| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
ஆகிஞ்சஞ்ஞாயதனங்
Ākiñcaññāyatanaṃ
267. விஞ்ஞாணஞ்சாயதனங் ஸமதிக்கம்மாதி எத்தா²பி புப்³பே³ வுத்தனயேனேவ விஞ்ஞாணஞ்ச ஆயதனமஸ்ஸ அதி⁴ட்டா²னட்டே²னாதி ஜா²னம்பி விஞ்ஞாணஞ்சாயதனங். வுத்தனயேனேவ ச ஆரம்மணம்பி. ஏவமேதங் ஜா²னஞ்ச ஆரம்மணஞ்சாதி உப⁴யம்பி அப்பவத்திகரணேன ச அமனஸிகரணேன ச ஸமதிக்கமித்வாவ யஸ்மா இத³ங் ஆகிஞ்சஞ்ஞாயதனங் உபஸம்பஜ்ஜ விஹாதப்³ப³ங், தஸ்மா உப⁴யம்பேதங் ஏகஜ்ஜ²ங் கத்வா ‘விஞ்ஞாணஞ்சாயதனங் ஸமதிக்கம்மா’தி இத³ங் வுத்தந்தி வேதி³தப்³ப³ங்.
267. Viññāṇañcāyatanaṃsamatikkammāti etthāpi pubbe vuttanayeneva viññāṇañca āyatanamassa adhiṭṭhānaṭṭhenāti jhānampi viññāṇañcāyatanaṃ. Vuttanayeneva ca ārammaṇampi. Evametaṃ jhānañca ārammaṇañcāti ubhayampi appavattikaraṇena ca amanasikaraṇena ca samatikkamitvāva yasmā idaṃ ākiñcaññāyatanaṃ upasampajja vihātabbaṃ, tasmā ubhayampetaṃ ekajjhaṃ katvā ‘viññāṇañcāyatanaṃ samatikkammā’ti idaṃ vuttanti veditabbaṃ.
ஆகிஞ்சஞ்ஞாயதனஸஞ்ஞாஸஹக³தந்தி எத்த² பன நாஸ்ஸ கிஞ்சனந்தி அகிஞ்சனங்; அந்தமஸோ ப⁴ங்க³மத்தம்பி அஸ்ஸ அவஸிட்ட²ங் நத்தீ²தி வுத்தங் ஹோதி. அகிஞ்சனஸ்ஸ பா⁴வோ ஆகிஞ்சஞ்ஞங். ஆகாஸானஞ்சாயதனவிஞ்ஞாணாபக³மஸ்ஸேதங் அதி⁴வசனங். தங் ஆகிஞ்சஞ்ஞங் அதி⁴ட்டா²னட்டே²ன இமிஸ்ஸா ஸஞ்ஞாய ஆயதனந்தி ஆகிஞ்சஞ்ஞாயதனங். தஸ்மிங் ஆகிஞ்சஞ்ஞாயதனே பவத்தாய ஸஞ்ஞாய ஸஹக³தந்தி ஆகிஞ்சஞ்ஞாயதனஸஞ்ஞாஸஹக³தங். ஆகாஸே பவத்திதவிஞ்ஞாணாபக³மாரம்மணஸ்ஸ ஜா²னஸ்ஸேதங் அதி⁴வசனங். இத⁴ விஞ்ஞாணஞ்சாயதனஸமாபத்தியா நிகந்திபரியாதா³னது³க்க²தாய து³க்கா² படிபதா³, பரியாதி³ன்னநிகந்திகஸ்ஸ அப்பனா பரிவாஸத³ந்த⁴தாய த³ந்தா⁴பி⁴ஞ்ஞா. விபரியாயேன ஸுகா² படிபதா³ கி²ப்பாபி⁴ஞ்ஞா ச. பரித்தகஸிணுக்³கா⁴டிமாகாஸே பவத்திதவிஞ்ஞாணாபக³மாரம்மணதாய பரித்தாரம்மணதா, விபரியாயேன அப்பமாணாரம்மணதா வேதி³தப்³பா³. ஸேஸங் புரிமஸதி³ஸமேவ.
Ākiñcaññāyatanasaññāsahagatanti ettha pana nāssa kiñcananti akiñcanaṃ; antamaso bhaṅgamattampi assa avasiṭṭhaṃ natthīti vuttaṃ hoti. Akiñcanassa bhāvo ākiñcaññaṃ. Ākāsānañcāyatanaviññāṇāpagamassetaṃ adhivacanaṃ. Taṃ ākiñcaññaṃ adhiṭṭhānaṭṭhena imissā saññāya āyatananti ākiñcaññāyatanaṃ. Tasmiṃ ākiñcaññāyatane pavattāya saññāya sahagatanti ākiñcaññāyatanasaññāsahagataṃ. Ākāse pavattitaviññāṇāpagamārammaṇassa jhānassetaṃ adhivacanaṃ. Idha viññāṇañcāyatanasamāpattiyā nikantipariyādānadukkhatāya dukkhā paṭipadā, pariyādinnanikantikassa appanā parivāsadandhatāya dandhābhiññā. Vipariyāyena sukhā paṭipadā khippābhiññā ca. Parittakasiṇugghāṭimākāse pavattitaviññāṇāpagamārammaṇatāya parittārammaṇatā, vipariyāyena appamāṇārammaṇatā veditabbā. Sesaṃ purimasadisameva.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / அரூபாவசரகுஸலங் • Arūpāvacarakusalaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / அரூபாவசரகுஸலகதா²வண்ணனா • Arūpāvacarakusalakathāvaṇṇanā
