| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
6. ඡට්‌ඨවග්‌ගො
6. Chaṭṭhavaggo
(58) 6. ආකාසකථා
(58) 6. Ākāsakathā
460. ආකාසො අසඞ්‌ඛතොති? ආමන්‌තා. නිබ්‌බානං තාණං ලෙණං සරණං පරායනං අච්‌චුතං අමතන්‌ති? න හෙවං වත්‌තබ්‌බෙ…පෙ.… ආකාසො අසඞ්‌ඛතො, නිබ්‌බානං අසඞ්‌ඛතන්‌ති? ආමන්‌තා. ද්‌වෙ අසඞ්‌ඛතානීති? න හෙවං වත්‌තබ්‌බෙ…පෙ.…. ද්‌වෙ අසඞ්‌ඛතානීති? ආමන්‌තා . ද්‌වෙ තාණානි…පෙ.… අන්‌තරිකා වාති? න හෙවං වත්‌තබ්‌බෙ…පෙ.….
460. Ākāso asaṅkhatoti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… ākāso asaṅkhato, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe…. Dve asaṅkhatānīti? Āmantā . Dve tāṇāni…pe… antarikā vāti? Na hevaṃ vattabbe…pe….
ආකාසො අසඞ්‌ඛතොති? ආමන්‌තා. අත්‌ථි කෙචි අනාකාසං ආකාසං කරොන්‌තීති? ආමන්‌තා. අත්‌ථි කෙචි සඞ්‌ඛතං අසඞ්‌ඛතං කරොන්‌තීති? න හෙවං වත්‌තබ්‌බෙ…පෙ.… අත්‌ථි කෙචි ආකාසං අනාකාසං කරොන්‌තීති? ආමන්‌තා. අත්‌ථි කෙචි අසඞ්‌ඛතං සඞ්‌ඛතං කරොන්‌තීති? න හෙවං වත්‌තබ්‌බෙ…පෙ.….
Ākāso asaṅkhatoti? Āmantā. Atthi keci anākāsaṃ ākāsaṃ karontīti? Āmantā. Atthi keci saṅkhataṃ asaṅkhataṃ karontīti? Na hevaṃ vattabbe…pe… atthi keci ākāsaṃ anākāsaṃ karontīti? Āmantā. Atthi keci asaṅkhataṃ saṅkhataṃ karontīti? Na hevaṃ vattabbe…pe….
ආකාසෙ පක්‌ඛිනො ගච්‌ඡන්‌ති, චන්‌දිමසූරියා ගච්‌ඡන්‌ති, තාරකරූපානි ගච්‌ඡන්‌ති, ඉද්‌ධිං විකුබ්‌බන්‌ති, බාහුං චාලෙන්‌ති, පාණිං චාලෙන්‌ති, ලෙඩ්‌ඩුං ඛිපන්‌ති, ලගුළං ඛිපන්‌ති, ඉද්‌ධිං 1 ඛිපන්‌ති, උසුං ඛිපන්‌තීති? ආමන්‌තා. අසඞ්‌ඛතෙ පක්‌ඛිනො ගච්‌ඡන්‌ති, චන්‌දිමසූරියා ගච්‌ඡන්‌ති, තාරකරූපානි ගච්‌ඡන්‌ති, ඉද්‌ධිං විකුබ්‌බන්‌ති, බාහුං චාලෙන්‌ති, පාණිං චාලෙන්‌ති, ලෙඩ්‌ඩුං ඛිපන්‌ති, ලගුළං ඛිපන්‌ති, ඉද්‌ධිං ඛිපන්‌ති, උසුං ඛිපන්‌තීති? න හෙවං වත්‌තබ්‌බෙ…පෙ.….
Ākāse pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ 2 khipanti, usuṃ khipantīti? Āmantā. Asaṅkhate pakkhino gacchanti, candimasūriyā gacchanti, tārakarūpāni gacchanti, iddhiṃ vikubbanti, bāhuṃ cālenti, pāṇiṃ cālenti, leḍḍuṃ khipanti, laguḷaṃ khipanti, iddhiṃ khipanti, usuṃ khipantīti? Na hevaṃ vattabbe…pe….
461. ආකාසං පරිවාරෙත්‌වා ඝරානි කරොන්‌ති කොට්‌ඨානි කරොන්‌තීති? ආමන්‌තා. අසඞ්‌ඛතං පරිවාරෙත්‌වා ඝරානි කරොන්‌ති කොට්‌ඨානි කරොන්‌තීති? න හෙවං වත්‌තබ්‌බෙ…පෙ.….
461. Ākāsaṃ parivāretvā gharāni karonti koṭṭhāni karontīti? Āmantā. Asaṅkhataṃ parivāretvā gharāni karonti koṭṭhāni karontīti? Na hevaṃ vattabbe…pe….
උදපානෙ ඛඤ්‌ඤමානෙ අනාකාසො ආකාසො හොතීති? ආමන්‌තා. සඞ්‌ඛතං අසඞ්‌ඛතං හොතීති? න හෙවං වත්‌තබ්‌බෙ…පෙ.….
Udapāne khaññamāne anākāso ākāso hotīti? Āmantā. Saṅkhataṃ asaṅkhataṃ hotīti? Na hevaṃ vattabbe…pe….
තුච්‌ඡඋදපානෙ පූරියමානෙ, තුච්‌ඡකොට්‌ඨෙ පූරියමානෙ, තුච්‌ඡකුම්‌භියා පූරියමානාය ආකාසො අන්‌තරධායතීති? ආමන්‌තා. අසඞ්‌ඛතං අන්‌තරධායතීති? න හෙවං වත්‌තබ්‌බෙ…පෙ.….
Tucchaudapāne pūriyamāne, tucchakoṭṭhe pūriyamāne, tucchakumbhiyā pūriyamānāya ākāso antaradhāyatīti? Āmantā. Asaṅkhataṃ antaradhāyatīti? Na hevaṃ vattabbe…pe….
462. න වත්‌තබ්‌බං – ‘‘ආකාසො අසඞ්‌ඛතො’’ති? ආමන්‌තා. ආකාසො සඞ්‌ඛතොති? න හෙවං වත්‌තබ්‌බෙ…පෙ.… තෙන හි ආකාසො අසඞ්‌ඛතොති.
462. Na vattabbaṃ – ‘‘ākāso asaṅkhato’’ti? Āmantā. Ākāso saṅkhatoti? Na hevaṃ vattabbe…pe… tena hi ākāso asaṅkhatoti.
ආකාසකථා නිට්‌ඨිතා.
Ākāsakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 6. ආකාසකථාවණ්‌ණනා • 6. Ākāsakathāvaṇṇanā
