| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. அக்கோஸஸுத்தங்
2. Akkosasuttaṃ
188. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அஸ்ஸோஸி கோ² அக்கோஸகபா⁴ரத்³வாஜோ ப்³ராஹ்மணோ – ‘‘பா⁴ரத்³வாஜகொ³த்தோ கிர ப்³ராஹ்மணோ ஸமணஸ்ஸ கோ³தமஸ்ஸ ஸந்திகே அகா³ரஸ்மா அனகா³ரியங் பப்³ப³ஜிதோ’’தி குபிதோ அனத்தமனோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அஸப்³பா⁴ஹி ப²ருஸாஹி வாசாஹி அக்கோஸதி பரிபா⁴ஸதி.
188. Ekaṃ samayaṃ bhagavā rājagahe viharati veḷuvane kalandakanivāpe. Assosi kho akkosakabhāradvājo brāhmaṇo – ‘‘bhāradvājagotto kira brāhmaṇo samaṇassa gotamassa santike agārasmā anagāriyaṃ pabbajito’’ti kupito anattamano yena bhagavā tenupasaṅkami; upasaṅkamitvā bhagavantaṃ asabbhāhi pharusāhi vācāhi akkosati paribhāsati.
ஏவங் வுத்தே, ப⁴க³வா அக்கோஸகபா⁴ரத்³வாஜங் ப்³ராஹ்மணங் ஏதத³வோச – ‘‘தங் கிங் மஞ்ஞஸி, ப்³ராஹ்மண, அபி நு கோ² தே ஆக³ச்ச²ந்தி மித்தாமச்சா ஞாதிஸாலோஹிதா அதிதி²யோ 1’’தி? ‘‘அப்பேகதா³ மே, போ⁴ கோ³தம, ஆக³ச்ச²ந்தி மித்தாமச்சா ஞாதிஸாலோஹிதா அதிதி²யோ’’தி. ‘‘‘தங் கிங் மஞ்ஞஸி, ப்³ராஹ்மண, அபி நு தேஸங் அனுப்பதே³ஸி கா²த³னீயங் வா போ⁴ஜனீயங் வா ஸாயனீயங் வா’’’தி? ‘‘‘அப்பேகதா³ நேஸாஹங், போ⁴ கோ³தம, அனுப்பதே³மி கா²த³னீயங் வா போ⁴ஜனீயங் வா ஸாயனீயங் வா’’’தி. ‘‘‘ஸசே கோ² பன தே, ப்³ராஹ்மண, நப்படிக்³க³ண்ஹந்தி , கஸ்ஸ தங் ஹோதீ’’’தி? ‘‘‘ஸசே தே, போ⁴ கோ³தம, நப்படிக்³க³ண்ஹந்தி, அம்ஹாகமேவ தங் ஹோதீ’’’தி. ‘‘ஏவமேவ கோ², ப்³ராஹ்மண, யங் த்வங் அம்ஹே அனக்கோஸந்தே அக்கோஸஸி, அரோஸெந்தே ரோஸேஸி, அப⁴ண்ட³ந்தே ப⁴ண்ட³ஸி, தங் தே மயங் நப்படிக்³க³ண்ஹாம. தவேவேதங், ப்³ராஹ்மண, ஹோதி; தவேவேதங், ப்³ராஹ்மண, ஹோதி’’.
Evaṃ vutte, bhagavā akkosakabhāradvājaṃ brāhmaṇaṃ etadavoca – ‘‘taṃ kiṃ maññasi, brāhmaṇa, api nu kho te āgacchanti mittāmaccā ñātisālohitā atithiyo 2’’ti? ‘‘Appekadā me, bho gotama, āgacchanti mittāmaccā ñātisālohitā atithiyo’’ti. ‘‘‘Taṃ kiṃ maññasi, brāhmaṇa, api nu tesaṃ anuppadesi khādanīyaṃ vā bhojanīyaṃ vā sāyanīyaṃ vā’’’ti? ‘‘‘Appekadā nesāhaṃ, bho gotama, anuppademi khādanīyaṃ vā bhojanīyaṃ vā sāyanīyaṃ vā’’’ti. ‘‘‘Sace kho pana te, brāhmaṇa, nappaṭiggaṇhanti , kassa taṃ hotī’’’ti? ‘‘‘Sace te, bho gotama, nappaṭiggaṇhanti, amhākameva taṃ hotī’’’ti. ‘‘Evameva kho, brāhmaṇa, yaṃ tvaṃ amhe anakkosante akkosasi, arosente rosesi, abhaṇḍante bhaṇḍasi, taṃ te mayaṃ nappaṭiggaṇhāma. Tavevetaṃ, brāhmaṇa, hoti; tavevetaṃ, brāhmaṇa, hoti’’.
