| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၇. အာကာသော သနိဒသ္သနောတိကထာဝဏ္ဏနာ
7. Ākāso sanidassanotikathāvaṇṇanā
၄၆၃-၄၆၄. ဣဒာနိ အာကာသော သနိဒသ္သနောတိကထာ နာမ ဟောတိ။ တတ္ထ ယေသံ တာဠစ္ဆိဒ္ဒာဒီသု ဉာဏပ္ပဝတ္တိံ နိသ္သာယ ‘‘သဗ္ဗောပိ အဇဋာကာသော သနိဒသ္သနော’’တိ လဒ္ဓိ, သေယ္ယထာပိ အန္ဓကာနံ ; တေ သန္ဓာယ အာကာသော သနိဒသ္သနောတိ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ ‘‘ယဒိ သနိဒသ္သနော, ဧဝံဝိဓော ဘဝေယ္ယာ’’တိ စောဒနတ္ထံ ရူပန္တိအာဒိ ဝုတ္တံ။ စက္ခုဉ္စ ပဋိစ္စာတိပဉ္ဟေသု ဧဝရူပသ္သ သုတ္တသ္သ အဘာဝေန ပဋိက္ခိပိတ္ဝာ တုလန္တရိကာဒီနံ ဥပလဒ္ဓိံ နိသ္သာယ ပဋိဇာနာတိ။ ဒ္ဝိန္နံ ရုက္ခာနံ အန္တရန္တိ ဧတ္ထ ရုက္ခရူပံ စက္ခုနာ ဒိသ္ဝာ အန္တရေ ရူပာဘာဝတော အာကာသန္တိ မနောဒ္ဝာရဝိညာဏံ ဥပ္ပဇ္ဇတိ, န စက္ခုဝိညာဏံ။ သေသေသုပိ ဧသေဝ နယော။ တသ္မာ အသာဓကမေတန္တိ။
463-464. Idāni ākāso sanidassanotikathā nāma hoti. Tattha yesaṃ tāḷacchiddādīsu ñāṇappavattiṃ nissāya ‘‘sabbopi ajaṭākāso sanidassano’’ti laddhi, seyyathāpi andhakānaṃ ; te sandhāya ākāso sanidassanoti pucchā sakavādissa, paṭiññā itarassa. Atha naṃ ‘‘yadi sanidassano, evaṃvidho bhaveyyā’’ti codanatthaṃ rūpantiādi vuttaṃ. Cakkhuñca paṭiccātipañhesu evarūpassa suttassa abhāvena paṭikkhipitvā tulantarikādīnaṃ upaladdhiṃ nissāya paṭijānāti. Dvinnaṃ rukkhānaṃ antaranti ettha rukkharūpaṃ cakkhunā disvā antare rūpābhāvato ākāsanti manodvāraviññāṇaṃ uppajjati, na cakkhuviññāṇaṃ. Sesesupi eseva nayo. Tasmā asādhakametanti.
အာကာသော သနိဒသ္သနောတိကထာဝဏ္ဏနာ။
Ākāso sanidassanotikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၅၉) ၇. အာကာသော သနိဒသ္သနောတိကထာ • (59) 7. Ākāso sanidassanotikathā
