| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༦. ཨཱཀཱསངྒཔཉྷོ
6. Ākāsaṅgapañho
༦. ‘‘བྷནྟེ ནཱགསེན, ‘ཨཱཀཱསསྶ པཉྩ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི པཉྩ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, ཨཱཀཱསོ སབྦསོ ཨགཡ྄ཧོ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སབྦསོ ཀིལེསེཧི ཨགཡ྄ཧེན བྷཝིཏབྦཾ། ཨིདཾ, མཧཱརཱཛ, ཨཱཀཱསསྶ པཋམཾ ཨངྒཾ གཧེཏབྦཾ།
6. ‘‘Bhante nāgasena, ‘ākāsassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, ākāso sabbaso agayho, evameva kho, mahārāja, yoginā yogāvacarena sabbaso kilesehi agayhena bhavitabbaṃ. Idaṃ, mahārāja, ākāsassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཨཱཀཱསོ ཨིསིཏཱཔསབྷཱུཏདིཛགཎཱནུསཉྩརིཏོ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ‘ཨནིཙྩཾ དུཀྑཾ ཨནཏྟཱ’ཏི སངྑཱརེསུ མཱནསཾ སཉྩཱརཡིཏབྦཾ། ཨིདཾ, མཧཱརཱཛ, ཨཱཀཱསསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, ākāso isitāpasabhūtadijagaṇānusañcarito, evameva kho, mahārāja, yoginā yogāvacarena ‘aniccaṃ dukkhaṃ anattā’ti saṅkhāresu mānasaṃ sañcārayitabbaṃ. Idaṃ, mahārāja, ākāsassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཨཱཀཱསོ སནྟཱསནཱིཡོ, ཨེཝམེཝ ཁོ, མཧཱརཱཛ , ཡོགིནཱ ཡོགཱཝཙརེན སབྦབྷཝཔཊིསནྡྷཱིསུ མཱནསཾ ཨུབྦེཛཡིཏབྦཾ, ཨསྶཱདོ ན ཀཱཏབྦོ། ཨིདཾ, མཧཱརཱཛ, ཨཱཀཱསསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, ākāso santāsanīyo, evameva kho, mahārāja , yoginā yogāvacarena sabbabhavapaṭisandhīsu mānasaṃ ubbejayitabbaṃ, assādo na kātabbo. Idaṃ, mahārāja, ākāsassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཨཱཀཱསོ ཨནནྟོ ཨཔྤམཱཎོ ཨཔརིམེཡྻོ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨནནྟསཱིལེན ཨཔརིམིཏཉཱཎེན བྷཝིཏབྦཾ། ཨིདཾ, མཧཱརཱཛ, ཨཱཀཱསསྶ ཙཏུཏྠཾ ཨངྒཾ གཧེཏབྦཾ།
‘‘Puna caparaṃ, mahārāja, ākāso ananto appamāṇo aparimeyyo, evameva kho, mahārāja, yoginā yogāvacarena anantasīlena aparimitañāṇena bhavitabbaṃ. Idaṃ, mahārāja, ākāsassa catutthaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཨཱཀཱསོ ཨལགྒོ ཨསཏྟོ ཨཔྤཏིཊྛིཏོ ཨཔལིབུདྡྷོ, ཨེཝམེཝ ཁོ , མཧཱརཱཛ, ཡོགིནཱ ཡོགཱཝཙརེན ཀུལེ གཎེ ལཱབྷེ ཨཱཝཱསེ པལིབོདྷེ པཙྩཡེ སབྦཀིལེསེསུ ཙ སབྦཏྠ ཨལགྒེན བྷཝིཏབྦཾ, ཨནཱསཏྟེན ཨཔྤཏིཊྛིཏེན ཨཔལིབུདྡྷེན བྷཝིཏབྦཾ། ཨིདཾ, མཧཱརཱཛ, ཨཱཀཱསསྶ པཉྩམཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན སཀཾ པུཏྟཾ རཱཧུལཾ ཨོཝདནྟེན – ‘སེཡྻཐཱཔི, རཱཧུལ 1, ཨཱཀཱསོ ན ཀཏྠཙི པཏིཊྛིཏོ, ཨེཝམེཝ ཁོ ཏྭཾ, རཱཧུལ, ཨཱཀཱསསམཾ བྷཱཝནཾ བྷཱཝེཧི, ཨཱཀཱསསམཾ ཧི ཏེ, རཱཧུལ, བྷཱཝནཾ བྷཱཝཡཏོ ཨུཔྤནྣཱ མནཱཔཱམནཱཔཱ ཕསྶཱ ཙིཏྟཾ པརིཡཱདཱཡ ཋསྶནྟཱི’’’ཏི།
‘‘Puna caparaṃ, mahārāja, ākāso alaggo asatto appatiṭṭhito apalibuddho, evameva kho , mahārāja, yoginā yogāvacarena kule gaṇe lābhe āvāse palibodhe paccaye sabbakilesesu ca sabbattha alaggena bhavitabbaṃ, anāsattena appatiṭṭhitena apalibuddhena bhavitabbaṃ. Idaṃ, mahārāja, ākāsassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena – ‘seyyathāpi, rāhula 2, ākāso na katthaci patiṭṭhito, evameva kho tvaṃ, rāhula, ākāsasamaṃ bhāvanaṃ bhāvehi, ākāsasamaṃ hi te, rāhula, bhāvanaṃ bhāvayato uppannā manāpāmanāpā phassā cittaṃ pariyādāya ṭhassantī’’’ti.
ཨཱཀཱསངྒཔཉྷོ ཚཊྛོ།
Ākāsaṅgapañho chaṭṭho.
Footnotes:
