| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၆. အာကာသင္ဂပဉ္ဟော
6. Ākāsaṅgapañho
၆. ‘‘ဘန္တေ နာဂသေန, ‘အာကာသသ္သ ပဉ္စ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, အာကာသော သဗ္ဗသော အဂယ္ဟော, ဧဝမေဝ ခော, မဟာရာဇ, ယောဂိနာ ယောဂာဝစရေန သဗ္ဗသော ကိလေသေဟိ အဂယ္ဟေန ဘဝိတဗ္ဗံ။ ဣဒံ, မဟာရာဇ, အာကာသသ္သ ပဌမံ အင္ဂံ ဂဟေတဗ္ဗံ။
6. ‘‘Bhante nāgasena, ‘ākāsassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, ākāso sabbaso agayho, evameva kho, mahārāja, yoginā yogāvacarena sabbaso kilesehi agayhena bhavitabbaṃ. Idaṃ, mahārāja, ākāsassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, အာကာသော ဣသိတာပသဘူတဒိဇဂဏာနုသဉ္စရိတော, ဧဝမေဝ ခော, မဟာရာဇ, ယောဂိနာ ယောဂာဝစရေန ‘အနိစ္စံ ဒုက္ခံ အနတ္တာ’တိ သင္ခာရေသု မာနသံ သဉ္စာရယိတဗ္ဗံ။ ဣဒံ, မဟာရာဇ, အာကာသသ္သ ဒုတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, ākāso isitāpasabhūtadijagaṇānusañcarito, evameva kho, mahārāja, yoginā yogāvacarena ‘aniccaṃ dukkhaṃ anattā’ti saṅkhāresu mānasaṃ sañcārayitabbaṃ. Idaṃ, mahārāja, ākāsassa dutiyaṃ aṅgaṃ gahetabbaṃ.
‘‘ပုန စပရံ, မဟာရာဇ, အာကာသော သန္တာသနီယော, ဧဝမေဝ ခော, မဟာရာဇ , ယောဂိနာ ယောဂာဝစရေန သဗ္ဗဘဝပဋိသန္ဓီသု မာနသံ ဥဗ္ဗေဇယိတဗ္ဗံ, အသ္သာဒော န ကာတဗ္ဗော။ ဣဒံ, မဟာရာဇ, အာကာသသ္သ တတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, ākāso santāsanīyo, evameva kho, mahārāja , yoginā yogāvacarena sabbabhavapaṭisandhīsu mānasaṃ ubbejayitabbaṃ, assādo na kātabbo. Idaṃ, mahārāja, ākāsassa tatiyaṃ aṅgaṃ gahetabbaṃ.
‘‘ပုန စပရံ, မဟာရာဇ, အာကာသော အနန္တော အပ္ပမာဏော အပရိမေယ္ယော, ဧဝမေဝ ခော, မဟာရာဇ, ယောဂိနာ ယောဂာဝစရေန အနန္တသီလေန အပရိမိတဉာဏေန ဘဝိတဗ္ဗံ။ ဣဒံ, မဟာရာဇ, အာကာသသ္သ စတုတ္ထံ အင္ဂံ ဂဟေတဗ္ဗံ။
‘‘Puna caparaṃ, mahārāja, ākāso ananto appamāṇo aparimeyyo, evameva kho, mahārāja, yoginā yogāvacarena anantasīlena aparimitañāṇena bhavitabbaṃ. Idaṃ, mahārāja, ākāsassa catutthaṃ aṅgaṃ gahetabbaṃ.
‘‘ပုန စပရံ, မဟာရာဇ, အာကာသော အလဂ္ဂော အသတ္တော အပ္ပတိဋ္ဌိတော အပလိဗုဒ္ဓော, ဧဝမေဝ ခော , မဟာရာဇ, ယောဂိနာ ယောဂာဝစရေန ကုလေ ဂဏေ လာဘေ အာဝာသေ ပလိဗောဓေ ပစ္စယေ သဗ္ဗကိလေသေသု စ သဗ္ဗတ္ထ အလဂ္ဂေန ဘဝိတဗ္ဗံ, အနာသတ္တေန အပ္ပတိဋ္ဌိတေန အပလိဗုဒ္ဓေန ဘဝိတဗ္ဗံ။ ဣဒံ, မဟာရာဇ, အာကာသသ္သ ပဉ္စမံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန သကံ ပုတ္တံ ရာဟုလံ ဩဝဒန္တေန – ‘သေယ္ယထာပိ, ရာဟုလ 1, အာကာသော န ကတ္ထစိ ပတိဋ္ဌိတော, ဧဝမေဝ ခော တ္ဝံ, ရာဟုလ, အာကာသသမံ ဘာဝနံ ဘာဝေဟိ, အာကာသသမံ ဟိ တေ, ရာဟုလ, ဘာဝနံ ဘာဝယတော ဥပ္ပန္နာ မနာပာမနာပာ ဖသ္သာ စိတ္တံ ပရိယာဒာယ ဌသ္သန္တီ’’’တိ။
‘‘Puna caparaṃ, mahārāja, ākāso alaggo asatto appatiṭṭhito apalibuddho, evameva kho , mahārāja, yoginā yogāvacarena kule gaṇe lābhe āvāse palibodhe paccaye sabbakilesesu ca sabbattha alaggena bhavitabbaṃ, anāsattena appatiṭṭhitena apalibuddhena bhavitabbaṃ. Idaṃ, mahārāja, ākāsassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena – ‘seyyathāpi, rāhula 2, ākāso na katthaci patiṭṭhito, evameva kho tvaṃ, rāhula, ākāsasamaṃ bhāvanaṃ bhāvehi, ākāsasamaṃ hi te, rāhula, bhāvanaṃ bhāvayato uppannā manāpāmanāpā phassā cittaṃ pariyādāya ṭhassantī’’’ti.
အာကာသင္ဂပဉ္ဟော ဆဋ္ဌော။
Ākāsaṅgapañho chaṭṭho.
Footnotes:
