| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. আকিঞ্চঞ্ঞাযতনপঞ্হাসুত্তং
7. Ākiñcaññāyatanapañhāsuttaṃ
৩৩৮. ‘‘‘আকিঞ্চঞ্ঞাযতনং, আকিঞ্চঞ্ঞাযতন’ন্তি ৰুচ্চতি। কতমং নু খো আকিঞ্চঞ্ঞাযতনন্তি? তস্স ময্হং, আৰুসো, এতদহোসি – ‘ইধ ভিক্খু সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরতি। ইদং ৰুচ্চতি আকিঞ্চঞ্ঞাযতন’ন্তি। সো খ্ৰাহং, আৰুসো, সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরামি। তস্স ময্হং, আৰুসো, ইমিনা ৰিহারেন ৰিহরতো ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি।
338. ‘‘‘Ākiñcaññāyatanaṃ, ākiñcaññāyatana’nti vuccati. Katamaṃ nu kho ākiñcaññāyatananti? Tassa mayhaṃ, āvuso, etadahosi – ‘idha bhikkhu sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharati. Idaṃ vuccati ākiñcaññāyatana’nti. So khvāhaṃ, āvuso, sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharāmi. Tassa mayhaṃ, āvuso, iminā vihārena viharato viññāṇañcāyatanasahagatā saññāmanasikārā samudācaranti.
‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, আকিঞ্চঞ্ঞাযতনং পমাদো, আকিঞ্চঞ্ঞাযতনে চিত্তং সণ্ঠপেহি, আকিঞ্চঞ্ঞাযতনে চিত্তং একোদিং করোহি, আকিঞ্চঞ্ঞাযতনে চিত্তং সমাদহা’তি। সো খ্ৰাহং, আৰুসো, অপরেন সমযেন সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহাসিং। যঞ্হি তং, আৰুসো, সম্মা ৰদমানো ৰদেয্য…পে॰… মহাভিঞ্ঞতং পত্তো’’তি। সত্তমং।
‘‘Atha kho maṃ, āvuso, bhagavā iddhiyā upasaṅkamitvā etadavoca – ‘moggallāna, moggallāna! Mā, brāhmaṇa, ākiñcaññāyatanaṃ pamādo, ākiñcaññāyatane cittaṃ saṇṭhapehi, ākiñcaññāyatane cittaṃ ekodiṃ karohi, ākiñcaññāyatane cittaṃ samādahā’ti. So khvāhaṃ, āvuso, aparena samayena sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja vihāsiṃ. Yañhi taṃ, āvuso, sammā vadamāno vadeyya…pe… mahābhiññataṃ patto’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-৮. পঠমঝানপঞ্হাসুত্তাদিৰণ্ণনা • 1-8. Paṭhamajhānapañhāsuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১-৮. পঠমজ্ঝানপঞ্হসুত্তাদিৰণ্ণনা • 1-8. Paṭhamajjhānapañhasuttādivaṇṇanā
