| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. ආකිඤ්‌චඤ්‌ඤායතනපඤ්‌හාසුත්‌තං
7. Ākiñcaññāyatanapañhāsuttaṃ
338. ‘‘‘ආකිඤ්‌චඤ්‌ඤායතනං, ආකිඤ්‌චඤ්‌ඤායතන’න්‌ති වුච්‌චති. කතමං නු ඛො ආකිඤ්‌චඤ්‌ඤායතනන්‌ති? තස්‌ස මය්‌හං, ආවුසො, එතදහොසි – ‘ඉධ භික්‌ඛු සබ්‌බසො විඤ්‌ඤාණඤ්‌චායතනං සමතික්‌කම්‌ම නත්‌ථි කිඤ්‌චීති ආකිඤ්‌චඤ්‌ඤායතනං උපසම්‌පජ්‌ජ විහරති. ඉදං වුච්‌චති ආකිඤ්‌චඤ්‌ඤායතන’න්‌ති. සො ඛ්‌වාහං, ආවුසො, සබ්‌බසො විඤ්‌ඤාණඤ්‌චායතනං සමතික්‌කම්‌ම නත්‌ථි කිඤ්‌චීති ආකිඤ්‌චඤ්‌ඤායතනං උපසම්‌පජ්‌ජ විහරාමි. තස්‌ස මය්‌හං, ආවුසො, ඉමිනා විහාරෙන විහරතො විඤ්‌ඤාණඤ්‌චායතනසහගතා සඤ්‌ඤාමනසිකාරා සමුදාචරන්‌ති.
338. ‘‘‘Ākiñcaññāyatanaṃ, ākiñcaññāyatana’nti vuccati. Katamaṃ nu kho ākiñcaññāyatananti? Tassa mayhaṃ, āvuso, etadahosi – ‘idha bhikkhu sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharati. Idaṃ vuccati ākiñcaññāyatana’nti. So khvāhaṃ, āvuso, sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharāmi. Tassa mayhaṃ, āvuso, iminā vihārena viharato viññāṇañcāyatanasahagatā saññāmanasikārā samudācaranti.
‘‘අථ ඛො මං, ආවුසො, භගවා ඉද්‌ධියා උපසඞ්‌කමිත්‌වා එතදවොච – ‘මොග්‌ගල්‌ලාන, මොග්‌ගල්‌ලාන! මා, බ්‍රාහ්‌මණ, ආකිඤ්‌චඤ්‌ඤායතනං පමාදො, ආකිඤ්‌චඤ්‌ඤායතනෙ චිත්‌තං සණ්‌ඨපෙහි, ආකිඤ්‌චඤ්‌ඤායතනෙ චිත්‌තං එකොදිං කරොහි, ආකිඤ්‌චඤ්‌ඤායතනෙ චිත්‌තං සමාදහා’ති. සො ඛ්‌වාහං, ආවුසො, අපරෙන සමයෙන සබ්‌බසො විඤ්‌ඤාණඤ්‌චායතනං සමතික්‌කම්‌ම නත්‌ථි කිඤ්‌චීති ආකිඤ්‌චඤ්‌ඤායතනං උපසම්‌පජ්‌ජ විහාසිං. යඤ්‌හි තං, ආවුසො, සම්‌මා වදමානො වදෙය්‍ය…පෙ.… මහාභිඤ්‌ඤතං පත්‌තො’’ති. සත්‌තමං.
‘‘Atha kho maṃ, āvuso, bhagavā iddhiyā upasaṅkamitvā etadavoca – ‘moggallāna, moggallāna! Mā, brāhmaṇa, ākiñcaññāyatanaṃ pamādo, ākiñcaññāyatane cittaṃ saṇṭhapehi, ākiñcaññāyatane cittaṃ ekodiṃ karohi, ākiñcaññāyatane cittaṃ samādahā’ti. So khvāhaṃ, āvuso, aparena samayena sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja vihāsiṃ. Yañhi taṃ, āvuso, sammā vadamāno vadeyya…pe… mahābhiññataṃ patto’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-8. පඨමඣානපඤ්‌හාසුත්‌තාදිවණ්‌ණනා • 1-8. Paṭhamajhānapañhāsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-8. පඨමජ්‌ඣානපඤ්‌හසුත්‌තාදිවණ්‌ණනා • 1-8. Paṭhamajjhānapañhasuttādivaṇṇanā
