| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೨೭. ಪದುಮುಕ್ಖಿಪವಗ್ಗೋ
27. Padumukkhipavaggo
೧. ಆಕಾಸುಕ್ಖಿಪಿಯತ್ಥೇರಅಪದಾನಂ
1. Ākāsukkhipiyattheraapadānaṃ
೧.
1.
‘‘ಸುವಣ್ಣವಣ್ಣಂ ಸಿದ್ಧತ್ಥಂ, ಗಚ್ಛನ್ತಂ ಅನ್ತರಾಪಣೇ।
‘‘Suvaṇṇavaṇṇaṃ siddhatthaṃ, gacchantaṃ antarāpaṇe;
ಜಲಜಗ್ಗೇ ದುವೇ ಗಯ್ಹ, ಉಪಾಗಚ್ಛಿಂ ನರಾಸಭಂ॥
Jalajagge duve gayha, upāgacchiṃ narāsabhaṃ.
೨.
2.
‘‘ಏಕಞ್ಚ ಪುಪ್ಫಂ ಪಾದೇಸು, ಬುದ್ಧಸೇಟ್ಠಸ್ಸ ನಿಕ್ಖಿಪಿಂ।
‘‘Ekañca pupphaṃ pādesu, buddhaseṭṭhassa nikkhipiṃ;
ಏಕಞ್ಚ ಪುಪ್ಫಂ ಪಗ್ಗಯ್ಹ, ಆಕಾಸೇ ಉಕ್ಖಿಪಿಂ ಅಹಂ॥
Ekañca pupphaṃ paggayha, ākāse ukkhipiṃ ahaṃ.
೩.
3.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ।
‘‘Catunnavutito kappe, yaṃ pupphamabhiropayiṃ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ॥
Duggatiṃ nābhijānāmi, pupphadānassidaṃ phalaṃ.
೪.
4.
‘‘ಇತೋ ಛತ್ತಿಂಸಕಪ್ಪಮ್ಹಿ, ಏಕೋ ಆಸಿಂ ಮಹೀಪತಿ।
‘‘Ito chattiṃsakappamhi, eko āsiṃ mahīpati;
ಅನ್ತಲಿಕ್ಖಕರೋ ನಾಮ, ಚಕ್ಕವತ್ತೀ ಮಹಬ್ಬಲೋ॥
Antalikkhakaro nāma, cakkavattī mahabbalo.
೫.
5.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಆಕಾಸುಕ್ಖಿಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ āyasmā ākāsukkhipiyo thero imā gāthāyo abhāsitthāti.
ಆಕಾಸುಕ್ಖಿಪಿಯತ್ಥೇರಸ್ಸಾಪದಾನಂ ಪಠಮಂ।
Ākāsukkhipiyattherassāpadānaṃ paṭhamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಅಪದಾನ-ಅಟ್ಠಕಥಾ • Apadāna-aṭṭhakathā / ೧-೧೦. ಆಕಾಸುಕ್ಖಿಪಿಯತ್ಥೇರಅಪದಾನಾದಿವಣ್ಣನಾ • 1-10. Ākāsukkhipiyattheraapadānādivaṇṇanā
