti. Masūrake tūlavajjā anuññātāti vipariṇāmetvā sambandhitabbaṃ. Masūrakaṃ nāma cammachavikā bhisīti vadanti.
༡༩༤. ཨུཎྞཱཡཾ མནུསྶལོམཉྩ པཎྞེ སུདྡྷཾ ཏམཱལཀཉྩ པུཔྥཉྩ ཨཔྤཊིཝེཀྑིཏཾ ཨཱསནཉྩེཝ ན ལབྦྷནྟི སམྦནྡྷོ། མནུསྶལོམནྟི ཨིམིནཱ ན ཀེཝལཾ ཨིདྷ ཨེལ༹ཀལོམམེཝ ཨུཎྞཱ, ཨཐ ཁོ ཀཔྤིཡཱཀཔྤིཡམཾསཛཱཏཱིནཾ པཀྑིཙཏུཔྤདཱནཾ ལོམམྤཱིཏི དསྶེཏི། པུཔྥནྟི པིཡངྒུབཀུལཔུཔྥཱདི། ཏམཱལཀསདྡེནེཝ ཨུཔཙཱརཏོ པཏྟཾ གཧེཏྭཱ ‘‘ཏམཱལཀ’’ནྟི ཝུཏྟཾ། ཨཔྤཊིཝེཀྑིཏནྟི ཨནུཔཔརིཀྑིཏཾ། ཀཱིདིསཾ པན པཊིཝེཀྑིཏབྦཾ, ཀཱིདིསཾ ན པཊིཝེཀྑིཏབྦནྟི? ཡཾ ཝིནིཙྪཡཏོ ཝིཉྙཱཏཾ, ཏཾ ན པཊིཝེཀྑིཏབྦཾ, ཨིཏརཾ ཧཏྠེན པརཱམསནྟེན པཊིཝེཀྑིཏབྦཾ།
194. Uṇṇāyaṃ manussalomañca paṇṇe suddhaṃ tamālakañca pupphañca appaṭivekkhitaṃ āsanañceva na labbhanti sambandho. Manussalomanti iminā na kevalaṃ idha eḷakalomameva uṇṇā, atha kho kappiyākappiyamaṃsajātīnaṃ pakkhicatuppadānaṃ lomampīti dasseti. Pupphanti piyaṅgubakulapupphādi. Tamālakasaddeneva upacārato pattaṃ gahetvā ‘‘tamālaka’’nti vuttaṃ. Appaṭivekkhitanti anupaparikkhitaṃ. Kīdisaṃ pana paṭivekkhitabbaṃ, kīdisaṃ na paṭivekkhitabbanti? Yaṃ vinicchayato viññātaṃ, taṃ na paṭivekkhitabbaṃ, itaraṃ hatthena parāmasantena paṭivekkhitabbaṃ.
ཨཀཔྤིཡསཡནནིདྡེསཝཎྞནཱ ནིཊྛིཏཱ།
Akappiyasayananiddesavaṇṇanā niṭṭhitā.
