| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. ஆகிஞ்சஞ்ஞாயதனபஞ்ஹாஸுத்தங்
7. Ākiñcaññāyatanapañhāsuttaṃ
338. ‘‘‘ஆகிஞ்சஞ்ஞாயதனங், ஆகிஞ்சஞ்ஞாயதன’ந்தி வுச்சதி. கதமங் நு கோ² ஆகிஞ்சஞ்ஞாயதனந்தி? தஸ்ஸ மய்ஹங், ஆவுஸோ, ஏதத³ஹோஸி – ‘இத⁴ பி⁴க்கு² ஸப்³ப³ஸோ விஞ்ஞாணஞ்சாயதனங் ஸமதிக்கம்ம நத்தி² கிஞ்சீதி ஆகிஞ்சஞ்ஞாயதனங் உபஸம்பஜ்ஜ விஹரதி. இத³ங் வுச்சதி ஆகிஞ்சஞ்ஞாயதன’ந்தி. ஸோ க்²வாஹங், ஆவுஸோ, ஸப்³ப³ஸோ விஞ்ஞாணஞ்சாயதனங் ஸமதிக்கம்ம நத்தி² கிஞ்சீதி ஆகிஞ்சஞ்ஞாயதனங் உபஸம்பஜ்ஜ விஹராமி. தஸ்ஸ மய்ஹங், ஆவுஸோ, இமினா விஹாரேன விஹரதோ விஞ்ஞாணஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி.
338. ‘‘‘Ākiñcaññāyatanaṃ, ākiñcaññāyatana’nti vuccati. Katamaṃ nu kho ākiñcaññāyatananti? Tassa mayhaṃ, āvuso, etadahosi – ‘idha bhikkhu sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharati. Idaṃ vuccati ākiñcaññāyatana’nti. So khvāhaṃ, āvuso, sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharāmi. Tassa mayhaṃ, āvuso, iminā vihārena viharato viññāṇañcāyatanasahagatā saññāmanasikārā samudācaranti.
‘‘அத² கோ² மங், ஆவுஸோ, ப⁴க³வா இத்³தி⁴யா உபஸங்கமித்வா ஏதத³வோச – ‘மொக்³க³ல்லான, மொக்³க³ல்லான! மா, ப்³ராஹ்மண, ஆகிஞ்சஞ்ஞாயதனங் பமாதோ³, ஆகிஞ்சஞ்ஞாயதனே சித்தங் ஸண்ட²பேஹி, ஆகிஞ்சஞ்ஞாயதனே சித்தங் ஏகோதி³ங் கரோஹி, ஆகிஞ்சஞ்ஞாயதனே சித்தங் ஸமாத³ஹா’தி. ஸோ க்²வாஹங், ஆவுஸோ, அபரேன ஸமயேன ஸப்³ப³ஸோ விஞ்ஞாணஞ்சாயதனங் ஸமதிக்கம்ம நத்தி² கிஞ்சீதி ஆகிஞ்சஞ்ஞாயதனங் உபஸம்பஜ்ஜ விஹாஸிங். யஞ்ஹி தங், ஆவுஸோ, ஸம்மா வத³மானோ வதெ³ய்ய…பே॰… மஹாபி⁴ஞ்ஞதங் பத்தோ’’தி. ஸத்தமங்.
‘‘Atha kho maṃ, āvuso, bhagavā iddhiyā upasaṅkamitvā etadavoca – ‘moggallāna, moggallāna! Mā, brāhmaṇa, ākiñcaññāyatanaṃ pamādo, ākiñcaññāyatane cittaṃ saṇṭhapehi, ākiñcaññāyatane cittaṃ ekodiṃ karohi, ākiñcaññāyatane cittaṃ samādahā’ti. So khvāhaṃ, āvuso, aparena samayena sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja vihāsiṃ. Yañhi taṃ, āvuso, sammā vadamāno vadeyya…pe… mahābhiññataṃ patto’’ti. Sattamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-8. பட²மஜா²னபஞ்ஹாஸுத்தாதி³வண்ணனா • 1-8. Paṭhamajhānapañhāsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-8. பட²மஜ்ஜா²னபஞ்ஹஸுத்தாதி³வண்ணனா • 1-8. Paṭhamajjhānapañhasuttādivaṇṇanā
