| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৬. ছট্ঠৰগ্গো
6. Chaṭṭhavaggo
(৫৮) ৬. আকাসকথা
(58) 6. Ākāsakathā
৪৬০. আকাসো অসঙ্খতোতি? আমন্তা। নিব্বানং তাণং লেণং সরণং পরাযনং অচ্চুতং অমতন্তি? ন হেৰং ৰত্তব্বে…পে॰… আকাসো অসঙ্খতো, নিব্বানং অসঙ্খতন্তি? আমন্তা। দ্ৰে অসঙ্খতানীতি? ন হেৰং ৰত্তব্বে…পে॰…। দ্ৰে অসঙ্খতানীতি? আমন্তা । দ্ৰে তাণানি…পে॰… অন্তরিকা ৰাতি? ন হেৰং ৰত্তব্বে…পে॰…।
460. Ākāso asaṅkhatoti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… ākāso asaṅkhato, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe…. Dve asaṅkhatānīti? Āmantā . Dve tāṇāni…pe… antarikā vāti? Na hevaṃ vattabbe…pe….
আকাসো অসঙ্খতোতি? আমন্তা। অত্থি কেচি অনাকাসং আকাসং করোন্তীতি? আমন্তা। অত্থি কেচি সঙ্খতং অসঙ্খতং করোন্তীতি? ন হেৰং ৰত্তব্বে…পে॰… অত্থি কেচি আকাসং অনাকাসং করোন্তীতি? আমন্তা। অত্থি কেচি অসঙ্খতং সঙ্খতং করোন্তীতি? ন হেৰং ৰত্তব্বে…পে॰…।
Ākāso asaṅkhatoti? Āmantā. Atthi keci anākāsaṃ ākāsaṃ karontīti? Āmantā. Atthi keci saṅkhataṃ asaṅkhataṃ karontīti? Na hevaṃ vattabbe…pe… atthi keci ākāsaṃ anākāsaṃ karontīti? Āmantā. Atthi keci asaṅkhataṃ saṅkhataṃ karontīti? Na hevaṃ vattabbe…pe….
আকাসে পক্খিনো গচ্ছন্তি, চন্দিমসূরিযা গচ্ছন্তি, তারকরূপানি গচ্ছন্তি, ইদ্ধিং ৰিকুব্বন্তি, বাহুং চালেন্তি, পাণিং চালেন্তি, লেড্ডুং খিপন্তি, লগুল়ং খিপন্তি, ইদ্ধিং 1 খিপন্তি, উসুং খিপন্তীতি? আমন্তা। অসঙ্খতে পক্খিনো গচ্ছন্তি, চন্দিমসূরিযা গচ্ছন্তি, তারকরূপানি গচ্ছন্তি, ইদ্ধিং ৰিকুব্বন্তি, বাহুং চালেন্তি, পাণিং চালেন্তি, লেড্ডুং খিপন্তি, লগুল়ং খিপন্তি, ইদ্ধিং খিপন্তি, উসুং খিপন্তীতি? ন হেৰং ৰত্তব্বে…পে॰…।
Ākāse pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ 2 khipanti, usuṃ khipantīti? Āmantā. Asaṅkhate pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ khipanti, usuṃ khipantīti? Na hevaṃ vattabbe…pe….
৪৬১. আকাসং পরিৰারেত্ৰা ঘরানি করোন্তি কোট্ঠানি করোন্তীতি? আমন্তা। অসঙ্খতং পরিৰারেত্ৰা ঘরানি করোন্তি কোট্ঠানি করোন্তীতি? ন হেৰং ৰত্তব্বে…পে॰…।
461. Ākāsaṃ parivāretvā gharāni karonti koṭṭhāni karontīti? Āmantā. Asaṅkhataṃ parivāretvā gharāni karonti koṭṭhāni karontīti? Na hevaṃ vattabbe…pe….
উদপানে খঞ্ঞমানে অনাকাসো আকাসো হোতীতি? আমন্তা। সঙ্খতং অসঙ্খতং হোতীতি? ন হেৰং ৰত্তব্বে…পে॰…।
Udapāne khaññamāne anākāso ākāso hotīti? Āmantā. Saṅkhataṃ asaṅkhataṃ hotīti? Na hevaṃ vattabbe…pe….
তুচ্ছউদপানে পূরিযমানে, তুচ্ছকোট্ঠে পূরিযমানে, তুচ্ছকুম্ভিযা পূরিযমানায আকাসো অন্তরধাযতীতি? আমন্তা। অসঙ্খতং অন্তরধাযতীতি? ন হেৰং ৰত্তব্বে…পে॰…।
Tucchaudapāne pūriyamāne, tucchakoṭṭhe pūriyamāne, tucchakumbhiyā pūriyamānāya ākāso antaradhāyatīti? Āmantā. Asaṅkhataṃ antaradhāyatīti? Na hevaṃ vattabbe…pe….
৪৬২. ন ৰত্তব্বং – ‘‘আকাসো অসঙ্খতো’’তি? আমন্তা। আকাসো সঙ্খতোতি? ন হেৰং ৰত্তব্বে…পে॰… তেন হি আকাসো অসঙ্খতোতি।
462. Na vattabbaṃ – ‘‘ākāso asaṅkhato’’ti? Āmantā. Ākāso saṅkhatoti? Na hevaṃ vattabbe…pe… tena hi ākāso asaṅkhatoti.
আকাসকথা নিট্ঠিতা।
Ākāsakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৬. আকাসকথাৰণ্ণনা • 6. Ākāsakathāvaṇṇanā
