| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
27. பது³முக்கி²பவக்³கோ³
27. Padumukkhipavaggo
1-10. ஆகாஸுக்கி²பியத்தே²ரஅபதா³னாதி³வண்ணனா
1-10. Ākāsukkhipiyattheraapadānādivaṇṇanā
1-2. ஸத்தவீஸதிமே வக்³கே³ பட²மாபதா³னே ஜலஜக்³கே³ து³வே க³ய்ஹாதி ஜலே உத³கே ஜாதே அக்³கே³ உப்பலாத³யோ த்³வே புப்பே² க³ஹெத்வா பு³த்³த⁴ஸ்ஸ ஸமீபங் க³ந்த்வா ஏகங் புப்ப²ங் பாதே³ஸு நிக்கி²பிங் பூஜேஸிங், ஏகங் புப்ப²ங் ஆகாஸே கி²பிந்தி அத்தோ².
1-2. Sattavīsatime vagge paṭhamāpadāne jalajagge duve gayhāti jale udake jāte agge uppalādayo dve pupphe gahetvā buddhassa samīpaṃ gantvā ekaṃ pupphaṃ pādesu nikkhipiṃ pūjesiṃ, ekaṃ pupphaṃ ākāse khipinti attho.
து³தியாபதா³னங் பாகடமேவ.
Dutiyāpadānaṃ pākaṭameva.
10. ததியாபதா³னே போ³தி⁴யா பாத³புத்தமேதி உத்தமே போ³தி⁴பாத³பே. அட்³ட⁴சந்த³ங் மயா தி³ன்னந்தி தஸ்மிங் போ³தி⁴மூலே அட்³ட⁴சந்தா³காரேன மயா அனேகபுப்பா²னி பூஜிதானீதி அத்தோ². த⁴ரணீருஹபாத³பேதி ருக்க²பப்³ப³தரதனாத³யோ தா⁴ரேதீதி த⁴ரணீ, பத²வீ, த⁴ரணியா ருஹதி பதிட்ட²ஹதீதி த⁴ரணீருஹோ, பாத³ஸங்கா²தேன மூலேன உத³கங் பிவதி க²ந்த⁴விடபாதீ³ஸு பத்த²ரியதீதி பாத³போ, த⁴ரணீருஹோ ச ஸோ பாத³போ சேதி த⁴ரணீருஹபாத³போ, தஸ்மிங் த⁴ரணீருஹபாத³பே புப்ப²ங் மயா பூஜிதந்தி அத்தோ².
10. Tatiyāpadāne bodhiyā pādaputtameti uttame bodhipādape. Aḍḍhacandaṃ mayā dinnanti tasmiṃ bodhimūle aḍḍhacandākārena mayā anekapupphāni pūjitānīti attho. Dharaṇīruhapādapeti rukkhapabbataratanādayo dhāretīti dharaṇī, pathavī, dharaṇiyā ruhati patiṭṭhahatīti dharaṇīruho, pādasaṅkhātena mūlena udakaṃ pivati khandhaviṭapādīsu patthariyatīti pādapo, dharaṇīruho ca so pādapo ceti dharaṇīruhapādapo, tasmiṃ dharaṇīruhapādape pupphaṃ mayā pūjitanti attho.
சதுத்தா²பதா³னங் உத்தானத்த²மேவ.
Catutthāpadānaṃ uttānatthameva.
18-19. பஞ்சமாபதா³னே ஹிமவந்தஸ்ஸாவிதூ³ரேதி ஹிமவந்தஸ்ஸ ஆஸன்னே. ரோமஸோ நாம பப்³ப³தோதி ருக்க²லதாகு³ம்பா³பா⁴வா கேவலங் த³ப்³ப³திணாதி³ஸஞ்ச²ன்னத்தா ரோமஸோ நாம பப்³ப³தோ அஹோஸி. தம்ஹி பப்³ப³தபாத³ம்ஹீதி தஸ்மிங் பப்³ப³தபரியந்தே. ஸமணோ பா⁴விதிந்த்³ரியோதி ஸமிதபாபோ வூபஸந்தகிலேஸோ ஸமணோ வட்³டி⁴தஇந்த்³ரியோ, ரக்கி²தசக்கு²ந்த்³ரியாதி³இந்த்³ரியோதி அத்தோ². அத² வா வட்³டி⁴தஇந்த்³ரியோ வட்³டி⁴தஸத்³தி⁴ந்த்³ரியாதி³இந்த்³ரியோதி அத்தோ². தஸ்ஸ ஸமணஸ்ஸ அஹங் பி³ளாலிஆலுவே க³ஹெத்வா அதா³ஸிந்தி அத்தோ².
18-19. Pañcamāpadāne himavantassāvidūreti himavantassa āsanne. Romaso nāma pabbatoti rukkhalatāgumbābhāvā kevalaṃ dabbatiṇādisañchannattā romaso nāma pabbato ahosi. Tamhi pabbatapādamhīti tasmiṃ pabbatapariyante. Samaṇo bhāvitindriyoti samitapāpo vūpasantakileso samaṇo vaḍḍhitaindriyo, rakkhitacakkhundriyādiindriyoti attho. Atha vā vaḍḍhitaindriyo vaḍḍhitasaddhindriyādiindriyoti attho. Tassa samaṇassa ahaṃ biḷāliāluve gahetvā adāsinti attho.
ச²ட்ட²ஸத்தமட்ட²மனவமத³ஸமாபதா³னானி உத்தானத்தா²னேவாதி.
Chaṭṭhasattamaṭṭhamanavamadasamāpadānāni uttānatthānevāti.
ஸத்தவீஸதிமவக்³க³வண்ணனா ஸமத்தா.
Sattavīsatimavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
1. ஆகாஸுக்கி²பியத்தே²ரஅபதா³னங் • 1. Ākāsukkhipiyattheraapadānaṃ
3. அட்³ட⁴சந்தி³யத்தே²ரஅபதா³னங் • 3. Aḍḍhacandiyattheraapadānaṃ
5. பி³ளாலிதா³யகத்தே²ரஅபதா³னங் • 5. Biḷālidāyakattheraapadānaṃ