‘‘யோ கோ², ப்³ராஹ்மண, அக்கோஸந்தங் பச்சக்கோஸதி, ரோஸெந்தங் படிரோஸேதி, ப⁴ண்ட³ந்தங் படிப⁴ண்ட³தி, அயங் வுச்சதி, ப்³ராஹ்மண, ஸம்பு⁴ஞ்ஜதி வீதிஹரதீதி. தே மயங் தயா நேவ ஸம்பு⁴ஞ்ஜாம ந வீதிஹராம. தவேவேதங், ப்³ராஹ்மண, ஹோதி; தவேவேதங், ப்³ராஹ்மண, ஹோதீ’’தி. ‘‘ப⁴வந்தங் கோ² கோ³தமங் ஸராஜிகா பரிஸா ஏவங் ஜானாதி – ‘அரஹங் ஸமணோ கோ³தமோ’தி. அத² ச பன ப⁴வங் கோ³தமோ குஜ்ஜ²தீ’’தி.
‘‘Yo kho, brāhmaṇa, akkosantaṃ paccakkosati, rosentaṃ paṭiroseti, bhaṇḍantaṃ paṭibhaṇḍati, ayaṃ vuccati, brāhmaṇa, sambhuñjati vītiharatīti. Te mayaṃ tayā neva sambhuñjāma na vītiharāma. Tavevetaṃ, brāhmaṇa, hoti; tavevetaṃ, brāhmaṇa, hotī’’ti. ‘‘Bhavantaṃ kho gotamaṃ sarājikā parisā evaṃ jānāti – ‘arahaṃ samaṇo gotamo’ti. Atha ca pana bhavaṃ gotamo kujjhatī’’ti.
‘‘அக்கோத⁴ஸ்ஸ குதோ கோதோ⁴, த³ந்தஸ்ஸ ஸமஜீவினோ;
‘‘Akkodhassa kuto kodho, dantassa samajīvino;
ஸம்மத³ஞ்ஞா விமுத்தஸ்ஸ, உபஸந்தஸ்ஸ தாதி³னோ.
Sammadaññā vimuttassa, upasantassa tādino.
‘‘தஸ்ஸேவ தேன பாபியோ, யோ குத்³த⁴ங் படிகுஜ்ஜ²தி;
‘‘Tasseva tena pāpiyo, yo kuddhaṃ paṭikujjhati;
குத்³த⁴ங் அப்படிகுஜ்ஜ²ந்தோ, ஸங்கா³மங் ஜேதி து³ஜ்ஜயங்.
Kuddhaṃ appaṭikujjhanto, saṅgāmaṃ jeti dujjayaṃ.
‘‘உபி⁴ன்னமத்த²ங் சரதி, அத்தனோ ச பரஸ்ஸ ச;
‘‘Ubhinnamatthaṃ carati, attano ca parassa ca;
பரங் ஸங்குபிதங் ஞத்வா, யோ ஸதோ உபஸம்மதி.
Paraṃ saṅkupitaṃ ñatvā, yo sato upasammati.
‘‘உபி⁴ன்னங் திகிச்ச²ந்தானங், அத்தனோ ச பரஸ்ஸ ச;
‘‘Ubhinnaṃ tikicchantānaṃ, attano ca parassa ca;
ஜனா மஞ்ஞந்தி பா³லோதி, யே த⁴ம்மஸ்ஸ அகோவிதா³’’தி.
Janā maññanti bāloti, ye dhammassa akovidā’’ti.
ஏவங் வுத்தே, அக்கோஸகபா⁴ரத்³வாஜோ ப்³ராஹ்மணோ ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம…பே॰… ஏஸாஹங் ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபெ⁴ய்யாஹங், ப⁴ந்தே, போ⁴தோ கோ³தமஸ்ஸ ஸந்திகே பப்³ப³ஜ்ஜங், லபெ⁴ய்யங் உபஸம்பத³’’ந்தி.
Evaṃ vutte, akkosakabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Labheyyāhaṃ, bhante, bhoto gotamassa santike pabbajjaṃ, labheyyaṃ upasampada’’nti.
அலத்த² கோ² அக்கோஸகபா⁴ரத்³வாஜோ ப்³ராஹ்மணோ ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³ங். அசிரூபஸம்பன்னோ கோ² பனாயஸ்மா அக்கோஸகபா⁴ரத்³வாஜோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங் நாபரங் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பனாயஸ்மா பா⁴ரத்³வாஜோ அரஹதங் அஹோஸீதி.
Alattha kho akkosakabhāradvājo brāhmaṇo bhagavato santike pabbajjaṃ, alattha upasampadaṃ. Acirūpasampanno kho panāyasmā akkosakabhāradvājo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyā’’ti abbhaññāsi. Aññataro ca panāyasmā bhāradvājo arahataṃ ahosīti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. அக்கோஸஸுத்தவண்ணனா • 2. Akkosasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. அக்கோஸஸுத்தவண்ணனா • 2. Akkosasuttavaṇṇanā
