| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೬. ಛಟ್ಠವಗ್ಗೋ
6. Chaṭṭhavaggo
(೫೮) ೬. ಆಕಾಸಕಥಾ
(58) 6. Ākāsakathā
೪೬೦. ಆಕಾಸೋ ಅಸಙ್ಖತೋತಿ? ಆಮನ್ತಾ। ನಿಬ್ಬಾನಂ ತಾಣಂ ಲೇಣಂ ಸರಣಂ ಪರಾಯನಂ ಅಚ್ಚುತಂ ಅಮತನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಆಕಾಸೋ ಅಸಙ್ಖತೋ, ನಿಬ್ಬಾನಂ ಅಸಙ್ಖತನ್ತಿ? ಆಮನ್ತಾ। ದ್ವೇ ಅಸಙ್ಖತಾನೀತಿ? ನ ಹೇವಂ ವತ್ತಬ್ಬೇ…ಪೇ॰…। ದ್ವೇ ಅಸಙ್ಖತಾನೀತಿ? ಆಮನ್ತಾ । ದ್ವೇ ತಾಣಾನಿ…ಪೇ॰… ಅನ್ತರಿಕಾ ವಾತಿ? ನ ಹೇವಂ ವತ್ತಬ್ಬೇ…ಪೇ॰…।
460. Ākāso asaṅkhatoti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… ākāso asaṅkhato, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe…. Dve asaṅkhatānīti? Āmantā . Dve tāṇāni…pe… antarikā vāti? Na hevaṃ vattabbe…pe….
ಆಕಾಸೋ ಅಸಙ್ಖತೋತಿ? ಆಮನ್ತಾ। ಅತ್ಥಿ ಕೇಚಿ ಅನಾಕಾಸಂ ಆಕಾಸಂ ಕರೋನ್ತೀತಿ? ಆಮನ್ತಾ। ಅತ್ಥಿ ಕೇಚಿ ಸಙ್ಖತಂ ಅಸಙ್ಖತಂ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ಕೇಚಿ ಆಕಾಸಂ ಅನಾಕಾಸಂ ಕರೋನ್ತೀತಿ? ಆಮನ್ತಾ। ಅತ್ಥಿ ಕೇಚಿ ಅಸಙ್ಖತಂ ಸಙ್ಖತಂ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Ākāso asaṅkhatoti? Āmantā. Atthi keci anākāsaṃ ākāsaṃ karontīti? Āmantā. Atthi keci saṅkhataṃ asaṅkhataṃ karontīti? Na hevaṃ vattabbe…pe… atthi keci ākāsaṃ anākāsaṃ karontīti? Āmantā. Atthi keci asaṅkhataṃ saṅkhataṃ karontīti? Na hevaṃ vattabbe…pe….
ಆಕಾಸೇ ಪಕ್ಖಿನೋ ಗಚ್ಛನ್ತಿ, ಚನ್ದಿಮಸೂರಿಯಾ ಗಚ್ಛನ್ತಿ, ತಾರಕರೂಪಾನಿ ಗಚ್ಛನ್ತಿ, ಇದ್ಧಿಂ ವಿಕುಬ್ಬನ್ತಿ, ಬಾಹುಂ ಚಾಲೇನ್ತಿ, ಪಾಣಿಂ ಚಾಲೇನ್ತಿ, ಲೇಡ್ಡುಂ ಖಿಪನ್ತಿ, ಲಗುಳಂ ಖಿಪನ್ತಿ, ಇದ್ಧಿಂ 1 ಖಿಪನ್ತಿ, ಉಸುಂ ಖಿಪನ್ತೀತಿ? ಆಮನ್ತಾ। ಅಸಙ್ಖತೇ ಪಕ್ಖಿನೋ ಗಚ್ಛನ್ತಿ, ಚನ್ದಿಮಸೂರಿಯಾ ಗಚ್ಛನ್ತಿ, ತಾರಕರೂಪಾನಿ ಗಚ್ಛನ್ತಿ, ಇದ್ಧಿಂ ವಿಕುಬ್ಬನ್ತಿ, ಬಾಹುಂ ಚಾಲೇನ್ತಿ, ಪಾಣಿಂ ಚಾಲೇನ್ತಿ, ಲೇಡ್ಡುಂ ಖಿಪನ್ತಿ, ಲಗುಳಂ ಖಿಪನ್ತಿ, ಇದ್ಧಿಂ ಖಿಪನ್ತಿ, ಉಸುಂ ಖಿಪನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Ākāse pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ 2 khipanti, usuṃ khipantīti? Āmantā. Asaṅkhate pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ khipanti, usuṃ khipantīti? Na hevaṃ vattabbe…pe….
೪೬೧. ಆಕಾಸಂ ಪರಿವಾರೇತ್ವಾ ಘರಾನಿ ಕರೋನ್ತಿ ಕೋಟ್ಠಾನಿ ಕರೋನ್ತೀತಿ? ಆಮನ್ತಾ। ಅಸಙ್ಖತಂ ಪರಿವಾರೇತ್ವಾ ಘರಾನಿ ಕರೋನ್ತಿ ಕೋಟ್ಠಾನಿ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
461. Ākāsaṃ parivāretvā gharāni karonti koṭṭhāni karontīti? Āmantā. Asaṅkhataṃ parivāretvā gharāni karonti koṭṭhāni karontīti? Na hevaṃ vattabbe…pe….
ಉದಪಾನೇ ಖಞ್ಞಮಾನೇ ಅನಾಕಾಸೋ ಆಕಾಸೋ ಹೋತೀತಿ? ಆಮನ್ತಾ। ಸಙ್ಖತಂ ಅಸಙ್ಖತಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Udapāne khaññamāne anākāso ākāso hotīti? Āmantā. Saṅkhataṃ asaṅkhataṃ hotīti? Na hevaṃ vattabbe…pe….
ತುಚ್ಛಉದಪಾನೇ ಪೂರಿಯಮಾನೇ, ತುಚ್ಛಕೋಟ್ಠೇ ಪೂರಿಯಮಾನೇ, ತುಚ್ಛಕುಮ್ಭಿಯಾ ಪೂರಿಯಮಾನಾಯ ಆಕಾಸೋ ಅನ್ತರಧಾಯತೀತಿ? ಆಮನ್ತಾ। ಅಸಙ್ಖತಂ ಅನ್ತರಧಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Tucchaudapāne pūriyamāne, tucchakoṭṭhe pūriyamāne, tucchakumbhiyā pūriyamānāya ākāso antaradhāyatīti? Āmantā. Asaṅkhataṃ antaradhāyatīti? Na hevaṃ vattabbe…pe….
೪೬೨. ನ ವತ್ತಬ್ಬಂ – ‘‘ಆಕಾಸೋ ಅಸಙ್ಖತೋ’’ತಿ? ಆಮನ್ತಾ। ಆಕಾಸೋ ಸಙ್ಖತೋತಿ? ನ ಹೇವಂ ವತ್ತಬ್ಬೇ…ಪೇ॰… ತೇನ ಹಿ ಆಕಾಸೋ ಅಸಙ್ಖತೋತಿ।
462. Na vattabbaṃ – ‘‘ākāso asaṅkhato’’ti? Āmantā. Ākāso saṅkhatoti? Na hevaṃ vattabbe…pe… tena hi ākāso asaṅkhatoti.
ಆಕಾಸಕಥಾ ನಿಟ್ಠಿತಾ।
Ākāsakathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೬. ಆಕಾಸಕಥಾವಣ್ಣನಾ • 6. Ākāsakathāvaṇṇanā
