| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๖. ฉฎฺฐวโคฺค
6. Chaṭṭhavaggo
(๕๘) ๖. อากาสกถา
(58) 6. Ākāsakathā
๔๖๐. อากาโส อสงฺขโตติ? อามนฺตาฯ นิพฺพานํ ตาณํ เลณํ สรณํ ปรายนํ อจฺจุตํ อมตนฺติ? น เหวํ วตฺตเพฺพ…เป.… อากาโส อสงฺขโต, นิพฺพานํ อสงฺขตนฺติ? อามนฺตาฯ เทฺว อสงฺขตานีติ? น เหวํ วตฺตเพฺพ…เป.…ฯ เทฺว อสงฺขตานีติ? อามนฺตา ฯ เทฺว ตาณานิ…เป.… อนฺตริกา วาติ? น เหวํ วตฺตเพฺพ…เป.…ฯ
460. Ākāso asaṅkhatoti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… ākāso asaṅkhato, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe…. Dve asaṅkhatānīti? Āmantā . Dve tāṇāni…pe… antarikā vāti? Na hevaṃ vattabbe…pe….
อากาโส อสงฺขโตติ? อามนฺตาฯ อตฺถิ เกจิ อนากาสํ อากาสํ กโรนฺตีติ? อามนฺตาฯ อตฺถิ เกจิ สงฺขตํ อสงฺขตํ กโรนฺตีติ? น เหวํ วตฺตเพฺพ…เป.… อตฺถิ เกจิ อากาสํ อนากาสํ กโรนฺตีติ? อามนฺตาฯ อตฺถิ เกจิ อสงฺขตํ สงฺขตํ กโรนฺตีติ? น เหวํ วตฺตเพฺพ…เป.…ฯ
Ākāso asaṅkhatoti? Āmantā. Atthi keci anākāsaṃ ākāsaṃ karontīti? Āmantā. Atthi keci saṅkhataṃ asaṅkhataṃ karontīti? Na hevaṃ vattabbe…pe… atthi keci ākāsaṃ anākāsaṃ karontīti? Āmantā. Atthi keci asaṅkhataṃ saṅkhataṃ karontīti? Na hevaṃ vattabbe…pe….
อากาเส ปกฺขิโน คจฺฉนฺติ, จนฺทิมสูริยา คจฺฉนฺติ, ตารกรูปานิ คจฺฉนฺติ, อิทฺธิํ วิกุพฺพนฺติ, พาหุํ จาเลนฺติ, ปาณิํ จาเลนฺติ, เลฑฺฑุํ ขิปนฺติ, ลคุฬํ ขิปนฺติ, อิทฺธิํ 1 ขิปนฺติ, อุสุํ ขิปนฺตีติ? อามนฺตาฯ อสงฺขเต ปกฺขิโน คจฺฉนฺติ, จนฺทิมสูริยา คจฺฉนฺติ, ตารกรูปานิ คจฺฉนฺติ, อิทฺธิํ วิกุพฺพนฺติ, พาหุํ จาเลนฺติ, ปาณิํ จาเลนฺติ, เลฑฺฑุํ ขิปนฺติ, ลคุฬํ ขิปนฺติ, อิทฺธิํ ขิปนฺติ, อุสุํ ขิปนฺตีติ? น เหวํ วตฺตเพฺพ…เป.…ฯ
Ākāse pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ 2 khipanti, usuṃ khipantīti? Āmantā. Asaṅkhate pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ khipanti, usuṃ khipantīti? Na hevaṃ vattabbe…pe….
๔๖๑. อากาสํ ปริวาเรตฺวา ฆรานิ กโรนฺติ โกฎฺฐานิ กโรนฺตีติ? อามนฺตาฯ อสงฺขตํ ปริวาเรตฺวา ฆรานิ กโรนฺติ โกฎฺฐานิ กโรนฺตีติ? น เหวํ วตฺตเพฺพ…เป.…ฯ
461. Ākāsaṃ parivāretvā gharāni karonti koṭṭhāni karontīti? Āmantā. Asaṅkhataṃ parivāretvā gharāni karonti koṭṭhāni karontīti? Na hevaṃ vattabbe…pe….
อุทปาเน ขญฺญมาเน อนากาโส อากาโส โหตีติ? อามนฺตาฯ สงฺขตํ อสงฺขตํ โหตีติ? น เหวํ วตฺตเพฺพ…เป.…ฯ
Udapāne khaññamāne anākāso ākāso hotīti? Āmantā. Saṅkhataṃ asaṅkhataṃ hotīti? Na hevaṃ vattabbe…pe….
ตุจฺฉอุทปาเน ปูริยมาเน, ตุจฺฉโกเฎฺฐ ปูริยมาเน, ตุจฺฉกุมฺภิยา ปูริยมานาย อากาโส อนฺตรธายตีติ? อามนฺตาฯ อสงฺขตํ อนฺตรธายตีติ? น เหวํ วตฺตเพฺพ…เป.…ฯ
Tucchaudapāne pūriyamāne, tucchakoṭṭhe pūriyamāne, tucchakumbhiyā pūriyamānāya ākāso antaradhāyatīti? Āmantā. Asaṅkhataṃ antaradhāyatīti? Na hevaṃ vattabbe…pe….
๔๖๒. น วตฺตพฺพํ – ‘‘อากาโส อสงฺขโต’’ติ? อามนฺตาฯ อากาโส สงฺขโตติ? น เหวํ วตฺตเพฺพ…เป.… เตน หิ อากาโส อสงฺขโตติฯ
462. Na vattabbaṃ – ‘‘ākāso asaṅkhato’’ti? Āmantā. Ākāso saṅkhatoti? Na hevaṃ vattabbe…pe… tena hi ākāso asaṅkhatoti.
อากาสกถา นิฎฺฐิตาฯ
Ākāsakathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๖. อากาสกถาวณฺณนา • 6. Ākāsakathāvaṇṇanā
