| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੨੫. ਅਕਪ੍ਪਿਯਸਯਨਨਿਦ੍ਦੇਸવਣ੍ਣਨਾ
25. Akappiyasayananiddesavaṇṇanā
੧੮੭-੯. ‘‘ਉਚ੍ਚਕੋ ਆਸਨ੍ਦਿਕੋ ਉਪ੍ਪਨ੍ਨੋ ਹੋਤਿ, ਅਨੁਜਾਨਾਮਿ ਭਿਕ੍ਖવੇ ਉਚ੍ਚਕਮ੍ਪਿ ਆਸਨ੍ਦਿਕ’’ਨ੍ਤਿ (ਚੂਲ਼વ॰ ੨੯੭) વਚਨਤੋ ਮਞ੍ਚਸ੍ਸ ਉਪਡ੍ਢਭਾਗਪ੍ਪਮਾਣੇਨ ਏਕਤੋਭਾਗੇਨ ਦੀਘਮ੍ਪਿ ਸੁਗਤਙ੍ਗੁਲੇਨ ਅਤਿਰੇਕਟ੍ਠਙ੍ਗੁਲਪਾਦਕਂ ਇਧ ਆਸਨ੍ਦੀਤਿ ਅਧਿਪ੍ਪੇਤਂ, ਚਤੁਰਂਸਾਸਨ੍ਦਿਕੋ ਪਨ ਪਮਾਣਾਤਿਕ੍ਕਨ੍ਤਕੋਪਿ વਟ੍ਟਤਿ। ਤੂਲੀਤਿ ਪਕਤਿਤੂਲਿਕਾ। ਪਲ੍ਲਙ੍ਕੋਨਾਮ ਆਹਰਿਮੇਹਿ વਾਲ਼ੇਹਿ ਕਤੋਤਿ વੁਤ੍ਤੋ। ਤਤ੍ਥੇવ ‘‘ਸੀਹਰੂਪਾਦਿਂ ਦਸ੍ਸੇਤ੍વਾ ਕਤੋ ਪਨ વਟ੍ਟਤੀ’’ਤਿ વਦਨ੍ਤਿ। ਪਟਿਕਨ੍ਤਿ ਸੇਤਤ੍ਥਰਣਂ। ਗੋਨਚਿਤ੍ਤਕਨ੍ਤਿ ਏਤ੍ਥ ਚਤੁਰਙ੍ਗੁਲਾਧਿਕਲੋਮੋ ਕੋਜવੋ ‘‘ਗੋਨਕੋ’’ਤਿ વੁਚ੍ਚਤਿ। ‘‘ਅਨੁਜਾਨਾਮਿ, ਭਿਕ੍ਖવੇ, ਕੋਜવ’’ਨ੍ਤਿ (ਮਹਾવ॰ ੩੩੭) ਚੀવਰਕ੍ਖਨ੍ਧਕੇ વੁਤ੍ਤਤ੍ਤਾ ਚਤੁਰਙ੍ਗੁਲਲੋਮਕਂ ਪਕਤਿਕੋਜવਂ વਟ੍ਟਤਿ। ਰਤਨਚਿਤ੍ਤਂ ਚਿਤ੍ਤਕਂ ਨ વਟ੍ਟਤਿ। ਪਟਲੀਤਿ ਘਨਪੁਪ੍ਫਰਤ੍ਤਅਤ੍ਥਰਣਂ । વਿਕਤੀਤਿ ਸੀਹਬ੍ਯਗ੍ਘਾਦਿਰੂਪવਿਚਿਤ੍ਤੋ ਉਣ੍ਣਾਮਯਤ੍ਥਰਣਕੋ। ਉਦ੍ਦਲੋਮੀਤਿ ਏਕਤੋਉਗ੍ਗਤਪੁਪ੍ਫਂ। ਏਕਨ੍ਤਲੋਮਿਕਾਤਿ ਉਭਤੋਉਗ੍ਗਤਪੁਪ੍ਫਂ।
187-9. ‘‘Uccako āsandiko uppanno hoti, anujānāmi bhikkhave uccakampi āsandika’’nti (cūḷava. 297) vacanato mañcassa upaḍḍhabhāgappamāṇena ekatobhāgena dīghampi sugataṅgulena atirekaṭṭhaṅgulapādakaṃ idha āsandīti adhippetaṃ, caturaṃsāsandiko pana pamāṇātikkantakopi vaṭṭati. Tūlīti pakatitūlikā. Pallaṅkonāma āharimehi vāḷehi katoti vutto. Tattheva ‘‘sīharūpādiṃ dassetvā kato pana vaṭṭatī’’ti vadanti. Paṭikanti setattharaṇaṃ. Gonacittakanti ettha caturaṅgulādhikalomo kojavo ‘‘gonako’’ti vuccati. ‘‘Anujānāmi, bhikkhave, kojava’’nti (mahāva. 337) cīvarakkhandhake vuttattā caturaṅgulalomakaṃ pakatikojavaṃ vaṭṭati. Ratanacittaṃ cittakaṃ na vaṭṭati. Paṭalīti ghanapuppharattaattharaṇaṃ . Vikatīti sīhabyagghādirūpavicitto uṇṇāmayattharaṇako. Uddalomīti ekatouggatapupphaṃ. Ekantalomikāti ubhatouggatapupphaṃ.
