| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
२७. पदुमुक्खिपवग्गो
27. Padumukkhipavaggo
१-१०. आकासुक्खिपियत्थेरअपदानादिवण्णना
1-10. Ākāsukkhipiyattheraapadānādivaṇṇanā
१-२. सत्तवीसतिमे वग्गे पठमापदाने जलजग्गे दुवे गय्हाति जले उदके जाते अग्गे उप्पलादयो द्वे पुप्फे गहेत्वा बुद्धस्स समीपं गन्त्वा एकं पुप्फं पादेसु निक्खिपिं पूजेसिं, एकं पुप्फं आकासे खिपिन्ति अत्थो।
1-2. Sattavīsatime vagge paṭhamāpadāne jalajagge duve gayhāti jale udake jāte agge uppalādayo dve pupphe gahetvā buddhassa samīpaṃ gantvā ekaṃ pupphaṃ pādesu nikkhipiṃ pūjesiṃ, ekaṃ pupphaṃ ākāse khipinti attho.
दुतियापदानं पाकटमेव।
Dutiyāpadānaṃ pākaṭameva.
१०. ततियापदाने बोधिया पादपुत्तमेति उत्तमे बोधिपादपे। अड्ढचन्दं मया दिन्नन्ति तस्मिं बोधिमूले अड्ढचन्दाकारेन मया अनेकपुप्फानि पूजितानीति अत्थो। धरणीरुहपादपेति रुक्खपब्बतरतनादयो धारेतीति धरणी, पथवी, धरणिया रुहति पतिट्ठहतीति धरणीरुहो, पादसङ्खातेन मूलेन उदकं पिवति खन्धविटपादीसु पत्थरियतीति पादपो, धरणीरुहो च सो पादपो चेति धरणीरुहपादपो, तस्मिं धरणीरुहपादपे पुप्फं मया पूजितन्ति अत्थो।
10. Tatiyāpadāne bodhiyā pādaputtameti uttame bodhipādape. Aḍḍhacandaṃ mayā dinnanti tasmiṃ bodhimūle aḍḍhacandākārena mayā anekapupphāni pūjitānīti attho. Dharaṇīruhapādapeti rukkhapabbataratanādayo dhāretīti dharaṇī, pathavī, dharaṇiyā ruhati patiṭṭhahatīti dharaṇīruho, pādasaṅkhātena mūlena udakaṃ pivati khandhaviṭapādīsu patthariyatīti pādapo, dharaṇīruho ca so pādapo ceti dharaṇīruhapādapo, tasmiṃ dharaṇīruhapādape pupphaṃ mayā pūjitanti attho.
चतुत्थापदानं उत्तानत्थमेव।
Catutthāpadānaṃ uttānatthameva.
१८-१९. पञ्चमापदाने हिमवन्तस्साविदूरेति हिमवन्तस्स आसन्ने। रोमसो नाम पब्बतोति रुक्खलतागुम्बाभावा केवलं दब्बतिणादिसञ्छन्नत्ता रोमसो नाम पब्बतो अहोसि। तम्हि पब्बतपादम्हीति तस्मिं पब्बतपरियन्ते। समणो भावितिन्द्रियोति समितपापो वूपसन्तकिलेसो समणो वड्ढितइन्द्रियो, रक्खितचक्खुन्द्रियादिइन्द्रियोति अत्थो। अथ वा वड्ढितइन्द्रियो वड्ढितसद्धिन्द्रियादिइन्द्रियोति अत्थो। तस्स समणस्स अहं बिळालिआलुवे गहेत्वा अदासिन्ति अत्थो।
18-19. Pañcamāpadāne himavantassāvidūreti himavantassa āsanne. Romaso nāma pabbatoti rukkhalatāgumbābhāvā kevalaṃ dabbatiṇādisañchannattā romaso nāma pabbato ahosi. Tamhi pabbatapādamhīti tasmiṃ pabbatapariyante. Samaṇo bhāvitindriyoti samitapāpo vūpasantakileso samaṇo vaḍḍhitaindriyo, rakkhitacakkhundriyādiindriyoti attho. Atha vā vaḍḍhitaindriyo vaḍḍhitasaddhindriyādiindriyoti attho. Tassa samaṇassa ahaṃ biḷāliāluve gahetvā adāsinti attho.
छट्ठसत्तमट्ठमनवमदसमापदानानि उत्तानत्थानेवाति।
Chaṭṭhasattamaṭṭhamanavamadasamāpadānāni uttānatthānevāti.
सत्तवीसतिमवग्गवण्णना समत्ता।
Sattavīsatimavaggavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi
१. आकासुक्खिपियत्थेरअपदानं • 1. Ākāsukkhipiyattheraapadānaṃ
३. अड्ढचन्दियत्थेरअपदानं • 3. Aḍḍhacandiyattheraapadānaṃ
५. बिळालिदायकत्थेरअपदानं • 5. Biḷālidāyakattheraapadānaṃ
