| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
6. ඡට්‌ඨවග්‌ගො
6. Chaṭṭhavaggo
(59) 7. ආකාසො සනිදස්‌සනොතිකථා
(59) 7. Ākāso sanidassanotikathā
463. ආකාසො සනිදස්‌සනොති? ආමන්‌තා. රූපං රූපායතනං රූපධාතු නීලං පීතකං ලොහිතකං ඔදාතං චක්‌ඛුවිඤ්‌ඤෙය්‍යං චක්‌ඛුස්‌මිං පටිහඤ්‌ඤති චක්‌ඛුස්‌ස ආපාථං ආගච්‌ඡතීති? න හෙවං වත්‌තබ්‌බෙ…පෙ.….
463. Ākāso sanidassanoti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
ආකාසො සනිදස්‌සනොති? ආමන්‌තා. චක්‌ඛුඤ්‌ච පටිච්‌ච ආකාසඤ්‌ච උප්‌පජ්‌ජති චක්‌ඛුවිඤ්‌ඤාණන්‌ති? න හෙවං වත්‌තබ්‌බෙ …පෙ.….
Ākāso sanidassanoti? Āmantā. Cakkhuñca paṭicca ākāsañca uppajjati cakkhuviññāṇanti? Na hevaṃ vattabbe …pe….
චක්‌ඛුඤ්‌ච පටිච්‌ච ආකාසඤ්‌ච උප්‌පජ්‌ජති චක්‌ඛුවිඤ්‌ඤාණන්‌ති? ආමන්‌තා. ‘‘චක්‌ඛුඤ්‌ච පටිච්‌ච ආකාසඤ්‌ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව 1 සුත්‌තන්‌තොති? නත්‌ථි. ‘‘චක්‌ඛුඤ්‌ච පටිච්‌ච රූපෙ ච උප්‌පජ්‌ජති චක්‌ඛුවිඤ්‌ඤාණ’’න්‌ති 2 – අත්‌ථෙව සුත්‌තන්‌තොති? ආමන්‌තා. හඤ්‌චි ‘‘චක්‌ඛුඤ්‌ච පටිච්‌ච රූපෙ ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව සුත්‌තන්‌තො, නො ච වත රෙ වත්‌තබ්‌බෙ – ‘‘චක්‌ඛුඤ්‌ච පටිච්‌ච ආකාසඤ්‌ච උප්‌පජ්‌ජති චක්‌ඛුවිඤ්‌ඤාණ’’න්‌ති.
Cakkhuñca paṭicca ākāsañca uppajjati cakkhuviññāṇanti? Āmantā. ‘‘Cakkhuñca paṭicca ākāsañca uppajjati cakkhuviññāṇa’’nti – attheva 3 suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti 4 – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca ākāsañca uppajjati cakkhuviññāṇa’’nti.
464. න වත්‌තබ්‌බං – ‘‘ආකාසො සනිදස්‌සනො’’ති? ආමන්‌තා. නනු පස්‌සති ද්‌වින්‌නං රුක්‌ඛානං අන්‌තරං, ද්‌වින්‌නං ථම්‌භානං අන්‌තරං, තාළච්‌ඡිද්‌දං වාතපානච්‌ඡිද්‌දන්‌ති? ආමන්‌තා . හඤ්‌චි පස්‌සති ද්‌වින්‌නං රුක්‌ඛානං අන්‌තරං, ද්‌වින්‌නං ථම්‌භානං අන්‌තරං, තාළච්‌ඡිද්‌දං වාතපානච්‌ඡිද්‌දං, තෙන වත රෙ වත්‌තබ්‌බෙ – ‘‘ආකාසො සනිදස්‌සනො’’ති.
464. Na vattabbaṃ – ‘‘ākāso sanidassano’’ti? Āmantā. Nanu passati dvinnaṃ rukkhānaṃ antaraṃ, dvinnaṃ thambhānaṃ antaraṃ, tāḷacchiddaṃ vātapānacchiddanti? Āmantā . Hañci passati dvinnaṃ rukkhānaṃ antaraṃ, dvinnaṃ thambhānaṃ antaraṃ, tāḷacchiddaṃ vātapānacchiddaṃ, tena vata re vattabbe – ‘‘ākāso sanidassano’’ti.
ආකාසො සනිදස්‌සනොතිකථා නිට්‌ඨිතා.
Ākāso sanidassanotikathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 7. ආකාසො සනිදස්‌සනොතිකථාවණ්‌ණනා • 7. Ākāso sanidassanotikathāvaṇṇanā