ਕੁਤ੍ਤਨ੍ਤਿ ਸੋਲ਼ਸਨ੍ਨਂ ਨਾਟਕਿਤ੍ਥੀਨਂ ਠਤ੍વਾ ਨਚ੍ਚਨਯੋਗ੍ਗਂ ਉਣ੍ਣਾਮਯਤ੍ਥਰਣਂ। ਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਸੁਤ੍ਤਮਯਂ ਪਚ੍ਚਤ੍ਥਰਣਂ। ਕਟ੍ਟਿਸ੍ਸਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਕਟ੍ਟਿਸ੍ਸਮਯਂ ਪਚ੍ਚਤ੍ਥਰਣਂ। ਕੋਸੇਯ੍ਯਞ੍ਚ ਕਟ੍ਟਿਸ੍ਸਞ੍ਚ ਰਤਨਪਰਿਸਿਬ੍ਬਿਤਾਨੇવ ਨ વਟ੍ਟਨ੍ਤਿ, ਸੁਦ੍ਧਾਨਿ વਟ੍ਟਨ੍ਤਿ। ਹਤ੍ਥਿਅਸ੍ਸਰਥਤ੍ਥਰਾ ਤੇਸਂ ਉਪਰਿ ਅਤ੍ਥਰਣਕਅਤ੍ਥਰਣਾવ। ਅਜਿਨਪ੍ਪવੇਣੀਤਿ ਅਜਿਨਚਮ੍ਮੇਹਿ ਮਞ੍ਚਪ੍ਪਮਾਣੇਨ ਸਿਬ੍ਬਿਤ੍વਾ ਕਤਾ ਪવੇਣੀ, ਤੇਨ ਚ ਕਦਲੀਮਿਗਚਮ੍ਮਂ ਸੇਤવਤ੍ਥਸ੍ਸ ਉਪਰਿ ਪਤ੍ਥਰਿਤ੍વਾ ਸਿਬ੍ਬਿਤ੍વਾ ਕਤਂ ਪવਰਪ੍ਪਚ੍ਚਤ੍ਥਰਣਂ ਕਦਲੀਮਿਗਪ੍ਪવਰਪ੍ਪਚ੍ਚਤ੍ਥਰਣਂ, ਤੇਨ ਚ ਅਤ੍ਥਤਂ ਅਜਿਨਪ੍ਪવੇਣੀਕਦਲੀਮਿਗਪ੍ਪવਰਪ੍ਪਚ੍ਚਤ੍ਥਰਣਤ੍ਥਤਂ।
Kuttanti soḷasannaṃ nāṭakitthīnaṃ ṭhatvā naccanayoggaṃ uṇṇāmayattharaṇaṃ. Koseyyanti ratanaparisibbitaṃ koseyyasuttamayaṃ paccattharaṇaṃ. Kaṭṭissanti ratanaparisibbitaṃ koseyyakaṭṭissamayaṃ paccattharaṇaṃ. Koseyyañca kaṭṭissañca ratanaparisibbitāneva na vaṭṭanti, suddhāni vaṭṭanti. Hatthiassarathattharā tesaṃ upari attharaṇakaattharaṇāva. Ajinappaveṇīti ajinacammehi mañcappamāṇena sibbitvā katā paveṇī, tena ca kadalīmigacammaṃ setavatthassa upari pattharitvā sibbitvā kataṃ pavarappaccattharaṇaṃ kadalīmigappavarappaccattharaṇaṃ, tena ca atthataṃ ajinappaveṇīkadalīmigappavarappaccattharaṇatthataṃ.
ਸੇਤવਿਤਾਨਮ੍ਪਿ ਹੇਟ੍ਠਾ ਅਕਪ੍ਪਿਯਪ੍ਪਚ੍ਚਤ੍ਥਰਣੇ ਸਤਿ ਨ વਟ੍ਟਤਿ, ਕਪ੍ਪਿਯਪ੍ਪਚ੍ਚਤ੍ਥਰਣੇ ਸਤਿ વਟ੍ਟਤਿ, ਰਤ੍ਤવਿਤਾਨਸ੍ਸ ਹੇਟ੍ਠਾ ਕਪ੍ਪਿਯਪ੍ਪਚ੍ਚਤ੍ਥਰਣੇ ਸਤਿਪਿ ਨ વਟ੍ਟਤਿ ਏવ। ਸੀਸੂਪਧਾਨਂ ਪਾਦੂਪਧਾਨਨ੍ਤਿ ਮਞ੍ਚਸ੍ਸ ਉਭਤੋਲੋਹਿਤਕਂ ਉਪਧਾਨਂ ਨ વਟ੍ਟਤਿ। ਯਂ ਪਨ ਏਕਮੇવ ਉਪਧਾਨਂ ਹੋਤਿ, ਉਭੋਸੁ ਅਨ੍ਤੇਸੁ ਰਤ੍ਤਂ વਾ ਪਦੁਮવਣ੍ਣਂ વਾ ਚਿਤ੍ਤਂ વਾ, ਸਚੇ ਪਮਾਣਯੁਤ੍ਤਂ, વਟ੍ਟਤਿ, ਮਹਾਉਪਧਾਨਂ ਪਨ ਪਟਿਕ੍ਖਿਤ੍ਤਂ।
Setavitānampi heṭṭhā akappiyappaccattharaṇe sati na vaṭṭati, kappiyappaccattharaṇe sati vaṭṭati, rattavitānassa heṭṭhā kappiyappaccattharaṇe satipi na vaṭṭati eva. Sīsūpadhānaṃ pādūpadhānanti mañcassa ubhatolohitakaṃ upadhānaṃ na vaṭṭati. Yaṃ pana ekameva upadhānaṃ hoti, ubhosu antesu rattaṃ vā padumavaṇṇaṃ vā cittaṃ vā, sace pamāṇayuttaṃ, vaṭṭati, mahāupadhānaṃ pana paṭikkhittaṃ.
੧੯੦. ਆਸਨ੍ਦਾਦਿਤ੍ਤਯਾਤਿ ਆਸਨ੍ਦੀ ਤੂਲੀ ਪਲ੍ਲਙ੍ਕੋਤਿ ਇਦਂ ਤਯਂ ਨਾਮਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਠਪੇਤ੍વਾ ਤੀਣਿ ਆਸਨ੍ਦਿਂ ਪਲ੍ਲਙ੍ਕਂ ਤੂਲਿਕਂ ਸੇਸਕਂ ਗਿਹਿવਿਕਟਂ ਅਭਿਨਿਸੀਦਿਤੁਂ, ਨ ਤ੍વੇવ ਅਭਿਨਿਪਜ੍ਜਿਤੁ’’ਨ੍ਤਿ (ਚੂਲ਼વ॰ ੩੧੪) ਹਿ વੁਤ੍ਤਂ। ਸੇਸੇ ਗਿਹਿਸਨ੍ਤਕੇ ਨਿਸੀਦਿਤੁਂ ਲਬ੍ਭਤੀਤਿ ਅਤ੍ਥੋ। ਯਦਿ ਧਮ੍ਮਾਸਨੇ ਸਙ੍ਘਿਕਮ੍ਪਿ ਗੋਨਕਾਦਿਂ ਭਿਕ੍ਖੂਹਿ ਅਨਾਣਤ੍ਤਾ ਆਰਾਮਿਕਾਦਯੋ ਸਯਮੇવ ਪਞ੍ਞਪੇਨ੍ਤਿ ਚੇવ ਨੀਹਰਨ੍ਤਿ ਚ, ਏਤਂ ਗਿਹਿવਿਕਟਨੀਹਾਰਂ ਨਾਮ, ਇਮਿਨਾ ਗਿਹਿવਿਕਟਨੀਹਾਰੇਨ વਟ੍ਟਤਿ। ਭਤ੍ਤਗ੍ਗਂ ਨਾਮ વਿਹਾਰੇ ਏવ ਦਾਨਟ੍ਠਾਨਂ।
190.Āsandādittayāti āsandī tūlī pallaṅkoti idaṃ tayaṃ nāmaṃ. ‘‘Anujānāmi, bhikkhave, ṭhapetvā tīṇi āsandiṃ pallaṅkaṃ tūlikaṃ sesakaṃ gihivikaṭaṃ abhinisīdituṃ, na tveva abhinipajjitu’’nti (cūḷava. 314) hi vuttaṃ. Sese gihisantake nisīdituṃ labbhatīti attho. Yadi dhammāsane saṅghikampi gonakādiṃ bhikkhūhi anāṇattā ārāmikādayo sayameva paññapenti ceva nīharanti ca, etaṃ gihivikaṭanīhāraṃ nāma, iminā gihivikaṭanīhārena vaṭṭati. Bhattaggaṃ nāma vihāre eva dānaṭṭhānaṃ.
੧੯੧. ਚਤੁਨ੍ਨਂ ਪਾਦਾਨਂ, ਤੀਸੁ ਪਸ੍ਸੇਸੁ ਅਪਸ੍ਸਯਾਨਞ੍ਚ વਸੇਨ ਸਤ੍ਤਙ੍ਗੋ। ਏਕਪਸ੍ਸੇਨ ਯੁਤ੍ਤੋ ਪਞ੍ਚਙ੍ਗੋ। ਇਮੇ ਪਨ ਸਤ੍ਤਙ੍ਗਪਞ੍ਚਙ੍ਗਾ ‘‘ਅਨੁਜਾਨਾਮਿ, ਭਿਕ੍ਖવੇ, ਉਚ੍ਚਕਮ੍ਪਿ ਸਤ੍ਤਙ੍ਗ’’ਨ੍ਤਿ (ਚੂਲ਼વ॰ ੨੯੪) વੁਤ੍ਤਤ੍ਤਾ ਪਮਾਣਾਤਿਕ੍ਕਨ੍ਤਾਪਿ વਟ੍ਟਨ੍ਤਿ। ਤੇਨ વੁਤ੍ਤਂ ‘‘ਉਚ੍ਚਪਾਦਕਾ’’ਤਿ। ਤੂਲੋਨਦ੍ਧਾ ਮਞ੍ਚਪੀਠਾ ਘਰੇਯੇવ ਨਿਸੀਦਿਤੁਂ ਕਪ੍ਪਨ੍ਤੀਤਿ ਸਮ੍ਬਨ੍ਧੋ।
191. Catunnaṃ pādānaṃ, tīsu passesu apassayānañca vasena sattaṅgo. Ekapassena yutto pañcaṅgo. Ime pana sattaṅgapañcaṅgā ‘‘anujānāmi, bhikkhave, uccakampi sattaṅga’’nti (cūḷava. 294) vuttattā pamāṇātikkantāpi vaṭṭanti. Tena vuttaṃ ‘‘uccapādakā’’ti. Tūlonaddhā mañcapīṭhā ghareyeva nisīdituṃ kappantīti sambandho.
੧੯੨. ਚੀવਰਚ੍ਛવਿਯੋਤਿ ਛਨ੍ਨਂ ਚੀવਰਾਨਂ, ਛਨ੍ਨਂ ਅਨੁਲੋਮਚੀવਰਾਨਞ੍ਚ ਅਞ੍ਞਤਰਚੀવਰਚ੍ਛવਿਯੋਤਿ ਅਤ੍ਥੋ। ਸਬ੍ਬਤ੍ਥਾਤਿ ਮਞ੍ਚੇਪਿ ਪੀਠੇਪਿ ਭਤ੍ਤਗ੍ਗੇਪਿ ਅਨ੍ਤਰਘਰੇਪੀਤਿ ਅਤ੍ਥੋ। ਇਮਾਸਂ ਪਨ ਭਿਸੀਨਂ ਪਮਾਣਪਰਿਚ੍ਛੇਦੋਪਿ ਨਤ੍ਥਿ, ਮਞ੍ਚਪੀਠਾਦੀਨਂ વਸੇਨ ਅਨੁਰੂਪਂ ਸਲ੍ਲਕ੍ਖੇਤ੍વਾ ਪਮਾਣਂ ਕਾਤਬ੍ਬਂ।
192.Cīvaracchaviyoti channaṃ cīvarānaṃ, channaṃ anulomacīvarānañca aññataracīvaracchaviyoti attho. Sabbatthāti mañcepi pīṭhepi bhattaggepi antaragharepīti attho. Imāsaṃ pana bhisīnaṃ pamāṇaparicchedopi natthi, mañcapīṭhādīnaṃ vasena anurūpaṃ sallakkhetvā pamāṇaṃ kātabbaṃ.
੧੯੩. ‘‘ਤੂਲਿਕਾ ਉਪ੍ਪਨ੍ਨਾ ਹੋਤਿ। ਅਨੁਜਾਨਾਮਿ, ਭਿਕ੍ਖવੇ, વਿਜਟੇਤ੍વਾ ਬਿਮ੍ਬੋਹਨਂ ਕਾਤੁਂ, ਤੀਣਿ ਤੂਲਾਨਿ ਰੁਕ੍ਖਤੂਲਂ ਲਤਾਤੂਲਂ ਪੋਟਕਿਤੂਲ’’ਨ੍ਤਿ (ਚੂਲ਼વ॰ ੨੯੭) વੁਤ੍ਤਤ੍ਤਾ ਤੂਲਤ੍ਤਯਞ੍ਚ (ਚੂਲ਼વ॰ ਅਟ੍ਠ॰ ੨੯੭; ਕਙ੍ਖਾ॰ ਅਟ੍ਠ॰ ਤੂਲੋਨਨ੍ਦਸਿਕ੍ਖਾਪਦવਣ੍ਣਨਾ) ਬਿਮ੍ਬੋਹਨੇ વਟ੍ਟਤਿ। ਇਮੇਹਿ ਤੀਹਿ ਤੂਲੇਹਿ ਸਬ੍ਬੇਸਂ ਰੁਕ੍ਖਲਤਾਤਿਣਾਨਂ ਤੂਲਂ ਅਨੁਞ੍ਞਾਤਨ੍ਤਿ વੇਦਿਤਬ੍ਬਂ। ਭਿਸਿਯਂ ਪਨ ਕਿਞ੍ਚਿ ਤੂਲਂ ਨ વਟ੍ਟਤਿਯੇવ। ਭਿਸਿਗਬ੍ਭੋਤਿ ਭਿਸਿਯਾ વੁਤ੍ਤਂ ਚੋਲ਼ਾਦਿਪਞ੍ਚਕਂ ਬਿਮ੍ਬੋਹਨੇ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ। ਮਿਗਪਕ੍ਖਿਨਨ੍ਤਿ ਸੀਹਾਦੀਨਂ ਸਬ੍ਬਚਤੁਪ੍ਪਦਾਨਂ ਹਂਸਮੋਰਾਦੀਨਂ ਸਬ੍ਬਪਕ੍ਖੀਨਂ ਲੋਮਾਨਿ ਕਪ੍ਪਨ੍ਤਿ। ਮਸੂਰਕੇ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ।
193. ‘‘Tūlikā uppannā hoti. Anujānāmi, bhikkhave, vijaṭetvā bimbohanaṃ kātuṃ, tīṇi tūlāni rukkhatūlaṃ latātūlaṃ poṭakitūla’’nti (cūḷava. 297) vuttattā tūlattayañca (cūḷava. aṭṭha. 297; kaṅkhā. aṭṭha. tūlonandasikkhāpadavaṇṇanā) bimbohane vaṭṭati. Imehi tīhi tūlehi sabbesaṃ rukkhalatātiṇānaṃ tūlaṃ anuññātanti veditabbaṃ. Bhisiyaṃ pana kiñci tūlaṃ na vaṭṭatiyeva. Bhisigabbhoti bhisiyā vuttaṃ coḷādipañcakaṃ bimbohane anuññātanti sambandho. Migapakkhinanti sīhādīnaṃ sabbacatuppadānaṃ haṃsamorādīnaṃ sabbapakkhīnaṃ lomāni kappanti. Masūrake anuññātanti sambandho.
