| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༦. ཚཊྛཝགྒོ
6. Chaṭṭhavaggo
(༥༩) ༧. ཨཱཀཱསོ སནིདསྶནོཏིཀཐཱ
(59) 7. Ākāso sanidassanotikathā
༤༦༣. ཨཱཀཱསོ སནིདསྶནོཏི? ཨཱམནྟཱ། རཱུཔཾ རཱུཔཱཡཏནཾ རཱུཔདྷཱཏུ ནཱིལཾ པཱིཏཀཾ ལོཧིཏཀཾ ཨོདཱཏཾ ཙཀྑུཝིཉྙེཡྻཾ ཙཀྑུསྨིཾ པཊིཧཉྙཏི ཙཀྑུསྶ ཨཱཔཱཐཾ ཨཱགཙྪཏཱིཏི? ན ཧེཝཾ ཝཏྟབྦེ…པེ॰…།
463. Ākāso sanidassanoti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
ཨཱཀཱསོ སནིདསྶནོཏི? ཨཱམནྟཱ། ཙཀྑུཉྩ པཊིཙྩ ཨཱཀཱསཉྩ ཨུཔྤཛྫཏི ཙཀྑུཝིཉྙཱཎནྟི? ན ཧེཝཾ ཝཏྟབྦེ …པེ॰…།
Ākāso sanidassanoti? Āmantā. Cakkhuñca paṭicca ākāsañca uppajjati cakkhuviññāṇanti? Na hevaṃ vattabbe …pe….
ཙཀྑུཉྩ པཊིཙྩ ཨཱཀཱསཉྩ ཨུཔྤཛྫཏི ཙཀྑུཝིཉྙཱཎནྟི? ཨཱམནྟཱ། ‘‘ཙཀྑུཉྩ པཊིཙྩ ཨཱཀཱསཉྩ ཨུཔྤཛྫཏི ཙཀྑུཝིཉྙཱཎ’’ནྟི – ཨཏྠེཝ 1 སུཏྟནྟོཏི? ནཏྠི། ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟི 2 – ཨཏྠེཝ སུཏྟནྟོཏི? ཨཱམནྟཱ། ཧཉྩི ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟི – ཨཏྠེཝ སུཏྟནྟོ, ནོ ཙ ཝཏ རེ ཝཏྟབྦེ – ‘‘ཙཀྑུཉྩ པཊིཙྩ ཨཱཀཱསཉྩ ཨུཔྤཛྫཏི ཙཀྑུཝིཉྙཱཎ’’ནྟི།
Cakkhuñca paṭicca ākāsañca uppajjati cakkhuviññāṇanti? Āmantā. ‘‘Cakkhuñca paṭicca ākāsañca uppajjati cakkhuviññāṇa’’nti – attheva 3 suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti 4 – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca ākāsañca uppajjati cakkhuviññāṇa’’nti.
༤༦༤. ན ཝཏྟབྦཾ – ‘‘ཨཱཀཱསོ སནིདསྶནོ’’ཏི? ཨཱམནྟཱ། ནནུ པསྶཏི དྭིནྣཾ རུཀྑཱནཾ ཨནྟརཾ, དྭིནྣཾ ཐམྦྷཱནཾ ཨནྟརཾ, ཏཱལ༹ཙྪིདྡཾ ཝཱཏཔཱནཙྪིདྡནྟི? ཨཱམནྟཱ ། ཧཉྩི པསྶཏི དྭིནྣཾ རུཀྑཱནཾ ཨནྟརཾ, དྭིནྣཾ ཐམྦྷཱནཾ ཨནྟརཾ, ཏཱལ༹ཙྪིདྡཾ ཝཱཏཔཱནཙྪིདྡཾ, ཏེན ཝཏ རེ ཝཏྟབྦེ – ‘‘ཨཱཀཱསོ སནིདསྶནོ’’ཏི།
464. Na vattabbaṃ – ‘‘ākāso sanidassano’’ti? Āmantā. Nanu passati dvinnaṃ rukkhānaṃ antaraṃ, dvinnaṃ thambhānaṃ antaraṃ, tāḷacchiddaṃ vātapānacchiddanti? Āmantā . Hañci passati dvinnaṃ rukkhānaṃ antaraṃ, dvinnaṃ thambhānaṃ antaraṃ, tāḷacchiddaṃ vātapānacchiddaṃ, tena vata re vattabbe – ‘‘ākāso sanidassano’’ti.
ཨཱཀཱསོ སནིདསྶནོཏིཀཐཱ ནིཊྛིཏཱ།
Ākāso sanidassanotikathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༧. ཨཱཀཱསོ སནིདསྶནོཏིཀཐཱཝཎྞནཱ • 7. Ākāso sanidassanotikathāvaṇṇanā
