| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
27. පදුමුක්‌ඛිපවග්‌ගො
27. Padumukkhipavaggo
1-10. ආකාසුක්‌ඛිපියත්‌ථෙරඅපදානාදිවණ්‌ණනා
1-10. Ākāsukkhipiyattheraapadānādivaṇṇanā
1-2. සත්‌තවීසතිමෙ වග්‌ගෙ පඨමාපදානෙ ජලජග්‌ගෙ දුවෙ ගය්‌හාති ජලෙ උදකෙ ජාතෙ අග්‌ගෙ උප්‌පලාදයො ද්‌වෙ පුප්‌ඵෙ ගහෙත්‌වා බුද්‌ධස්‌ස සමීපං ගන්‌ත්‌වා එකං පුප්‌ඵං පාදෙසු නික්‌ඛිපිං පූජෙසිං, එකං පුප්‌ඵං ආකාසෙ ඛිපින්‌ති අත්‌ථො.
1-2. Sattavīsatime vagge paṭhamāpadāne jalajagge duve gayhāti jale udake jāte agge uppalādayo dve pupphe gahetvā buddhassa samīpaṃ gantvā ekaṃ pupphaṃ pādesu nikkhipiṃ pūjesiṃ, ekaṃ pupphaṃ ākāse khipinti attho.
දුතියාපදානං පාකටමෙව.
Dutiyāpadānaṃ pākaṭameva.
10. තතියාපදානෙ බොධියා පාදපුත්‌තමෙති උත්‌තමෙ බොධිපාදපෙ. අඩ්‌ඪචන්‌දං මයා දින්‌නන්‌ති තස්‌මිං බොධිමූලෙ අඩ්‌ඪචන්‌දාකාරෙන මයා අනෙකපුප්‌ඵානි පූජිතානීති අත්‌ථො. ධරණීරුහපාදපෙති රුක්‌ඛපබ්‌බතරතනාදයො ධාරෙතීති ධරණී, පථවී, ධරණියා රුහති පතිට්‌ඨහතීති ධරණීරුහො, පාදසඞ්‌ඛාතෙන මූලෙන උදකං පිවති ඛන්‌ධවිටපාදීසු පත්‌ථරියතීති පාදපො, ධරණීරුහො ච සො පාදපො චෙති ධරණීරුහපාදපො, තස්‌මිං ධරණීරුහපාදපෙ පුප්‌ඵං මයා පූජිතන්‌ති අත්‌ථො.
10. Tatiyāpadāne bodhiyā pādaputtameti uttame bodhipādape. Aḍḍhacandaṃ mayā dinnanti tasmiṃ bodhimūle aḍḍhacandākārena mayā anekapupphāni pūjitānīti attho. Dharaṇīruhapādapeti rukkhapabbataratanādayo dhāretīti dharaṇī, pathavī, dharaṇiyā ruhati patiṭṭhahatīti dharaṇīruho, pādasaṅkhātena mūlena udakaṃ pivati khandhaviṭapādīsu patthariyatīti pādapo, dharaṇīruho ca so pādapo ceti dharaṇīruhapādapo, tasmiṃ dharaṇīruhapādape pupphaṃ mayā pūjitanti attho.
චතුත්‌ථාපදානං උත්‌තානත්‌ථමෙව.
Catutthāpadānaṃ uttānatthameva.
18-19. පඤ්‌චමාපදානෙ හිමවන්‌තස්‌සාවිදූරෙති හිමවන්‌තස්‌ස ආසන්‌නෙ. රොමසො නාම පබ්‌බතොති රුක්‌ඛලතාගුම්‌බාභාවා කෙවලං දබ්‌බතිණාදිසඤ්‌ඡන්‌නත්‌තා රොමසො නාම පබ්‌බතො අහොසි. තම්‌හි පබ්‌බතපාදම්‌හීති තස්‌මිං පබ්‌බතපරියන්‌තෙ. සමණො භාවිතින්‌ද්‍රියොති සමිතපාපො වූපසන්‌තකිලෙසො සමණො වඩ්‌ඪිතඉන්‌ද්‍රියො, රක්‌ඛිතචක්‌ඛුන්‌ද්‍රියාදිඉන්‌ද්‍රියොති අත්‌ථො. අථ වා වඩ්‌ඪිතඉන්‌ද්‍රියො වඩ්‌ඪිතසද්‌ධින්‌ද්‍රියාදිඉන්‌ද්‍රියොති අත්‌ථො. තස්‌ස සමණස්‌ස අහං බිළාලිආලුවෙ ගහෙත්‌වා අදාසින්‌ති අත්‌ථො.
18-19. Pañcamāpadāne himavantassāvidūreti himavantassa āsanne. Romaso nāma pabbatoti rukkhalatāgumbābhāvā kevalaṃ dabbatiṇādisañchannattā romaso nāma pabbato ahosi. Tamhi pabbatapādamhīti tasmiṃ pabbatapariyante. Samaṇo bhāvitindriyoti samitapāpo vūpasantakileso samaṇo vaḍḍhitaindriyo, rakkhitacakkhundriyādiindriyoti attho. Atha vā vaḍḍhitaindriyo vaḍḍhitasaddhindriyādiindriyoti attho. Tassa samaṇassa ahaṃ biḷāliāluve gahetvā adāsinti attho.
ඡට්‌ඨසත්‌තමට්‌ඨමනවමදසමාපදානානි උත්‌තානත්‌ථානෙවාති.
Chaṭṭhasattamaṭṭhamanavamadasamāpadānāni uttānatthānevāti.
සත්‌තවීසතිමවග්‌ගවණ්‌ණනා සමත්‌තා.
Sattavīsatimavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi
1. ආකාසුක්‌ඛිපියත්‌ථෙරඅපදානං • 1. Ākāsukkhipiyattheraapadānaṃ
3. අඩ්‌ඪචන්‌දියත්‌ථෙරඅපදානං • 3. Aḍḍhacandiyattheraapadānaṃ
5. බිළාලිදායකත්‌ථෙරඅපදානං • 5. Biḷālidāyakattheraapadānaṃ
