| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៩. អក្ខណសុត្តវណ្ណនា
9. Akkhaṇasuttavaṇṇanā
២៩. នវមេ ខណេ កិច្ចានិ ករោតីតិ ខណកិច្ចោ, ឱកាសំ លភិត្វាវ កិច្ចានិ ករោតីតិ អត្ថោ។ ធម្មោតិ ចតុសច្ចធម្មោ។ ឱបសមិកោតិ កិលេសូបសមាវហោ។ បរិនិព្ពាយិកោតិ កិលេសបរិនិព្ពានករោ។ ចតុមគ្គញាណសង្ខាតំ សម្ពោធិំ គច្ឆតិ សម្បាបុណាតីតិ សម្ពោធគាមី។ ទីឃាយុកំ ទេវនិកាយន្តិ ឥទំ អសញ្ញំ ទេវនិកាយំ សន្ធាយ វុត្តំ។ អវិញ្ញាតារេសូតិ អតិវិយ អវិញ្ញូសុ។
29. Navame khaṇe kiccāni karotīti khaṇakicco, okāsaṃ labhitvāva kiccāni karotīti attho. Dhammoti catusaccadhammo. Opasamikoti kilesūpasamāvaho. Parinibbāyikoti kilesaparinibbānakaro. Catumaggañāṇasaṅkhātaṃ sambodhiṃ gacchati sampāpuṇātīti sambodhagāmī. Dīghāyukaṃ devanikāyanti idaṃ asaññaṃ devanikāyaṃ sandhāya vuttaṃ. Aviññātāresūti ativiya aviññūsu.
សុប្បវេទិតេតិ សុកថិតេ។ អន្តរាយិកាតិ អន្តរាយករា។ ខណោ វេ មា ឧបច្ចគាតិ អយំ លទ្ធោ ខណោ មា អតិក្កមិ។ ឥធ ចេវ នំ វិរាធេតីតិ សចេ កោចិ បមត្តចារី ឥធ ឥមំ ខណំ លភិត្វាបិ សទ្ធម្មស្ស និយាមតំ អរិយមគ្គំ វិរាធេតិ ន សម្បាទេតិ។ អតីតត្ថោតិ ហាបិតត្ថោ។ ចិរត្តំ អនុតបិស្សតីតិ ចិររត្តំ សោចិស្សតិ។ យថា ហិ ‘‘អសុកដ្ឋានេ ភណ្ឌំ សមុប្បន្ន’’ន្តិ សុត្វា ឯកោ វាណិជោ ន គច្ឆេយ្យ, អញ្ញេ គន្ត្វា គណ្ហេយ្យុំ, តេសំ តំ អដ្ឋគុណម្បិ ទសគុណម្បិ ភវេយ្យ។ អថ ឥតរោ ‘‘មម អត្ថោ អតិក្កន្តោ’’តិ អនុតបេយ្យ, ឯវំ យោ ឥធ ខណំ លភិត្វា អប្បដិបជ្ជន្តោ សទ្ធម្មស្ស និយាមតំ វិរាធេតិ, សោ អយំ វាណិជោវ អតីតត្ថោ ចិរំ អនុតបិស្សតិ សោចិស្សតិ។ កិញ្ច ភិយ្យោ អវិជ្ជានិវុតោតិ តថា។ បច្ចវិទុន្តិ បដិវិជ្ឈិំសុ។ សំវរាតិ សីលសំវរា។ មារធេយ្យបរានុគេតិ មារធេយ្យសង្ខាតំ សំសារំ អនុគតេ។ បារង្គតាតិ និព្ពានំ គតា។ យេ បត្តា អាសវក្ខយន្តិ យេ អរហត្តំ បត្តា។ ឯវមិធ គាថាសុ វដ្ដវិវដ្ដំ កថិតំ។
Suppavediteti sukathite. Antarāyikāti antarāyakarā. Khaṇo ve mā upaccagāti ayaṃ laddho khaṇo mā atikkami. Idhaceva naṃ virādhetīti sace koci pamattacārī idha imaṃ khaṇaṃ labhitvāpi saddhammassa niyāmataṃ ariyamaggaṃ virādheti na sampādeti. Atītatthoti hāpitattho. Cirattaṃ anutapissatīti cirarattaṃ socissati. Yathā hi ‘‘asukaṭṭhāne bhaṇḍaṃ samuppanna’’nti sutvā eko vāṇijo na gaccheyya, aññe gantvā gaṇheyyuṃ, tesaṃ taṃ aṭṭhaguṇampi dasaguṇampi bhaveyya. Atha itaro ‘‘mama attho atikkanto’’ti anutapeyya, evaṃ yo idha khaṇaṃ labhitvā appaṭipajjanto saddhammassa niyāmataṃ virādheti, so ayaṃ vāṇijova atītattho ciraṃ anutapissati socissati. Kiñca bhiyyo avijjānivutoti tathā. Paccavidunti paṭivijjhiṃsu. Saṃvarāti sīlasaṃvarā. Māradheyyaparānugeti māradheyyasaṅkhātaṃ saṃsāraṃ anugate. Pāraṅgatāti nibbānaṃ gatā. Ye pattā āsavakkhayanti ye arahattaṃ pattā. Evamidha gāthāsu vaṭṭavivaṭṭaṃ kathitaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៩. អក្ខណសុត្តំ • 9. Akkhaṇasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៩. អក្ខណសុត្តវណ្ណនា • 9. Akkhaṇasuttavaṇṇanā