੧੯੪. ਇਦਾਨਿ ਭਿਸਿਯਂ ਕਪ੍ਪਿਯਾਕਪ੍ਪਿਯਂ ਦਸ੍ਸੇਤੁਂ ‘‘ਮਨੁਸ੍ਸਲੋਮ’’ਨ੍ਤਿਆਦਿਮਾਹ। ਉਣ੍ਣਾਯਨ੍ਤਿ (ਚੂਲ਼વ॰ ੨੯੭; ਚੂਲ਼વ॰ ਅਟ੍ਠ॰ ੨੯੭) ਉਣ੍ਣਾਭਿਸਿਯਂ ਮਨੁਸ੍ਸਲੋਮਂ ਨ ਲਬ੍ਭਤੀਤਿ ਅਤ੍ਥੋ। ਉਣ੍ਣਾਭਿਸਿਯਮ੍ਪਿ ਮਨੁਸ੍ਸਲੋਮਂ ਠਪੇਤ੍વਾ ਯੇਸਂ ਕੇਸਞ੍ਚਿ ਪਕ੍ਖਿਚਤੁਪ੍ਪਦਾਨਂ ਲੋਮਂ વਟ੍ਟਤੀਤਿ ਅਤ੍ਥੋ। ਪਣ੍ਣੇਤਿ ਪਣ੍ਣਭਿਸਿਯਞ੍ਚ ਪੁਪ੍ਫਞ੍ਚ ਸੁਦ੍ਧਂ ਤਮਾਲਪਤ੍ਤਞ੍ਚ ਨ ਲਬ੍ਭਂ, ਅવਸੇਸਂ ਯਂ ਕਿਞ੍ਚਿ ਪਣ੍ਣਂ ਲਬ੍ਭਤੀਤਿ ਅਤ੍ਥੋ। ਤਮਾਲਪਤ੍ਤਕਮ੍ਪਿ ਅਞ੍ਞੇਹਿ ਮਿਸ੍ਸਂ વਟ੍ਟਤੀਤਿ। ਚੋਲ਼વਾਕਤਿਣੇਸੁ ਅਕਪ੍ਪਿਯਂ ਨਾਮ ਨਤ੍ਥਿ। ਆਸਨਞ੍ਚੇવ ਅਪ੍ਪਟਿવੇਕ੍ਖਿਤਂ ਨ ਲਬ੍ਭਨ੍ਤਿ ਆਸਨਸਾਮਞ੍ਞਤੋ ਪਸਙ੍ਗੇਨ વੁਤ੍ਤਂ। ਅਕਪ੍ਪਿਯਸਯਨવਿਨਿਚ੍ਛਯੋ।
194. Idāni bhisiyaṃ kappiyākappiyaṃ dassetuṃ ‘‘manussaloma’’ntiādimāha. Uṇṇāyanti (cūḷava. 297; cūḷava. aṭṭha. 297) uṇṇābhisiyaṃ manussalomaṃ na labbhatīti attho. Uṇṇābhisiyampi manussalomaṃ ṭhapetvā yesaṃ kesañci pakkhicatuppadānaṃ lomaṃ vaṭṭatīti attho. Paṇṇeti paṇṇabhisiyañca pupphañca suddhaṃ tamālapattañca na labbhaṃ, avasesaṃ yaṃ kiñci paṇṇaṃ labbhatīti attho. Tamālapattakampi aññehi missaṃ vaṭṭatīti. Coḷavākatiṇesu akappiyaṃ nāma natthi. Āsanañceva appaṭivekkhitaṃ na labbhanti āsanasāmaññato pasaṅgena vuttaṃ. Akappiyasayanavinicchayo.
ਅਕਪ੍ਪਿਯਸਯਨਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Akappiyasayananiddesavaṇṇanā niṭṭhitā.
