| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. அக்க²ணஸுத்தவண்ணனா
9. Akkhaṇasuttavaṇṇanā
29. நவமே க²ணே கிச்சானி கரோதீதி க²ணகிச்சோ, ஓகாஸங் லபி⁴த்வாவ கிச்சானி கரோதீதி அத்தோ². த⁴ம்மோதி சதுஸச்சத⁴ம்மோ. ஓபஸமிகோதி கிலேஸூபஸமாவஹோ. பரினிப்³பா³யிகோதி கிலேஸபரினிப்³பா³னகரோ. சதுமக்³க³ஞாணஸங்கா²தங் ஸம்போ³தி⁴ங் க³ச்ச²தி ஸம்பாபுணாதீதி ஸம்போ³த⁴கா³மீ. தீ³கா⁴யுகங் தே³வனிகாயந்தி இத³ங் அஸஞ்ஞங் தே³வனிகாயங் ஸந்தா⁴ய வுத்தங். அவிஞ்ஞாதாரேஸூதி அதிவிய அவிஞ்ஞூஸு.
29. Navame khaṇe kiccāni karotīti khaṇakicco, okāsaṃ labhitvāva kiccāni karotīti attho. Dhammoti catusaccadhammo. Opasamikoti kilesūpasamāvaho. Parinibbāyikoti kilesaparinibbānakaro. Catumaggañāṇasaṅkhātaṃ sambodhiṃ gacchati sampāpuṇātīti sambodhagāmī. Dīghāyukaṃ devanikāyanti idaṃ asaññaṃ devanikāyaṃ sandhāya vuttaṃ. Aviññātāresūti ativiya aviññūsu.
ஸுப்பவேதி³தேதி ஸுகதி²தே. அந்தராயிகாதி அந்தராயகரா. க²ணோ வே மா உபச்சகா³தி அயங் லத்³தோ⁴ க²ணோ மா அதிக்கமி. இத⁴ சேவ நங் விராதே⁴தீதி ஸசே கோசி பமத்தசாரீ இத⁴ இமங் க²ணங் லபி⁴த்வாபி ஸத்³த⁴ம்மஸ்ஸ நியாமதங் அரியமக்³க³ங் விராதே⁴தி ந ஸம்பாதே³தி. அதீதத்தோ²தி ஹாபிதத்தோ². சிரத்தங் அனுதபிஸ்ஸதீதி சிரரத்தங் ஸோசிஸ்ஸதி. யதா² ஹி ‘‘அஸுகட்டா²னே ப⁴ண்ட³ங் ஸமுப்பன்ன’’ந்தி ஸுத்வா ஏகோ வாணிஜோ ந க³ச்செ²ய்ய, அஞ்ஞே க³ந்த்வா க³ண்ஹெய்யுங், தேஸங் தங் அட்ட²கு³ணம்பி த³ஸகு³ணம்பி ப⁴வெய்ய. அத² இதரோ ‘‘மம அத்தோ² அதிக்கந்தோ’’தி அனுதபெய்ய, ஏவங் யோ இத⁴ க²ணங் லபி⁴த்வா அப்படிபஜ்ஜந்தோ ஸத்³த⁴ம்மஸ்ஸ நியாமதங் விராதே⁴தி, ஸோ அயங் வாணிஜோவ அதீதத்தோ² சிரங் அனுதபிஸ்ஸதி ஸோசிஸ்ஸதி. கிஞ்ச பி⁴ய்யோ அவிஜ்ஜானிவுதோதி ததா². பச்சவிது³ந்தி படிவிஜ்ஜி²ங்ஸு. ஸங்வராதி ஸீலஸங்வரா. மாரதெ⁴ய்யபரானுகே³தி மாரதெ⁴ய்யஸங்கா²தங் ஸங்ஸாரங் அனுக³தே. பாரங்க³தாதி நிப்³பா³னங் க³தா. யே பத்தா ஆஸவக்க²யந்தி யே அரஹத்தங் பத்தா. ஏவமித⁴ கா³தா²ஸு வட்டவிவட்டங் கதி²தங்.
Suppavediteti sukathite. Antarāyikāti antarāyakarā. Khaṇo ve mā upaccagāti ayaṃ laddho khaṇo mā atikkami. Idhaceva naṃ virādhetīti sace koci pamattacārī idha imaṃ khaṇaṃ labhitvāpi saddhammassa niyāmataṃ ariyamaggaṃ virādheti na sampādeti. Atītatthoti hāpitattho. Cirattaṃ anutapissatīti cirarattaṃ socissati. Yathā hi ‘‘asukaṭṭhāne bhaṇḍaṃ samuppanna’’nti sutvā eko vāṇijo na gaccheyya, aññe gantvā gaṇheyyuṃ, tesaṃ taṃ aṭṭhaguṇampi dasaguṇampi bhaveyya. Atha itaro ‘‘mama attho atikkanto’’ti anutapeyya, evaṃ yo idha khaṇaṃ labhitvā appaṭipajjanto saddhammassa niyāmataṃ virādheti, so ayaṃ vāṇijova atītattho ciraṃ anutapissati socissati. Kiñca bhiyyo avijjānivutoti tathā. Paccavidunti paṭivijjhiṃsu. Saṃvarāti sīlasaṃvarā. Māradheyyaparānugeti māradheyyasaṅkhātaṃ saṃsāraṃ anugate. Pāraṅgatāti nibbānaṃ gatā. Ye pattā āsavakkhayanti ye arahattaṃ pattā. Evamidha gāthāsu vaṭṭavivaṭṭaṃ kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. அக்க²ணஸுத்தங் • 9. Akkhaṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. அக்க²ணஸுத்தவண்ணனா • 9. Akkhaṇasuttavaṇṇanā
